Yachasqaykikunata yuyay

JEHOVA DIOSMI cerebronchikta unancharqa yachasqanchikkunata yuyanapaq. Diosqa munarqam wiñaypaq kawsananchikta, chaymi cerebronchikta rurarqa hayka kutitaña servichikuptinchikpas hinalla yanapawananchikpaq (Sal. 139:14; Juan 17:3).

Ichapas yachasqaykikuna yuyayta mana atinkichu. Hinaptinqa, ¿imatataq rurawaq qonqay sonqo mana kanaykipaq?

Imapas yachanapaq kallpanchakuyqa ancha allinmi. Muyuriqninchikpi imakuna kasqanpi chaynataq imakunapas pasasqanpi reparasqanchikmi hinaspa runamasinchikpi interesakusqanchikmi yanapawasun astawan piensarinapaq, chaynapim imapas leesqanchikmanta otaq uyarisqanchikmanta astawan yachayta munasun.

Yaqa sapa kutim sutikuna yuyaypi astawan sasachakunchik. Ichaqa yachanchikmi predicasqanchik runamasinchikkunata, iñiqmasinchikkunata otaq hukkunatapas ancha kuyapayasqanchikta. ¿Imataq yanapawasun sutikunata mana qonqananchikpaq? Huk congregacionman cartasqanpim apostol Pablo 26 iñiqmasinkunapa sutinta qellqarqa. Paykunapi interesakusqanqa sutillam karqa, manam sutillankutachu yacharqa aswanqa imayna kasqankumantam qellqarqa (Rom. 16:3-16). Kay tiempopipas congregacionkunata watukuq iñiqmasinchikkunam sapa semana huk congregacionkunata watukuspapas iñiqmasinchikkunapa sutinta yuyanku. ¿Imataq yanapan yuyanankupaq? Chayraq reqsispa parlasqankupim achka kutita sutinmanta ninku hinaspam pi kasqanta mana qonqanankupaq rikchaynin imayna kasqanpi reparanku. Hinaspapas iñiqmasinchikkunawan predicanankupaqmi tiempochakunku otaq paykunawan mikunankupaqpas. Pitapas chayraq reqsiruspaqa, ¿yaqachu sutinta yuyawaq? Imanasqa sutinta mana qonqanaykipaq piensay, chaymantapas yachamusqanchik wakin consejokunawan yanapachikuy.

Leesqanchikta yuyaypas ancha allinmi. ¿Imataq chaypaq yanapasunkiman? Yachay munasqayki hinaspa entiendesqaykim yanapasunki. Imamantapas leespaykiqa atencionwanmi leenayki, sichum leechkaspa hukkunapi piensaspaykiqa leesqaykitam mana yuyankichu. Leesqaykitam astawanraq entiendenki yachasqayki kaqkunawan tupachispaqa. Tapukuy: “¿Imaynatataq hinaspa haykapitaq kay yachasqayta servichikuyman? ¿Imaynatam servichikuyman hukkunata yanapanaypaq?”, nispa. Yanapasunkitaqmi sapa palabrata leenaykimantaqa puntochankunapi otaq comachankunapi sayaspa leeynikiqa, chaymi leesqaykipa ima nisqanta entiendenki hinaspapas manataqmi chayllachu qonqarunki.

Yachachiqkunam ninku yachasqanchikkunata kaqmanta yuyariyqa ancha allin kasqanta. Universidadpi yachachiq profesormi yuyarinapaq pruebata ruraspan qawachirqa yachasqanchikta huk minutollapas yuyayqa mana qonqanapaq yanapasqanta. Chaynaqa llapanta otaq partellantapas leeyta tukuruspaykiqa yuyaymanay allinnin kaq yachachikuykunapi hinaspa kallpanchakuy mana qonqanaykipaq. Yachasqaykita umallaykimanta hukkunaman imaynata willanaykipaq piensay. Leeyta tukuruspa kaqmanta yuyariyqa chaylla mana qonqarunaykipaqmi yanapasunki.

Leesqaykimantaqa willawaqtaqmi iskay-kimsa punchaw pasayllata familiaykiman otaq iñiqmasikimanpas, chaymantapas willawaqtaqmi llamkasqaykipi, escuelapi hinaspa vecinoykiwan otaq piwanpas predicacionpi rimaspayki. Hinaspapas yuyariy allinnin kaq yachachikuyninkunata hinaspa Bibliapa nisqanman hina imamanta yachachisqanta. Chaynata ruraspaykim allinnin kaq yachachikuykunata yuyanki hinaspam hukkunatapas yanapanki.

Leesqaykita kaqmanta yuyarispa chaynataq hukkunawan rimaspaykipas allinmi kanman allinnin kaq yachachikuykunata yachasqaykipi yuyaymanayqa, Bibliata qellqaq Asafwan Davidpas chaytam rurarqaku. Asafmi nirqa: “Dios Taytalláy, rurasqaykimantam yuyarillasaq. Ñawpa tiempopi rurasqaykimantam yuyarillasaq. Admirakuypaq rurasqaykimantam yuyarillasaq. Qampa tukuy rurasqaykimantam rimallasaq. Atiynikiwan rurasqaykimantam yuyaymanasaq”, nispa (Sal. 77:11, 12). Chaynallataqmi Davidpas nirqa: “Tukuy tutam ñoqallayqa qanmanta yuyaymanani”. ‘Pasaq tiempokunamantam yuyarillani. Atiynikiwan rurasqaykikunapim piensani’, nispa (Sal. 63:6; 143:5). ¿Chaynatachu qampas yuyaymananki?

