Huk sipascham kawsarirurqa

Hemorragiawan unquq warmita Jesus imayna hampirusqantaqa Jairopas qawarqam. Chaymi payqa warmachan wañurusqantaña piensaspanpas mana iskayrayarqachu Jesus kawsarirachinanmantaqa (Mateo 9:18).

Ichaqa hampisqan warmiwan Jesus rimachkaptinraqmi Jairopa runankuna chayaruspa nirqaku: “¡Warmi churikiqa wañukunñam! ¿Imapaqñataq yachachikuqpa umantaqa nanachinki?”, nispa (Marcos 5:35).

Hinaptinmi Jairoqa muspaypi hinaña tarikurqa. Chaymi llaqtanpi ancha riqsisqa runa kaspanpas chullalla warmi warmachanmanta llumpayta waqallarqa. Jesusñataqmi warmacha wañukusqanta uyariruspan kallpanchaspa nirqa: “Ama llakikuychu, iñiylla-iñiyqa”, nispa (Marcos 5:36).

Hinaspam Jesusqa wasinkama riysirqa. Wasiman chayaruptinkuñataqmi runakunaqa waqachkasqaku, wakinqa waqaspa qaparichkasqaku, wakinñataq llakikuymanta qasqunkutapas takakuchkasqaku. Jesusñataqmi wasiman yaykuykuspan nirqa: “Sipaschaqa manam wañunchu, puñuyllam-puñuchkan”, nispa (Marcos 5:39). Chaynata niptinmi runakunaqa paymanta asikurqaku warmachaqa wañusqaña kasqanta yachaspanku. Jesusñataqmi yachachiyta munarqa Diospa atiyninwanqa puñuqtapas rikcharichichkaq hinalla wañuqkunata kawsarichinanmanta.

Ichaqa wasipi kaqkunata hawaman lluqsirachispanmi Pedrowan, Santiagowan, Juanwan hinaspa warmapa tayta-mamallanwan ukupiqa karqa. Hinaspam warmachapa kasqanman asuykurqaku, hinaptinmi warmachapa makinta hapiykuspan Jesus nirqa: “Talita kumi”, nispa. Chayqa “sipascha qamtam niki, ‘¡hatariy!’” ninanmi (Marcos 5:41). Chaymi sipaschaqa chaylla hatariruspan puriyta qallaykurqa. ¡Maynatachá tayta-mamanqa kusikurqaku! Jesusqa kawsarichisqanta qawachinanpaqmi nirqaraq warmachaman imallatapas mikuchinankupaq.

Jesusqa sapa kuti nisqanman hinam warmachapa tayta-mamantapas nirqa ama pimanpas willakunankupaq. Chaywanpas “chay pasakusqanmantam tukuy chay lawkunapi yacharurqaku” (Mateo 9:26). Arí, piyninchikpas kawsariruptinqa kusikuymantam pimanpas willakuchwan, ¿aw? Chay warmachawanqa iskaykamañam Jesuspa kawsarichisqanqa karqa.