¿Imatam yachachiwanchik wayqapi qullqimanta rikchanachiyqa?

1, 2. ¿Imapaqtaq Jesusqa wayqapi qullqimanta rikchanachiyta willakurqa?

JESUSQA wayqapi qullqimanta rikchanachiytam willakurqa hanaq pachapaq iñiqmasinchikkunamanta ima suyasqanta yachanankupaq. Ichaqa llapanchikmi hanaq pachapaq utaq kay pachapaq suyakuyniyuq kaspanchikpas, chay willakuywanqa yanapachikuchwan. Chaypaqmi kay willakuypa ima niy munasqanta allinta entiendenanchik.

² ¿Haykapitaq Jesusqa kay rikchanachiyta qatiqninkunaman willarqa? Chaytaqa willakurqa hamuq tiempopi kamachiq kaptin hinaspa tukupay tiempopi imakuna pasakunanmanta willakuspanmi (Mat. 24:3). Chaymi nichwan wayqapi qullqimanta rikchanachiyqa chay willakuypa parten kasqanta hinaspa kay tukupay tiempopi cumplikusqantapas.

 3. ¿Imatam yachachiwanchik Mateo 24 hinaspa 25 sapakama rikchanachiykunaqa?

³ Tukupay tiempomanta Jesus willakuspanqa, tawa rikchanachiykunawanmi willarqa chay tiempopi Diosta serviqkunamanta ima suyasqanta yachachinanpaq. Kay tawa rikchanachiykunam tarikun Mateo 24:45 versiculomanta 25:46 versiculokama. Punta kaq rikchanachiymi allin yuyayniyuq sirvientemanta, paykunaqa kanku hanaq pachapaq iñiqmasinchikkunamanta wakillanmi, ruwayninkuqa Diospa serviqninkunata yachachiymi. Jesusqa kay rikchanachiytam willarqa paykuna Diosman sunqu hinaspa allin yuyayniyuq kanankupaq.a Iskay kaq rikchanachiyqa chunka doncellakunamantam. Kay rikchanachiywanmi Jesusqa lliw hanaq pachapaq kaqkunata yuyarichichkarqa kutimunanta mana yachasqankurayku listolla hinaspa rikchan-rikchanlla kanankupaq.b Kimsa kaq rikchanachiyqa wayqapi qullqimanta rikchanachiymi. Jesusqa kay rikchanachiy willasqanwanmi hanaq pachapaq iñiqmasinchikkunata yachachirqa Diospa kamachisqanta cumplinankupaq kallpanchakunankumanta hinaspa anchata llamkanankumanta. Tawa kaq rikchanachiyñataqmi ovejakunamantawan cabrakunamanta. Kay rikchanachiyqa kay pachapaq iñiqmasinchikkunatam yachachin Diosman sunqu kanankupaq hinaspa hanaq pachapaq iñiqmasinchikkunata yanapanankupaqpas.c Kay yachachikuypim qawasunchik wayqapi qullqimanta rikchanachiyta.

4, 5. (1) ¿Piwantaq tupan rikchanachiypi runaqa? (2) ¿Hayka chaninniyuqtaq huk wayqa qullqiqa karqa? (Qaway willakuyta.)

⁴ (Leey Mateo 25:14-30.) Jesusqa wayqapi qullqimanta rikchanachiyta willakuspanmi huk apu runa utaq patron illasqanmanta willakurqa. Huk kutipipas Jesusqa willakurqam yaqa chayman rikchakuq willakuyta, chay willakusqanpi runam kamachiq kananpaq illarqa (Luc. 19:12).d Achka watakunam qillqanchikkunaqa chay iskaynin willakuypi runakunata tupachiq Jesuswan, illasqankutañataq 33 watapi hanaq pachaman Jesuspa pasakusqanwan. Ichaqa manamá Jesusqa chay watallapichu hanaq pachapiqa kamachiyta qallaykurqa. Aswanmi 1914 watakama suyanan karqa “enemigonkunata Dios saruchinankama” (Heb. 10:12, 13).

