-
¿Imaynatam Diosqa allpa pachata kamachimunqa?¿Imaynatam wiñaypaq kusisqa kawsakuchwan? Bibliamanta yachanapaq
-
-
Bibliapim willawanchik Diosqa kusisqa kawsakunanchikta munasqanmanta, hamuq tiempopiqa chaynam kawsakusun kay allpa pachata Dios gobiernamuptin utaq kamachimuptin. ¿Pitataq Diosqa gobiernonpi kamachimunanpaq akllarun? ¿Kamachimuchkanñachu? ¿Imatam ruwarunña? ¿Imatam hamuq tiempopi ruwanqa? Chaykunamantam kay yachachikuypi hinaspa qatiqnin iskay yachachikuykunapi yachasunchik.
1. ¿Pitataq Diosqa gobiernonpi kamachimunanpaq akllarun?
Jehova Diosqa gobiernonpi kamachimunanpaqmi Jesusta akllarun. Payqa hanaq pachamantam kamachimuwasun (Mateo 4:17; Juan 18:36). Jesusmantam bibliapi nin: ‘Wiñaypaqmi kamachinqa’, nispa (Lucas 1:32, 33). Jesusqa Diospa akllasqan kasqanraykum enteron allpa pachata kamachimunqa.
2. ¿Sapallanchu Jesusqa kamachimunqa?
Jesusqa kay pachamanta akllasqa runakunapiwanmi hanaq pachamanta kamachimunqa. Paykunaqa kanku ‘llapallan ayllukunamantam, tukuy rikchaq rimaykunamantam, lliw llaqtakunamantam hinaspa lliw nacionkunamantam’ (Apocalipsis 5:9, 10). Hinaptinqa ¿haykataq paykunaqa kanku? Jesuswan kuska kamachimuqkunaqa 144.000 runakunallam kanku, paykunallam hanaq pachamanqa rinku (leey Apocalipsis 14:1-4). Diosman sunqu achkallay-achka runakunañataqmi kay allpa pachapi kawsakusunchik (Salmos 37:29).
3. ¿Imanasqataq runamantaqa Jesusqa aswan allin kamachiq kanqa?
Wakin autoridadkunaqa allin sunquyuq kaspankupas manam llapallanchikta yanapaytaqa atinkuchu. Wakinkuqa astawanmi mana allinkunata ruwanku, chaymantapas runakunaqa iskay-kimsa watallam kamachinku. Diospa gobiernonpi kamachiq Jesustam ichaqa mana pi runapas hurqunqachu. Diospa gobiernonqa “wiña-wiñaypaqmi” takyanqa (Daniel 2:44). Jesus kamachimuspanqa manam pimanpas sayapakunqachu. Payqa ancha llakipayakuqmi, kuyapayakuqmi. Chayna kananchikpaqmi ñuqanchiktapas yanapawasun (leey Isaias 11:9).
ASTAWAN YACHAYKUSUN
Diospa gobiernonmi aswan allinqa runakunapa gobiernonmantaqa. Chaymanta astawan yachaykusunchik.
4. Jesusqa enteron allpa pachatam kamachimunqa
Jesusqa manam runakuna hinachu, payqa atiyniyuqmi chaymi pimantapas aswan allinta gobiernawasun. Leeychik Mateo 28:18 hinaspa qatiqninmanta rimariychik:
¿Imanasqataq runamantaqa Jesusqa aswan allin kamachiq kanqa?
Runakunaqa huk llaqtallatam utaq huk nacionllatam kamachinku hinaspapas iskay-kimsa watallam kamachinku. Diospa gobiernonmi ichaqa enteron allpa pachata wiñaypaq kamachinqa. Leeychik Daniel 7:14 hinaspa qatiqninmanta rimariychik:
Diospa gobiernonqa wiñaypaqmi takyanqa, ¿imanasqataq chayqa ancha allin?
¿Imanasqataq ancha allin enteron allpa pachata kamachimuyninqa?
