Jesusmi apostolkunapa chakinta mayllarqa

Jesuspa kamachisqanman hinam Pedrowan Juanqa pascua fiestapaq Jerusalenpi imakunatapas ruwarqaku. Chaymantam Jesusqa wakin 10 apostolninkunawan kuska Jerusalenman inti siqaykuytaña Olivos muqunta rirqaku. Chay kutillañam payqa inti siqaykusqantapas chay punchawqa rikurqa kawsarinan punchawkama.

Hinaspam Jerusalenman chayaruspanku pascuata ruwananku wasiman rirqaku. Chay wasiqa altosniyuqmi karqa, chaymi altosninman qispispanku imakunatapas allichasqataña tarirurqaku. Jesusqa chay punchawtam munayllawanña suyarqa, chaymi nirqa: ‘Anchallatañam kay pascuata qamkunawan mikuykuyta munarqani manaraq ñakarichkaspay’, nispa (Lucas 22:15).

Pascua fiestapiqa ñawpaqmantaraqmi vinota haywanakuspa tomaqku. Chaymi Jesusmanpas haywaykuptinku Diosta mañakuspan nirqa: “Kay vasota hapispa tomaychik hinaspa llapallaykichik haywanakuychik, nikichikmi: Kunanmanta qipamanqa manañam uvaspa rurunmantaqa kaqmanta tomasaqñachu Diospa munaychakuynin chayamunankama”, nispa (Lucas 22:17, 18). Chaywanqa musyakunankum karqa Jesusqa wañukunanpaqña kasqanmanta.

Chayna mikuchkaptinkum Jesusqa hatariruspan hawa pachanta hurqukuykurqa, hinaspam toallawan wiqawninta watakuykuspan apostolkunapa chakinta mayllananpaq lavatorioman yakuta tallirqa. Chay pachaqa sirvientekunallam wasiyuq kamachiptin wasiyuqpa invitasqan runakunapa chakinta mayllaq (Lucas 7:44). Pascuata mikusqanku tutam ichaqa wasiyuq mana kaptin kikin Jesusña chayta ruwarqa. Chaytaqa apostolkunapas ruwanmankum karqa, ichaqa manam mayqinkupas ruwarqachu. ¿Hinallaraqchu hatun tukuq karqaku? Imayna kaptinpas, chakinkuta Jesus mayllasqanwanmi pinqarikururqaku.

Pedrota mayllananpaq kaptinñataqmi Pedro nirqa: “Qamqa manapunim haykapipas chakiytaqa mayllawankimanchu”, nispa. Jesusñataqmi nirqa: “Mana mayllaptiyqa manam ñuqawan kuskaqa kawaqchu”, nispa. Hinaptinmi Pedroqa nirqa: “Señor, chaynaqa amayá chakillaytachu mayllawayqa aswanqa makiytawan umaytawanyá”, nispa. Jesusñataqmi nirqa: “Pipas bañakuruspanqa chakillantañam mayllakunan, paypaqariki enteron cuerponmi limpioña kachkan. Qamkunaqa limpiom kachkankichik ichaqa manam llapaykichikchu”, nispa (Juan 13:8-10).

Chaynatam Jesusqa lliw apostolkunapa chakinta mayllarqa. Hinaspam hawan pachanta hinakuykuspan kaqmanta mesapi tiyaykuspa nirqa: “¿Entiendenkichikchu qamkunawan kay ruwasqayta? Qamkunam sutichawankichik ‘yachachikuq’ hinaspa ‘señor’ nispa. Chaytaqa allintam ninkichik, arí ñuqaqa ‘yachachikuq’ hinaspa ‘señormi’ kani. Sichu ‘señor’ hinaspa ‘yachachikuq’ kachkaspay chakikichikta ñuqa mayllaruykichik, hinaptinqa qamkunapas chaynayá chakikichikta mayllanakuychik. Chakikichiktaqa mayllarqani qamkunapas chaynata ruwanaykichikpaqmi, chaymi qamkunawan ruwasqayman hina qamkunapas ruwanaykichik. Chiqaptapunim nikichik: Sirvienteqa manam patronninmantaqa aswan maschu nitaq kachamusqa kaqpas kachamuqninmantaqa aswan maschu. Kaykunata yachaspaykichik hinaspa chayman hina kawsaspaykichikqa kusisqam kankichik”, nispa (Juan 13:12-17).

¡Mayna sumaqmi Jesuspa chay yachachisqanqa! Qatiqninkunaqa mana hatun tukuspam hukkunata yanapananku karqa, manam riqsisqa kasqankupaq hapikuspachu piwanpas servichikunanku karqa. Chaynaqa, Jesuspa lliw qatiqninkunaqa payta qatipakuspa hinaspa mana pimanpas sayapakuspam imapipas yanapanakunanku.