¿Imanasqataq Jesuspa qatiqninkunaqa mana ayunaqkuchu?

Bautizaq Juanqa hinallam yaqa 30 kaq watapi pascua fiestamanta presochasqa karqa. Payqa qatiqninkuna Jesuspa qatiqninña kanantam munarqa, ichaqa manam lliwchu chaytaqa ruwarqaku.

Chaymi Juanpa qatiqninkunaqa 31 kaq watapi pascua fiesta chayamunan punchawkuna Jesusman rispa nirqaku: “Fariseokunawan ñuqaykuqa ayunanikum, ¿imanasqataq qatiqnikikunaqa mana ayunankuchu?”, nispa (Mateo 9:14). Fariseo runakunaqa religionninkupi costumbreraykullam ayunaqku. Chayna fariseo runamantam Jesusqa huk kutipi willakurqa. Chay fariseoqa hatun tukuspanmi Diosta mañakuspa nirqa: “Dioslláy, wakin runakuna hina mana kasqaymantam agradecekuyki, [...] semanapim iskay kutita ayunani”, nispa (Lucas 18:11, 12). Ichapas fariseokuna hina costumbreraykulla Juanpa qatiqninkunapas ayunaqku, utaq bautizaq Juan carcelpi kasqanraykulla. Chaychá paykunaqa munarqaku Jesuspa qatiqninkunapas Juanrayku ayunanankuta.

Chaymi Jesusqa paykunata nirqa: “Noviopa amistadninkunaqa manam llakisqachu kananku novio paykunawanraq kachkaptinqa, ¿aw? Ichaqa chayamunqam punchaw novio qichusqa kananpaq, hinaptinqa ayunanqakum”, nispa (Mateo 9:15).

Chay novioqa Juanpa willakusqanman hinaqa Jesusmi karqa (Juan 3:28, 29). Chaymi qatiqninkunawanraq Jesus kachkaptinqa mana ayunanankuchu karqa. Wañukuptinmi ichaqa llakikuymanta waqaspa ayunananku karqa. Kawsariruptinqa kusisqa kasqankuraykutaqmi manaña ayunanankuchu karqa.

Chaymantapas Jesusqa nirqaraqmi: “Manam pipas mawka pachataqa remendanchu musuq latapawanqa, chaynata ruwaptinqa chintiruspanmi mawka pachataqa astawan llikirunman. Manataqmi manaraq puqusqa vinotaqa mawka odrekunapiqa churankuchu, churaruptinkuqa odrekunam tuqyarunman hinaptinmi vinopas usunman, hinaspam odrekunapas mana valeqña rikurirunman. Aswanqa manaraq puqusqa vinotaqa musuq odrekunapim churana”, nispa (Mateo 9:16, 17). ¿Ima niytataq Jesusqa munachkarqa?

Chaykuna willasqanwanmi Jesusqa Juanpa qatiqninkunata nichkarqa judio abuelonkupa ruwasqankutaqa amaña ruwanankupaq. Judio runakunapa religionninqa mawka pachakuna hinam hinaspa mawka odrekuna hinam karqa, paykunaqa runakunapa costumbrellantam qatiqku. Jesuspa yachachisqanñataqmi mana chaynachu karqa, aswanqa musuqñam. Payqa manam judio runakunapa religionninta kaqmanta hatarichiqchu hamurqa, aswanqa Jehova Diosta imayna yupaychanankupaq yachachiqmi.