Wasimanta nanachikuq allin ruwaq yuyayniyuq sirvientemanta

Jesusqa “aslla kaq ovejakuna” Diospa munaychakuyninpi kanankumantam yachachirqa (Lucas 12:32). Chaytam paykunaqa llumpayta chaninchananku karqa. Chayraykum Jesusqa imaynata chayta suyanankumanta yachachirqa.

Chaymi rikchan-rikchanlla kanankumanta rimaspan nirqa: “Qamkunaqa pachasqa kaspayá listolla kaychik, mecheroykichikpas ratachisqayá kachun, hinaspayá casamientomanta patronnin kutimuqta suyaq runakuna hina kaychik, paykunam patronnin chayamuspan punkuta tacaykamuptin chaylla kichanku. ¡Mayna kusisqam rikchan-rikchanlla kachkaqta patronninpa tarimusqan sirvientekunaqa!”, nispa (Lucas 12:35-37).

Chaytaqa mana sasachakuspallam Jesuspa qatiqninkunaqa uyarirqaku. Patronninkuta suyaq runakunaqa rikchan-rikchanllam suyarqaku, chaymi Jesusqa nirqaraq: “Kusisqataqmá kanku llumpay tutataña utaq chawpi tuta pasaytaña patronnin chayamuspan rikchan-rikchanlla kachkaqta tarimuptinpas”, nispa (Lucas 12:38).

Chaywanqa manam llamkaqllaña allin runakuna kanallankumantachu nichkarqa, aswanqa rikchan-rikchanlla kanankumantawanmi. Hinaspam Jesusqa kikinmantapas rimaspan nirqa: “Chaynaqa qamkunapas listollayá kaychik, mana piensasqaykichik horapim runapa churinqa hamunqa”, nispa (Lucas 12:40). Chaynatam qawachirqa hamuq punchawpi kutimunanta, hinaspa qatiqninkunapas rikchan-rikchanlla kanankumanta, aswanraqmi ‘aslla kaq ovejakunaqa’.

Pedroñataqmi Jesuspa yachachisqanmanta sumaqta yachaykuyta munaspan nirqa: “Señor, ¿kay rikchanachiytaqa niwankiku ñuqallaykumanchu icha lliwmanchu?”, nispa. Jesusñataqmi huk rikchanachiymantawanraq willakuspan nirqa: “¿Pipunitaq wasimanta nanachikuq allin ruwaq yuyayniyuq sirvienteqa? Paytam patronnin churanqa llapa sirvientenkunaman tiempollanpi imam mikunankuta mikuchinanpaq. ¡Mayna kusisqam chay sirvienteqa patronnin chayaramuspan chayna ruwachkaqta tarimuptinqa! Chiqaptapunim nikichik: Tukuy kapuqninkunatam chay sirvientepa makinman churanqa”, nispa (Lucas 12:41-44).

Punta willakusqanpi ‘patronqa’ Jesusmi, ‘wasimanta nanachikuq allin ruwaq yuyayniyuq sirvienteñataqmi’ ‘aslla kaq ovejakunamanta’ wakin kanku, paykunaqa Diospa munaychakuyninpim kanqaku (Lucas 12:32). Chay ‘aslla kaq ovejakunamanta’ wakinmi patronpa ‘sirvientenkunaman tiempollanpi imam mikunankuta mikuchinanku’ karqa. Chaykunaraykuchá Pedrowan Jesuspa wakin qatiqninkunaqa piensarqaku Jesusqa hamuq punchawkunapi kutimunanmanta. Jesuspa chayamunan tiempopaqqa lliw qatiqninkunam Diosmanta yachachikuykunawan allin mikuchisqa hina kananku karqa.

Chaymantam Jesusqa qatiqninkunata nirqa: “Ichaqa, sichu chay sirviente haykapipas sunqunpi ninman, ‘patronniyqa unamuchkanmi’ nispan, hinaspañataq qallaykunman mikukuyta, tomakuyta, sinkakuyta hinaspa qaritapas warmitapas sirvientekuna maqayta, hinaptinqa mana suyasqan punchaw hinaspa mana yachasqan horapi patronnin chayaramuspanmi as-allinta castiganqa, hinaspanmi mana iñiyniyuqkunapa kasqanman wischuykunqa”, nispa (Lucas 12:45, 46). Chaynatam Jesusqa kaqmanta nichkarqa rikchan-rikchanlla kayta manapuni qunqanankumanta, chaynapi ama hukmanyarunankupaq nitaq sirvientemasinkutapas ama hukmanyachinankupaq.

Chaymantam Jesusqa kikinmanta nirqa: “Ñuqaqa hamurqani kay pachapi nina ratachiqmi”, nispa. Imaynam imapas rupaspanqa chinkarun, chaynam Jesuspas pantay yachachikuykunata pinqayman churaspan chinkachirqa. Chaymantapas nina ratachichkaq hina Diosmanta imam kaqta yachachiptinmi runakunaqa chaqwata ruwarqaku. Chaymi nirqa: “Taytam qari churinpa contranpi kanqa, churinñataqmi taytanpa contranpi. Mamanmi warmi wawanpa contranpi kanqa, warmi wawanñataqmi mamanpa contranpi. Suegram llumchuyninpa contranpi kanqa, llumchuyñataqmi suegranpa contranpi kanqa”, nispa (Lucas 12:49, 53).

Tukuy chaykunataqa qatiqninkunamanmi Jesusqa nichkarqa. Chaymantañataqmi wakin runakunata nirqa: “Intipa siqaykunan lawmanta puyu rikurimuptinmi chaylla ninkichik: ‘¡Manchakuypaq wayram hamukuchkan!’, nispa. Hinaptinmi nisqaykichikman hina chayamun. Sur lawmanta wayramuptinñataqmi ninkichik: ‘Llumpa-llumpaytam rupamunqa’, nispa. Hinaptinmi nisqaykichikman hina rupamun. ¡Yaw iskay uyakuna! Qamkunaqa cielotawan kay pachatapas qawaspaykichikmi yachankichik imayna tiempo kananta, hinachkaptinqa, ¿imaynamá manaqa yachankichikchu imanasqa kay tiempopi imapas pasasqantaqa?”, nispa (Lucas 12:54-56). Chaynatam nirqa achka runakuna Diospa kachamusqan kasqanmanta iskayrayasqankurayku.