Manam allinchu apuyayllata maskayqa

Fariseo runapa wasinpi mikusqanmanta Jesus lluqsimuptinqa achka runakunam hawapi suyarqaku, chayqa Galileapi hinam karqa (Marcos 1:33; 2:2; 3:9). Chay Judea lawpipas achka runakunam Jesuspa yachachisqanta uyariykuyta munarqaku, paykunaqa manam fariseo runakuna hinachu karqaku.

Paykunatam Jesus nirqa: “Cuidakuychikyá fariseokunapa levaduranmanta utaq iskay uya kayninkumanta”, nispa. Chayqa qatiqninkunapaqpas ancha allinmi karqa. Chaytaqa ñawpaqtapas Jesusqa willakurqañam, chaywanpas kaqllam nirqa fariseokunapa imayna kasqanta yachasqanrayku (Lucas 12:1; Marcos 8:15). Fariseokunaqa mana allin runakunam karqaku, paykunaqa yanqallam Diostapas yupaychaq tukuqku. Chaymi huchankuqa mana pakasqa kananmanta Jesus nirqa: “Manam imapas suma-sumaq tapasqaqa kanchu mana qawanapaq hinaqa, nitaq imapas pakasqaqa kanchu mana yachanapaq hinaqa”, nispa (Lucas 12:2).

Ichapas Jesusta uyariq judiokunaqa manaraq Galilea lawpi Jesuspa yachachisqantaqa uyarirqakuraqchu. Chaymi Jesusqa kaqmanta wakin yachachikuykunamanta yachachispan nirqa: “Amayá manchakuychikchu cuerpoykichik wañuchiqkunataqa, paykunaqa chay ruwayllatam atinmanku”, nispa (Lucas 12:4). Chaynatam Jesusqa kaqmanta yachachichkarqa Jehova Diospi hapipakuy ancha allin kasqanmanta. Paykunaqa Jesuspa qatiqnin kasqankutam riqsichikunanku karqa (Mateo 10:19, 20, 26-33; 12:31, 32).

Chayta Jesus rimachkaptinmi runakuna ukumanta huk runa Jesusta nirqa: “Yachachikuq, wawqiyta niykapuway herenciata ñuqawan rakinakunanpaq”, nispa (Lucas 12:13). Diospa kamachisqanman hinaqa piwi kaq churim aswan achkata ima herenciatapas chaskiq, chaymi chay runaqa mana wawqinwanqa piñanakunanchu karqa (Deuteronomio 21:17). Ichaqa llunkullañachusmi chay runaqa karqa. Chaymi Jesusqa yuyaywan nirqa: “Yaw runa, ¿pitaq churaruwan qamkunapa jueznikichik utaq herencia rakipusuqnikichik kanaypaq?”, nispa (Lucas 12:14).

Hinaspam runakunata yuyaymanachinanpaq nirqa: “Allintayá qawakuychik hinaspa cuidakuychik imatapas llumpay munapayaymanta, runapa vidanqariki tukuy imayuq kaptinpas manam kapuqninkunamantachu kanqa”, nispa (Lucas 12:15). Apu kaspapas manam wañuspaqa imatapas apanchikchu. Chaymantam Jesusqa Diospa qayllanpi allin kay aswan allin kasqanta qawachinanpaq huk apu runamanta willakurqa.

Nirqam: “Huk apu runapam kawsaynin alli-allinta qispirurqa. Hinaptinmi chay runaqa sunqullanpi nirqa: ‘Kunanqariki manam kanchu cosechayta maypi churanaypaqpas. Kunanqa, ¿imatataq ruwasaq?’, nispa. Hinaspam nirqa: ‘Kaytayá ruwasaq: Kawsay waqaychanaykunata paskaruspayá aswan hatuntaña ruwarusaq hinaspa chayman huñusaq lliw kawsayniytawan tukuy imaykunata, hinaspam kikillayta nikusaq: “Kunanqa, unay watakunapaqmi tukuy imaykikuna achkallaña kachkan, chaynaqa hawkallañayá kawsakuy, mikukuy, tomakuy hinaspa kusikuy”’, nispay. Chay runatam ichaqa Dios nirqa: ‘Yaw mana yuyayniyuq runa, kunan tutam wañuchisunki. Hinaptinqa, ¿pipaqtaq kanqa tukuy huñusqaykiqa?’, nispa. Chaynam kanqa Diospaq mana imayuq kaspan kikillanpaq tukuy imata huñuq runawanqa”, nispa (Lucas 12:16-21).

Jesusqa yacharqam qatiqninkunapas hinaspa uyariqnin runakunapas mana musyayllata kapuqniyuq kayta kuyarunankumanta, hinaspa imakunamantapas llumpayta llakikuspa Diosta yupaychachkaspa hukmanyarunankumanta. Chaymi Galilea lawpi ancha riqsisqa yachachikuyninpi nisqanta kaqmanta yachachirqa.

Nirqam: “Amañayá vidaykichikmantaqa llakikuychikchu ‘¿imataraq mikusaq?’ [...], ‘¿imawanraq pachakusaq?’, nispaqa. [...] Qawaychik alton pawaqkunata: Paykunaqa manam tarpunkuchu nitaq cosechankuchu, manataqmi kanchu kawsay waqaychananku wasinkupas nitaq taqinkupas. Chaywanpas Diosmi paykunataqa mikuchin. ¿Manachu qamkunaqa alton pawaqkunamantapas astawan valenkichik? [...] Qawaychiktaqyá waytakunapa imayna wiñasqanta. Waytakunaqa manam afanakunkuchu nitaq puchkankuchu, ichaqa nikichikmi: Manam Salomonpas llumpa-llumpay apu kachkaspanpas, huknin wayta hinallapas pachakurqachu. [...] Chaynaqa amañayá llakikuychikchu: ‘¿Imataraq mikusun, imataraq tomasun?’, nispaqa. Amataqyá ancha llakisqallañaqa [...] kaychikchu. [...] Hanaq pachapi taytaykichikqa yachanmi chaykuna pisipususqaykichiktaqa. Chaynaqa, hinallayá maskaychik Diospa munaychakuyninta, hinaptinqa qusunkichikmi imam pisipususqaykichiktaqa”, nispa (Lucas 12:22-31; Mateo 6:25-33).

Chaymantam Jesusqa Diospa munaychakuynin maskaqkunaqa “aslla kaq ovejakuna” kanankumanta willakurqa. Paykunaqa 144.000 Diosman sunqu runakunallam kananku karqa. ¿Imatam paykunaqa Diosmanta chaskinqaku? Jesusmi nirqa: “Taytaykichikmi tantearun munaychakuyninta qusunaykichikpaq”, nispa. Chaymi paykunaqa hanaq pachapi kapuqninkuta huñunankupaq kallpanchakunanku karqa, manam kay pachapi imatapas huñunankupaqchu. Chaynapi hanaq pachapi Cristowan kuska kamachimunankupaq (Lucas 12:32-34).