¿Tantiakurunkiñachu bautizakunaykipaq?

 1. ¿Imatam puntata ruwanchik wasita ruwananchikpaq?

WASI ruwayta munaspanchikqa, ¿chayllachu rinchik wasi ruwanapaq tukuy ima rantiq? Manamiki. Aswanqa puntatam allinta tantianchik hayka qullqiwan chay wasi ruwananchikpaq. Mana chayqa munasqanchik wasi ruway qispichiytaqa manam atisunchu.

 2. Lucas 14:27-30 nisqanman hinaqa, ¿imatam manaraq bautizakuqkunaqa ruwananku?

² Yaqapaschá qamqa Diosta kuyasqaykirayku hinaspa qampaq tukuy ima ruwasqanmanta riqsikusqaykirayku bautizakuytaña munachkanki. Chayqa ancha allinmi. Ichaqa bautizakuytaqa manam pukllayta hinallachu qawanayki. Jesusmi bautizakuyta hinaspa paypa qatiqninña kayta tupachirqa wasi ruwaywan (qaway Lucas 14:27-30). Jesuspa nisqanman hinam pipas wasinta ruwananpaqqa allinta tantian. Chaynam qampas bautizakunaykipaqqa allinta tantiakunayki. Chaynapim bautizakusqayki qipamanqa imaña-haykaña kaptinpas Jehova Diosmantaqa mana karunchakunkichu (Luc. 9:23-26; 12:51-53).

 3. ¿Imamantam kunan yachasunchik?

³ Chaynaqa, amayá iskayrayaychu bautizakunaykipaqqa. Bautizakuptikiqa Jehova Diosmi kunan hinaspa hamuq punchawkunapi kusisqa kawsakunaykipaq yanapasunki. Chayraykum kunan yachasunchik bautizakuy ima ninan kasqanmanta. Kaymanta yachaynikim yanapasunki bautizakunaykipaq hinaña kasqaykita utaq manaraq bautizakunaykipaq hina kasqaykita yachanaykipaq.

 4. (1) Bautizakuy munaqkunaqa, ¿imatam Jehova Diosta ninanku? (2) Mateo 16:24 nisqanman hinaqa, ¿ima ninantaq Diosllapaqña kawsakuyqa?

⁴ Bautizakunaykipaqqa puntatam sapaykipi Jehova Diosta sunqumanta mañakunayki. Hinaspam ninayki payllapaqña kawsakunaykipaq tantiakurusqaykimanta. Mañakuspaykiqa ninaykitaqmi manaña kikikipa munasqaykiman hina kawsanaykipaqpas, aswanmi paypa munasqanman hinaña (qaway Mateo 16:24). Arí, Jehova Diosta chayna nisqaykimantapacham payllapaqña kawsakunki (Rom. 14:8). Chaymantapas paypa munaynintam imamantapas puntapi churanayki. Ichaqa Jehova Diosqa manam pitapas hikutanchu payllapaqña kawsakunanpaq tantiakunankutaqa (Sal. 116:12, 14).

 5. ¿Bautizakuyqa chaynallachu Jehova Diosllapaqña kawsakunapaq mañakuywan?

⁵ “Jehova Dioslláy, kunanmantapacham qamllapaqña kawsakullasaq” nispa mañakusqaykitaqa Jehova Dioswan qamllam yachanki. Bautizakusqaykita utaq yakupi challpukusqaykitam ichaqa achka runakuna qawanqaku hatun huñunakuypi kasqanrayku. Chay hatun huñunakuyman riqkunaqa bautizakusqaykita qawaspankum yachanqaku Diosllapaqña kawsakunaykipaq tantiakurusqaykimanta.b Yachanqakutaqmi taytanchik Jehova Diosta tukuy sunqumanta kuyasqaykirayku bautizakusqaykimantapas (Mar. 12:30).

6, 7. 1 Pedro 3:18-22 nisqanman hinaqa, ¿imanasqataq bautizakunchik?

⁶ Yaqapaschá sunquykipi tapukurqanki: ¿Bautizakunayraqchu Diosta yupaychanaypaq?, nispa. Chaymanta allinta yachanaykipaqqa yuyaymanawaqmi 1 Pedro 3:18-22 nisqanpi (qaway). Imaynam ñawpaq tiempopi Diosta yupaychaq Noeypas Jehova Diosta kuyasqanrayku hatun buqueta ruwarqa, chaynam qampas Diosta kuyasqaykirayku bautizakunayki. Chaymantapas apostol Pedropa nisqanman hinam puntata bautizakunayki ‘salvasqa kanaykipaq’. Arí, bautizakusqaykiwanmi qawachichkanki Jesuspi iñisqaykita chaynataq Jesus ñuqanchikrayku wañusqanmanta mana iskayrayasqaykitapas. Manataqmi iskayrayankichu Jesus kawsariramuspan hanaq pachaman kutikuspan Dioswan kuska kasqanmantapas.

