“Allin yuyayniyuq hinaspa qawan-qawanllayá kaychik”

1. ¿Ima nispam Jesus nirqa qatiqninkunata Diospa piñakuynin punchaw haykapi chayamunanmanta? ¿Imayna kanankupaqmi nirqa?

MANARAQ Jesus wañukuchkaptinmi tawa qatiqninkuna tapuykurqaku “tiempopa tukupayninmanta” imayna yachanankumanta (Mat. 24:3). Ichapas paykunaqa yachayta munarqaku judiokuna Diosta imayna yupaychasqanku tukunanpaq hichpamusqanta imayna cuentata qukunankumanta. Qatiqninkunata contestaspanqa manam Jesusqa chayllamantachu rimarqa, rimarqataqmi kay kawsakusqanchik ‘tiempopa tukupayninmantapas’. Diospa piñakuynin punchaw haykapi chayamunanmantam Jesusqa kaynata nirqa: “Chay punchawmanta hinaspa chay horamantaqa manam pipas yachanchu, hanaq pachapi angelkunapas nitaq Diospa churinpas, aswanqa taytallaymi yachan”, nispa. Chaymantam qatiqninkunata imayna kanankupaq nirqa: ‘Qawan-qawanlla hinaspa rikchan-rikchanllayá kaychik’, nispa (Mar. 13:32-37).

2. ¿Imanasqataq Jesuspa qatiqninkunaqa qawan-qawanlla kananku karqa?

² Ñawpaq tiempopi Jesuspa qatiqninkunaqa qawan-qawanllam kananku karqa. Chaymantam kawsakuyninkuqa karqa. Jesusqa qatiqninkunamanqa clarotam nirqa judiokuna Diosta yupaychasqanku tukunanpaq hichpamusqanta imayna cuentata qukunankumanta. Chaymi kaynata nirqa: “Jerusalen llaqtata tropakuna muyurirusqanta rikuspaykichikqa, yachaychikyá purmachisqa kaynin hichparamusqanta”, nispa. Chaykuna pasasqanta qawaspankum paykunaqa urqukunaman ayqikunanku karqa Jesuspa nisqanman hina (Luc. 21:20, 21). Jesuspa nisqanta kasukuqkunaqa Roma soldadokuna Jerusalenta manaraq chinkachichkaptinkum ayqikurqaku, chaymi mana wañurqakuchu.

3. ¿Imamantam kay yachachikuypi yachasun?

³ Ñuqanchikqa satanaspa munaychakusqan tiempopa tukupayninpim kawsachkanchik. Chayraykum ñawpaq tiempopi Jesuspa qatiqninkuna hina qawan-qawanlla kananchik. Chaymi kay yachachikuypi yachasun enteron pachapi tukuy imakuna pasakusqanta qawaspa imayna kanamanta. Yachasuntaqmi kikinchik allinta qawarikunamantapas chaynataq tukupay punchawpiña kasqanchikrayku tiemponchikta mana usuchinamantapas.

4. ¿Imanasqataq yachaykuyta munanchik tukuy imapas pasakusqanmanta?

⁴ ¿Imanasqataq yachaykuyta munanchik tukuy imakuna pasakusqankunawan bibliapa nisqan imayna cumplikusqanmanta? Jesusmi nirqaña satanaspa munaychakusqan tukunanpaq hichpamuptin imakuna pasakunanmanta (Mat. 24:3-14). Apostol Pedrom kallpanchawarqanchik bibliapa nisqankuna cumplikusqanta allinta qawananchikpaq, chaynapi allin iñiyniyuq kanapaq (2 Ped. 1:19-21). Chaymantapas, Apocalipsis librom kaynata qallarin: “Tukuy kay willakuykunaqa Jesucristopa revelasqanmi. Paymi tukuy kaykunataqa Diosmanta chaskirqa pisi tiempollamantaña imakuna pasakunanmanta”, nispa (Apoc. 1:1). Chaykunaraykum yachaykuyta munanchik enteron pachapi tukuy imapas pasakusqanmanta hinaspa chay pasakusqankunawan bibliapa nisqan imayna cumplikusqanmanta. Wakiqninchiktaqa ichapas gustawachwan chaykunamanta iñiqmasinchikkunawan rimay.

