Apostolkunaqa riqsisqa kaytam hinalla munarqaku

Jesusqa qatiqninkunawan kuskam Perea lawmanta Jerico llaqtamanña Jordan mayunta chimparqaku. Chaymantaqa hichpallapiñam Jerusalenqa kachkarqa. Chaymanqa 33 kaq watapi pascua fiestamanmi achka runakuna paykunawan kuska rirqaku.

Jesusqa qatiqninkunapa ñawpaqnintam rirqa allinllapi pascua fiestaman chayananpaq. Qatiqninkunam ichaqa manchakuywan karqaku, manam unayraqchu karqa Lazaro wañukuptin Perea lawmanta Judea lawman Jesuspa risqanqa, chaypim qatiqmasinkunata Tomas nirqa: “Hakuchik ñuqanchikpas paywan wañumunanchikpaq”, nispa (Juan 11:16, 47-53). Chaymi Jerusalen llaqtaman riyqa manchakuypaq karqa.

Jesusñataqmi imakuna kananmanta apostolninkunaman willananpaq paykunata sapaqchaykuspan nirqa: “Jerusalenmanmi qispichkanchik, chaypim runapa churinqa entregasqa kanqa riqsisqa sacerdotekunaman hinaspa escribakunaman hinaptinmi wañuchisqa kananpaq churaykunqaku. Chaymantapas huk law nacionniyuqkunamanmi entregaykunqaku asipayanankupaq, azotenankupaq hinaspa qirupi warkunankupaq, ichaqa kimsa punchawmantam kawsarimunqa”, nispa (Mateo 20:18, 19).

Chaywanqa kimsa kutikamañam Jesusqa wañuchisqa kananmanta hinaspa kawsarimunanmanta willakurqa (Mateo 16:21; 17:22, 23). Ichaqa kay kutipim qirupi wañuchisqa kananmanta willakurqa. Qatiqninkunañataqmi uyarispankupas mana sumaqtachu musyakuqku Jesuspa ima niy munasqantaqa. Ichapas paykunaqa suyarqaku Israel runakunataqa kay pachapi kaspan Jesus kamachinanmanta, chaynataq paykunapas chaypi kanankumanta.

Paykunawanqa Santiagopa hinaspa Juanpa mamankupas rirqam, mamankupa sutinqa Salomeychusmi karqa. Chay iskay apostolkunatam piñaniraq kasqankurayku “rayopa churinkuna” nispa Jesusqa suticharqa (Marcos 3:17; Lucas 9:54). Paykunaqa unayñam Jesus kamachiptin imapas allin ruwayniyuq kayta munarqaku, chaytaqa mamankupas yachaqmi. Chaymi mamankuqa Jesusman asuykuspan wawankunapaq favorta mañakurqa. Jesusñataqmi nirqa: “¿Imatataq munanki?”, nispa. Payñataqmi nirqa: “Niykuyyá kay iskaynin wawaykuna qam kamachiptiki huknin alliq lawnikipi hukninñataq ichuq lawnikipi tiyaykunankupaq”, nispa (Mateo 20:20, 21).

Chaytaqa Santiagowan Juanmi mañakurqaku. Chaymi Jesusqa pinqaypaq wañuchisqa kananmanta willakuruspan paykunata nirqa: “Qamkunaqa manam yachankichikchu imam mañakusqaykichikta. ¿Atiwaqchikchu tomanaypaqña kaqta tomayta?”, nispa. Paykunañataqmi nirqaku: “Atiymankum”, nispa (Mateo 20:22). Ichaqa manachusmi sumaqtachu yacharqaku imam nisqankutaqa.

Chayna kaptinpas Jesusqa nirqam: “Chiqaptapunim tomankichik, ichaqa alliq utaq ichuq lawniypi tiyaykuyqa manam ñuqamantachu, chayqa kachkan taytaypa akllasqankunapaqmi”, nispa (Mateo 20:23).

Santiagopawan Juanpa munasqankuta yacharuspankum wakin 10 apostolkunaqa llumpayta piñakurqaku. Ichapas Santiagowan Juanqa chayta sutillata qawachirqaku ñawpaqkunatapas pim aswan riqsisqa kasqankumanta wakinwan atipanakuspankuqa (Lucas 9:46-48). Imaynaña kaptinpas Jesuspa 12 apostolninkunaqa manaraqmi kasukurqakuchu sullka hina kanankumanta Jesuspa yachachisqantaqa, paykunaqa hinallaraqmi hatun tukurqaku.

Chayna pantaspanku sasachakuyta rikurirachiptinkum Jesusqa 12 apostolkunata qayaykuspan sumaqllata nirqa: “Qamkunaqa yachankichikmi nacionkunata kamachiqkunaqa runakunapi munaychakusqanta, yachankichiktaqmi munayniyuq runakunapas runakunata kamachisqanta. Qamkuna ukupim ichaqa mana chaynachu kanan, aswanqa qamkunamanta pipas riqsisqa kayta munaqqa qamkunapa serviqnikichikmi kanan. Chaymantapas qamkunamanta pipas puntapi kayta munaspanqa llapallaykichikpa sirvientenmi kanan”, nispa (Marcos 10:42-44).

Chaymantam Jesusqa kallpancharqa paypa imayna kasqanta qatipakunankupaq. Nirqam: “Runapa churinpas manam servichikuqchu hamurqa aswanqa servinanpaqmi hinaspa vidanta quspan achka runakunata librananpaqmi”, nispa (Mateo 20:28). Jesusqa kimsa watañam sirviente hina hukkunapaq imakunatapas ruwachkarqa, payqa runakunaraykuraqmi wañukunanpas karqa. Chaytam qatiqninkunaqa qatipakunanku karqa. Paykunaqa sirviente hinallam kananku karqa, manam servichikuqkuna hinachu. Chaymantapas sullka hinallam kananku karqa, manam riqsisqa kayta munaqkunachu.