Achkaqtam yanapanqaku allin ruwaq kanankupaq

 1. ¿Imakunataq pasanqa Jesuspa 1.000 wata kamachisqan ukupi?

ANCHA kusisqachá tarikusun 1.000 wata ukupi runakuna kawsariyta qallaykuptinkuqa. Llapallanchikmá munachkanchikña wañukuq ayllunchikkunawan tupaykuyta. Jehova Diospas chaytam munachkan (Job 14:15). Mayna kusikuypaqchá chay punchawqa kanqa. Qayna yachasqanchikman hinam ‘allin ruwaqkunapa’ sutinqa Diospa libronpi kachkan, paykunaqa ‘hatarimunqaku hinalla kawsakunankupaqmi’ (Hech. 24:15; Juan 5:29). Yaqapaschá kuyasqanchik ayllunchikkuna puntata kawsarimunqaku.b ‘Mana allin ruwaqkunapas’ utaq manaraq wañukuchkaspanku Diosta manaraq serviqkunapas ‘hatarimunqakum juzgasqa kanankupaq’.

2, 3. (1) Isaias 11:9, 10 nisqanman hinaqa, ¿imakunamantataq kawsarimuqkunaman yachachisunchik? ¿Imaynampitaq yachachisunchik? (2) ¿Imakunamantam kunan yachasun?

² Kawsarimuqkunaqa tukuy imamantam yachananku kanqa (Is. 26:9; 61:11). Chayraykum chaypiqa kunan tiempomantapas astawanraq yachachinanchik kanqa (leey Isaias 11:9, 10). Mana allin ruwaqkunamanmi yachachinanchik kanqa Jesucristomanta, Diospa gobiernonmanta, Jesuspa wañukusqanmanta, Diospa sutinmanta, Dioslla tukuy imata kamachiq kasqanmanta. ‘Allin ruwaqkunapas’ wañukusqanku qipaman Diospa tukuy ima ruwasqanmantam yachananku kanqa. Paykunaqariki wañukurqaku biblia qillqaytapas manaraq tukuchkaptinkum. Chaynaqa, ‘allin ruwaqkunamanpas’, ‘mana allin ruwaqkunamanpas’ yachachinanchikmi kanqa.

³ Chaymi kunan yachasunchik kaykunamanta: ¿Imaynatataq yachachisunchik kawsarimuqkunaman? ¿Imataq pasanqa yachachisqanchikta chaskikuqkunawanqa? ¿Imataq pasanqa yachachisqanchikta mana chaskikuqkunawanqa? Chaykunamanta yachayninchikqa allinmi. Daniel qillqawan Apocalipsis qillqam yanapawasunchik runakuna kawsarimuyta qallaykuptin imakuna kananmanta sumaqta yachanapaq. Puntatayá yachaykusunchik Daniel 12:1, 2 nisqan willakuymanta.

4, 5. ¿Imakuna tukupay punchawkunapi pasananmantataq Daniel 12:1 nin?

⁴ (Leey Daniel 12:1). Daniel qillqapim niwanchik kay tukupay tiempopi imakunapas imayna kananmanta. Daniel 12:1 nin Miguelqa utaq Jesucristoqa Diospa runankunata ‘yanapananpaq sayasqanta’. Chay willakuyqa 1914 watapim cumplikuyta qallaykurqa. Chay watapimriki Jesusqa kamachinanpaq churasqa karqa.

⁵ Daniel qillqapiqa nintaqmi: “Tukupay punchawkunapiqa haykapipas mana pasasqan hatun ñakariymi kanqa, chayna ñakariyqa manam hatun llaqta rikurisqanmantapas karqachu”, nispa. Chay punchawkunapiqa Jesusqa Diospa runankunata yanapananpaqmi hatarinqa. Daniel qillqapa nisqan ‘hatun ñakariyqa’ Mateo 24:21 nisqan “llumpa-llumpay ñakariy” punchawmi. Chay ñakariypa qipanmanmi Jesusqa hatarinqa Diospa runankunata yanapananpaq, chayqa Diospa piñakuynin punchawpim kanqa. Diospa runankunatam Apocalipsis qillqapi nin mana pipa yupay atinan achkallay-achka runakuna kasqanta, “paykunaqa kanku llumpa-llumpay ñakariypi mana wañuqkunam” (Apoc. 7:9, 14).

