¿Imaynatam Jesus qawachirqa Dios allin ruraq kasqanta?

“Diosmi [. . .] Jesucristota churarqa wañuspa yawarnin chaqchusqanwan salvawananchikpaq, chaytaqa haypanchik iñispallam. Chaynatamá Dios qawachiwarqanchik justo kasqanta.” (ROM. 3:⁠25.)

1, 2. a) ¿Imatam Bibliaqa yachachiwanchik runakuna imayna tarikusqankumanta? b) ¿Ima tapukuykunamantam yachasunchik kay estudiopi?

EDEN huertapi Diospa contranpi churakusqankumantaqa lliwmi yachanchik. Kunanqa Adanpa mana kasukusqanraykum ñakarinchik. Bibliam nin: “Huk runallawan kay pachapi huchallikuy qallariruptinmi chayrayku wañuypas rikurirurqa chaymi lliw runakuna huchallikuspanchik wañunchik”, nispa (Rom. 5:12). Allinta ruranapaq kallpanchakuspapas pantanchikmi, chaymi orakunanchik Dios pampachawananchikpaq. Pablopas llakikuspanmi nirqa: “Allintaqa manam ruranichu munaspaypas aswanqa mana munachkaspaypas mana allinllatam rurani. [. . .] ¡Imapiñataq rikukuni!”, nispa (Rom. 7:​19, 24).

² Kaymanta estudiaspaqa tapukunanchikmi: ¿Imaynatam llapan runakuna huchayoq kachkaptinqa Nazaretmanta Jesusqa mana huchayoq nacerqa? ¿Imanasqataq bautizakurqa? ¿Imaynatam vidanwan hatuncharqa Diospa allin ruraq kasqanta? Chaymantapas, ¿imatam rurayta atirqa wañukusqanwan?

Diospa allin ruraq kasqanmi iskayrayachisqa karqa

 3. ¿Imaynatam Evata Diablo engañarurqa?

³ ‘Diablowan hinaspa Satanaswan sutichasqa ñawpaqmantaraq kaq culebrapa’ kamachikuynintam, punta tayta-mamanchikqa akllakurqaku Diospa gobiernonta qepancharuspanku (Apo. 12:⁠9). ¿Imataq pasarurqa? Puntataqa, Diospa allin Kamachiq kasqantam Satanas iskayrayachirqa, “huertapi llapan sachakunapa” rurunta mana mikunankupaq Diospa kamachisqan cheqap kasqanmanta Evata tapuspan. Payqa willarqam huk sachapa rurullanta mana mikunankupaq kamachisqa kasqankuta hinaspa mikuruspaqa wañunankumantapas. Satanasmi ichaqa nirqa: “Manapunim wañunkichikchu”, nispa. Chaywanmi nichkarqa Jehová Dios llulla kasqanta. Engañokunawanmi convencechirqa Evamanta Dios allinkuna pakasqanta. Nirqataqmi chay sachapa rurunta mikuruspaqa Dios hina kaspa allin kaqtapas chaynataq mana allin kaqtapas kikillanmanta yachananta (Gen. 3:​1-5).

 4. ¿Imaynatam runakunaqa Satanaspa munaychakusqanña rikurirurqaku?

⁴ Diabloqa creechirqam Diosmanta karunchakuspanku runakuna aswan kusisqa kanankuta. Adanpas Diospa gobiernon allin kasqanta defiendenanmantaqa, señoranta kasukuspanmi mana mikunanku ruruta mikururqa. Chaynapim Diospa amistadninta chinkarachirqa hinaspa llumpay llasaq yugota hina huchatawan wañuyta saqeruwanchik. Lliw runakunam ‘kay pachapi kamachikuq Diablopa’ munaychakusqanña rikurirurqaku (Juan 14:​30; Rom. 7:14).

 5. a) ¿Imaynatam rimasqanta Jehová Dios cumplirqa? b) ¿Ima suyakuytam Dios qorqa Adanpawan Evapa wawa-churinkunaman?

⁵ Jehová Diosqa haykapipas cumplinmi rimasqantaqa. Chaymi Adantawan Evata wañunankupaq sentenciarqa (Gen. 3:​16-19). Chaywanpas, Diospa munasqanqa hinallam rurakunan karqa. Adantawan Evata sentenciaspanpas wawa-churinkunapaqmi suyakuyta qorqa. Diosmi nirqa huk ‘mirayta’ hatarichinanmanta, chay mirayta Satanas talonninpi kachuptinpas allinyaruspanmi umanta chamchanan karqa (Gen. 3:15). Bibliam chaymanta willawanchik Jesucristomanta kaynata nispan: ‘Diospa Churinqa rikurimurqa Diablopa rurasqankunamanta librawananchikpaqmi’ (1 Juan 3:⁠8). Ichaqa, ¿imaynatam Jesuspa rurasqanwan wañusqanpas yanapanman Diospa allin ruraq kasqan hatunchasqa kananpaq?