5. Diospa gobiernonña kamachimuwananchiktam munanchik
¿Imanasqataq Diospa gobiernonña kamachimuwananchikta munanchik? VIDEOTA qawaykuychik hinaspa qatiqninmanta rimariychik:
¿Ima sasachakuykunam kachkan runakuna kamachisqanrayku?
Leeychik Eclesiastes 8:9 hinaspa qatiqninmanta rimariychik:
¿Imanasqataq munanchik Diospa gobiernonña kamachimuwananchikta?
6. Jesuswan kamachimuqkunaqa yachankum imayna kasqanchikta
Jesusqa kay allpa pachaman hamuspanmi ñuqanchik hina kawsakurqa chaymi yachan imakunawan ñakarisqanchikta (Hebreos 4:15). Jesuswan kamachimunankupaq 144.000 akllasqa runakunapas “llapallan ayllukunamanta, tukuy rikchaq rimaykunamanta, lliw llaqtakunamanta hinaspa lliw nacionkunamanta” akllasqam kanku (Apocalipsis 5:9).
¿Imanasqataq munawaq Jesuswan yanapaqninkuna kamachimuwananchikta?
Diosmi Jesuswan kamachimunankupaq akllarun qarikunata warmikunata, tukuy rikchaq llaqtakunamanta.
7. Runapa kamachikuyninkunamantaqa Diospa kamachikuyninkunam aswan allinqa
Imaynam autoridadkunapas runankuna allinlla kanankuta munaspanku kamachikuykunata utaq leykunata churanku, chaynallataqmi Diosninchikpas kamachikuykunata quwanchik. Leeychik 1 Corintios 6:9-11 hinaspa qatiqninmanta rimariychik:
¿Imaynataq kawsakusunchik llapallan runakuna Diosta kasukuptinkuqa?a
¿Imanasqataq Jehova Diosqa munan kamachikuyninkuna kasukunanchikta? ¿Imanasqataq chaynata ninki?
¿Huchallikuq runakunapas atinmankuchu Dios kasukuyta? (Kaqmanta leeykuychik 11 versiculota).
Autoridadkunaqa runankuna allinlla kanankuta munaspankum kamachikuykunata churanku. Diosninchikpas allinlla kawsakunanchikta munaspanmi kamachikuykunata quwanchik.
WAKIN RUNAKUNAM NINKU: “Llapallanchikmi cieloman ripukusunchik Jesuswan kuska kanapaq”, nispanku.
Chaynata niptinku, ¿ima textotataq leeykapuwaq 144.000 akllasqa runakunalla Jesuswan kamachimunankumanta yachaykachinaykipaq?
YUYARIYKUSUN
Jehova Diosqa gobiernonpi kamachimunanpaqmi Jesusta akllarun. Jesusqa hanaq pachamantam enteron allpa pachata kamachimunqa.
¿Ima niwaqtaq?
¿Hanaq pachamanta kamachimunankupaq akllasqakunaqa huk llaqtallamantachu kanku?
¿Imanasqataq Diospa gobiernon aswan allin runakunapa gobiernonmantaqa?
Jesusña kay allpa pachata kamachimuptin chaypi kawsakuyta munaspaqa, ¿ima mana allin ruwaykunatam saqinanchik?
ASTAWAN YACHANAYKIPAQ
¿Maymantataq Diospa akllasqanqa kamachimunqa? Chaymanta kaypi leeykuy.
“¿Es el Reino de Dios algo que se lleva en el corazón?” (Tarinkim jw.org nisqanpi)
Diosta mana kasukunapaq autoridadkuna niptinkuqa paykunata kasukunamantaqa Diostam kasukunanchik. Chayta qawaykuy.
Yachaykuy hanaq pachamanta kamachimunankupaq 144.000 akllasqa runakunamanta.
