“¡Kallpanchakuychikyá!, ñuqaqa kay pachatam venceruniña”

Pascua mikuyta tukuruspankum Jesuswan apostolninkunaqa huñunakusqanku wasimanta lluqsinankupaq hinaña karqaku. Jesusqa yachachiyta tukuruspanmi nirqa: “Kaykunatam nirqaykichik pipas ama urmachisunaykichikpaq”, nispa. Chayna nisqanqa allinpunim karqa. Jesusmi nirqa: “Yupaychana wasimantam qarqusunkichik. Chayamunqataqmi tiempo pipas wañuchisunaykichikpaq, wañurachisuspaykichikmi piensanqaku chay ruwasqankuwan Diosta servisqankuta”, nispa (Juan 16:1, 2).

Chaywanqa yaqachá apostolkunaqa hukmanyarurqaku. Jesusqa nirqañam chiqnisqa kanankumanta, ichaqa manaraqmi nirqachu wañuchisqa kanankumantaqa paykunawan kuskaraq kasqanrayku (Juan 16:4). Chay kutipim ichaqa willarqa wañuchisqa kanankupaq maskasqa kaspanku ama paqwaypaq hukmanyarunankupaq.

Chaymantapas Jesusqa nirqam: “Kunanmi ichaqa kutichkani kachamuwaqniy Diosman, chayna kaptinpas manam mayqinnikichikpas tapuwankichikchu: ‘¿Maytataq richkanki?’, nispaqa”, nispa. Chaytaqa mikusqankupim paykunaqa ña tapurqakuña (Juan 13:36; 14:5; 16:5). Ichaqa manañam kaqmantaqa tapurqakuchu sasachakuypi kanankumanta hukmanyarusqankurayku. Manañam tapurqakuchu Jesus hanaq pachapi imata ruwananmanta nitaq Diosta yupaychaqkuna imayna kanankumantapas. Jesusñataqmi nirqa: “Kaykuna nisqaywanmi sinchi llakisqa kachkankichik”, nispa (Juan 16:6).

Chaymantapas nirqam: “Qamkunapa allinnikichikpaqmi ñuqaqa richkani. Mana riptiyqa manam yanapasuqnikichikqa qamkunaman hamunmanchu, rispaymi ichaqa kachamusqaykichik”, nispa (Juan 16:7). Jesusqa wañukuspanmi hanaq pachaman kutikunan karqa, chaynapi maypiña kaptinkupas qatiqninkunaman chuya espirituta kachamunanpaq.

Chuya espirituqa sutillatam qawachinan karqa “imam hucha kasqanta, imam allin ruway kasqanta hinaspa imam Diospa juicion kasqanta” (Juan 16:8). Arí, chuya espiritum qawachinan karqa runakunaqa Diospa kachamusqan runata qipanchasqankuta. Jesus hanaq pachaman kutiptinmi runakuna yachananku karqa allin ruwaq kasqanta hinaspa kay ‘pachapi kamachiq’ satanasqa wañuchisqa kananta (Juan 16:11).

Jesusqa nirqataqmi: “Qamkunaman ninayqa achkaraqmi kachkan, ichaqa manaraqmi kunanqa entiendewaqchikchu”, nispa. Apostolkunaqa chuya espirituta chaskiruspankuñam ‘chiqap kaqmantaqa’ entiendespa chayman hina kawsakunanku karqa (Juan 16:12, 13).

Chaymantam Jesus nirqa: “Pisi tiempomantaqa manañam rikuwankichikñachu, ichaqa manapas unaymantam kaqllamanta rikuwankichik”, nispa. Chaywanmi apostolkunaqa uyarayaspa ima niy munasqanmanta tapunakurqaku. Jesusñataqmi nirqa: “Chiqaptapunim nikichik: Qamkunaqa waqankichikmi hinaspapas qaparkachankichikmi, runakunañataqmi kusikunqaku. Qamkunaqa llakisqallañam kankichik, ichaqa llakikuynikichikmi kusikuyman tikrakunqa”, nispa (Juan 16:16, 20). Religionkunapi punta apaqkunaqa Jesusta wañurachiptinkum kusikunanku karqa, apostolninkunam ichaqa llakisqallaña kananku karqa. Chaywanpas Jesus kawsariptinmi kusisqa kananku karqa, aswanraqmi chuya espirituta chaskispankuqa.

Jesusqa apostolninkuna imayna tarikusqankumanta rimaspanmi tupachispan nirqa: “Warmiqa wachakuspanmi nanaywan ñakarin wachakunan hora chayaramusqanrayku, wachakusqan qipatam ichaqa ñakarisqantapas manaña yuyarinchu naceruq wawanwan kusikusqanrayku”, nispa. Hinaspam apostolninkunata kallpanchananpaq nirqa: “Chaynallataqmi qamkunapas kunanqa llakikuyllapiña kachkankichik, kaqmanta qamkunawan tupaptiymi ichaqa kusikunkichik, manataqmi pipas chay kusikuynikichiktaqa qichusunkichikchu”, nispa (Juan 16:21, 22).

Apostolkunaqa manam haykapipas Jesuspa sutinpiqa mañakurqakuraqchu, chaymi Jesusqa nirqa qipamanqa sutinpi taytanta mañakunankumanta. ¿Chaynataqa nirqa mañakusqankuta Dios manaña uyarisqanraykuchu? Manam. Jesusmi nirqa: “Kikin taytaymi qamkunataqa kuyasunkichik ñuqata kuyawasqaykichikrayku hinaspa Diospa rantinpi hamusqayta creesqaykichikrayku”, nispa (Juan 16:26, 27).

Jesuspa chaynata nisqanwanpaschá apostolninkunaqa mana iskayrayaspa nirqaku: ‘Creenikum Diosmanta hamusqaykita’, nispa. Ichaqa chayna kasqantam sasachakuykunapi kasparaq qawachinanku karqa. Chay qallarinanpaqña kasqanmantam Jesus nirqa: “Horam chayamuchkanña, chayaramunñamá kanpas, hinaptinmi wasikichikman sapakama chiqichisqa kankichik hinaspam sapallayta saqiruwankichik”, nispa. Chaywanpas kallpanchaspam nirqa: “Tukuy kaykunatam niruykichik ñuqarayku hawka kanaykichikpaq. Kay pachapiqa ñakarinkichikmi, ichaqa ¡kallpanchakuychikyá!, ñuqaqa kay pachatam venceruniña”, nispa (Juan 16:30-33). Jesusqa manam apostolninkunataqa qunqarunanchu karqa. Manataqmi iskayrayarqachu tukuy sunqunkuwan Diospa munayninta ruwaspankuqa, satanasta hinaspa munaychakusqan runakunapa sasachasqanta pay hina atipanankumantaqa.