¿Imatam Jesus qawachirqa bautizakusqanwan?

 6. ¿Imaynatam yachanchik Adanpa huchan Jesuspi mana kasqanta?

⁶ Diosqa munarqam Jesus yuyayniyoqña kaspan Adan manaraq huchallikuchkaspan hina kananta (Rom. 5:14; 1 Cor. 15:45). Chaypaqqa mana huchayoqmi nacenan karqa. ¿Imaynatam chayqa atikurqa? Angel Gabrielmi Jesuspa maman Mariaman willarqa: ‘Chuya espiritu qanman hamuptinmi hanaq pachapi Diospa atiynin puyu hina pampaykusunki. Chayraykum [. . .] naceq wawapas sutichasqa kanqa Diospa Churinwan’, nispa (Luc. 1:35). Jesus warmachallaraq kachkaptinchá mamanqa willarqa manaraq nacechkaptin tukuy ima pasakusqanmanta. Chaymi Mariawan Josey templopi Jesusta tariruptinku pay nirqa: “¿Manachu yacharqankichik Taytaypa asuntonkunapi kanayta?”, nispa (Luc. 2:49). Qawasqanchikman hinaqa, warmacha kasqanmantam Jesusqa yacharqaña Diospa Churin kasqanta. Chaymi paypaqqa ancha allin karqa Taytanpa allin ruraq kasqanta hatunchayqa.

 7. ¿Imaynam Jesuspa yuyaynin hinaspa cuerponpas karqa?

⁷ Dioswan amistadnin ancha chaninchasqantam Jesus qawachirqa Diospa llaqtanpi huñunakuykunaman mana faltakuspan. Yuyayninpi mana pantaq kaspanmi lliw uyarisqantawan hebreo rimaypi qellqasqa Diospa Palabranta leesqantapas entienderqa (Luc. 4:16). Cuerponpas mana huchayoqmi karqa, chaytam runakunata salvananpaq entregarqa. Chayqa tuparqam hamuq punchawkunapi ima pasananmanta Salmo 40:​6-8 nisqanwan, chay willakuypichá piensachkarqa bautizakusqan ratopi orakuspan (Luc. 3:21; leey Hebreos 10:​5-10).a

 8. ¿Imanasqataq Juanqa mana munarqachu Jesus bautizayta?

⁸ Jesus bautizakunanpaq Juanman asuykuptinmi, qallariypiqa mana munarqachu. ¿Imanasqa? Paypa bautizasqanqa qawachirqam huchankumantawan Leyta mana kasukusqankumanta judiokuna wanakusqankuta. Familian kaptinchá Juanqa yacharqa Jesus mana huchayoq kasqanta hinaspa wanakuyta manaña necesitasqantapas. Ichaqa, Jesusmi qawachirqa yakupi bautizakuy allin kasqanta. Nirqam: ‘ [Chaynatam] Diospa munasqanta tukuy imata rurananchik’, nispa (Mat. 3:15).

 9. ¿Imatam qawachirqa Jesuspa bautizakusqanqa?

⁹ Jesusqa piensanmanmi karqa mana pantaq churiyoq kayta, payqa Adan manaraq huchallikuchkaptin hinam mana huchayoq karqa. Chaytaqa manam piensayllapas-piensarqachu, paypaq Diospa munayninqa manam chaychu karqa. Diosqa kachamurqa Mesias otaq prometesqa Miray kananpaqmi, chaypaqmi mana huchayoq vidanta ofrendata hina qonan karqa (leey Isaias 53:​5, 6, 12). Ichaqa entiendenanchikmi, Jesusqa bautizakurqa manam Diosman qokusqanta qawachinanpaqchu, ñoqanchikmi ichaqa chayta ruranchik. Diosman qokusqa Israel nacionmantam payqa karqa. Bautizakusqanqa qawachirqam Diospa munayninta rurananpaq payman presentakusqanta, chayna kananmantam qawachirqa Mesiasmanta willakuykuna.

10. ¿Imakunataq Diospa munaynin karqa Mesiaspaq, hinaspa imaynam sientekurqa chaykunata ruraspan?

¹⁰ Jesusqa munarqam Diospa munaynin rurayta, chaymi predicarqa, runakunata qatiqnin kanankupaq yachachirqa hinaspa rurasqanta hinalla ruranankupaqpas prepararqa. Diosman presentakuspanmi Jesusqa qawachirqataq qatikachasqa hinaspa ñakarispa wañuy munasqanta, chaynatam Diospa kamachinanpaq derechonta defienderqa. Payqa anchatam Taytanta kuyarqa. Chaymi munaynin rurananmantawan vidanta ofrendata hina qonanmanta yachasqan anchata kusichirqa (Juan 14:31). Kusikurqataqmi huchamantawan wañuymanta librawananchikta yachaspan, chaytam rurarqa mana huchayoq vidanpa valorninta Taytanman qospan. Chaykunata rurananpaq presentakuspan, ¿chaskirqachu Diospa favorninta? Arí, ¡chaskirqam!

