Perea lawpi Diosmanta Jesuspa willakusqan

Jesusqa Jerusalenpi hinaspa Judea lawpim Diosmanta willakuspan chaynataq unquqkunatapas hampispan purirqa. Chaymantam Jordan mayuta chimpaspan Perea lawpipas llaqtan-llaqtan Diosmanta willakurqa Jerusalenman kutinanña kaptinpas.

Chay Perea lawpim huk runa nirqa: “Señor, ¿asllachu salvakunqaku?”, nispa. Chaynataqa ichapas nirqa religionkunapi punta apaqkuna pikuna salvakunankumanta tukuyta rimasqankurayku. Jesusñataqmi tapusqanmantaqa mana imatapas nispan salvakunapaqqa ima ruwanamanta nirqa: “Anchatayá kallpanchakuychik kichki punkunta yaykunaykichikpaq”, nispa. Chaymantapas imanasqa ancha kallpanchakunamantam nirqa: “Achkallañam yaykuyta munanqaku, ichaqa manam atinqakuchu”, nispa (Lucas 13:23, 24).

Chaymantapas nirqaraqmi: ‘Maypacham wasiyuq hatariruspan punkunta llavewan wichqaruptinqa qamkunam hawapi sayachkaq qiparunkichik, hinaspam punku takayta qallaykunkichik: “Señor kichaykullawayku”, nispa. Wasiyuqñataqmi nisunkichik: “¡Maymantachá qamkunaqa kankichikpas, qayllaymanta llapallaykichik pasawaychik mana allin ruwaqkuna!”’, nispa (Lucas 13:25-27).

Jesuspa chay willakusqanpi runaqa llavewanña patron punkuta wichqaruptinmi qipataña chayarqa, ichaqa allinllapi chayayta atichkaspanpas llullantañam qipataqa chayarqa. Yaqa chaynam Jesuspa yachachisqanta uyariq achka judio runakunapas karqaku, paykunaqa atispankupas manam Diosta puntapi churanankupaqchu Jesustaqa uyariqku. Hinaspam salvakunankupaq Diospa kachamusqan churintaqa qipanchaqku. Chaymi Jesusqa nirqa chay runakunaqa qarqusqa kaspanku ‘kirunkutapas kirichichichispa’ waqanankumanta. Chaywanpas llapan nacionkunamanta runakunam hamunanku karqa ‘Diospa munaychakuyninpa mesanpi tiyaykunankupaq’ (Lucas 13:28, 29).

Jesusqa nirqataqmi: “Qipapi kaqkunam puntapi kanqaku, puntapi kaqkunañataqmi qipapi kanqaku”, nispa (Lucas 13:30). ‘Qipapi kaqkunaqa’ judio religionman yaykukuqkunam hinaspa ñakarichisqa kaq hina judiokunam. ‘Puntapi kaqkunañataqmi’ religionkunapi hatun tukuq punta apaqkuna. Paykunaqa ‘qipapi kachkaq hinam’ Diospa munaychakuyninpiqa mana kanqakuchu.

Chayna rimachkaptinmi wakin fariseokuna Jesusman asuykuspa nirqaku: ‘Kaymanta lluqsispa pasakuy, Herodes Antipasmi wañuchiyta munasuchkanki’, nispa. Chaytaqa ichapas Herodesqa Jesus huk lawman pasakunanta munaspan rimarqa, Herodesqa ichapas mana munarqachu bautizaq Juan hina hukpas makinpi wañurunantaqa. Jesusñataqmi fariseokunata nirqa: “Rispaykichikyá chay atuqta nimuychik: ‘Payqa demoniokunatam qarquchkan hinaspam kunanpas paqarinpas unquqkunata sanoyachinqa, minchañam tukunqa’”, nispa (Lucas 13:31, 32). Jesusqa chaynataqa ichapas nirqa sacrellaña ‘atuq’ hina Herodes kasqanrayku. Chaywanpas Jesusqa manam pitapas manchakurqachu nitaq Herodespa nisqantachu ruwarqa, aswanqa taytanpa kamachisqanman hinam imatapas ruwarqa.

Chaymantam Jesusqa Jerusalenman kutirqa “manam Diosmanta willakuqqa wañuchisqachu kanan Jerusalenmanta hawapiqa” nispan (Lucas 13:33). Ichaqa chayna kananmantaqa manam ima willakuypas karqachu. Hinaptinqa, ¿imanasqataq Jesusqa Jerusalenpi wañuchisqa kananmanta nirqa? Chay llaqtapi 71 tukuy rikchaq autoridadkunapa juzgananku wasi kasqanraykum, chaymanmi pusaqku Diosmanta willakuq tukuq kasqankupaq tumpasqa kaqkunata. Chaymantapas Jerusalenpim Diospaq uywakunata kañapuqku. Chaykunaraykum Jesusqa Jerusalenpi wañuchisqa kananmanta yacharqa.

Chaymantam llakirikuruspan nirqa: “¡Jerusalen! ¡Jerusalen! Qamqa Diosmanta willakuqkunatam wañuchinki. Qanman kachamusqa runakunatam rumikunawan chuqapanki. ¡Rapran ukupi llapallan chiwchichankunata huñuchkaq wallpa hinam runaykikunata achka kutipi huñuyta munarqani, ichaqa manam munarqankichu! Chayraykum wasikichikta Diosqa saqinqa”, nispa (Lucas 13:34, 35). Chay judio runakunaqa Diospa churinta qipanchasqankuraykum ñakarichisqa kananku karqa.

Chaymantam manaraq Jerusalenman Jesus chayachkaptin huknin kamachiq fariseo wasinman mikuq pusarqa sabado punchawpi. Wakin runakunañataqmi qaway-qawaqku makinpas chakinpas punkipasqa runata Jesus hampirunanta utaq mana hampirunantapas. Jesusñataqmi fariseokunata hinaspa Moisespa chaskisqan kamachikuykunamanta yachaqkunata tapurqa: “¿Allinchu kanman sabado punchawpi sanoyachiy icha manachu?”, nispa (Lucas 14:3).

Ichaqa manam pipas rimarirqachu, Jesusñataqmi runata hampiruspan chay runakunata kaqmanta nirqa: “Qamkunamanta, ¿mayqinnikichiktaq churikichik utaq toroykichik uchkuman wichiykuptin sabado punchawpi chaylla mana hurqunkichikchu?”, nispa (Lucas 14:5). Chayna nisqanwanqa huk kutipi hinam mana ima niytapas atirqakuchu.