Diosta serviq familiakuna, rikchan-rikchanlla kaychik

“Rikchaspayá cuidakusunchik.” (1 TES. 5:6.)

1, 2. ¿Imatam familiakuna rurananku rikchan-rikchanlla kanankupaq?

JEHOVÁ ‘DIOSPA manchakuypaq punchawnin chayamunanmanta’ rimaspanmi Tesalonica llaqtapi iñiqkunaman Pablo nirqa: “Wawqe-panillaykuna, qamkunam ichaqa mana tutapichu kachkankichik, chaynaqa hamunan punchawqa manam suwa hinachu tarimusunkichik. Qamkunaqa kanchaymanta hinaspa punchawmanta kaqmi llapallaykichik kankichik, ñoqanchikqa kanchik manam tutayaymanta kaqchu”, nispa. Nirqataqmi: “Amayá wakinkuna hina puñukuqllachu kasun, aswanqa rikchaspayá cuidakusunchik”, nispa (Joel 2:31; 1 Tes. 5:4-6).

² Apostol Pablopa kayna nisqanqa ancha allinpunim ñoqanchikpaqpas, tukupay tiempopi kawsasqanchikrayku (Dan. 12:4). Nisqanta kasukuyqa hinaspa rikchan-rikchanlla kayqa yanapawasunmi. ¿Imanasqa? Mana allin ruraq runakunapa puchukaynin hichpaykamusqanrayku, hinaspa Diosmanta karunchawananchikpaq Satanas tukuyta rurasqanrayku. ¿Imatam rurananku Diosta serviq familiakuna Diosmanta mana karunchasqa kanankupaq? Sapakamaman Jehová Diospa kamachisqantam kasukunanku. Qawasunchik imaynatam qosapas, señorapas hinaspa churi-wawakunapas yanapakunmanku familiankupi rikchan-rikchanlla kanankupaq.

Qosakuna, ‘allin michiqta’ qatipakuychik

 3. ¿Ima rurayniyoqmi kanku qosakunaqa 1 Timoteo 5:8 nisqanman hina?

³ Bibliam nin ‘qariqa warmipa uman’ kasqanta (1 Cor. 11:3). ¿Imatam qosaqa ruranan familiapi uma kasqanta allinta cumplinanpaq? Huknin kaq rurayninmantam Biblia nin: “Pipas ayllunkunata mana mantieneyta munaspanqa, tukuymanta llalliqtaqa wasinpi yachaqkunata mana mantienespanqa qepanchakurunñam iñisqantapas, payqa Diosman mana iñiq runakunamantapas peorraqmi rikurirun”, nispa (1 Tim. 5:8). Qawasqanchikman hinaqa, qosam familianta mantienenan. Ichaqa manam chayllachu. Familian rikchan-rikchanlla kayta munaspanqa, yanapananmi iñiyninpiwan Dioswan amistadninkupi allin takyasqa kanankupaq (Pro. 24:3, 4). ¿Imaynatam chayta ruranman?

 4. ¿Imatam qosaqa ruranan familian iñiyninpi allin takyasqa kananta munaspanqa?

⁴ “Qosaqa warmipa umanmi, chaynam Cristopas llapallan iñiqkunapa uman”. Chaymi qatiqninkunata Jesus imayna pusasqanmanta qosaqa yachanan, hinaspam familianta nanachikunanpaq qatipakunan (Efe. 5:23). Qatiqninkunawan imayna kasqanta qawachinanpaqmi Jesusqa tupachikurqa michiqwan (leey Juan 10:14, 15). Arí, Jesusqa “allin michiqmi”, chaymi qosaqa familian iñiyninkupi allin kananta munaspanqa, Jesuspa rimasqantawan imakuna rurasqanta estudianan hinaspa ‘ejemplonta qatikunan’ (1 Ped. 2:21).

 5. ¿Maynatam Jesusqa qatiqninkunata reqsin?

⁵ Qawasunchik imaynatam qosaqa Jesuspa ejemplonta qatipakunman. Michiqqa ovejankunatam allinta reqsin, ovejankunapas michiqnintam reqsinku, chaymi qayasqanta uyarispanku kasukunku. Chaychá Jesusqa nirqa: “Reqsinitaqmi ovejaykunatapas hinaptinmi paykunapas reqsiwan”, nispa. Qatiqninkunataqa manam yanqa-yanqallatachu reqsin. Griego rimaypi “reqsiy” ninanqa “alli-allinta reqsiy” ninanmi. Jesusqa allintapunim reqsin sapakama qatiqninkunata: imapas necesitasqankuta, imayna kasqankuta hinaspa pantasqankutapas. Manam imapas pakasqachu kachkan. Qatiqninkunapas payta allintapuni reqsispankum kasukunku.