5. ¿Imanasqataq bibliapa willakusqankuna cumplikusqanmanta rimaspaqa cuidakunanchik hinaspa imatam yachananchik? (Qawaytaq fotokunatapas).

⁵ Bibliapa willakusqankuna imayna cumplikusqanmanta rimaspaqa cuidakunanchikmi. ¿Imanasqa? Kikinchikpa piensasqanchikmantaña rimaspaqa iñiqmasinchikkunatam rakinarachichwan. Ichapas gobiernokunaqa guerra manaña kananpaq hinaspa runakuna seguroña kawsakunankupaq imatapas ruwanankupaq ninmanku. Chayta uyarispa “1 Tesalonicenses 5:3 nisqanmi cumplikuchkanña” nispa piensanamantaqa Diospa llaqtanpi punta apaqkunapa ima nisqankutam yachananchik. Paykunapa nisqanman hina imatapas rimaspanchikqa iñiqmasinchikkunawanmi “huk sunqulla” kasun (1 Cor. 1:10; 4:6).

6. ¿Imatam yachachiwanchik 2 Pedro 3:11-13 nisqan?

⁶ (Leey 2 Pedro 3:11-13). Apostol Pedrom yanapawanchik bibliapa willakusqankuna cumplikuptin imayna kanapaq. Paymi kallpanchawanchik ‘Jehova Diospa punchawnin chayamunanta qawan-qawanlla suyananchikpaq’. Chaynataqa nin manam imay punchaw hinaspa imay hora Armagedon chayamunanta yachayta munasqanchikraykuchu, aswanqa tiempo kachkaptinraq ‘chuyay-chuyay kawsakunapaqmi hinaspa Diosta tukuy sunquwan servisqanchikta ruwasqanchikwan qawachinapaqmi’ (Mat. 24:36; Luc. 12:40). Arí, Diosta tukuy sunquwan kuyasqanchikraykum imayna kasqanchikqa hinaspa imapas ruwasqanchikqa kanan. Chaypaqqa sapakamam allinta qawakunanchik.

7. ¿Imatam ruwananchik kikinchik allinta qawakunapaq? (Rimarimuytaq Lucas 21:34 nisqanmantapas).

⁷ Jesusqa qatiqninkunataqa nirqa manam enteron pachapi tukuy imakuna pasakusqanta qawanallankupaqchu, nirqataqmi kikinkuta qawakunankupaqpas. Chayna nisqanmi kachkan Lucas 21:34 (leey) nisqanpi. Paymi nirqa: “Allintayá qawakuychik”, nispa. ¿Imatam ruwananchik kikinchik allinta qawakunapaq? Diosmanta karunchawaqninchik kaqkunamantam cuidakunanchik. Chayta ruwaptinchikqa Diosninchikmi hinalla kuyawasun (Prov. 22:3; Jud. 20, 21).

8. ¿Imatam Pablo qillqarqa iñiqmasinkunaman?

⁸ Apostol Pablom iñiqmasinkunata nirqa kikinku allinta qawakunankupaq. Chaymi Efeso llaqtapi iñiqmasinkunaman qillqarqa: “Amayá ruqru umakuna hinaqa kawsakuychikchu, aswanqa yachayniyuqkuna hinayá kawsakuychik”, nispa (Efes. 5:15, 16). Satanasqa imaynatapas Diosmanta karuncharuytam munawachkanchik. Chaymi bibliapi niwanchik ‘Diospa imam munaynin kasqanta’ allinta entiendenapaq. Chaynapi satanaspa tuqllankunaman mana wichiykunapaq (Efes. 5:17).

