Jesusmi lamar quchata hawkayachirqa

Jesusqa tukuy punchaw ruwasqankunawan pisipasqallaña kaspanmi tutaykuq lawta qatiqninkunata nirqa: “Hakuchik quchapa wak law patanman”, nispa. Chay lawqa Capernaum llaqtapa chimpanmi karqa (Marcos 4:35).

Chay risqanku lawqa Gerasa llaqta lawñam karqa, chayqa Decapolis lawpa huk kaqnin llaqtanmi karqa. Lliw Decapolis lawqa Griego runakunapa munaychakusqanmi karqa, ichaqa karqaraqmi achka judio runakunapas.

Runakunaqa musyarurqakum Capernaum llaqtamanta Jesuspa lluqsisqantaqa, chaymi wakin botekunawan qipanta qatirqaku (Marcos 4:36). Chimpanankupaq lawqa manam karuchu karqa. “Galilea lamar qucha” nispa riqsiptinkupas hatun quchallam karqa. Chay hatun quchaqa uku-ukum karqa, hinaspapas manam puchqu yakuchu karqa. Chaymantapas suytunpa kasqanraykum hanayninmanta urayninman yaqa tawa hora puriy karqa, hinaspa waqtanmanta chimpanmanñataq yaqa iskay hora puriy.

Jesusqa mana pantaq runa kaspanpas pisipasqam kachkarqa. Chaymi boteman qispiruspallan qipa lawninpi sawnakuykuspa puñururqa.

Chay chimpasqanku hatun quchaqa urqukunapa chawpinpim karqa, chay quchapaqa hawanmi qunillaña karqa. Chaymi wakinpiqa urqukunamanta chiri wayra kallpawan hamuspa quni yakuwan tupanakuq, hinaptinmi quchaqa nisyuta aytinyayta qallaykuq. Chaynam karurqa chay chimpasqanku tuta. Chayraykum Jesuspa wakin apostolninkunaqa botewan allin puriqkuna kaspankupas sasachakuypi rikurirurqaku, yakum aytinyaspan “as-asmanta boteman huntayta qallaykurqa” (Lucas 8:23). Chaywanpas Jesusqa hinallam puñuchkarqa.

Apostolkunaqa ñawpaqkunapi hinam tukuyta ruwallarqaku ama chinkaykunankupaq, ichaqa manam ima ruwaytapas atillarqakuchu. Hinaspam mancharisqallaña kaspanku Jesusta nirqaku: “¡Señor, salvaykuwayku, wañuy patapiñam kachkanchik!”, nispa (Mateo 8:25). Paykunaqa hiqipaspa wañuruytam manchakurqaku.

Jesusñataqmi rikchariruspan nirqa: “Pisi iñiyniyuq runakuna, ¿imanasqataq qamkunaqa llumpay mancharisqallaña kachkankichik?”, nispa (Mateo 8:26). Hinaspam wayrata qaqchaspan hatun quchata nirqa: “¡Upallaspayki hawkayay!”, nispa (Marcos 4:39). Hinaptinmi wayrawan hatun quchaqa chaylla hawkayarurqa. Marcoswan Lucaspas chaymantaqa willakunkum. Jesusqa puntatas wayratawan quchata qaqchasqa, chaymantañas qatiqninkuna iskayrayasqankumantaqa rimasqa.

Chay nisyu wayrata hinaspa yakuta hawkayarachiptinmi qatiqninkunaqa ima niytapas mana atirqakuchu. Hinaspam mancharikuspanku ninakurqaku: “¿Pitaq kay runaqa kanman wayrapas lamar quchapas kasunanpaqqa?”, nispa. Hinaspañam hatun quchapa wak law chimpanmanqa chayarurqaku (Marcos 4:41–5:1). Jesusta qatiq wakin botekunaqa yaqachusmi kutikurqaku.

Jesuspa chay ruwasqanmi qawachiwanchik tukuy imapas makillanpi kasqanta, chayqa sunqunchiktam tiyaykachin. Payña kay pachata kamachimuptinqa manam nisyu-nisyu wayraqa, llumpa-llumpay paraqa nitaq ima sasachakuypas kanqañachu.