Jesusqa sabado punchawpim huk runata hampirurqa

Jesusqa Galilea lawpim Diospa munayninta unay ruwarqa, chaywanpas payqa puntamantaraqmi nirqaña: “Huk law llaqtakunapipas Diospa munaychakuyninmanta sumaq willakuytaqa willakunaymi”, nispa. Chaymi Judea lawmanña rirqa chaypipas Diosmanta willakunanpaq (Lucas 4:43, 44). Ñam Jerusalenpi pascua fiesta kananpaq punchawkuna chayamuchkarqaña, chayqa marzo hinaspa abril killakunapim karqa.

Jesusmanta willakuq qillqakunaqa manam llumpaytachu Judea lawpi Jesuspa ruwasqankunamantaqa willakun, Galilea lawpi ruwasqankunamantam ichaqa astawan willakun. Judea lawpi runakunaqa manachusmi Jesustaqa kusikuywanchu chaskirqaku. Chaywanpas payqa hinallam Diosmanta willakurqa hinaspa imakunatapas ruwarqa.

Chaymantam Jesusqa Jerusalenman rirqa 31 kaq watapi pascua fiestaman. Chaypim achka runakunapa purinan lawpi “oveja” sutiyuq punkupi pozo karqa, chay pilarniyuqkuna pozotam sutichaqku “Betzata” nispa. Chaymanmi tukuy rikchaq unquyniyuq runakuna riqku yaku timpuyta qallaykuptin yaykuruspa hampikuruyta piensaspanku.

Chayninta sabado punchawta Jesus richkaspanmi 38 wataña unquq runawan tuparurqa. Chaymi asuykuspan nirqa: “¿Munankichu allinyayta?”, nispa. Chay unquqñataqmi nirqa: “Señor manam piyniypas kanchu yaku kuyuriptin pozo ukuman yaykuchiwaqniy, rinaykamam hukña llalliruwaspan yaykurun”, nispa (Juan 5:6, 7).

Jesusñataqmi mana pipa piensasqanman hina nirqa: “¡Hatariy!, chakanaykita huqarispayki puriy”, nispa (Juan 5:8). Hinaptinmi unquq runaqa hampisqaña rikurirurqa, hinaspam chakananta huqarispan puriyta qallaykurqa.

Judio runakunañataqmi chayta qawaspa kusikunankumantaqa chay allinyaq runata piñasqallaña nirqaku: “Kunanqa sabado punchawmi, chakanaykita apayqa manam allinchu”, nispanku. Hinaptinmi chay runañataq paykunata nirqa: “Kikin sanoyachiwaqniymi niwarqa: ‘Chakanaykita huqarispayki puriy’”, nispa (Juan 5:10, 11). Chay judio runakunapaqqa manam allinchu karqa sabado punchawpi pitapas hampiyqa.

Chaymi tapurqaku: “¿Pitaq ‘chakanaykita huqarispa puriy’ nisuqniki runaqa?”, nispa. Jesusmi ichaqa runakuna ukupi chinkarurqaña, chaymi chay hampichikuq runaqa mana yacharqachu pim hampirusqantaqa (Juan 5:12, 13). Chaywanpas chay punchawllam Jesuswanqa Diospa wasinpi tuparurqa, hinaspam yacharurqa pim kasqanta.

Chaynapim tapuqnin judiokunaman rispan willakurqa chay hampiqnin runaqa Jesus kasqanmanta. Chay judio runakunañataqmi Jesusta maskarqaku sabado punchawpi imanasqa hampisqanmanta qaqchamunankupaq, manam hampisqanmantaqa kusikurqakuchu, aswanmi qatikachaytaraq qallaykurqaku.