 6. ¿Imaynatam qosaqa Jesusta qatipakunman?

⁶ ¿Imaynatam qosaqa Jesusta qatipakunman familianta nanachikuspan? Michiq hinam kananku hinaspa familiantapas ovejachankunata hina qawananku. Allinta reqsinanpaqmi kallpanchakunan. ¿Chayqa atikunmanchu? Arí, chaypaqmi sapakamawan rimanan hinaspa imapas sasachakuyninta uyarinan. Kallpanchakunantaqmi allin ejemplota qonanpaq, allintataqmi tanteanan familianwan estudianankupaq, huñunakuyman rinankupaq, predicanankupaq hinaspa kusirikunankupaqpas. Tanteasqankuna Bibliapa nisqanman hina kaptinqa hinaspa familianta allinta reqsiptinqa, manam sasachu kanqa qosapi confianankupaq chaynataq huk sonqolla Jehová Diosta servispanku kusikunankupaqpas.

7, 8. ¿Imaynatam qosaqa Jesuspa kuyakuyninta qatipakunman?

⁷ Allin michiqqa ovejankunata reqsispanpas kuyantaqmi. Jesuspa vidanmantawan predicasqanmanta leeptinchikmi sonqonchik kusirikun qatiqninkunata imayna kuyasqanmanta. Payqa ovejankunaraykum ‘vidantapas qorqa’. Diospa amistadninta munaq qosaqa Jesuspa ejemplontam qatikunan hinaspam familiantapas kuyanan. Señoranta kamachiqllaña kananmantaqa kuyananmi, imaynam ‘Cristopas iñiqkunata kuyasqanman’ hina (Efe. 5:25). Rimapayanantaqmi kuyapayakuywan hinaspa respetowan (1 Ped. 3:7).

⁸ Bibliamanta churinkunata yachachispanmi taytaqa respetachikunan hinaspapas kuyakuqmi kanan. Corregispanqa kuyakuywanmi ruranan. Hukkunamantaqa wakin warmachakunaqa sasachakunkum entiendeypi. Chayna kaptinqa taytaqa astawanmi pacienciakunan. Sichum Jesuspa ejemplonta tukuy tiempopi qatipakunanpaq kallpanchakuptinqa, familianpim hawkayay kanqa hinaspam Diospa amparasqan tarikunqaku (leey Salmo 23:1-6).

 9. Noey hina, ¿ima rurayniyoqmi qosakunaqa kanku hinaspa imataq yanapanqa chayta cumplinankupaq?

⁹ Kunanñataq qawasun Noey imayna kasqanmanta. Paymi kawsarqa mana allin ruraq runakunapa puchukaynin tiempopi, hinaspam sinchi parata Jehová Dios kachaykamuptin qanchis runakunallawan salvasqa karqa (2 Ped. 2:5). Familianpa uman kasqanraykum paykunata yanapanan karqa sinchi paramanta salvakunankupaq. Chaynatam taytakunapas rurananku kay tukupay tiempopi (Mat. 24:37). ¿Imaynatam chayta rurananku? Jesuspa ejemplontam estudiananku hinaspam kallpanchakunanku qatipakunankupaq.

Señorakuna, familiaykichikta yanapakuychik

10. ¿Ima ninantaq, ‘warmikuna qosaykichikta kasuychik’ nisqanqa?

¹⁰ Pablom qellqarqa: “Señorninchikta hinayá warmikunapas qosaykichikta kasuychik”, nispa (Efe. 5:22). Kayna nisqanqa manam hukmanyanapaqchu. Manaraq Evata Jehová Dios unanchachkaspanmi nirqa: “Manam allinchu qaripa sapallan kayninqa, yanapaqnintayá payman rikchakuqta rurasaq”, nispa (Gen. 2:18). Qosapa yanapaqnin kayqa alabanapaqmi.

11. ¿Imaynatam yachayniyoq warmiqa familianta yanapan?

