Ama llumpaytaqa llakikuychu

BIBLIAPA YACHACHISQAN: “Amayá afanakuychikchu” (Mateo 6:25).

¿Ima ninantaq? Jesusmi chayta rimarqa ancha riqsisqa yachachikuyninpi. Bibliamanta rimaq huk diccionariopa nisqanman hinaqa ‘afanakuy’ ninanqa “wakchayaypi tarikunanmanta, ima mikunanmanta hinaspa huk sasachakuypi tarikunanmanta runapa llakikuyninmi”. Wakinpiqa llumpaytam hukmanyanchik hamuq punchawkunamanta piensaspa. Ichaqa lliwmi imapas pisipuwaqninchikkunamantawan wakiqninchik allinlla kanankumanta llakikunchik (Filipenses 2:20, CQ12). “Amayá afanakuychikchu” nispanqa ama llumpayta llakikunamantam Jesusqa nichkarqa, mana chayqa manam allinchu kawsakuchwan hamuq punchawmanta llumpayta manchakuspanchikqa (Mateo 6:31, 34).

¿Allinninchikpaqchu kanman? Jesuspa nisqanqa allinpunim. Yachayniyuq runakunam ninku, huk runa llumpayta llakikuptinqa cuerpon imatapas chaylla ruwananpaq listolla kasqanmanta. Nirqakutaqmi chayna kasqankurayku wiksa nanaywan, qasqu nanaywan hinaspa asma unquywan unqusqankumanta.

Jesusmi nirqa afanakuyqa utaq llumpayta llakikuyqa yanqapaq kasqanta. Nirqam: “¿Mayqannikichiktaq afanakuspapas huk kuchusta wiñaruwaqchik?”, nispa (Mateo 6:27). Manam llumpayta imamantapas llakikusqanchikraykuchu aswan allinqa utaq astawanqa kawsakusun. Wakinpiqa manataqmi imapas piensasqanchikman hinachu pasakun. Yachayniyuq runapa nisqanman hinam ‘hamuq punchawmanta llumpay llakikuyqa yanqapaqmi, [...] wakillanpim piensasqanchikman hinaqa pasakun’.

¿Imatam ruwachwan mana llumpayta llakikunapaq? Puntataqa Diospi tukuy sunquykiwan hapipakuy. Urpikunaman Dios mikuchichkaspanqa hinaspa waytakunata sumaqta pachachichkaspanqa, ¿manachum Diosqa yupaychaqninkunata waqaychanqa? (Mateo 6:25, 26, 28-30). Chaymantapas, sapa punchaw allinta kawsakuy. Jesusmi nirqa: ‘Amayá afanakuychikchu hamuq punchawmantaqa. Qipa punchawkunaqa achka afanakuykunatam apamunqa’, nispa (Mateo 6:34).

Jesuspa nisqanta kasukuspaqa, manam llumpaytaqa unqusunchu aswanqa hawkam kawsakusunchik (Filipenses 4:6, 7).