⁵ Manaraq pasakuchkaspanmi chay willakuypi apu runaqa sirvientenkunata qayachimuspa pusaq wayqa qullqita saqirqa. Chayqa achka qullqimá karqa.e Chay apu runaqa chay pusaq wayqa qullqiwan llamkaspanku mirachipunankutam munarqa. Chay pusaq wayqa qullqiqa ancha chaninniyuqmi paypaqqa karqa. Jesuspaqpas ancha chaninniyuqmi karqa kay pachapi kaspan Diospa munayninta ruwasqanqa.

6, 7. ¿Imawantaq tupan wayqapi qullqiqa?

⁶ Jesusqa anchatam chanincharqa Diosmanta willakuytaqa. Chay ruwasqanwanmi achka runakuna Diosta riqsirqaku (leey Lucas 4:43). Ichaqa Jesusqa yacharqam Diosmanta willakuy astawan apakunanmanta. Chaymi qatiqninkunata nirqa: ‘Qawariychik tarpusqakunata, ñam puqusqaña kachkan cosechanapaq’, nispa (Juan 4:35-38). Jesusqa Diosmanta willakuytam cosechawan tupachirqa. Payqa allin tarpuq runa hinam allin cosechanankuta munarqa. Chaymi manaraq hanaq pachaman richkaspa qatiqninkunata kamachirqa Jehova Diosmanta willakunankupaq (2 Cor. 4:7). Kaynatam nirqa: “Rispayá willamuychik qatiqniykunaña kanankupaq”, nispa (Mat. 28:18-20).

⁷ Imaynam chay apu runa wayqa qullqita sirvientenkunaman saqirqa, chaynam Jesuspas hanaq pachapaq iñiqmasinchikkunaman Jehova Diosmanta willakunankupaq kamachikuyta saqirqa (Mat. 25:14). Chaymi chay wayqa qullqiqa tupan Diosmanta willakuywan hinaspa yachachiywan.

 8. Sapakama sirvientekuna mana chaynallata chaskiptinkupas, ¿imatam apu runaqa paykunamanta suyarqa?

⁸ Apu runaqa punta kaqmanmi saqiykurqa pichqa wayqa qullqita, hukninmanñataq iskay wayqa qullqita, hukninmanñataq huk wayqa qullqillata (Mat. 25:15). Qawasqanchik hinam sapakama sirvientekunaqa mana chaynallatachu chaskirqaku. Ichaqa chay apu runam munarqa kimsan sirvientenkuna tukuy atisqankuta ruwaspanku qullqinta mirachipunankuta. Jesuspas munanmi hanaq pachapaq iñiqmasinchikkuna tukuy atisqankuta ruwaspanku Diosmanta willakunankuta (Mat. 22:37; Col. 3:23). Pentecostes 33 watapim, Jesuspa qatiqninkunaqa Diosmanta willakuyta qallaykurqaku achka nacionkunapi. Chay ruwasqankutam Hechos qillqapi willakun (Hech. 6:7; 12:24; 19:20).f

 9. (1) ¿Imatam iskay sirvientekuna ruwarqaku? (2) ¿Imatam chayqa paykunamanta qawachiwanchik? (3) ¿Imatam ruwananku sumaq huertapi kawsakuyta munaqkunaqa?

⁹ Qullqita mirachiq iskay sirvientekunaqa tupanmi tukupay tiempopi hanaq pachapaq iñiqmasinchikkunawan. Paykunam anchata llamkarqaku Diosmanta willakuspanku, astawanraqmi 1919 watamantapachaqa. Jesuspa willakusqanpi sirvientekunaqa sapakamam mana chaynallatachu chaskirqaku. Kaywanqa manam nichkanchikchu iskaypi rakinasqa hanaq pachapaq iñiqmasinchikkuna kasqankumantaqa. Willakuypi iskay sirvientekunaqa anchatam llamkarqaku, hinaspam chaskisqankumantapas huk chaynayuqtaraq kutichipurqaku. Ichaqa, ¿hanaq pachapaq iñiqmasinchikkunallachu Diosmanta astawan willakunanku? Manamá. Ovejakunamantawan cabrakunamanta willakuymi yachachiwanchik, sumaq huertapi kawsakuyta munaspaqa hanaq pachapaq iñiqmasinchikkunata kasukunamanta hinaspa Diosmanta willakuypi yanapanamantapas. Huk rimaypiqa llapanchikmi ‘chulla kanchalla’ kanchik, chaymi llapanchik kallpanchakunanchik Diosmanta willakunapaq hinaspa yachachinapaq (Juan 10:16).