⁷ Chaymantapas bautizakunaykiqa allin concienciayuq kanaykipaqmi utaq Dioswan kuyachikunaykipaqmi. Arí, Diosllapaqña kawsakunaykipaq mañakusqaykimanta hinaspa bautizakusqaykimantapacham kuyasqan runanña kanki. Sunqumanta wanakusqaykiraykum huchaykimantapas pampachasqaña kanki. Chaymi Jehova Diospa qayllanpiqa mana huchayuq hinaña kanki.

 8. ¿Imanasqam pipas bautizakunan?

⁸ Bibliata sumaqta ñawinchasqaykiraykum yacharqanki taytanchik Jehova Diosqa llakipayakuq chaynataq kuyapayakuq kasqanmanta. Chaymi Diosninchiktaqa kuyayta qallaykurqanki. Kuyasqaykiraykutaqmi bautizakuytapas munanki. Arí, Jehova Diosta sunqumanta kuyasqanraykum pipas bautizakunanqa.

 9. Mateo 28:19, 20 nisqanman hinaqa, ¿ima ninantaq hanaq pacha taytapa, churinpa hinaspa chuya espiritupa sutinpi bautizakuy?

⁹ Diosmanta imam kaqta yachasqaykipas yanapasunkim bautizakuyta tantiakunaykipaq. Jesuspas nirqam pipas bautizakuyta munaspanqa bautizakunan “hanaq pacha taytapa, churinpa hinaspa chuya espiritupa sutinpim” nispam (qaway Mateo 28:19, 20). Kaywanmi Jesusqa niyta munachkarqa pipas bautizakuyta munaspanqa puntata imam kaqta yachanan Jehova Diosmantawan Jesusmanta. Yachanantaqmi Jehova Dios chuya espiritunwan utaq atiyninwan imayna yanapawasqanchikmantapas. Arí, bibliapi Jehova Diosmanta imam kaqta yachasqaykiqa yanapasunkim bautizakuspa Jehova Diosllapaqña kawsakunaykipaq (Heb. 4:12).

10, 11. Bautizakuy munaqkunaqa, ¿imakunatañam Diosmanta yacharunku?

¹⁰ Chaynaqa, ¿imakunatañam Diosmanta yacharunki? Yacharunkiñachá Diospa sutin Jehova kasqanmanta hinaspa tukuy atiyniyuq chaynataq unanchawaqninchik kasqanmantapas (Rom. 10:13; Is. 37:16). Chaymantapas yacharunkiñachá Jehova Dioslla waqaychawaqninchik kasqanmantapas (Sal. 3:8; 36:9). Yacharunkiñataqchá Jehova Dios kuyawasqanchikrayku churin Jesusta kay pachaman ñuqanchikrayku wañunanpaq kachamusqanmanta, chaynapi hamuq punchawkunapipas wiñaypaq kusisqa kawsakunapaq (Juan 17:3). Chaymi bautizakuptikiqa runakunapas yachanqaku Jehova Diospa testigonña kasqaykita (Is. 43:10-12). Chaymantapas Jehova Diospa runankunawan kuskam Diosninchikta yupaychanki, paykunawan kuskataqmi runamasinchikkunamanpas Diosmanta willakunki (Sal. 86:12).

¹¹ Mayna kusisqachá tarikunki Jehova Diosmanta imam kaqta yacharusqaykiwanqa. Chaychá Diosllapaqña kawsakunaykipaq bautizakuytaña munachkanki, ¿aw?

12, 13. Bautizakuy munaqkunaqa, ¿imakunatañam Jesusmanta yacharunku?

