¿Pikunataq Diosmanta llapallan nacionpi willakuchkanku?

Jehova Diospa gobiernonmi runakunapa sasachakuyninta pisi tiempollamantaña chinkachinqa. ¡Mayna kusikuypaqmi chayqa! Chaymi kay sumaq willakuymanta willakunanchik. Jesuspas chaymanta willakunankupaqmi qatiqninkunata kamachirqa (Mateo 28:19, 20). ¿Imatam Jehova Diospa testigonkunapas ruwachkanku Jesuspa kamachisqanta kasukuspanku?

1. ¿Imaynatam Mateo 24:14 nisqan cumplikuchkan kay tiemponchikpi?

Jesusmi nirqa: “Diospa gobiernonmanta kay sumaq willakuymi willakusqa kanqa enterollan kay pachapi”, nispa (Mateo 24:14). Jehova Diospa testigonkunaqa anchatam munaniku Diospa gobiernonña kamachinanmanta runakunaman willakuyta. Chaymi llapallan nacionkunapi willakuchkaniku yaqa 1.000 masnin rimaykunapi. Chayna willakuytaqa manam atiymankuchu Jehova Dios mana yanapawaptinkuqa.

2. ¿Imaynatam Diosmanta runakunaman willakunaykupaq kallpanchakuniku?

Willakunikuqa haykam tarisqayku runakunamanmi. Chaypaqqa ñawpaqpi Jesuspa qatiqninkuna hinam “wasin-wasin” willakuniku (Hechos 5:42). Chaynatam sapa wata achkallaña runakunaman Diosmanta willakuniku. Wasinkupi mana tarispaykupas achka runakunapa kasqanmanmi riniku willakunaykupaq. Kallpanchakunikum maypipas hinaspa imay horapas Jehova Dios kamachimunanmanta willakunaykupaq.

3. ¿Pikunam Diosmanta willakunankupaq kamachisqa kachkanku?

Diospa llapallan serviqninkunam willakunanku. Chaymi testigokunaqa Diosta tukuy sunquykuwan kasukuspayku anchata kallpanchakuniku runakunaman willakunaykupaq, chaynapi paykunapas salvakunankupaq (leey 1 Timoteo 4:16). Willakusqaykumantaqa manam pipas pagawankuchu, bibliapim nin: “Mana imallapaqmi chaskirqankichik, mana imallapaqtaqyá quychikpas”, nispa (Mateo 10:7, 8). Wakin runakuna mana uyariwaptinkupas hinallam willakuniku Jehova Diosta hatunchaspa kusichinaykupaq.

ASTAWAN YACHAYKUSUN

4. Kallpanchakunikum lliw runakunaman Diosmanta willakunaykupaq

VIDEO: Diosmantam willakuchkanchik “kay pachapa cantonkama” (7:38)

• ¿Ima ninkitaq Diosmanta willakunaykupaq kallpanchakusqaykumanta?

Leeychik Mateo 22:39 hinaspa Romanos 10:13-15, chaymantañataq qatiqninmanta rimariychik:

• Jehova Diospa testigonkunataqa ¿imataq kallpanchawanku runakunaman Diosmanta willakunaykupaq?

• ¿Ima nintaq Jehova Diosqa paymanta willakuq serviqninkunamanta? (Kaqmanta leeykuychik 15 versiculota).

5. Jehova Dios yanapawaptinkum willakuniku

Jehova Diosqa paymanta yachay munaqkunata tarinaykupaqmi yanapawanku. Nueva Zelandapi ima pasakusqanmanta yachaykusun. Iñiqmasinchik Paulmi hukkaqnin tardenpi wasin-wasin willakuq rispan Diosmanta yachay munaq warmita tarirurqa. Chay warmiqa Jehova Diostas temprano mañakusqa pipas paymanta yachaykachinanpaq. Chaymanta kimsa hora pasayllatas Paulqa punkunta takaykusqa Diosmanta willananpaq.

Leeychik 1 Corintios 3:9 hinaspa qatiqninmanta rimariychik:

• ¿Pipa yanapakuyninwantaq Diosmanta willakuspaqa yachay munaqkunata tariniku?

Leeychik Hechos 1:8 hinaspa qatiqninmanta rimariychik:

• Jehova Dios mana yanapawaptinchikqa, ¿atichwanchu enteron allpa pachapi willakuyta?

Yachaykunaykipaq

Huñunakuyniykupim yachachiwanku Diosmanta imaynata willakunaykupaq. ¿Chay huñunakuyman rirqankichu? ¿Ima ninkitaq imaynata yachachiwasqankumanta?

6. Willakuspaqa Diospa kamachiwasqanchiktam kasukuchkanchik

Apostolkunapa tiemponpiqa chiqnikuq runakunam Diosmanta willakunankuta mana munarqakuchu. Ichaqa hinalla willakunankupaqmi autoridadkunapa ley hurqusqankuta valechikurqaku (Filipenses 1:7). Kunanpas Jehova Diospa testigonkunaqa chaynatam ruwaniku.a

VIDEO: Diosmanta willakusqaykuta harkakuptinkum autoridadkunaman rirqaniku (2:28)

Leeychik Hechos 5:27-42 hinaspa qatiqninmanta rimariychik:

• ¿Imanasqataq Diosmanta willakunanchikta mana munaptinkupas hinalla willakunanchik? (Kaqmanta leeykuychik 29, 38 hinaspa 39 versiculokunata).

YUYARIYKUSUN

Jesusqa qatiqninkunatam kamachirqa enteron allpa pachapi Diosmanta sumaq willakuyta willakunankupaq. Jehova Dios yanapawaptinchikmi enterollan allpa pachapi willakuchkanchik.

¿Ima niwaqtaq?

• ¿Imaynatam llapallan nacionkunapi Diosmanta willakuchkaniku?

• ¿Runakunata kuyasqaykuraykuchu Diosmanta yachachiniku? ¿Ima ninkitaq?

• ¿Kusisqachu kasun Diosmanta willakuspaqa? ¿Ima ninkitaq? ¿Imanasqa?

ASTAWAN YACHANAYKIPAQ

¿Imaynatam Jehova Diospa testigonkunaqa willakunku hatu-hatun llaqtakunapi? Chaymanta kaypi qaway.

Paris llaqtapi achka runakunapa kasqanpi willakusqanku (5:11)

¿Imaynatam Jehova Diospa testigonkunaqa llaqtankumanta lluptikuq runakunamanpas willakunku? Chaymanta kay videopi qaway.

Huk law nacionmanta kaqkunamanmi Diosmanta yachachichkanku (5:59)

Kaypim huk iñiqmasinchik willakun Diosmanta tukuy tiemponwan willakuspan kusisqa kasqanmanta.

Manam ñakakunichu Dios servisqaymanta (6:29)

Diosmanta hinalla willakunaykupaq juiciopi ganasqaykumanta kaypi leey.

“Diosmanta willakuqkunam juezkunata valekurqaku” (Jesucristoqa kamachimuchkanñam, 13 kaq yachachikuy)