Ordenninpi yachachinapaq

IMAMANTA yachachinaykipaq kaqta ordenninpi preparakunaykipaqqa puntatam reparanayki yachachisqayki imapaq kasqanta. ¿Willayllachu-willanki ima creenciamantapas, imayna portakuymantapas, imayna kawsakuymantapas? ¿Mayqen yachachikuymantapas cheqap otaq mana cheqap kasqantachu qawachiyta munanki? ¿Munankichu imapas chaninchanankuta otaq kasukunankuta? Huk runallaman otaq achka runakunaman yachachinaykipaqqa reparanaykim imakunaña yachasqankupi hinaspa chay yachachikuymanta ima nisqankupipas. Chayman hina yachachinaykipaq kaqta ordenninpi preparakuspa imapi yanapasqanmanta entiendechiy.

Apostol Pablopas Damasco llaqtapi predicaspanmi qawachirqa Jesusqa Diospa prometesqan Cristo kasqanmanta, chaymi Damascopi kaq judiokunaqa mana ima niytapas atirqakuchu (Hech. 9:22). ¿Imaynatam allinta entiendechirqa? Hebreo Rimaypi Qellqasqa Diospa Palabran Cristomanta willakusqanpi judiokuna creesqankutam qawachirqa. Chay qellqakunapi Cristopa vidanmantawan predicasqanmanta willakuykunata leespanmi qawachirqa Cristoqa Jehova Diospa kachamusqan kasqanta (Hech. 13:16-41; 17:2, 3). Bibliapa yachachikuyninkunamanta chaynata yachachispaqa uyarisuqnikikunatam entiendechinki.

Ordenninpi imaynata preparakunapaq. Imamantapas yachachinaykipaq kaqtam ordenninpi qellqawaq qatiqninpi yachachikuykunaman hina.

Yachachinaykipaq kaqta preparakuspa. Imapi yanapanaykipaq kasqanman hina yachachinaykipaq kaqkunata ordenninpi qellqay. Chayqa kanman yachachisqaykita entiendechinapaq aswan allinnin kaq yachachikuykunam otaq cheqap kaqmanta mana cheqap kaqmanta yachachikuykunapas. Chayman hina uyarisuqnikikunapi reparaspa yanapananpaq kaqkunallata servichikuy.

Ordenninpi yachachinaykipaq kay ejemplopi reparay. Diospa sutinmanta yachachinayki kaptinqa qawachiwaqmi: 1) imanasqa Diospa sutinta yachanamanta 2) imataq Diospa sutin kasqanmanta hinaspa 3) imayna hatunchanamantapas.

‘Allin yuyayniyoq confianza sirvientepa’ horqomusqan qellqakunam yanapawanchik Bibliamanta ordenninpi estudiachinapaq (Mat. 24:45). Chay qellqakunam Biblia estudiaqkunata yanapan yachachikuykunata allinta entiendenankupaq. Wakin qellqanchikkunapiñataqmi yachachikuykunaqa rakisqa kachkan subtitulokunawan. Sapa yachachikuymi estudianteta yanapan qatiqnin yachachikuyta entiendenanpaq.

Imapas imanasqa pasasqanmanta chaynataq imapi tukusqanmanta. Kaynata yachachiypas yanapawasunmi ordenninpi yachachinapaq.

Pimanpas yachachispaqa entiendechinam rurasqanpas otaq piensasqanpas imapi tukunanta. Proverbios 7 kaq capitulom chayna yachachinapaq yanapawanchik. Chaypim willawanchik mana experienciayoq hinaspa mana allin “yuyayniyoq” mozomanta, payqa sasachakuypim tarikurqa chuchumika warmi engañarusqanwan (Prov. 7:7).

Yachachisqaykita astawan entiendechinaykipaq qawachiy Jehova Diosta mana kasukuqkunaqa sasachakuypi tarikusqankuta, kasukuqkunañataq bendicionkuna chaskisqankuta. Diospa Prometesqan Allpaman israelitakuna manaraq yaykuchkaptinkum Moises qawachirqa kasukuyqa otaq mana kasukuyqa imapi tukusqanta (Deut. 28 cap.).

Wakinpiqa allinmi kanman imapi tukusqanmanta willaspa discurso qallariyqa hinaspam qawachina imanasqa chayna pasasqanmanta. Chaynata yachachinapaqqa bosquejopim puntata qellqana sasachakuymanta hinaspa imayna atipanapaq kasqanmantapas.