¹² ¿Imakunatañam Jesusmanta yacharunki? Yacharunkiñachá Jesusqa librawaqninchik kasqanmanta. Payqariki huchanchikraykum wañurqa. Chaymi sunqumanta wanakuspanchikqa huchanchikmanta pampachasqa kayta atinchik. Jesus wañukusqanraykutaqmi Dioswan kuyachikuytapas atinchik, hamuq punchawpipas wiñaypaqtaqmi kusisqa kawsakusun (Juan 3:16). Chaymantapas yacharunkiñachá Jesusqa ‘sacerdotekunapa jefen kasqanmanta’ utaq Diosta yupaychaypi yanapawaqninchik kasqanmanta. Arí, paynintakamallam Diosman asuykuytapas atinchik (Heb. 4:15; 7:24, 25). Yacharunkiñataqchá Jesusta kamachiwaqninchik kananpaq Jehova Dios akllarusqanmantapas. Chaymi Jesusqa Diosninchikpa sutinta chuyanchanqa, tukuy mana allinkunatapas chinkachinqam, hinaspapas kusisqa kawsakunanchikpaqmi hamuq punchawpi kay allpa pachanchikta huertayachinqa (Mat. 6:9, 10; Apoc. 11:15). Hinaspapas yacharunkitaqchá Jesusqa qatipakunapaq hina kasqanmanta (1 Ped. 2:21). Payqariki taytanpa munaynintam imamantapas puntapi churarqa. Chaymi ñuqanchikpas qatipakunanchik (Juan 4:34).

¹³ Bibliapi Jesusmanta imam kaqta yachaynikiqa yanapasunkim payta kuyanaykipaq. Yanapasunkitaqmi Jesus hina Jehova Diospa munayninta imamantapas puntapi churanaykipaq. Hinaspam munanki Diosllapaqña kawsakunaykipaq bautizakuyta.

14, 15. ¿Imaynatam Jehova Diosqa atiyninwan yanapawanchik, hinaspa imaynam tarikunku bautizakuy munaqkunapas chayta yachaspanku?

¹⁴ Yacharunkitaqchá Jehova Dios chuya espiritunwan utaq atiyninwan tukuy imapi yanapawasqanchikmantapas. Jehova Diosqa ñawpaq tiempopim runankunata atiyninwan yanaparqa palabranta qillqanankupaq. Kunanpas atiyninwantaqmi yanapawanchik palabranmanta allinta yachananchikpaq hinaspa yachasqanchikman hina kawsakunanchikpaq (Juan 14:26; 2 Ped. 1:21). Arí, bibliapa nisqanman hinam Jehova Diosqa ‘hatu-hatun atiyninwan’ yanapawanchik (2 Cor. 4:7). Jehova Diosqa atiyninwantaqmi yanapawanchik runakunaman mana manchakuspa paymanta willakunanchikpaq. Yanapawanchiktaqmi mana allinkunaman mana wichiykunapaq hinaspa imaña-haykaña kaptinpas mana llumpayta hukmanyarunapaq. Allin runa kananchikpaqpas Jehova Diosqa atiyninwanmi yanapawanchik (Gal. 5:22). Chaynaqa Jehova Diostayá sunqumanta mañakusun atiyninwan tukuy imapi yanapawananchikpaq (Luc. 11:13).

¹⁵ Kusisqam tarikunchik Jehova Dios atiyninwan imaña-haykaña kaptinpas yanapawananchikmanta yachaspanchik. Chayna kusisqataqchá tarikunku bautizakuy munaqkunapas. Chaychá munachkanku Diosllapaqña kawsakunankupaq bautizakuyta.

16. Kunankamaqa, ¿imakunamantam yacharamunchik?

¹⁶ Diosllapaqña kawsakunaykipaq chaynataq bautizakunaykipaq tantiakusqaykiqa ancha allinmi. Ichaqa kaypi yachamusqanchikman hinapas bautizakuyqa manam pukllay hinallachu. Kaypi yachamusqanchikman hinataqmi bautizakuspaykiqa salvasqa kanki hinaspapas Jehova Dioswan kuyachikuytam atinki. Ichaqa manam chayraykullachu bautizakunaykiqa, aswanqa tukuy sunqumanta Jehova Diosta kuyasqaykiraykum. Chaypaqqa puntatam imam kaqta yachanayki Jehova Diosmanta, Jesusmanta hinaspa Jehova Dios atiyninwan imayna yanapawasqanchikmanta. Chaynaqa, ¿bautizakuytañachu munachkankichik?

17. ¿Imakunatam manaraq bautizakuqkunaqa ruwachkanku bautizakuyta munasqankurayku?

