Jesusmi Nazaret llaqtanman kutirqa

Nazaret llaqtapi runakunaqa Jesuswan tupaykuytam munarqaku. Payqa carpintero hinallam chay llaqtamantaqa Juanwan bautizachikuq lluqsirqa. Chaymantam ichaqa Jehova Diospa atiyninwan imakunatapas ruwarqa, chaymi Nazaretpi runakunaqa imapas ruwasqanta qawayta munarqaku.

Astawanraqmi karqa yupaychana wasiman Jesus riptinqa. Chaypim sapa kuti huñunakuqku Diosta mañakunankupaq hinaspa Moisespa qillqasqankunata ñawinchanankupaq (Hechos 15:21). Ñawinchaqkutaqmi Diosmanta willakuqkunapa qillqasqankutapas. Hinaptinmi lliwpa qayllanpi ñawinchananpaq Jesuspas hatariptin Isaias qillqata haywarqaku. Muyurispanqa unay wataña riqsisqan runakunatachá Jesusqa rikurqa. Hinaspanmi hapisqan qillqapi maskarqa Diospa akllasqan runamanta willakuq lawta, chayqa Isaias qillqapa 61 capitulopa huk hinaspa iskay versiculonkunapim kunanqa kachkan.

Tariruspanmi ñawincharqa chay akllasqa runaqa kaykuna willakunanmanta: Presochasqakuna librasqa kananmanta, ñawsakuna qawakunanmanta hinaspa Diospa kuyapayakuyninta tarinapaq tiempomanta. Hinaspanmi ñawinchayta tukuruspanqa haywaqninman qillqata quspan tiyaykurqa, runakunañataqmi qaway-qawarqaku. Jesusñataqmi ichapas unay rimasqanmanta kaynataraq nirqa: “Kay uyarisqaykichik rimaykunam kunan punchaw cumplikurun”, nispa (Lucas 4:21).

Hinaptinmi runakunaqa “suma-sumaqllataña rimasqanwan admirakuspanku” ninakurqaku: “Payqa Joseypa churinmi, ¿aw?”, nispa. Jesusñataqmi huk law llaqtakunapi hina ima milagrotapas ruwananta munasqankuta musyakuspan nirqa: “Nisqankupi hinachá niwankichik: ‘Yaw hampiq runa kikikiraqyá hampikaramuy. Capernaum llaqtapi ruwasqaykikunamanta uyarisqaykutayá kay llaqtaykipipas ruway’”, nispa (Lucas 4:22, 23). Nazaretpi runakunaqa munarqakuchá Jesusqa llaqtamasinpaqraq imatapas puntata ruwananta, ichaqa mana ruwasqanwanmi saqisqa kasqankupaq hapikurqaku.

Chayta yachaspanmi Jesusqa hinallaraq rimaspan Israelpi ñawpaqkunata imakuna kasqanmanta willakurqa. Puntatam Eliasmanta willakurqa. Payqa huk law llaqtapi viudaman kachasqam karqa Israel nacionpi achka viudakuna kachkaptinpas. Chay viudaqa Sarepta llaqtayuqmi karqa, paytawan wawantam Eliasqa hinalla kawsanankupaq yanaparqa (1 Reyes 17:8-16). Chaymantapas Jesusqa Eliseomantam willakurqa. Paypas Israel nacionpi achka runakuna leprawan unquptinkupas Siria nacionniyuq Naaman runallatam hampirurqa (2 Reyes 5:1, 8-14).

Chay nisqanwanmi runakunaqa llumpayta piñakururqaku qaqchasqa kasqankupaq hapikuspanku. Chaymi Jesustaqa utqayman wasimanta hurquspanku urqupa puntanman pusarurqaku qaqaman tanqaykunankupaq. Jesusmi ichaqa lluptikuspan Capernaunman pasakurqa, chayqa Galilea lamar quchapa patanpim karqa.