9. ¿Imaynatam entiendechwan Diospa imam munaynin kasqanta?

⁹ Bibliaqa manam Diosmanta imakuna karuncharuwananchikmantaqa lliwtachu willawanchik. Chaymi imapaqpas sutillata biblia mana niptinqa sapakama tantiakunanchik. Allinta tantianapaqqa “Diospa imam munaynin” kasqantam entiendenanchik. Chaypaqqa sapa punchaw bibliata leespanchikmi chaypi yuyaymanananchik. Diospa munaynin imam kasqanta entiendespanchikqa hinaspa ‘Cristopa piensasqanman hina piensanapaq’ kallpanchakuspanchikqa ‘yachayniyuqkuna hinam’ kawsakusun imatapas ruwanapaq kamachikuy mana sutilla kaptinpas (1 Cor. 2:14-16). Wakinpiqa chayllam cuentata qukunchik imapas mana allin kasqanta, wakinpiñataqmi mana.

10. ¿Ima mana allinkunamantataq cuidakunanchik?

¹⁰ Mana allinkunamanta wakinmi pitapas yanqamanta asikachay, llumpayta tomay utaq mikuy, nanay simi kay, maqanakuykunata utaq wañuchinakuykunata qaway, chaykunapi pukllay hinaspa qalalla kaqkunata qaway (Sal. 101:3). Enemigonchik diabloqa tukuytamá ruwachkan Jehova Diosmanta karuncharuwananchikpaq (1 Ped. 5:8). Tukuy chay mana allinkunamanta mana cuidakuspanchikqa yuyayninchikpiwan sunqunchikpim qallaykuchwan envidiakuq kayta, llullakuq kayta, imatapas munapayaq kayta, chiqnikuq kayta, hatuntukuq kayta hinaspa mana pampachakuq kayta (Gal. 5:19-21). Tukuy chaykunamanta cuentata qukuruspanchikqa chayllam sunqunchikmanta chinkachinanchik, manachayqa tiempopa risqanman hinam hatun huchaman wichiykuchwan (Sant. 1:14, 15).

11. ¿Imaynatam mana cuentata qukuspanchik mana allinman wichiykuchwan? ¿Imanasqataq mana allin ruwaqkunawanqa mana hukllawakunanchikchu?

¹¹ Kunanñataq rimarisun mana cuentata qukuspanchik imaynata mana allinman wichiykunamanta. Jehova Diospa testigonkuna allin runakuna kasqanchikta qawachinapaqmi respetowan pitapas rimapayanchik hinaspa imapipas yanapaykunchik. Ichapas chayrayku mana testigo llamkaqmasinchikwan wakinpi kuska mikuyta qallaykuchwan, chaymantaqa sapa punchawña. Payqa ichapas huchapakuymanta rimanman. Qallariypiqa ichapas pinqakuspanchik mana imatapas nichwanchu. Punchawkuna pasasqanman hinam ichaqa amañarusqanchikrayku manaña pinqakuchwanchu. Huk punchawñataq niwachwan llamkay tukuyta imatapas tomaq rinanchikpaq, ñuqanchikñataq “arí” niykuchwan, hinaspaqa llamkaqmasinchik hinañam piensayta qallaykuchwan. Chaynaqa, ¿manachu llamkaqmasinchikwan sapa punchaw hukllawakusqanchikrayku pay hinaña mana allin ruwayta qallaykuchwan? Llapallan runakunawan kuyakuq hinaspa respetakuq kaspanchikpas, yuyarinanchikmi mana allin ruwaq runakunawan hukllawakuspaqa paykuna hina kayta qallaykunanchikta (1 Cor. 15:33). Jesuspa nisqanta kasukuspaqa hinaspa kikinchik allinta qawakuspaqa manam Diosta mana kasukuq runakunawanqa llumpaytaqa hukllawakusunchu (2 Cor. 6:15). Arí, mana allinkunamanta cuentata qukuspam chaylla karunchakusun.