11. ¿Imaynatam Jehová Dios qawachirqa Jesusqa Cristo otaq prometesqa Mesias kasqanta?

¹¹ Jesusmanta Bibliapi willaq tawa librokunaqa qawachinmi, Jordan mayumanta Jesus lloqsiramuptin Jehová Dios chaskisqanta. Bautizaq Juanmi willawanchik ima pasasqanmanta: ‘Ñoqam rikurqani chuya espiritu hanaq pachamanta paloma hina uraykamuspa Jesuspa hawanman tiyaykuqta. [. . .] Rikurqanim, chaymi willakuni payqa Diospa Churin kasqanta’ (Juan 1:​32-34). Kikin Diospas chay kutipim nirqa: “Paymi kuyasqay Churiy. Payraykum kusisqa kachkani”, nispa (Mat. 3:17; Mar. 1:11; Luc. 3:22).

Wañukunankamam kasukurqa

12. ¿Imatam Jesus rurarqa bautizakusqan qepata 3 wata parten?

¹² Qatiqnin 3 wata partenpim, Jesusqa tukuy tiemponta servichikurqa Taytanmanta yachachinanpaq hinaspa Llapallan Kamachiq kasqanta defiendenanpaqpas. Diospa Prometesqan Allpapi puriyqa pisipanapaqmi karqa, ichaqa manam imawanpas harkachikurqachu predicananpaqqa (Juan 4:6, 34; 18:37). Diospa Gobiernonmanta willaspanpas onqoqkunatam sanoyachirqa, runakunata mikuchirqa hinaspa wañuqkunatapas kawsarichirqa. Kay milagrokunawanmi qawachirqa runakunapaq Diospa gobiernon imakuna rurananta (Mat. 11:4, 5).

13. ¿Imatam Jesus yachachirqa Dios mañakuymanta?

¹³ Yachachisqanmantawan onqoqkunata sanoyachisqanmanta Jesus alabakunanmantaqa, humilde kasqantam qawachirqa tukuy rurasqanmanta Taytanta hatunchaspa (Juan 5:19; 11:41-44). Yachachirqataqmi imakunam mañakusqanchikpi puntapi kananmanta. Mañakunanchikmi Diospa sutin chuyanchasqa kananpaq hinaspa paypa gobiernon Satanaspa mana allin munaychakusqanpa rantinpi munaychakunanpaq, chaynapi “kay pachapipas hanaq pachapi hina” munaynin rurakunanpaq (Mat. 6:9, 10). Chaynataq, kamachiwarqanchik mañakusqanchikman hina ruraspa ‘Diospa munaychakusqantawan paypa munasqan allin rurayta’ puntata maskanapaq (Mat. 6:33).

14. Jesus mana huchayoq kaptinpas, ¿imanasqataq paypaq sasa karqa Diospa munaynin rurayqa?

¹⁴ Wañukunan asuykamuptinmi Jesusqa aswan preocupasqa tarikurqa Taytanpa kamachisqan cumplinanmanta. Diospa munasqan rurakunanpaq hinaspa Taytan hatunchasqa kananpaqqa, mana allin juiciotawan ñakarispa wañuytam aguantanan karqa. Wañukunanpaq 5 punchaw faltachkaptinmi mañakurqa: ‘Hukmanyasqam kachkani. Chaynaqa ¿imanisaqtaq? [. . .] Taytáy, salvaykuway kunan ratomanta [. . .]. Ñoqaqa [. . .] ñakarinaypaqmi hamurqani’, nispa. Runa kaspanmi chayna sientekurqa. Kikillanpi piensananmantaqa aswan allin kaqpi piensaspanmi nirqa: “Taytáy, sutikitayá hatunchayña”, nispa. Diosqa chayllam contestarqa: “Ñam hatuncharuniña, chaywanpas huktawanraqmi hatunchasaq”, nispa (Juan 12:27, 28). Jesusqa listoñam kachkarqa mayqan runapa mana pasasqan aswan sasa pruebakunata pasananpaq. Taytanpa rimamusqanmi kallpancharqa Diospa Llapallan Kamachinanpaq derechonta hatunchananpaq hinaspa defiendenanpaqpas. ¡Chaynatamá rurarqa!

¿Ima ruraytam Jesus atirqa wañusqanwan?