“¿Pikunallataq hanaq pachamanqa rinku?” (Tarinkim jw.org nisqanpi)
Carcelpi kaq warmicham yacharurqa Jehova Diosqa lliw runata chaynallata kuyawasqanchikta.
“Kay allpa pacha Diospa makinpiña kaptinmi allinqa kawsakusunchik” (¡Rikchariy!, noviembre 2011)
a Chaymantam hina kay libropi astawan yachasunchik 34 yachachikuymanta 47 yachachikuykama.
-
-
¿Imaynañam kawsakusunchik Jesus kamachimuptinqa?¿Imaynatam wiñaypaq kusisqa kawsakuchwan? Bibliamanta yachanapaq
-
-
Hanaq pachapiqa Jesusmi kamachichkanña. Manapas unaymantam kay allpa pachatapas kamachimunqaña. Pay kamachimuptinqa, ¿imaynañataq kawsakusun? Chaymantam kay yachachikuypi yachasunchik.
1. ¿Imatam Jesusqa ruwanqa hawkaña kawsakunapaq?
Diospa piñakuynin punchawpim Jesusqa mana allin ruwaq runakunata hinaspa kamachiqkunata chinkachinqa (Apocalipsis 16:14, 16). Arí, “ñam chayaykamuchkanña mana allin ruwaqkunapa chinkachisqa kayninkuqa” (Salmos 37:10). Jesus kamachimuptinqa mana chiqninakuspam hawkaña kawsakusunchik (leey Isaias 11:4).
2. ¿Imaynañam kawsakusunchik Jesus kamachimuptinqa?
Jesus kamachimuptinqa, “allin ruwaq runakunam allpataqa chaskinqaku. Hinaspankum chaypi wiña-wiñaypaq kawsakunqaku” (Salmos 37:29). Mayna sumaqchá kanqa llapallan runakuna allin kaqta ruwaptinkuqa, Diosta kuyaspanku runamasinkunatapas kuyaptinkuqa. Chaypiqa manañam pipas unqusunchu nitaq wañusunchu.
3. ¿Imaynaña kanapaqtaq Jesusqa runakunata yanapawasunchik?
Mana allin runakunata chinkarachispanmi Jesusqa 1.000 wata kamachimunqa. Jesusmi 144.000 yanapaqninkunawan runakunata yanapawasun mana pantaqña kananchikpaq. 1.000 wata pasaruptinqa enteron allpa pacham suma-sumaqña kanqa, runakunapas Diosta kasukusqanchikraykum kusisqaña kawsakusunchik. Diospa sutinqa manañamá pinqaypiñachu kanqa (Mateo 6:9, 10). 1.000 wata tukuruptinqa kikin Jehova Diosñam kamachimuwasunchik, hinaptinmi Dioslla allin kamachiq kasqanta yachasunchik. Chaymantam Diosqa satanastawan demonionkunata chaynataq mana kasukuqkunata qalaypaq chinkachinqa (Apocalipsis 20:7-10). Chaymanta qipamanqa Diosta kasukuqkunam kusisqa wiña-wiñaypaq kawsakusunchik.
ASTAWAN YACHAYKUSUN
Jehova Diosqa tukuy nisqankunataqa cumplinqapunim Jesus kamachimuptin. ¿Imanasqataq chaynapuni kananmanta ninchik? Chaymantam kaypi yachaykusunchik.
4. Manañam runakunachu kamachiwasun
‘Runaqa runamasinta munaychakuspam ñakarichin’ (Eclesiastes 8:9). Jehova Diosmi Jesusta kamachinqa ñakarichiwaqninchikkunata tukuchinanpaq.
Leeychik Daniel 2:44 hinaspa 2 Tesalonicenses 1:6-8, chaymantañataq qatiqninmanta rimariychik:
Kamachiq kananpaq taytan churaykusqanrayku, ¿imananqam Jesusqa kamachiqkunata hinaspa chay kamachiqkunaman sayapakuqkunatapas?