12. ¿Imatam Jesuspa qatiqninkunaqa ruwananku karqa tukupay punchaw chayamunankama?

¹² ¿Yaqachu Jesuspa qatiqninkunaqa mana imatapas ruwaspanku tukupay punchaw chayamunanta suyanmanku karqa? Manam, Jesusmi paykunataqa kamachirqa “Jerusalenpi, enteron Judeapi, Samariapi chaynataq kay pachapa cantonkama” Diospa gobiernonmanta willakunankupaq (Hech. 1:6-8). Arí, ima ruwanankuqa sasam karqa, chaywanpas Diosmanta willakuypi ocupasqa kaspankuqa manam tiemponkutaqa usuchinmankuchu karqa.

13. ¿Imanasqataq tiemponchikta mana usuchinanchikchu? (Rimarimuytaq Colosenses 4:5 nisqanmantapas).

¹³ (Leey Colosenses 4:5). Kikinchikta allinta qawakunapaqqa tiemponchikta imayna servichikusqanchiktam yachananchik. Eclesiastes 9:11 nisqanman hinam ‘qunqayllamanta imapas pasaruwachwan’. Arí, qunqaymantam wañuypas hayparamuwachwan.

14, 15. ¿Imakunatam ruwasun tiemponchikta allinta servichikuspaqa? (Rimarimuytaq Hebreos 6:11, 12 nisqanmantapas, qawaytaq fototapas).

¹⁴ Tiemponchikta allinta servichikuspaqa Diospa munayninta ruwaypim ocupasqa kasun, hinaspapas payman astawan asuykunapaqmi tukuyta ruwasun (Juan 14:21). Bibliam nin: “Mana imapa kuyurichinanyá kaychik, hinaspapas allintayá sayaychik, hinaspayá señorninchikpa ruwayninpi tukuy tiempo astawan llamkaychik”, nispa. Chayna nisqantam kasukunanchik (1 Cor. 15:58). Chaynapim wañuy hayparamuwaptinchikpas utaq kay tiempopa tukupaynin chayamuptinpas mana pesakusunchu “kaytawan utaq waktawanchiki Jehova Diospaqqa ruwayman karqa” nispaqa (Mat. 24:13; Rom. 14:8).

¹⁵ Jesusqa niwasqanchikman hinam hinalla yanapawachkanchik enteron pachapi Diospa gobiernonmanta willakunapaq. Payqa Jehova Diospa llaqtanpi kaqkunawanmi yanapawachkanchik imayna willakunapaq hinaspa imakunawan willakunapaq (Mat. 28:18-20). Chaymi tukuy mana allinkunata Jehova Dios chinkachinan punchaw chayamunankama kallpanchakunanchik Diosmanta willakunapaq hinaspa bibliamanta allinta yachachinapaq, hinaspapas rikchan-rikchanllam kananchik. Hebreos 6:11, 12 (leey) nisqanta kasukuspanchikqa mana iskayrayaspam tukupaykama suyasun.

16. ¿Imatam llapallanchik kasukuyta munanchik?

¹⁶ Jehova Diosqa tantiarunñam satanaspa munaychakusqan tukuy mana allinkunata haykapi chinkachinanpaq. Chay punchaw chayaramuptinqa palabranpi lliw nisqankunatam cumplinqapuni. Diospa piñakuynin punchaw unamusqanta piensaptinchikpas chay punchawqa “tiempollanpim chayamunqa” (Hab. 2:3). Chayraykum llapallanchik munanchik Miqueas 7:7 nisqanta kasukuyta, chaypim nin: ‘Haykapipas Jehova Diosllapim suyay-suyallasaq. Mana amispam yanapaykuwaqniy Diosllayta suyallasaq’, nispa.