Sasachakuymantawan imayna atipanamanta. Predicasqayki lawpi runakunaqa yaqapaschá allinta uyarisunki imawan sasachakusqankumanta hinaspa imayna atipanapaq kasqanmanta rimaptikiqa.

Rimawaqmi kaykunamanta: yuyaqyaymanta, wañuymanta otaq mana allin ruraqkuna astawan rikurisqanmanta. Chay sasachakuykunamanta rimaspaqa Bibliapa nisqanwan qawachiy imayna allichasqa kananmanta.

Kaykunawanpas sasachakunmankutaqmi: wawankuta otaq churinkuta sapallanku uywasqankuwan, llumpayta onqospa hukmanyasqankuwan otaq pipas ñakarichiptin sasachakusqankuwanpas. Allinta yanapanapaqqa uyariwaqninchik rimaptinmi atencionwan uyarina. Chayna sasachakuykunamanta Bibliapa willasqanta qawachiy ichaqa allinta tanteaspa. Pimanpas predicaspaykiqa qawachiwaqmi imata ruraspa sasachakuyninta atipananpaq otaq kay tiempopi mana allichay atina kaptinqa imaynata aguantananpaqpas. Chaypaqqa imamanta rimasqaykita entiendenanpaq textokunata leepuy. Mana chayqa manam entiendenqachu imamanta willasqaykitaqa.

Imapas pasasqanmanta ordenninpi willaspa. Wakin yachachikuyqa ordenninpi yachachinapaqmi. Ejemplopaq, Exodo libropim chunka castigokuna imayna kasqanmanta qatinasllanpi willakuchkan. Hebreos 11 kaq capitulopiñataqmi apostol Pablo qatinasllanpi qellqarqa Diosman sonqo kaq warmikunamantawan qarikunamanta chaynataq imay tiempopi kawsasqankumantapas.

Imamantapas imayna pasasqanman hina qatinasllanpi willaptikiqa uyarisuqnikikunam allinta entiendenqaku. Chaynatam yachachiwaq ñawpa tiempopi imapas pasasqanmanta otaq kunan tiempopi pasasqanmantapas. Imapas pasasqanmanta ordenninpi willaspaqa qawachiwaqtaqmi imanasqa chay pasasqanmanta chaynataq imapi tukusqanmantapas. Bibliapa willakusqanman hina hamuq tiempopi imakuna pasananmanta ordenninpi willaptikiqa allinta entiendespam yuyanqaku.

Imamantapas willaspaqa imapas imayna pasasqanmantam qatinasllanpi willawaq. Willawaqmi pipas Diosman sonqo kasqanrayku ima sasachakuypipas tarikusqanmanta.

Yachachisqaykiwan tupaq kaqkunallata servichikuy. Bosquejoykipi qellqay yachachinaykipaq yanapasuqniki kaqkunallata. Chaykunatam akllawaq imamanta yachachinaykipaq kaqpi reparaspa. Reparanaykitaqmi uyarisuqnikikuna pikuna kasqanpipas. Yachachisqaykiqa llapantam yanapanan, mana chayqa yachachisqaykim yanqapaq kanman.

Preparakuspaqa tarinkipaschá yachachisqaykiwan tupaq achka yachachikuykunata. ¿Llapantachu servichikuwaq? Achka yachachikuykunamanta willaspaqa manam allintachu entiendechinki. Aswan allinnin kaq yachachikuykuna iskay-kimsalla kaptinqa mana sasachakuspam yuyanqaku, achkanpi apurayman rimasqam ichaqa mana. Kaywanqa manam nichkanchikchu rikchanachiykunata otaq experienciakunata manaña servichikunaykimantachu, chaykunataqa servichikuwaqmi uyarisuqnikikunata yanapananpaq kaqkunallata. Chaynata yachachinaykipaq reparay Marcos 7:3, 4; Juan 4:1-3, 7-9 nisqankuna imakunamantawan willasqanpi.

Punta kaq yachachikuymanta rimaruspa qatiqninmantaña rimasqaykita sutillata qawachinaykipaqmi tupasqanman hina palabrakunata servichikunayki.

Allintam entiendechinki imamanta yachachinaykipaq kaqta ordenninpi hinaspa yachachisqaykiwan tupaq kaqkunallata servichikuspaqa.