10. ¿Imam qawachin tukupay tiempopi kawsasqanchikta?

¹⁰ Jesusqa munanmi llapallan qatiqninkuna Diosmanta yachachiypi astawan llamkanankuta. Chaytam punta pachak watapi iñiqmasinchikkunaqa ruwarqaku. Chay wayqapi qullqimanta willakuy tukupay tiempopi cumplikusqanman hinaqa, ¿anchatachu iñiqmasinchikkunaqa Diosmanta willakuchkanku? Arí, manam haykapipas chaynataqa willakurqakuchu. Anchata llamkasqankuraykum waranqantin runakuna sapa wata bautizakunku. Paykunapas Diosmantaqa willakunkum. ¡Jesusqa ancha kusisqachá kachkan! Tukuy kaykunam qawachin Jesuspa willakusqanman hina Diosmanta willakuy tukupay tiempopi ancha allin kasqanmanta.

11. ¿Imaynatam yachanchik llumpa-llumpay ñakariy punchawkunapi Jesus hamunanmanta?

¹¹ Jesusmi nirqa: ‘Chay sirvientekunapa patronnin kutiramuspanmi paykunamanta cuentata mañarqa’, nispa (Mat. 25:19). ¿Haykapitaq kutimunqa patronqa utaq Jesusqa? Llumpa-llumpay ñakariy punchawkunapa tukupayninpim. ¿Imaynatam chayta yachanchik? Mateo 24 hinaspa 25 capitulopa willakuyninpim, Jesusqa achka kutikama rimarqa kutimunanmanta. Huk kaqnin willakusqanpim nirqa: ‘Rikuwanqakum puyupi tukuy atiyniywan hinaspa kanchariyniywan hamuchkaqta’, nispa. Kayqa llumpa-llumpay ñakariy punchawkunapim cumplikunqa, runakunata juzgananpaq Jesus hamuptin. Jesusqa yuyarichirqataqmi tukupay tiempopi iñiqmasinchikkunata rikchan-rikchanlla kanankupaq. Nirqam: “Manam yachankichikchu ima punchawmi Señornikichik kutimunaytaqa”, nispa. Nirqataqmi: “Diosmanta Hamuq Runaqa kutiramusaq mana piensasqaykichik horam”, nispa (Mat. 24:30, 42, 44). Wayqapi qullqimanta Jesus willakuspanqa, rimachkarqataqmi hamuspan runakunata juzgananmanta hinaspa Satanaspa munaychakusqanta chinkachinanmantapas.g

12, 13. (1) ¿Imatam apu runa nirqa iskay allin sirvientenkunata? (2) ¿Imanasqam chaynata nirqa? (3) ¿Haykapim hanaq pachapaq iñiqmasinchikkuna wiñaypaq sellasqa kanqaku? (Qaway “Wañukuspankum Diospa chaskisqan kanqaku” niq yachachikuyta.) (4) ¿Ima suyakuymi kachkan Diosmanta willakuypi hanaq pachapaq iñiqmasinchikkunata yanapaqkunapaqqa?

¹² Apu runa illasqanmanta kutiramuspanmi iskaynin allin sirvientenkunata sapakamata nirqa: “Qamqa confianza allin sirvientem kasqanki, kay asllawanpas confianza kasqaykimantam achkataraq confiasqayki”, nispa (Mat. 25:21, 23). ¿Imanasqam chaynata nirqa? Punta kaq sirvientem pichqa wayqa qullqitawan mirarachirqa, iskay kaq sirvienteñataq iskay wayqa qullqitawan mirarachirqa. ¿Imawanmi kayna ruwasqanqa tupan? ¿Imatam ruwanqa Jesus hamuspanqa?

