Mana hatun tukuq kaymanta yachachisqan

Jesusqa musquypi hina rikchaynin tikrakusqanmanta, hinaspa huk warmamanta demonio qarqusqanmantam Capernaum llaqtamanña rirqa. Chaymanqa mana pipas musyananpaqmi qatiqninkunallawan rirqa (Marcos 9:30). Chaypim Jesusqa kaqlla willakurqa wañuchisqa kananmanta, hinaspam yachachirqa manaña kaptin qatiqninkuna imata hinalla ruwanankumanta. Nirqam: “Runapa churinqa runakunapa makinmanmi entregasqa kanqa, hinaptinmi wañuchinqaku. Ichaqa kimsa punchawmantam kawsarimunqa”, nispa (Mateo 17:22, 23).

Apostol Pedropaq hukman rikchakuptinpas Jesusqa ñam willakurqaña wañuchisqa kananmantaqa (Mateo 16:21, 22). Chaymantapas kimsa qatiqninkunam urqupi rikurqaku Jesuspa rikchaynin tikrakusqanta hinaspa wañukunanmanta iskay runakunawan rimasqanta (Lucas 9:31). Jesuspa willakusqanwanqa imayna kananta mana yachaspankupas qatiqninkunaqa llakirikururqakum (Mateo 17:23). Chaywanpas manam chaymantaqa imatapas tapukurqakuchu.

Chaymantam Jesusqa Capernaum llaqtaman rirqa, chay llaqtamantaqa achkam apostolninkuna karqa. Chayaruptinkum Diospa wasinpaq qullqita mañaq runakunaqa Pedroman asuykurqaku, yaqapaschá Jesusta qullqi mana qusqanmanta tumpanankupaq Pedrota nirqaku: “¿Manachu yachachiqnikichikqa pagan templopaq impuestota?”, nispa (Mateo 17:24).

Pedroñataqmi nirqa: “Arí paganmi”, nispa. Ichaqa wasiman Pedro yaykuruptinmi Jesusqa imamanta rimasqankuta musyaruspan nirqa: “¿Ima ninkitaq Simon? ¿Pikunamantataq kay pachapi kamachikuqkunaqa impuestokunata mañanku? ¿Churinkunamantachu icha huk runakunamantachu?”, nispa. “Huk runakunamantam” nispa Pedro niptinmi, Jesusñataq nirqa: “Chaynaqa churikunaqa manam impuestotaqa pagananchu, ¿aw?”, nispa (Mateo 17:25, 26).

Jesuspa taytanqa tukuy atiyniyuq Jehova Diosmi, paytam judio runakuna Diospa wasinpi yupaychaqku. Chaymi Jesusmantaqa Diospa churin kasqanrayku qullqitaqa mana mañanankuchu karqa. Chaywanpas Jesusqa Pedrotam nirqa: “Ichaqa ama piñakunankupaqyá lamar quchaman rispa anzueloykita wischuykuy, hinaspam punta challwa hapisqaykipa siminta kichaykuspayki huk qullqita tarinki. Chay qullqitayá paykunaman quykuy ñuqamantawan qanmanta”, nispa (Mateo 17:27).

Chaymantam lliw qatiqninkunaqa Jesusman asuykuspa tapurqaku Diospa munaychakuyninpi aswan riqsisqa pi kananmanta. Chaytaqa mana pinqakuspam tapukurqaku, Jesuspa wañukunanmanta tapukuytam ichaqa manchakuqku. Jesuspa qatiqninkunaqa Capernaunman risqankupim pim aswan riqsisqa kanankumanta rimarqaku. Chaymi Jesusqa chayta musyaspan nirqa: “¿Imamantataq ñanpi atipanakurqankichik?”, nispa (Marcos 9:33). Qatiqninkunañataqmi pinqarikuspanku upallarurqaku. Chaywanpas yachayta munaspankum nirqaku: “¿Pitaq hanaq pacha Diospa munaychakuyninpi aswan riqsisqaqa?”, nispa (Mateo 18:1).

Jesuspa qatiqninkunaqa kimsa wataña Jesuswan kaspankupas manaraqmi yacharqakuchu aswan riqsisqa kayta maskayqa mana allin kasqanta. Ichaqa pantaq runakuna kasqankuraykum hinaspa aswan riqsisqa kayta maskaq runakunawan wiñasqankuraykum chaynaqa karqaku. Chaymantapas Jesusqa Pedromanmi Diospa munaychakuyninpa ‘llavenkunata’ qunan karqa. Pedrowan, Santiagowan hinaspa Juanpas Jesuspa rikchaynin tikrakusqantam qawarqaku. Ichapas chayrayku paykunaqa aswan allin kasqankupaq hapikurqaku.

Imayna kaptinpas Jesusqa pantasqankuta qawachinanpaqmi warmachata chawpinkupi sayaykachispan nirqa: “Piensasqaykichikta mana tikraspaykichikqa hinaspa warmachakuna hina mana kaspaykichikqa manapunim hanaq pacha Diospa munaychakuyninmanqa yaykunkichikchu. Chaynaqa, kay warmacha hina pipas humillakuqmi hanaq pacha Diospa munaychakuyninpi aswan riqsisqaqa. Kayna warmachata sutiypi pipas chaskiqqa ñuqatapas chaskiwanmi”, nispa (Mateo 18:3-5).

¡Mayna sumaqmi Jesuspa chayna yachachisqanqa! Jesusqa mana piñakuspanmi sumaqllata chay warmachawan yachachirqa. Warmachakunaqa manam aswan riqsisqa kaytaqa maskankuchu. Chayna kanankupaqmi Jesusqa qatiqninkunata yachachirqa. Hinaspapas nirqam: “Llapallaykichikmanta sullka hina kaqmi riqsisqa kaqqa”, nispa (Lucas 9:48).