Allin llamkaq kanankupaq Jesuspa yachachisqan

Jesusqa Olivos muqupi hinallaraq tawa apostolninkunawan kaspanmi huk rikchanachiymantawanraq willakurqa. Chayqa Jerico llaqtapi achka-achka qullqiwan rikchanachiy willakusqan hinaraqmi karqa. Jerico llaqtapi willakusqanqa Diospa munaychakuynin qipakunataraq chayamunanmantam karqa. Olivos muqupi willakusqanñataqmi chayamunan tiempomanta hinaspa tukupay punchawmanta karqa, chayqa apostolkuna tapukusqanman hinam karqa. Chay willakusqanqa sutillatam qawachirqa allin llamkaqkuna kanankumanta hinaspa kamachisqanta ruwanankupaq anchata kallpanchakunankumanta.

Nirqam: “Diospa munaychakuyninqa rikchakun huk law nacionman rinanpaqña kachkaspan, sirvientenkunata qayachimuspan kapuqninkunata saqipakuq runamanmi”, nispa (Mateo 25:14). Jesusqa ñawpaqtapas “kamachiq kananpaq nombramienton chaskiq” huk law nacionman riq runawanmi tupachikurqa, chaymi apostolkunaqa willakusqanpi runaqa hina paylla kasqanta musyarqaku (Lucas 19:12).

Chay runaqa huk law nacionman rinanpaqmi sirvientenkunata qayachispan kapuqninkunata saqirqa. Jesuspas kimsa wata partenñam Diospa munaychakuyninmanta sumaq willakuyta willakurqa, hinaspapas qatiqninkunatam chayta ruwanankupaq yachachirqa. Chaymi paypas ripukunanpaq hinaña kachkarqa, ichaqa manam iskayrayarqachu qatiqninkunaqa Diospa munayninta hinalla ruwanankumantaqa (Mateo 10:7; Lucas 10:1, 8, 9; tupachiy Juan 4:38; 14:12).

¿Imaynata rakispantaq Jesuspa rikchanachiy willakusqanpi patronqa kapuqninkunata saqirqa? Jesusmi nirqa: “Hukninmanmi qurqa pichqa talento nisqa qullqita, hukninmanñataq iskayta, hukninmanñataqmi hukllata. Sapakamamanmi qurqa ruway atisqankuman hinalla, chaymantam huk law nacionman ripukurqa”, nispa (Mateo 25:15). ¿Imatam chay sirvientekunaqa chaskisqankuwan ruwarqaku? ¿Allin llamkaqkuna kaspachu patronninkupaq imakunatapas ruwarqaku?

Hinallaraq willaspanmi Jesus nirqa: “Chayllam pichqa talento qullqi chaskiqqa chay qullqiwan llamkaspan chayna pichqatawanraq mirarachirqa. Chaynallataqmi iskay chaskiqpas iskaytawanraq mirarachirqa. Chullalla chaskiq sirvientem ichaqa pasaspan pampata tuqururqa, hinaspanmi patronninpa qullqinta pampaspan pakarurqa”, nispa (Mateo 25:16-18). ¿Imatataq patronqa kutimuspan ruwarqa?

Jesusmi nirqa: “Unay tiempomantañataqmi chay sirvientekunapa patronnin kutiramurqa hinaspanmi paykunamanta cuentata mañarqa”, nispa (Mateo 25:19). Pichqa talento nisqa qullqita chaskiqwan iskay talento nisqa qullqita chaskiq sirvientekunaqa ‘ruway atisqankuman hinam’ anchata kallpanchakurqaku. Chaymi allin llamkaqkuna kaspanku patronninkupaq huk chaynatawanraq qullqinta mirarachirqaku. Chay pachaqa 19 watata llamkaspam huk talento nisqa qullqita huñuqku. Chaymi patronqa iskayninkuman chaynallata nirqa: “¡Tukuy sunqumanta ruwaq allin sirviente, allintam ruwarunki! Kay asllapipas allin ruwaq kasqaykiraykum aswan achkataraq qusqayki. Chaynaqa, ñuqawanyá kusikuy”, nispa (Mateo 25:21).

Chullalla talento nisqa qullqita chaskiq sirvientem ichaqa patronninta nirqa: “Patronlláy, ñuqaqa yacharqanim piñakuq kasqaykita, qamqa cosechankim mana tarpusqaykimanta, huñunkitaqmi mana wayrachisqaykimanta. Chaymi manchakurqani hinaspam pasaspay talento qullqikitaqa allpapi pamparurqani. Kayqaya qullqikita kutichipuchkayki”, nispa (Mateo 25:24, 25). Payqa manam bancollamanpas chay qullqi mirananpaqqa aparqachu. Chay sirvienteqa manam patronninpa munaynintachu ruwarqa.

Chaymi patronqa “mana allin hinaspa qilla sirviente” kasqanmanta nirqa. Hinaspanmi qusqanta qichuruspan allin llamkaq kaqman quykurqa. Chaymantam kamachikuyta rikurichispan nirqa: “Kaqniyuqqa astawanraqmi chaskinqa hinaptinmi achkanpi kapunqa, mana kaqniyuqmi ichaqa kaqnintapas qichuchikunqa”, nispa (Mateo 25:26, 29).

Jesuspa tukuy willasqanwanqa anchatam qatiqninkunaqa yuyaymanananku karqa. Paykunaqa chay rikchanachiy uyarisqankuwanmi musyakurqaku Diosmanta willakunankupaq llamkayqa suma-sumaq kasqanta chaynataq allinta llamkanankuta Jesus munasqantapas. Chaywanpas Jesusqa “ruway atisqankuman hinalla” ruwanankutam munarqa, manam llapanku chaynallata ruwanankutachu. Chayna kaptinpas payqa manam “qilla sirviente” hina kaqkunataqa chaskinchu.

Chaynaqa, mayna kusisqaya apostolkunaqa karqaku “kaqniyuqqa astawanraqmi chaskinqa” nispa Jesus niptinqa.