Jesusta Pilatoman pusasqankumanta

Jesusta kimsa kutikama Pedro negaptinqa achikyaykuchkarqañam, chaymi mana kaqmanta Jesusta juzgaqkunapas pasakurqakuña. Chay tuta Jesusta juzgasqankuqa manam leyninkuman hinachu karqa, chaymi achikyaytaqa kaqmanta huñunakurqaku leyninkuman hina juzgaq tukunankupaq. Chayraykum Jesustaqa kaqmanta pusachimurqaku.

Hinaspam nirqaku: “Cristo kaspaykiqa niwaykuyá”, nispa. Jesusñataqmi nirqa: ‘Arí niptiypas manapunim creewaqchikchu. Tapuptiypas manapunim kutichiwankichikmanchu’, nispa. Hinaspam Daniel 7:13 paymanta willakusqanman hina nirqa: “Kunanmantapacham runapa churinqa atiyniyuq Diospa alliq lawninpi tiyanqa”, nispa (Lucas 22:67-69; Mateo 26:63).

Paykunañataqmi kaqmanta nirqaku: “¿Qamchu kanki Diospa churin?”, nispa. Jesusñataqmi nirqa: “Kikikichikmi nichkankichik Diospa churin kasqaytaqa”, nispa. Chaychusmi Diosta kamisqanmanta tumpaspa wañuchinankupaq nirqaku: “Kikinchik uyarichkaspaqa, ¿imataraqtaq suyachwan?”, nispa (Lucas 22:70, 71; Marcos 14:64). Hinaspam chaqnaruspanku gobernador Poncio Pilatoman pusarqaku.

Judasqa rikurqachá Jesusta Pilatoman pusasqankutaqa. Wañuchinankupaq tanteasqankuta yacharuspanmi tumpata pesapakuspan hukmanyarqa, ichaqa sunqumanta wanakuspan pampachananpaq Diosta maskananmantaqa riqsisqa sacerdotekunamanmi 30 qullqita kutichiq rirqa. Hinaspam nirqa: “Mana huchayuq runata qipanchaspaymi huchallikuruni”, nispa. Paykunañataqmi nirqaku: “¡Imataq qukuwanku, qamchá yachakunki imam ruwanaykitaqa!”, nispa (Mateo 27:4).

Hinaptinmi Judasqa chay qullqita Diospa wasinpi wikapaspan wañuchikuyta munarqa. Chaymi tiqukuyta munaspan sachaman warkukururqa, ichaqa yaqapaschá kallma pakikuruptin uku-ukuta rumikunapa hawanman chunchulninkunapas pawanankama wichiykurqa (Hechos 1:17, 18).

Chay madrugawmi judiokunaqa Pilatopa palacionman Jesusta pusarurqaku. Ichaqa manam yaykuyta munarqakuchu mana judio kaqkunawan hukllawakuspaqa nisan killapa 15 punchawninpi mikuyta mana mikunankupaq hina kanankuta piensaspanku. Chayqa karqa mana levadurayuq tanta nisqanku fiestapa punta kaq punchawninmi, chaytapas pascua ruwasqanku punchawkunapim ruwarqaku.

Chaynapim Pilatoqa nirqa: “¿Ima huchamantataq kay runata tumpankichik?”, nispa. Paykunañataqmi nirqaku: “Mana allinkunallaña ruwaq runa mana kaptinqa hukchus pusamuykikuman”, nispa. Pilatoqa yaqapaschá musyarurqa judiokunaqa Jesusta pay wañuchinanta munasqankuta, chaymi nirqa: “Qamkunayá pusaspa leynikichikman hina juzgamuychik”, nispa. Hinaptinmi nirqaku: “Manam ñuqaykupaqa makillaykupichu runata wañuchinaykupaqqa”, nispa (Juan 18:29-31). Chaynata nispam wañuchiy munasqankuta qawachirqaku.

Pascuapi judiokuna Jesusta wañurachiptinkuqa runakunachá atipanakuspa chaqwata ruwanmanku karqa. Roma nacionniyuqkuna wañuchiptinkum ichaqa mana imapas kanmanchu karqa. Chaytam judiokunaqa munarqaku.

Paykunaqa Diosta kamisqanmanta Jesusta tumpaspankum wañuchinankupaq tantearurqaku, ichaqa manam chaytaqa Pilatomanqa willarqakuchu, aswanqa nirqakum: “Kay runatam tariramuniku gobiernopa contranpi runakuna umachachkaqta hinaspa Roma nacion kamachiqman impuesto pagayta harkakuchkaqta, chaymantapas ninmi Cristo hinaspa kamachiq kasqanta”, nispa (Lucas 23:2).

Romamanta autoridad kasqanraykum Pilatoqa hukmanyarurqa kamachiq kananmanta Jesusta tumpasqankuwan. Chaymi palacio ukuman yaykuspan Jesusta qayachimurqa, hinaspam tapurqa: “¿Qamchu kanki judiokunapa kamachiqnin?”, nispa. Huk rimaypiqa nichkarqam: “¿Chiqaptachu Roma nacionpi kamachiqpa contranpi hatarispa ‘kamachiqmi kani’ nichkanki?”, nispa. Jesusñataqmi paymanta Pilatoman imata willasqankumanta yachayta munaspan nirqa: “¿Kikillaykimantachu chaynataqa nichkanki icha hukkunachu ñuqamanta willasurqanki?”, nispa (Juan 18:33, 34).

Pilatoqa manachusmi allintachu yacharqa imanasqa Jesusta presochasqankumantaqa, chaymi nirqa: “¿Ñuqaqa judiochu kani? Llaqtamasikikunawan riqsisqa sacerdotekunam qamtaqa entregawarqa. ¿Imatamá ruwarunki?”, nispa (Juan 18:35).

Chaymi Jesusqa mana manchakuspan munaychakuyninmanta willakurqa, chaywanchá Pilatoqa mana ima niytapas atirqachu.