¿Imaynam Jesusqa karqa?

Jesuspa retratonqa manam kanchu, ¿imanasqa? Chay tiempopi foto mana kasqanraykum hinaspa mana dibujachikusqanraykum. Chaywanpas achka runakunam Jesustaqa wañukusqan qipataña dibujarqaku piensasqankuman hina.

Manam chay dibujaqkunaqa Jesus imayna rikchayniyuq kasqantaqa yacharqakuchu. Dibujaqkuqa llaqtankupi runakuna imayna kasqankuman hinam utaq imayna creesqankuman hinam, wakinpiqa rantiqkunapa munasqankuman hinam dibujaqku. Chayraykum wakin runakunaqa manaña imam kaqtachu Jesusmantaqa piensanku.

Wakin runakunaqa Jesustam dibujarqaku mana kallpayuqta, llaki uyayuqta, chukchasapata hinaspa iskay-kimsa barbayuqllata. Wakinñataqmi uman muyuriqninpi achkiyuqta utaq karullamanta hatun tukuspa qawamuqta. Chay runakunapa dibujasqankuqa ¿tupanchu bibliapa willakusqanwan? ¿Imaynatam yachachwan? Yachachwanmi bibliapa willakusqanta qawaspanchik, chaymantam qatiqninpi yachasunchik.

Chaynatam Jesusqa Diosta mañakuspan rimarqa, yaqachusmi chaytaqa nirqa bautizakuruspan (Hebreos 10:5; Mateo 3:13-17). Chaynaqa, ¿imayna cuerpoyuqtaq Jesusqa karqa? Manaraq Jesus ñacechkaptinmi angel Gabriel Mariata kaynata nirqa: ‘Wiksayakuspam wachakunki qari wawata, [...] chay naceqqa chuyam kanqa, Diospa churinwan sutichasqa’, nispa (Lucas 1:31, 35). Hinaptinqa, Adan hina chuya cuerpoyuqmi Jesusqa karqa (Lucas 3:38; 1 Corintios 15:45). Cabal cuerpoyuq, kallpanpa huntasqan. Rikchakurqataqchá maman Mariamanpas, mamanqa judiam karqa.

Jesusqa judio kasqanraykum barbayuq karqa, Roma nacionniyuqkunam ichaqa siksikuqku. Judiokunaqa barbayuq kaytam allinpaq hapiqku ichaqa manam hatunyanankamachu wiñachikuqku. Chaychá Jesusqa chukchantawan barbantaqa rutukuq. Sanson hina Diospaq sapaqchasqa runakunallam chukchankutaqa mana rutukuqkuchu (Numeros 6:5; Jueces 13:5).

Jesusqa yaqa 30 watankamam carpintero karqa, chay tiempopiqa manam karqachu maquinakunaqa, chaymi imatapas ruwaqku makillawan. Chaychá Jesusqa kallpanpa huntasqan karqa (Marcos 6:3). Jesusqa kallpayuq kasqanraykum Diosmanta willakuyta qallaykuspallan, mana pipa yanapasqan templopi llapa rantikuqkunata qarqururqa mesankutapas wischuspan (Juan 2:14-17). Chaymantapas Diospa kamachisqanta ruwananpaqmi ‘llaqtakunaman rirqa Diosmanta willakunanpaq’ (Lucas 4:43). Mana kallpayuq kaspanqa manachá chakillawanqa karu llaqtakunaman riytaqa atinmanchu karqa.

Chaynatam llakipa intusqan runakunata Jesusqa nirqa, hinaptinmi paykunaqa kuyakuqllaña hinaspa llampu sunqu Jesus kasqanrayku asuykurqaku yachachikuyninta uyariq (Mateo 11:28-30). Wawakunapas Jesusmanqa asuykuqmi, hinaptinmi payqa wawakunatapas marqakuykuq (Marcos 10:13-16).

Jesusqa manam llaki uyayuq runachu karqa. Huk kutipim, casarakuypi vino pisiruptin yakuta vinoyarachirqa chaypi kaq runakuna kusisqa kanankupaq (Juan 2:1-11). Wakin kutipipas runakunaman watuykuspanmi allin kaqkunata yachachirqa (Mateo 9:9-13; Juan 12:1-8).

Chaywanpas, Diosmanta runakunaman yachachispanmi willarqa kusisqa wiñaypaq kawsakuy atinankumanta (Juan 11:25, 26; 17:3). Huk kutipim, 70 qatiqninkuna Jesusman willarqaku willakusqankupi imayna kamusqankumanta, hinaptinmi “Jesusqa anchallataña kusikurqa”, hinaspam nirqa: ‘Kusikuychik hanaq pachapi sutikichik qillqasqa kasqanmanta’, nispa (Lucas 10:20, 21).

Jesuspa tiemponpi Diosmanta yachachiqkunaqa tukuytam ruwaqku runapa allin qawasqan kayta munaspanku, chaynaqa karqaku hatun tukuq kasqankuraykum (Numeros 15:38-40; Mateo 23:5-7). Jesusmi ichaqa apostolninkunata nirqa: “Qamkunaqa manam chaynachu kanaykichik”, nispa (Lucas 22:25, 26). Nirqataqmi: “Cuidakuychikyá escribakunamanta, paykunam munanku hatun pachawan kayman-wakman puriyta”, nispa (Marcos 12:38).

Jesusqa manam chay runakuna hinachu karqa, chaymi runakunapas mana chayllaqa riqsiqkuchu (Juan 7:10, 11). 11 apostolninkuna hinallam karqa. Chaymi Judaspas Jesusta enemigonkunaman imaynata riqsichinanpaq nirqa: “Muchaykusqay runam kanqa, paytam hapinkichik”, nispa (Marcos 14:44, 45).

Chaywanpas, Jesus imayna rikchayniyuqpuni kasqantaqa manam sumaqtaqa yachanchikchu, ichaqa manam lliwchu Jesustaqa bibliapa nisqanman hina dibujanku. Chaywanpas aswan allinqa kunan Jesus imayna kasqanta yachaymi.

Chaynatam Jesusqa qatiqninkunata nirqa enemigonkuna wañuchinankupaq manaraq hapichkaptinku (Juan 14:19). Wañurqaqa “vidanta quspan achka runakunata librananpaqmi” (Mateo 20:28). Kimsa punchawmantam espiritu cuerpoyuqta Diosqa kawsarichirqa, hinaptinmi qatiqninkunaman ‘rikuriykurqa’ (1 Pedro 3:18; Hechos 10:40). ¿Imayna rikchayniyuqñataq Jesusqa kawsarirqa? Yaqachusmi huk rikchayniyuqña, chaymi riqsiqninkunapas mana chayllachu riqsirqaku. Maria Magdalenapas Jesustam pantakururqa huerta cuidaqwan, iskay qatiqninkunapas pantarurqakum forastero runawan (Lucas 24:13-18; Juan 20:1, 14, 15).

Chaynaqa ¿imaynañataq kunanqa Jesusqa kachkan? Apostol Juanmi achka kutipi musquyninpi hina Jesustaqa rikurqa ‘kamachiqkunapapas kamachiqninña’ kasqanta, manam cruzpi chakatasqatachu. Chayna kamachiqña kasqanraykum Jesusqa manapas unaymanta chinkachinqaña lliw Diospa enemigonkunata, hinaptinmi sumaq kawsakuyña kay pachapiqa kanqa (Apocalipsis 19:16; 21:3, 4).