15. Manaraq wañuchkaspan, ¿imanasqataq Jesusqa nirqa “¡Tukusqañam!” nispa?

¹⁵ Qerupi warkusqa kachkaspanmi wañukunallanpaqña Jesus nirqa: “¡Tukusqañam!”, nispa (Juan 19:30). Bautizakusqanmanta wañukunankama 3 wata parten pasasqan tiempopim, ¡admirakuypaq kaqkunata Diospa yanapakuyninwan rurarqa! Wañukusqan qepallatam terremoto pasarurqa hinaptinmi Jesusta cuidaq capitanpas nirqa: “Cheqaptapunim payqa Diospa Churin kasqa”, nispa (Mat. 27:54). Yaqachusmi capitanqa chaynata nirqa Diospa Churin kasqanta niptin burlakusqankuta qawasqanrayku. Jesusqa llumpay ñakariykunapi tarikuspanpas wañukunankamam Diosta kasukurqa hinaspa qawachirqa Satanas pasaypaq llulla kasqanta. Kayta yuyarisun: 100 watakuna ñawpaqtaraqmi Satanasqa Dioslla kamachiq kasqanta defiendeqkunamanta nirqa: “Vidanraykum runaqa; tukuy ima kapuqnintapas qonman”, nispa (Job 2:4). Jesuspa kasukusqanmi qawachirqa Adanwan Evapas pruebakunapi kaspanku Diosta kasukuy atisqankuta, paykunapaqqa manam llumpay sasachu karqa. Aswanqa, imayna kawsasqanwan hinaspa wañukusqanwanmi Llapallan Kamachiq Diospa justo kasqanta defienderqa chaynataq hatuncharqa (leey Proverbios 27:11). Ichaqa, ¿imatawanmi Jesusqa wañusqanwan rurayta atirqa? Qawasunchikyá.

16, 17. a) ¿Imata servichikuspataq Diosqa ñawpaq tiempopi serviqninkunata mana huchayoqta hina qawarqa? b) ¿Imaynatam Diosqa premiarqa Churinpa kasukusqanta, hinaspa imatam Señor Jesucristoqa hinalla rurachkan?

¹⁶ Jesus kay Pachaman manaraq hamusqan tiempopi kawsaq achka serviqninkunatam Jehová Diosqa mana huchayoqta hinaña qawarqa, paykunamanmi kawsarimunankupaq suyakuyta qorqa (Isa. 25:8; Dan. 12:13). Ichaqa pantaq runakunaman chayna sumaq bendicionkunata qonanpaqqa, ¿imatam chuya Diosninchikqa servichikurqa? Bibliam nin: “Diosmi [. . .] Jesucristota churarqa wañuspa yawarnin chaqchusqanwan salvawananchikpaq, chaytaqa haypanchik iñispallam. Chaynatamá Dios qawachiwarqanchik justo kasqanta. [. . .] Pacienciakuspam huchankumanta runakunata mana castigarqachu. Kunanmi ichaqa huchanchikkunata pampachawaspanchik Jesusllaman iñikuqkunata mana huchayoqpaqña Dios chaskiwanchik. Chaynapim justo kasqanta yachanchik” (Rom. 3:25, 26).b

¹⁷ Jehová Diosqa Churintam premiaykurqa kawsarichimuspan hinaspa manaraq kay Pachaman hamuspan hatunchasqa kasqanmantapas astawanraq hatunchaspan. Kunanmi Jesusqa mana wañuq espirituña kachkan (Heb. 1:3). Sacerdotekunapa Jefen hinaspa Rey kaspanmi Jesucristoqa qatiqninkunata hinalla yanapanman Diospa allin ruraq kasqanta hatunchanankupaq. ¡Maynatam Diosninchikta agradecekunchik Churin hina hatunchaqninkunaman hinaspa tukuy sonqowan serviqninkunaman premio qosqanmanta! (Leey Salmo 34:3 hinaspa Hebreos 11:6.)

18. ¿Imamantam yachasun qatiqnin estudiopi?

¹⁸ Abelmantapacham, kasukuq runakunaqa Dioswan allin amistad karqaku prometesqa Miraypi iñisqankurayku. Wañukunankama Churin kasukunanta hinaspa chaywan ‘runakunapa huchan pampachanantam’ Diosqa yacharqa (Juan 1:29). Rantinchikpi Cristopa wañusqanmi kunanpas yanapawanchik (Rom. 3:26). ¿Imaynatam yanapasunkiman? Chaymantam yachasun qatiqnin estudiopi.

[Willakuykuna]

¿Imatam niwaq?

• ¿Imaynatam iskayrayachisqa karqa Diospa allin ruraq kasqan?

• ¿Imatam Jesus qawachirqa bautizakusqanwan?

• ¿Ima ruraytam Jesus atirqa wañusqanwan?

[9 kaq paginapi dibujo]

¿Imatam Jesus qawachirqa bautizakusqanwan?