Jehova Diospa rurasqankunapi, sumaq kayninkunapi hinaspa munayninmanta tukuy sonqoykiwan yuyaymanasqaykiqa yanapasunkim yachasqaykita mana qonqanaykipaq, chayna rurasqaykiqa imam yachasqaykitam sonqoykipi takyachinqa, yanapasunkitaqmi imayna piensasqaykita cambianaykipaqpas. Yachasqaykipi yuyaymanasqaykiqa imayna kawsanaykipaqmi yanapasunki (Sal. 119:16).

Jehova Diospa tukuy ima rurasqanmanta hinaspa Jesucristopa yachachisqankunata yuyanapaqmi kan yanapaqninchik. Jesucristo wañukunanpaq huk tutallaña kachkaptinmi discipulonkunaman nirqa: ‘Kaykunataqa nikichik qamkunawan kaspayraqmi. Taytaymi chuya espirituta ñoqapa sutiypi kachamunqa qamkunata kallpanchasunaykichikpaq, paymi tukuy imata yachachisuspaykichik yuyarichisunkichik qamkunaman tukuy ima nisqayta’, nispa (Juan 14:25, 26). Chay nisqantam uyarirqa Mateowan Juan. ¿Yanaparqachu paykunata chuya espiritu? Arí, yanaparqam. Pusaq wata qepatam Jesuspa vidanmanta Mateo qellqayta tukururqa, chaypim qellqarqa Jesucristopa Ancha Reqsisqa Yachachikuyninkunamanta, ñoqanchikwanña kasqan tiempomanta chaynataq kay pachapi mana allinkuna puchukananmanta señalkunatapas. Jesucristopa wañukusqanmanta soqta chunka pichqayoq wata pasaytam apostol Juanpas qellqarqa, chaypim willakun Jesucristo manaraq wañukuchkaspan apostolninkunaman imam nisqanta. Mateowan Juanqa yuyarqakuchá paykunawan Jesucristo kaspan imam nisqanta hinaspa rurasqankunata, chayna kaptinpas allinnin kaq yachachikuykunata yuyanankupaqmi chuya espiritu yanaparqa Jehova Diospa munasqanman hina Bibliata qellqanankupaq.

¿Yanapanmanchu chuya espiritu kay tiempopipas Dios serviqkunata? Arí, yanapanmi. Ichaqa manam qonqayllamantachu yuyarichiwasun mana yachasqanchik kaqkunataqa, yuyarichiwasunqa estudiasqanchik kaqkunallatam (Luc. 11:13; 1 Juan 5:14). Necesitasqanchik horam ‘yuyarichiwanchik Diosmanta ñawpaq willakuqkunapa nisqankunata hinaspa Salvaqninchik Señorpa kamachikuyninkunatapas’ (2 Ped. 3:1, 2).

Jehova Diosmi chunkay-chunkayta israelitakunaman nirqa paykunapaq rurasqankunata ‘ama qonqanankupaq’, chaynataqa nirqa manam lliw yachasqankuta imam kaqta yuyanankuraykuchu, aswanqa munasqallankupi afanakuspanku qonqarunankumantam. Yuyanankum karqa angelninwan Jehova Dios Egipto runakunapa piwi wawa-churinkuta wañuchispan librasqanta, chaynallataq Puka lamar qochata rakisqanmanta kutiykachispan Faraontawan tropankunata heqepachisqantapas. Yuyanankutaqmi karqa Sinai orqopi Diospa qosqan Leyninkunata chaynataq chunniqninta pusaspa Prometesqan Allpaman chayachisqantapas. Chaykunataqa manam qonqanankuchu karqa Dios serviyninkupi sapa punchaw allinta kawsanankupaqqa (Deut. 4:9, 10; 8:10-18; Ex. 12:24-27; Sal. 136:15).

Ñoqanchikpas manam qonqananchikchu yachasqanchikkunataqa. Vidanchikpi imawanpas sasachakuspaqa Jehova Dios imayna kasqanta hinaspa kuyakuywan sapallan Churin qowasqanchiktam yuyarinanchik, chaywanmi huchamanta librawarqanchik hinaspam wiñay kawsayta qowasunchik (Sal. 103:2, 8; 106:7, 13; Juan 3:16; Rom. 6:23). Bibliata sapa punchaw leespa, huñunakuypi rimarispa chaynataq predicaspam Diosmanta yachasqanchikkunataqa mana qonqasunchu.

Ima ruranaykipaqpas tanteaspaqa Diosmanta yachasqaykikunata yuyariy chayman hina allinta tanteanaykipaq. Ama qonqaychu chay rurayta hinaspa Jehova Diospa yanapakuynintapas maskay. Aychaykipa munasqanman hina otaq piensasqaykiman hina tanteanaykimantaqa tapukuy: ¿Diospa Palabranpi mayqen yachachikuynintaq otaq consejontaq allinta tanteakunaypaq yanapawanman?, nispa (Prov. 3:5-7; 28:26). Sutillamá mana leesqaykita otaq mana uyarisqaykitaqa manam yuyawaqchu. Jehova Diosta astawan kuyasqaykim kallpanchasunki yachasqaykiman hina imatapas ruranaykipaq, hinaspapas chuya espiritunwanmi yanapasunki yuyanaykipaq. Hinaptinqa Unanchaqnikita kuyasqaykim hinaspa paymanta astawan yachasqaykim yanapasunki yachayniyoq kanaykipaq.