¹⁷ Manaraq bautizakuqkuna, kunanqa bautizakuytañachá munachkankichik, ¿aw?c Arí, Diosta kuyasqaykichikraykum kallpanchakurqankichik bibliapi Jehova Diosmantawan Jesusmanta imam kaqta yachanaykichikpaq. Paykunamanta tukuy ima yachasqaykichikqa yanapasurqankichikchá astawan Diosman asuykunaykichikpaq (Heb. 11:6). Jehova Dios hamuq punchawkunapi tukuy ima ruwananmantapas manataqchá iskayrayankichikchu. Kusisqataqchá tarikunkichik Jesus ñuqanchikrayku wañukusqanmanta yachaspaykichikpas. Chayraykuchá tukuy ima huchaykichikmanta wanakuruspaykichik hinaspa punta vidaykichikta saqiruspaykichik Jehova Diospa munasqanman hinaña kawsakuchkankichik (Hech. 3:19). Runamasinchikkunamanpas Jehova Diosmanta tukuy ima yachasqaykichiktachá kusisqa willakuchkankichik. Willakunaykichikpaqqa kallpanchakuchkankichiktaqchá maypiña tarikuspaykichikpas Diosmanta willakunaykichikpaq chaynataq iñiqmasinchikkunawan kuska willakunaykichikpaqpas (Mat. 24:14). Jehova Diosqa mayna-mayna kusisqachá tarikun payrayku tukuy ima ruwasqaykichikta qawamuspanqa (Prov. 27:11).

18. ¿Imakunataraqmi bautizakuy munaqkunaqa ruwananku?

¹⁸ Manaraq bautizakuqkuna, kaykunatawanraqmi ruwanaykichik bautizakunaykichikpaqqa. Kaypi yachamusqanchikman hinam puntataqa sapaykipi Jehova Diosta sunqumanta mañakunayki payllapaqña kawsakunaykipaq (1 Ped. 4:2). Chaymantañataqmi punta apaqmasinkunata yanapaqman ninayki bautizakuy munasqaykimanta. Payñataqmi wakin punta apaqmasinkunata ninqa yachasqaykimanta rimanaykichikpaq. Paykunaqa tapusunkitaqmi Jehova Diosllapaqña kawsakunaykipaq tantiakusqaykimanta chaynataq imanasqa bautizakuy munasqaykimanta. Ichaqa amayá manchakuychu, paykunaqa kuyakuywanmi yanapasunki. Chaymantam paykunaqa huñunakuspanku tantianqaku bautizakunaykipaq hinaña kasqaykita utaq tumpachata suyaykunaykipaqpas. Bautizakunaykipaqña kaptikim ichaqa nisunki hamuq hatun huñunakuypi bautizakunaykipaq.

19, 20. Bautizakuqkunaqa, ¿imatam hinalla ruwananku, hinaspa imam chaypaqqa yanapanqa?

¹⁹ Bautizakuruspaykipas hinallam “Jehova Diosllay, kunanmantapacham qamllapaqña kawsakullasaq” nisqaykiman hina kawsakunaykipaq kallpanchakunayki.d Chaypaqqa, ¿imam yanapasunki?

²⁰ Imaña-haykaña kaptinpas amayá iñiqmasinchikkunamantaqa karunchakuychu. Bautizakusqaykimantapachamriki paykunawanqa huk ayllu hinaña kanki (1 Ped. 2:17). Paykunaqa manam haykaqpas saqisunkichu. Chaymi sapa huñunakuyninchikman riytaqa ama saqinaykichu. Sapa punchawtaqmi bibliaykitapas ñawinchaspayki yuyaymananayki. Jesuspa nisqanman hinataqmi tuta-punchaw mañakunayki. Chayqa Diosta astawan kuyanaykipaqmi yanapasunki (Sal. 1:1, 2; Mat. 26:41). Imapas munasqaykita puntata ruwanaykimantaqa hinallam ‘Diospa munayninta’ puntata ruwanaykipaq kallpanchakunayki (Mat. 6:33). Chayqa sutillam kanqa maypipas-chaypipas kaspayki pimanñapas Diosmanta willakuptiki. Chay ruwaynikiqa yanapasunkim Diosman sunqu kanaykipaq, hukkunatapas yanapankitaqmi hamuq punchawpi wiñaypaq kawsakunankupaq (1 Tim. 4:16).

21. ¿Imaynatam Jehova Diosqa bautizakuqkunata yanapanqa?

²¹ Diosllapaqña kawsakunaykipaq chaynataq bautizakunaykipaq tantiakuynikiqa ancha allinmi. Ichaqa sasachakuykunam kanqa. Chaywanqa amayá hukmanyaychu, sasachakuykunawan ñakariykunaqa tukurunqañam (2 Cor. 4:17). Jehova Diosmi ichaqa bautizakusqaykirayku kusisqa kawsakunaykipaq yanapasunki. Yanapasunkitaqmi hamuq punchawpi kay allpa pachapi kusisqa wiñaypaq kawsakunaykipaqpas (1 Tim. 6:19). Chaynaqa, sunqumantayá Jehova Diosta mañakuy allinta tantiakuspa bautizakunaykipaq.