Jehova Dioswan Jesusqa kuyakuqmi kanku. Chaynaqa runakunata juzgaspankuqa, ¿allintachu hinaspa mana sayapakuspachu tantianqaku?
5. Jesusqa allintam kamachimuwasun
Jesus kamachimuspanqa yanapawananchikpaqmi tukuyta ruwanqa. VIDEOTA qawaykuychik, runakunata kuyasqanrayku Jesus imakunata ruwasqanmanta yachaykunaykichikpaq.
Jesus kay allpa pachapi kaspan tukuy ima ruwasqanmi yachachiwanchik hamuq tiempopi imakuna ruwananmanta. Qatiqninpim willawasunchik Jesus kamachimuptinqa imaynaña kawsakunanchikmanta. Qamqa, ¿imayna kawsakuytañam munawaq? Llapallan textokunata bibliapi maskaykuspa leeykuychik.
JESUS KAY PACHAPI KASPANMI...
JESUS KAMACHIMUPTINQA...
... nisyu-nisyu wayrata hawkayachirqa (Marcos 4:36-41).
... enteron allpa pacham suma-sumaq kanqa (Isaias 35:1, 2).
... achkallay-achka runakunaman mikuchirqa (Mateo 14:17-21).
... manañam pipas yarqaymantaqa kanqañachu (Salmos 72:16).
... achka runakunata sanoyachirqa (Lucas 18:35-43).
... manañam pipas unqunqañachu (Isaias 33:24).
... wañusqakunata kawsarichirqa (Lucas 8:49-55).
... manañam pipas wañunqañachu (Apocalipsis 21:3, 4).
6. Jesus kamachimuptinqa allinñam kawsakusun
Jesus kamachimuptinqa kay allpa pacham suma-sumaq kanqa, chaypim runakunaqa kusisqa kawsakusunchik qallariypi Diospa munasqanman hina. VIDEOTA qawaykuychik Jesus wañukusqanrayku Jehova Dios imakuna ruwananmanta yachaykunaykichikpaq.
Leeychik Salmos 145:16 hinaspa qatiqninmanta rimariychik:
Jehova Diosmi llapallanchikman munasqanchikta quwasunchik. Chayta yachaspayki, ¿imaynam tarikunki?
WAKIN RUNAKUNAM NINKU: “Llapallanchik huk sunqulla kaspaqa imatapas ruwachwanmi”, nispanku.
¿Ima sasachakuykunatataq runakunaqa allichayta mana atinkuchu? ¿Jesusqa atinqachu?
YUYARIYKUSUN
Jesus kamachimuptinqa llapallanchikmi kay allpa pacha suma-sumaq kaptin Diosta yupaychaspa qallariypi munasqanman hina kusisqa kawsakusunchik.
¿Ima niwaqtaq?
¿Imakunatam Jesusqa ruwanqa Diosninchik manaña pinqaypi kananpaq?
¿Imanasqataq mana iskayrayanchikchu Jehova Diosqa nisqankunata cumplinanmanta?
¿Jesus imakuna ruwanantataq munanki?
ASTAWAN YACHANAYKIPAQ
¿Imaynataq Diospa piñakuynin punchawqa kanqa? Chaymanta kaypi leeykuy.
Jesusmi nirqa ‘llumpa-llumpay ñakariy punchawkuna’ kananmanta, ¿imam chay tiempopi pasanqa? (Mateo 24:21). Chaymanta kaypi leeykuy.
Jesus kamachimuptin imayna kawsakunanchikpim piensananchik. Chaypaq videota qawaykuy.
Raudel Rodriguezmi llaqtanpi sasachakuykunallaña kasqanta qawaspan autoridadkunapa contranpi karqa. Paytaqa bibliamanta yachasqanmi kusisqaña kawsakunanpaq yanaparqa. Paymanta kaypi leeykuy.
“Bibliam imayna kawsasqanta cambiarqa” (Tarinkim jw.org nisqanpi)
-