43 YACHACHIKUY
¿Tragota tomanmankuchu Diosta yupaychaqkuna?
Wakin runakunam amistadninkuwan huñunakuruspanku sinkanankukama tragota tomakunku. Wakinñataqmi malliykuyllatapas mana munankuchu. Wakinkuñataqmi wakillanpi hinaspa aschallata tomanku, ichaqa ¿ima nintaq bibliapi tragota tomaymanta?
1. ¿Huchachu tragota tomayqa?
Tragota malliykuyqa manam huchachu. Chaymi bibliapi nin: ‘Kanmi runapa sunqunta kusichiq vino’, nispa (Salmos 104:14, 15). Bibliapiqa willawanchiktaqmi ñawpa tiempopipas Diosta serviqkunaqa vinota asllata tomasqankumanta (1 Timoteo 5:23).
2. ¿Bibliaqa ima nintaq sinkanakama trago tomaymanta?
Jehova Diosqa manam munanchu sinkanakama tomananchiktaqa hinaspa sapa kuti tomananchiktaqa (Galatas 5:21). Bibliapim nin: “Amayá vinota llumpay tomaqkunawan kuskaqa kaychu”, nispa (Proverbios 23:20). Chaynaqa amayá tomasunchu ruwasqanchikta hinaspa imapas rimasqanchikta mana yuyananchikkamaqa nitaq unqunanchikkamaqa. Mana controlakuyta atispanchikqa tantiakunanchikmi mana malliyllapas-malliykunapaq.
3. ¿Imanasqataq hukkunapa tantiakusqankuta respetananchik?
Sapakamam tantiakunanchik asllata tomanapaq utaq qalaypaq mana tomanapaqpas. Pipas asllata tomananpaq tantiakuptinqa manam ninanchikchu: “¿Imanasqam tomanki?”, nispaqa. Tragota malliyllapas mana malliykunanpaq tantiakuqtaqa manataqmi hikutanachu tomananpaqqa (Romanos 14:10). Chaymantapas aschallata tomaptinchikpas runamasinchik hukmanyaptinqa, allinmi kanman aschallatapas manaña tomayninchik (leey Romanos 14:21). Jehova Diosta yupaychaqkunaqa runamasinchikkunapa allinnintam maskananchik, manam kikinchikpatachu (leey 1 Corintios 10:23, 24).
ASTAWAN YACHAYKUSUN
Bibliapi Diospa yachachisqanmanta yachasqanchikmi yanapawasun tragota aschallata tomanapaq utaq mana tomanapaqpas. Yachasuntaqmi pipas tomayninta imaynata saqinanmantapas.
4. Tomanaykipaq utaq mana tomanaykipaqqa kikikim tantiakunayki
¿Huchachu kanman aslla trago tomayqa? Chaymanta yachaykunaykichikpaq leeykuychik Jesuspa punta milagro ruwasqanmanta. Leeychik Juan 2:1-11 hinaspa qatiqninmanta rimariychik:
Kaypi leesqanchikman hinaqa, ¿huchapaqchu Jesusqa trago tomayta hapirqa?
Jesuspaqqa aslla trago tomayqa manam huchachu karqa. Chaynaqa, pipas aschallata tomaptinqa ¿mana allinpaqchu qawananchik?
Asllata tragota tomay mana hucha kaptinpas, ¿haykapitaq mana allinchu kanman? Leeychik Proverbios 22:3 hinaspa qatiqninmanta rimariychik. ¿Imanasqataq mana aschallatapas tomanankuchu...
... carrota manejaqkunaqa hinaspa maquinakunata servichikuqkunaqa?
... wiksayuq warmikunaqa?
... doctorkuna “amam tomankichu” niptinqa?
... tomayta qallaykuspa mana controlakuyta atiqkunaqa?
... autoridadkuna “amam tomankichu” niptinqa?
... ñawpaqta tomakuq kasqanrayku manaña tomananpaq tantiakuq runawanqa?