¹³ Llumpa-llumpay ñakariy punchawkuna manaraq qallaykuchkaptinmi, Jehova Diosqa sellanqa kay pachapiraq kawsaq hanaq pachapaq iñiqmasinchikkunata. Kaywanqa nichkan paykunata Jehova Dios wiñaypaq chaskisqanmantam (Apoc. 7:1-3). Chaymi manaraq Diospa piñakuynin qallaykuchkaptin, paykunaqa hanaq pachaman rinqaku. Ichaqa, ¿imam pasanqa Diosmanta willakuypi hanaq pachapaq iñiqmasinchikkunata yanapaqkunataqa? Jesusmi paykunata juzgaspan akllanqa ovejakunata hinaña. Chayraykum kay pachapi wiña-wiñaypaq kawsakunqaku Diospa kamachikuyninpi (Mat. 25:34).

14, 15. ¿Ima niytam Jesusqa munachkarqa kimsa sirvientekunamanta huk mana allin sirviente kasqanmanta nispanqa?

¹⁴ Wayqapi qullqimanta rikchanachiypiqa rimantaqmi kimsa kaq sirvientemantapas. ¿Imam paywan pasarqa? Jesusmi willakun kay sirviente chay wayqa qullqita mana llamkachisqanmanta nitaq bancomanpas mana churasqanmanta. Payqa chay wayqa qullqitam pamparurqa. Chaymi apu runaqa nirqa chay sirviente qilla hinaspa mana allin kasqanta. Hinaspam chay wayqa qullqita qichuruspan punta kaq sirvientenman quykurqa. Chaymantañataqmi chay mana allin sirvienteta wasinmanta qarqururqa ‘tutayaypa kasqanman’. Chaypim chay sirvienteqa manaña amiyta waqakurqa (Mat. 25:24-30; Luc. 19:22, 23).

¹⁵ Kimsa sirvientekunamanta huk mana allin sirviente kasqanmanta Jesus nispanqa, ¿nichkarqachu hanaq pachapaq iñiqmasinchikkuna kimsamanta huk kaqninku Diosta qipanchananmanta? Manamá. ¿Imaynatam chayta yachanchik? Yuyarisun allin yuyayniyuq sirvientemanta hinaspa chunka doncellakunamanta. Allin yuyayniyuq sirvientemanta willakuypim, Jesusqa rimarqa mana allin sirviente sirvientemasinkunata maqasqanmanta. Jesusqa manamá kaywanqa nichkarqachu allin yuyayniyuq confianza sirviente mana allin sirvientepi rikurirunanmantaqa. Aswanqa yuyarichichkarqam mana allin sirviente hina mana kanankupaq. Jesusqa yaqa chaynatam nirqa chunka doncellakunamanta willakuspanpas. Nirqam pichqa doncellakuna mana umayuq kasqankuta. Ichaqa manam nichkarqachu chay doncellakuna hina hanaq pachapaq iñiqmasinchikkunapas kanankumantaqa. Jesusqa chaywanmi yuyarichichkarqa llapan hanaq pachapaq iñiqmasinchikkuna listolla hinaspa rikchan-rikchanlla kanankupaq.h Wayqapi qullqimanta rikchanachiywanpas chaytam yachachiyta munarqa. Jesusqa manam nichkarqachu tukupay tiempopi hanaq pachapaq iñiqmasinchikkuna mana allinpi rikurirunankumantaqa. Aswanmi hanaq pachapaq iñiqmasinchikkunata yuyarichichkarqa anchata llamkanankupaq hinaspa chay mana allin sirviente hina mana kanankupaq (Mat. 25:16).

16. (1) ¿Imatam yachachiwanchik wayqapi qullqimanta rikchanachiyqa? (2) ¿Imaynatam kay yachachikuy yanaparuwanchik wayqapi qullqimanta rikchanachiyta entiendenapaq? (Qaway “¿Ima ninantaq wayqapi qullqimanta rikchanachiyqa?” niq yachachikuyta.)

¹⁶ ¿Imatam yachachiwanchik wayqapi qullqimanta rikchanachiyqa? Yachachiwanchikmi Jesus hanaq pachapaq iñiqmasinchikkunata Diosmanta willakunankupaq hinaspa yachachinankupaq kamachisqanta. Yachachiwanchiktaqmi Diosmanta willakuypi llapanchik tukuy sunquwan yanapakunamanta Jesus munasqantapas. Jesuspa tukuy ima kamachiwasqanchikta ruwaspanchikqa wiñay-kawsaytam chaskisunchik (Mat. 25:21, 23, 34).