Pascua fiestam chayamuchkarqaña

Jesusqa Olivos muqupim tawa apostolninkunapa tapukusqankumanta willakurqa, chaypim willakurqa chayamunan tiempomanta hinaspa tukupay punchawkunamanta.

Jesusqa achka ruwaywanmi chisiyarurqa nisan killapa 11 punchawqa. Chaymi samananpaqña Betaniaman kutispan apostolninkunata nirqa: “Yachasqaykichikman hinam iskay punchawmanta pascua fiesta kanqa, hinaptinmi runapa churinqa qirupi wañuchisqa kananpaq entregasqa kanqa”, nispa (Mateo 26:2).

Chay martes punchawqa religionkunapi punta apaqkunatam Jesusqa lliwpa qayllanpi mana allin kasqankuta qawachirqa, chaymi wañuchinankupaq maskarqaku. Jesusñataqmi chayrayku miercoles punchawqa mana pimanpas rikurispan apostolninkunallawan karqa, chay punchawqa nisan killapa 12 punchawninmi karqa. Jesusqa paqarintin punchaw inti siqaykuytam mana pipa sasachasqan pascua fiestata apostolninkunawan ruwayta munarqa, pascua fiestaqa karqa nisan killapa 14 punchawninpim.

Chay punchaw manaraq chayamuchkaptinmi riqsisqa sacerdotekunawan llaqtapi autoridadkunaqa, sacerdotekunapa kamachiqnin Caifaspa wasinpi huñunakurqaku. Paykunaqa mana allinkuna ruwasqankuta Jesus qawachiptinmi piñasqallaña karqaku. Chaymi ‘yachachinakurqaku Jesusta engañowan hapiruspa wañurachinankupaq’. Ninakurqakum: “Amayá fiestapiqa, llaqtapi runakuna ama chaqwata ruwanankupaq”, nispa (Mateo 26:4, 5). Paykunaqa Jesuswan kaq runakunatam manchakuqku.

Chayna tanteachkaptinkum Jesuspa huk kaqnin apostolnin Judas sutiyuq paykunaman chayarurqa. Payqa satanaspa munasqanman hinam Jesus traicionayta munarqa. Chaymi paykunata nirqa: “¿Imatataq quwankichik qamkunaman entregaykunaypaq?”, nispa (Mateo 26:15). Chayqa paykunapaq allin kaptinmi “qullqita paganankupaq rimanakurqaku” (Lucas 22:5). Hinaspam kusisqallaña 30 qullqita qurqaku, chayna qullqiwanchusmi pi sirvientetapas ñawpaqtaqa rantiqku (Exodo 21:32). Chaynatam religionkunapi punta apaqkunaqa Jesusta mana kaqpaqpas hapisqankuta qawachirqaku. Chaymantam Judasqa ‘tantearqa runakunapa mana yachasqallanta paykunaman entregaykuyqa haykapi allin kasqanta’ (Lucas 22:6).

Nisan killapa 13 punchawninqa miercoles punchaw inti siqaykuytam qallariq. Chay tutallañam Jesusqa Betaniapi puñupakurqa. Qatiqninkunañataqmi paqarintin punchawta pascua fiestapaq carnerota nakaspanku kankananku karqa, chaytaqa 14 punchaw qallaykuptinmi ruwananku karqa. ¿Maypitaq hinaspa pitaq chayta ruwanan karqa? Manaraqmi Jesusqa chaymantaqa imatapas nirqaraqchu, chaymi Judasqa riqsisqa sacerdotekunaman ima willaytapas mana atirqaraqchu.

Chaymantam Jesusqa Betaniallapiraq kachkaspan Pedrotawan Juanta chaypaq kacharqa, paykunataqa yaqachusmi jueves chawpi punchaw pasayta kacharqa. Nirqam: “Rispaykichikyá alistamuychik pascua mikuyta mikunanchikpaq”, nispa. Paykunañataqmi nirqaku: “¿Maypi alistamunaykutataq munanki?”, nispa. Jesusñataqmi nirqa: “Llaqtaman yaykuptikichikmi puyñupi yaku apachkaq runa qamkunawan tupanqa. Paytam qatinkichik yaykusqan wasi ukukama. Hinaspam wasiyuqta ninkichik: ‘Yachachiqmi nisunki: “¿Maypitaq invitadokunapaq cuartoqa kachkan qatiqniykunawan pascua mikuyta mikunaypaq?”’, nispa. Hinaptinmi wasiyuqqa sumaq allichasqa hatun cuartota wasipa altosninpi qawachisunkichik, chaypiyá alistamuychik”, nispa (Lucas 22:8-12).

Chay wasiyuq runaqa Jesuspa huk kaqnin qatiqninmi karqa. Payqa yaqachusmi musyarqaña wasinpi pascua fiestata Jesus ruway munasqantaqa. Chaymi apostolkunaqa Jerusalenman chayaspanku Jesuspa nisqanman hina chay runawan tuparurqaku. Hinaspam carnerotapas chaynataq imakunatapas pascua fiestapaq allicharqaku, chaynapi Jesuswan 12 apostolninkuna pascua mikuyta mikunankupaq.