¿Pipas casarakuspan utaq amistadninkunawan huñunakuspan tragota utaq vinota aypunmankuchu? Chaymanta yachaykunaykichikpaq VIDEOTA qawaykuychik.
Leeychik Romanos 13:13 hinaspa 1 Corintios 10:31, 32, chaymantañataq qatiqninmanta rimariychik:
Kay leesqanchikqa, ¿imapaqmi kallpanchasunki?
Diosta yupaychaqkunaqa sapakamam tantiakunchik asllata tomanapaq utaq mana tomanapaqpas. Wakin iñiqmasinchikkunaqa wakinpim asllata tomaykunku wakinpiñataqmi mana malliykunankupaq tantiakunku.
5. Tantiakuy asllata tomanaykipaq utaq mana tomanaykipaqpas
Aslla tragota tomay mana hucha kaptinpas, ¿imanasqataq Jehova Diosqa niwanchik sinkakunakama mana tomananchikpaq? Leeychik Oseas 4:11, 18 hinaspa qatiqninmanta rimariychik:
¿Imamantaq chayanman llumpayta tomaruq runaqa?
Wakinkuqa aschallata tomaykuspankupas chayllam sinkarunku, chaymi sumaqta riqsikunanchik imayna kasqanchikta. Leeychik Proverbios 11:2 hinaspa qatiqninmanta rimariychik:
¿Imanasqataq mana hatuntukuspa tantiakunayki haykata tomanaykipaq?
6. Amayá tomayllamanqa qukuruychu
¿Imataq huk runata yanaparqa sinkakuq kayninta saqinanpaq? VIDEOTA qawaykuychik hinaspa qatiqninmanta rimariychik:
Dimitriqa, ¿imaynataq karqa sinkaruspanqa?
¿Chayllachu trago tomayta saqirurqa?
¿Imaynatam trago tomayta saqirurqa?
Leeychik 1 Corintios 6:10, 11 hinaspa qatiqninmanta rimariychik:
¿Imanasqataq mana sinkakunanchikchu?
¿Sinkakuq runaqa saqinmanchu trago tomayta?
Leeychik Mateo 5:30 hinaspa qatiqninmanta rimariychik:
‘Alliq makikita qurukuruy’ nispanqa Jesusqa nichkarqa Dioswan kuyachikunapaqqa munasqanchikkunatapas saqinamantam. Chayrayku, ¿imatataq ruwawaq manaña tomanaykipaq?a
Leeychik 1 Corintios 15:33 hinaspa qatiqninmanta rimariychik:
¿Imanasqataq mana hukllawakunaykichu sinkakuq runakunawanqa?
WAKIN RUNAKUNAM NISUNKIMAN: “Bibliapiqa ¿ima nintaq trago tomaymanta?”, nispa.
Chaynata tapusuptikiqa ¿imaynatam bibliapa nisqanta yachaykachiwaq?
YUYARIYKUSUN
Tragota aschallata tomay mana hucha kaptinpas, Jehova Diosqa manam munanchu sinkakunanchiktaqa.
¿Ima niwaqtaq?
¿Ima nintaq bibliapi tragota utaq vinota tomaymanta?
¿Imapim tukuruchwan trago tomayman qukuruspaqa?
¿Imanasqataq asllata tomananpaq utaq mana tomananpaq hukkunapa tantiakusqantaqa respetananchik?
ASTAWAN YACHANAYKIPAQ
Musu-sipaskunaqa sinkarunankukama mana tomarunankupaqmi cuidakunanku. Chaypaq kay videota qawaykuy.
¿Imaynatataq trago tomayta pipas saqinman? Chaymanta kaypi leeykuy.
Tomaspa “salud” ninakuyqa ¿allinchu? Chaymanta kaypi leeykuy.
Tragota tomakuq runam saqirurqa trago tomayta, paymanta kaypi leeykuy.
a Wakinkuqa doctormanmi rinanku trago tomayta saqinankupaqqa. Chaymantapas manas kaqmantaqa tragotaqa malliyllapas-malliykunankuchu, chaynatam achka doctorkuna ninku.