Jesuspa bautizakusqan

Bautizaq Juan yaqa suqta killaña Diosmanta willakuchkaptinmi Jesusqa Juanta maskaq Jordan mayuman rirqa. Ichaqa manam yanqa watukuqchu nitaq ruwasqan imayna kasqanta qawaqchu, aswanqa Juanwan bautizachikuqmi. Jesusqa yaqa 30 watayuqñam kachkarqa.

Juanmi ichaqa mana munaspan nirqa: “Ñuqam qampa bautizananqa kanay, hinachkaptinchu ¿qamraq ñuqaman hamuwanki?”, nispan (Mateo 3:14). Payqa yacharqam Jesusqa Diospa churin kasqanta. Maman Elisabetmi willarqa tian Maria Jesuswan wiksayuq kachkaspan watukuqninku riptin Elisabetpa wiksanpi pay kuyurirusqanta. Chaymantapas Juanqa yacharqataqmi Jesus nacenanmanta huk angel willakusqanta hinaspa Jesus nacesqan tuta michiqkunaman angelkuna rikuriykusqantapas.

Juanqa huchankumanta wanakuqkunatam bautizarqa, Jesusmi ichaqa mana huchayuq kachkaspanpas bautizachikuq rirqa. Hinaspam Juanta hinalla nirqa: “Kunanllayá kachun, chayna mana kaptinqa manam Diospa tukuy munasqantaqa ruwachwanchu”, nispa (Mateo 3:15).

¿Imapaqtaq Jesusqa bautizakunan karqa? Taytanpa munaynintaña ruwayta qallarinanpaqmi, manam huchayuq kasqanmanta wanakusqanraykuchu, payqa mana huchayuq runam karqa (Hebreos 10:5-7). Unay watakunam Jesusqa carpintero hina llamkarqa, bautizakusqan punchawmantam ichaqa taytanpa imam kamachisqantaña ruwarqa, chaypaq kay pachaman hamusqanrayku. ¿Juanqa yacharqachu Jesus bautizakuptin imapas kananmanta?

Diospa willasqanman hinaqa yacharqam pimanpas chuya espiritu uraykamunanta, “paymi chuya espirituwan bautizaqqa” kanan karqa (Juan 1:33). Chayraykum runakunata bautizaspanqa qawan-qawanlla karqa pipa hawanman chuya espiritu uraykamusqanta qawananpaq. Chaymi anchata kusikurqa Jesus bautizakuptin “Diospa espiritun paloma hina payman uraykamuchkaqta” rikuspan (Mateo 3:16).

Chaymantapas hanaq pacha kicharikusqantam rikurqa. ¿Imatam chayqa Jesusmanta qawachin? Jesusqa yaqachá chaywanqa yuyariyta qallaykurqa hanaq pachapi taytan Jehova Dioswan kuska kasqanta, chaynataq manaraq kay pachaman hamuchkaspan tukuy ima yachasqantapas.

Chaymantapas Jesus bautizakuptinmi hanaq pachamanta nimurqa: “Paymi churiy, paytam kuyani hinaspapas chaskinim”, nispa (Mateo 3:17). ¿Pitaq chay rimamuqqa karqa? Manamá Jesuschu karqa, payqa Juanwanmi yakupi kachkarqaku. Jehova Diosmi chay rimamuqqa karqa, chaymi qawachin Jesusqa Diospa churin kasqanta.

Kay pachapi Jesus kaspanqa Jehova Diospa unanchasqan Adan hina runam karqa. Chaymanta rimaspanmi Jesuspa qatiqnin Lucas nirqa: “Yaqa kimsa chunka watayuq kachkaspanmi Jesusqa yachachiyta qallaykurqa. Runakunapa willakusqankuman hinam Jesusqa Joseypa churin karqa, Joseyñataq Heliypa churin, [...] Davidpa churin, [...] Abrahanpa churin, [...] Noeypa churin, [...] Adanpa churin, Adanñataq Diospa churin”, nispa (Lucas 3:23-38).

Arí, Adanqa Diospa unanchasqan runam karqa, chaynam Jesuspas Adan hina runa karqa. Bautizakuruspanmi ichaqa hanaq pachapi kasqanman hina Diospa aswan kuyasqan churin rikurirurqa. Chaymantapacham Jesusqa Diosmanta imam kaqta yachachirqa hinaspa imata ruwaspa wiñay kawsayta haypanamantapas. Jesusqa runakunapa rantinpi wañukunankamam chaytaqa ruwarqa.