Pi aswan riqsisqa kasqankumantam atipanakurqaku

Jesusqa pascua fiestata ruwasqanku tutam apostolninkunapa chakinta mayllarqa, chayta ruwaspanmi mana hatun tukuq kayta yachachirqa. Chaynataqa yachachirqa Diosman sunqu kaspankupas apostolninkunaqa hatun tukuspa hinalla pantasqankuraykum, paykunaqa pim aswan riqsisqa kasqankumantam atipanakurqaku (Marcos 9:33, 34; 10:35-37). Chayna kasqankutam chay tutapas qawachikurqaku.

Mikuyta tukuruptillankum ‘paykunaqa llumpayta atipanakurqaku mayqinninku aswan riqsisqa kasqankumanta’ (Lucas 22:24). ¡Jesusqa maynataya llakikurqa hinalla atipanakusqankuta qawaspanqa! Ichaqa, ¿imatam ruwarqa?

Chayna kasqankumanta qaqchapananmantaqa sumaqllatam yuyaymananankupaq nirqa: “Kamachiqkunam nacionkunata kamachinku, runakunapas kamachiqninkutam sumaq sutikunawan sutichanku. Qamkunaqa manam chaynachu kanaykichik. Aswanqa qamkunamanta pipas riqsisqa kaqqa llapallanpa sullkan hinam kanan, kamachiqpas sirviente hinam kanan. ¿Pitaq aswan riqsisqa? ¿Mikuqchu icha serviqchu?”, nispa. Hinaspam kikinpa ruwasqanmanta rimaspan nirqa: “Chaywanpas ñuqaqa qamkunapa serviqnikichik hinam kachkani”, nispa (Lucas 22:25-27).

Chayna pantaqllaña kaspankupas apostolkunaqa Jesuswan kuskam karqaku ima sasachakuypiña kaspankupas. Chaymi Jesusqa nirqaraq: “Ñuqam kamachinaykichikpaq qamkunawan acuerdota ruwani, imaynam taytaypas kamachinaypaq ñuqawan acuerdota ruwasqanman hina”, nispa (Lucas 22:29). Paykunaqa Jesusta kuyaq runakunam karqaku, chaymi Jesusqa paykunawan acuerdota utaq contratota ruwaspan nirqa hanaq pachapi paywan kuska kamachiqkuna kanankumanta.

Chayna kaptinpas apostolkunaqa hinallaraqmi pantaq runakuna karqaku. Chaymi Jesus nirqa: “Satanasmi munan qamkunata trigota hina suysuruyta”, nispa. Chayqa harnerowan suysuy hinam karqa (Lucas 22:31). Chaymantapas nirqam: “Llapallaykichikmi kunan tuta ñuqata saqiruwankichik, qillqasqam kachkan: ‘Michiqta wañurachiptiymi kanchapi ovejakuna chiqichisqa kanqaku’”, nispa (Mateo 26:31; Zacarias 13:7).

Pedroñataqmi qarillaña nirqa: “Llapallanku saqirusuptikipas, ñuqataqa manapunim haykapipas hukmanyachiwanqachu”, nispa (Mateo 26:33). Jesusñataqmi manaraqpas iskay kutita gallo waqachkaptin negananmanta nirqa. Chaywanpas nirqataqmi: “Ñuqam ichaqa qampaq Diosta mañakuruni iñiyniki mana chiriyarunanpaq, kutiramuspaykiñataqmi iñiqmasikikunata kallpanchanki”, nispa (Lucas 22:32). Chaywanpas Pedroqa nirqam: “Qanwan wañunay kaptinpas manapunim negasqaykichu”, nispa (Mateo 26:35). Chaynallatam wakin apostolkunapas nirqaku.

Jesusñataqmi nirqa: “Manam unayñachu qamkunawanqa kasaq. Maskawankichikmi, ichaqa qamkunatapas nikichikmi judiokunaman nisqayta hina: ‘Maymi risqaymanqa manam qamkunaqa riyta atiwaqchikchu’”, nispa. Nirqataqmi: “Musuq kamachikuytam quykichik: Qamkunapurayá kuyanakuychik. Imaynam ñuqapas qamkunata kuyarqaykichik chaynatayá qamkunapas kuyanakuychik. Qamkuna kuyanakuptikichikmi llapallan runakuna yachanqaku qatiqniykuna kasqaykichikta”, nispa (Juan 13:33-35).

Manaña unay paykunawan kananmanta Jesuspa rimasqanta uyarispanmi Pedro nirqa: “Señor, ¿maytataq richkanki?”, nispa. Jesusñataqmi nirqa: “Maymi risqaymanqa manam kunanqa qatiwankimanchu, qatiwankiqa chaymantañam”, nispa. Pedroñataqmi hukmanrayaspan nirqa: “Señor, ¿imanasqataq kunanqa mana qatikimanchu? Qamraykuqa vidaytapas qusaqmi”, nispa (Juan 13:36, 37).

Chaymantam Jesusqa Galilea lawpi kachkaptinkuraq alforjatapas nitaq imatapas mana apanankumanta nisqanta yuyarichirqa (Mateo 10:5, 9, 10). Hinaspam nirqa: “Manam imaykichikpas pisirqachu ¿aw?”, nispa. Paykunañataqmi “manam” nirqaku. Ichaqa qipakunaman ima ruwanankumantam Jesus nirqa: “Kunanyá ichaqa pipapas qullqi waqaychana wayqan hinaspa alforjan kaptinqa apachun, mana espadan kaptinpas hawan pachanta rantikuspanyá huk espadata rantichun. Nikichikmi, ‘leyta mana kasukuqkunawanmi hukllawasqa karqa’ nispa qillqasqa kasqanmi ñuqapi cumplikunan. Ñuqamanta willakuykunaqariki cumplikuchkanmi”, nispa (Lucas 22:35-37).

Jesusqa rimachkarqa suwakunawan kuskata qirupi warkunankumantam. Chaymanta qipamanqa qatiqninkunapas qatikachasqam kananku karqa. Paykunañataqmi chaypaq hinaña hapikuspanku nirqaku: “Señor, kayqaya kaypi kachkan iskay espadakuna” nispa. Jesusñataqmi nirqa: “[Nis] chayllapaqmi”, nispa (Lucas 22:38). Chaymanta qipakunallatam Jesusqa chay espadamanta sumaqta yachachirqa huk kaqninku servichikuyta qallaykuptin.