¹¹ Yachayniyoq warmiqa familian allin kananpaqmi yanapakun (leey Proverbios 14:1). Mana yuyayniyoq warmimantaqa payqa manam qosanpa kamachisqantaqa qepanchanchu, aswanmi sonqomanta respetan. Diosta mana kasukuq runakuna hina kananmantaqa, qosanpa kamachisqantam kasukun (Efe. 2:2). Mana yachayniyoq warmiqa chayllam qosanmanta mana allinkunata riman. Yuyayniyoq warmim ichaqa wawankuna hinaspa hukkunapas qosanta respetanankupaq kallpanchakun. Chaymantapas qosanpa uma kasqantaqa manam yanqachanchu mana allin rimaykunawanqa nitaq sapa kutichu qosanta qaqchapan. ¿Ima nichwantaq qollqe servichikuymanta? Mana yuyayniyoq warmiqa qosanpa sasawan qollqe tarisqantam yanqakunapi tukun. Yachayniyoq warmim ichaqa allinta tanteaspan servichikun, manataqmi qosanta hikutanchu llamkasqanmanta astawanraq llamkananpaqqa.

12. ¿Imatam warmiqa ruranman familian iñiyninpi rikchan-rikchanlla kananpaq?

¹² Allin warmiqa qosantam yanapan Jehová Diosmanta warmankunata yachachispan, chaynapim familianta yanapan iñiyninkupi rikchan-rikchanlla kananpaq (Pro. 1:8). Yanapakunmi Familiawan Diosta Yupaychanapaq Tuta rurakunanpaq. Chaymantapas warmankunata qosan corregiptinqa manam contranpiqa churakunchu. Mana yachayniyoq warmitam ichaqa mana imapas qokunchu.

13. ¿Imanasqataq ancha allin qosan congregacionpi rurayninkunata cumplinanpaq señoranpa yanapayninqa?

¹³ ¿Imaynam allin warmiqa tarikun qosan congregacionpi achka rurayniyoq kaptin? Anchatam kusikun qosan siervo ministerial otaq anciano kaspan llamkasqanmanta, otaq Comité de Enlace con los Hospitales, Comité Regional de Construcción nisqapi otaq huk ruraykunapipas iñiqmasinkunarayku llamkasqanmanta. Yuyayniyoq warmiqa maynatachá kallpanchakun rimaywan otaq ruraywan yanapananpaqqa. Ichaqa yachanmi qosan congregacionpi achka rurayniyoq kaspan familianta rikchan-rikchanlla kananpaq yanapasqanta.

14. a) ¿Ima sasachakuykunam kanman casada warmipaqqa hinaspa imaynatam atipanman? b) ¿Imaynatam familian allin kananpaq yanapakunman?

¹⁴ Señoraqa sasachakunmanmi qosanta yanapaytaqa tanteasqanwan mana tupaptin. Chayna kaptinpas payqa ‘hawkalla kawsakuspanmi sumaqllaña espirituyoq kasqanta’ qawachin hinaspa imapas allin lloqsinanpaq yanapakun (1 Ped. 3:4). Chaymantapas Jesuspa maman Mariapa, Abigailpa, Rutpa hinaspa Saraipa imayna kasqankutam qatipakun (1 Ped. 3:5, 6). Qatipakuntaqmi kunan tiempopi ‘Diospa agradonpaq kawsaq’ cristianakunatapas (Tito 2:3, 4). Qosanta kuyaspan hinaspa respetaspanmi yanapan casado vidanpiwan familianpas hawkalla, kusisqa hinaspa allin kananpaq. Diospa munayninta ruraq qaripaqqa, ancha valorniyoqmi chayna warmiqa (Pro. 18:22).

Warmakuna, mana rikuna kaqkunapi piensay

15. ¿Imaynatam mozo-sipaskuna yanapakunmanku familian rikchan-rikchanlla kananpaq?

¹⁵ Mozo-sipas, ¿imaynatam yanapakuwaq familiayki iñiyninkupi rikchan-rikchanlla kananpaq? Piensariy Jehová Diospa promesankunapi. Ichapas warmacha kasqaykimantapacha tayta-mamaykiqa dibujokunawan yachachisurqanki mosoq pacha imayna kananmanta, wiñasqaykiman hinataqmi Bibliatawan qellqanchikkunata servichikurqaku hamuq tiempopi wiñay kawsay imayna kananmanta qawanaykipaq. Sichu Dios serviynikita imamantapas puntapi churaptikiqa, manam sasachu kanqa rikchan-rikchanlla kaynikiqa.

16, 17. ¿Imatam mozo-sipaskuna ruranmanku wiñay kawsayta haypanankupaq?

