Huchasapa warmi pampachasqa kasqanmanta

Runakunaqa Jesuspa ruwasqanta hinaspa imayna kasqanta qawaspankum wakinqa allin sunquwan qawaqku, wakinñataqmi mana. Chayna kasqanmi sutilla qawakurqa Galilea lawpi Simonpa wasinpi. Payqa fariseo kaspanpas Jesustam wasinman mikuq rinanpaq qayarqa, ichapas sumaqta riqsinanrayku. Chaymi Jesusqa rirqa, ichapas chaypi kaqkunaman Jehova Diosmanta yachachinanrayku. Payqa ñawpaqkunatapas mikurqam autoridadkunapaq qullqi mañaypi llamkaqkunawan hinaspa huchasapakunawanpas.

Jesusñataqmi Simonpa wasinpiqa mana sumaq chaskisqachu karqa. Chay tiempopi runakunapaqa usutallawan puriptinkum chakinku qachachakuq hinaspa quniriruq, chaymi maymanpas chayaptinkuqa samaykachiqnin runa chiri yakuwan chakinkuta mayllaq. Jesustam ichaqa mana chaynatachu Simonqa chaskirqa, manataqmi costumbreman hinaqa mucharqapaschu, nitaq aceitetapas umanpiqa tallirqachu.

Chaymantam mikunankupaqña llapanku mesapi tiyaykuptinku “huchasapa kasqanwan llaqtapi riqsisqa warmi” mana qayasqa kachkaspan upallalla wasiman yaykururqa (Lucas 7:37). Llapanchik pantaq runakuna kaptinchikpas chay warmiqa yaqachusmi mana allinkuna ruwaq karqa, ichapas cuerponta rantikuq warmi karqa. Payqa yaqachusmi Jesuspa yachachisqankunataqa hinaspa runakunata llakipayasqanmantaqa yacharqa (Mateo 11:28, 29). Chaypaschá Jesustaqa maskarqa.

Mesapi mikuchkaptinkum warmiqa Jesusman qipanmanta asuykuspan chakin lawpi qunqurakuykurqa. Hinaspam waqayta qallaykurqa, wiqinwanñataqmi Jesuspa chakinta nuyuchispan chukchanwan chakichirqa. Hinaspapas chakinpi kuyakuyllawanña muchaykuspanmi miski asnaq aceitetapas tallirqa. Chayta qawaspanmi Simonñataq sunqunpi nikurqa: “Kay runaqa Diosmanta willakuq kaspanqa yachanmanchá kay llachpaqnin warmi pi kasqanta hinaspa imayna kasqantapas, kay warmiqariki huchasapam”, nispa (Lucas 7:39).

Jesusñataqmi rimapakusqanta musyaruspan nirqa: “Ninaymi kachkan Simon”, nispa. Simonñataqmi nirqa: “Yachachikuq, niykuwayyá”, nispa. Hinaptinmi Jesusñataq nirqa: “Iskay runakunam qullqi prestaqta debekurqaku, hukninmi pichqa pachak denario nisqa qullqita, hukninñataqmi pichqa chunkata. Kutichipunankupaq mana kaptinmi prestaqninqa tukuy sunqumanta iskayninkuta pampachaykurqa. Hinaptinqa, ¿mayqinnintaq prestaqninta astawan kuyanqa?”, nispa. Simonñataqmi nirqa: “Ñuqamantaqa achka qullqimanta pampachasqa kaqmi”, nispa (Lucas 7:40-43).

Simon allinta rimaruptinmi Jesusqa warmita qawarispan nirqa: “¿Qawachkankichu kay warmita? Wasikiman yaykuykamuptiymi qamqa chakiyta mayllakunaypaq yakuta mana quwarqankichu, kay warmim ichaqa wiqinwan chakiyta nuyuykachispan chukchanwan chakiykachin. Manam muchaykuwarqankichu, kay warmim ichaqa yaykumusqaymantapacha kuyakuyllawanña chakiyta muchapayachkan. Manam aceitewanpas umayman talliykuwarqankichu, kay warmim ichaqa chakiyta miski asnaq aceitewan talliykuwan. Chayraykum niki, ancha kuyakuq kasqanraykum kay warmipa huchankunaqa maynaña kaspanpas pampachasqaña kachkan. Aslla pampachasqa kaqmi ichaqa asllata kuyakun”, nispa (Lucas 7:44-47).

Jesusqa manam huchapakuy allin kasqantachu qawachichkarqa. Aswanqa huchankumanta wanakuqkunawan hinaspa payta maskaqkunawan llakipayakuq hinaspa kuyapayakuq kasqantam qawachichkarqa. Chay warmitam Jesus nirqa: “Huchaykikunaqa pampachasqam. [...] Iñiynikim salvaykusunki, hawkaña pasakuy”, nispa (Lucas 7:48, 50). ¡Maynataya chay warmiqa kusikurqa!