¹⁶ Apostol Pablopa 1 Corintios 9:24 nisqanta kasukuy (leey). Carrerapi hinayá kallpay wiñay kawsayta haypanaykipaq. Akllaytaq chayta chaskinaykipaq yanapasusqaykita. Achka mozo-sipaskunam suyakuyninkuta chinkarachinku kapuqniyoq kayta maskaspanku. Chayna rurayqa manamá allinchu. Qollqellata huñunapaq kawsayqa manam cheqap kusikuytaqa qowanchikchu. Imapas kapuqninchikqa manataqmi wiñaypaqchu. Aswan allinqa ‘mana rikusqanchik kaqkunata’ qawaymi. ¿Imanasqa? “Wiña-wiñaypaq” kasqanrayku (2 Cor. 4:18).

¹⁷ ‘Mana rikusqanchik kaqkunapiqa’ kachkan Diospa Gobiernonpi sumaqllaña kawsakuymi. Allinta tanteay chaykunata haypanaykipaq. Kusisqa kawsakuyta munaspaykiqa, vidaykita servichikuy Diosta servinaykipaq. Dios serviypi ruraykunaqa achkam kachkan haypanaykipaq.a Atisqallaykita haypanaykipaq tanteaspaykiqa, hinallam Diosta rikchan-rikchanlla servinki wiñay kawsayta suyaspa (1 Juan 2:17).

18, 19. ¿Imaynatam yachachwan pi mozo-sipaspas sonqomanta Dioswan amistadta rurasqanta?

¹⁸ Wiñay kawsayta chaskinapaqqa, puntatam sonqomanta Dioswan amistadta rurana. ¿Qam rurarunkiñachu? Tapukuy: “¿Dios serviypi ruraykunata kikiymantachu rurani icha tayta-mamay kamachiwaptillanchu? ¿Kallpanchakuchkanichu Diospa munasqanman hina sumaq kayniyoq kanaypaq? ¿Kallpanchakunichu sapa kuti Bibliata leenaypaq, orakunaypaq, huñunakuyman rinaypaq, predicanaypaq hinaspa Dios serviypi huk ruraykunatapas ruranaypaq? ¿Allinchu kachkan Jehová Dioswan amistadniy?”, nispa (Sant. 4:8).

¹⁹ Moisespa imayna kasqanpi yuyaymanay. Egipto runakuna hina uywasqa kaspanpas, payqa Diospa serviqnin kasqanwanmi reqsichikurqa manam reypa warmi churinpa wawan kasqanwanchu (leey Hebreos 11:24-27). Qampas Diospa serviqnin kayta munaspaykiqa Moisespa ejemplontam qatipakunayki. Chaynapim allinta kawsanki, hinaspa cheqap kusikuytawan ‘wiñay kawsayta haypanki’ (1 Tim. 6:19).

20. ¿Pikunam wiñay kawsaytaqa chaskinqaku?

²⁰ Kallpaqkunamanta apostol Pablopa rimasqanpiqa, chullallam premiota chaskiq. Wiñay kawsaytam ichaqa mana chullallachu haypanqa. Jehová Diosqa munanmi “llapallan runakuna salvakunankuta hinaspa cheqap yachachikuy reqsinankuta” (1 Tim. 2:3, 4). Ñam premiontaqa achkaña hayparunku, wakinkum ichaqa qam hina kallpachkanku (Heb. 12:1, 2). Wiñay kawsaytaqa chaskinqaku hinalla kallpaqkunam. Qampas chaskiytaqa atiwaqmi.

21. ¿Imamantam qatiqnin estudiopi yachasun?

²¹ Chayamunqapunim Diospa ‘manchakuypaq hatu-hatun punchawninqa’ (Mal. 4:5). Diosta serviq familiakunaqa kallpanchakunankum rikchan-rikchanlla kanankupaq. Ancha allinmi sapakamaman Diospa kamachisqanta kasukuyninkuqa. Ichaqa, ¿imatawantaqmi rurachwan rikchan-rikchanlla kanapaq hinaspa Dioswan amistadninchikpas allin kananpaq? Qatiqnin estudiopim qawasun familiakuna Dioswan allin kanankupaq kimsa yanapakuykunamanta.

[Willakuy]

¿Yuyachkankichu?

• ¿Imanasqataq Diosta serviq familiakunaqa rikchan-rikchanlla kananku?

• ¿Imaynatam qosakunaqa qatipakunmanku Jesusta?

• ¿Imaynatam yachayniyoq warmiqa qosanta yanapan?

• ¿Imaynatam mozo-sipaskunaqa yanapakunmanku familianku iñiyninkupi rikchan-rikchanlla kanankupaq?

[9 kaq paginapi dibujo]

Diospa munayninta ruraq qosapaqqa, ancha valorniyoqmi yanapakuq warmiqa