 6. ¿Imataq pasanqa mana pipa yupay atinan achkallay-achka runakuna llumpa-llumpay ñakariyta pasarusqanku qipaman? ¿Imaynampitaq chaynata ninchik? (Qaway allpa pachapi kawsarimunankumanta “Astawan yachay munaqkunapaq” niqta).

⁶ (Leey Daniel 12:2). ¿Imataq pasanqa mana pipa yupay atinan achkallay-achka runakuna hatun ñakariyta pasarusqanku qipaman? Daniel 12:2 riman kawsarimuy kananmanta. Ñawpaqtam chayta entienderqanchik Diosta serviqkuna kawsarichkaq hina tukuy sunqunkuwan Diosmanta willakuyta qallaykusqankumanta.c Ichaqa manam chaynachu, aswanqa kay allpa pacha suma-sumaqña kaptin kawsarimuymantam rimachkan. ¿Imaynanpitaq chaynata ninchik? Job 17:16 nin wañukuqkunaqa “allpaman” kutiykusqanchikmanta, chayraykum nichwan Daniel 12:2 nisqanqa aycha cuerpopi kawsarimuymanta rimasqanta. Chayqa kanqa Diospa piñakuynin punchawmanta qipamanmi.

 7. (1) ¿Ima niytataq munachkan Daniel 12:2 “wakinmi kawsarimunqa wiña-wiñaypaq kawsakunankupaq” nispanqa? (2) ¿Imaynanpitaq kay allpa pacha suma-sumaqña kaptin kawsariyqa ‘aswan allin’ kanqa?

⁷ ¿Ima niytataq munachkan Daniel 12:2 “wakinmi kawsarimunqa wiña-wiñaypaq kawsakunankupaq” nispanqa? Chaywanqa nichkan kawsarimuqkuna Jehova Diostawan Jesusta riqsispankuqa utaq hinalla riqsinankupaq 1.000 wata ukupi kallpanchakuspankuqa chaynataq kasukuspankuqa wiñay kawsayta chaskinankumantam (Juan 17:3). Chaypiña kawsariyqa aswan allinmi kanqa (Heb. 11:35). ¿Imaynanpi? Ñawpaqta kawsariq runakunaqa kaqllamanta wañusqankuraykum.

 8. ¿Ima niytataq munachkan ‘wakin chiqnisqa kanankupaq hinaspa pinqaypi kanankupaq’ kawsarimunankumanta nispanqa?

⁸ Kawsarimuqkunamantaqa manam llapallankuchu Jehova Diospa yachachisqantaqa kasukunqaku. Hina Daniel qillqapimriki nin ‘wakinqa wiña-wiñaypaq chiqnisqa kanankupaq hinaspa pinqaypi kanankupaq’ kawsarimunankumanta. Mana kasukusqankuraykum paykunapaqqa sutinkupas Diospa libronpiqa mana qillqasqachu kanqa. Manataqmi haypanqakuchu wiñay kawsaytapas. Paykunaqa pinqaypim kanqaku, utaq wiñaypaqmi wañunqaku. Chaynaqa Daniel 12:2 rimachkan kawsarimusqankumanta qipaman imayna kanankumantamd (Apoc. 20:12). Wakinkum wiñay kawsayta haypanqaku, wakinñataqmi mana.

9, 10. (1) Daniel 12:3 nisqanman hinaqa ¿imaraqtaq pasanqa llumpa-llumpay ñakariypa qipanman? (2) ¿Pikunataq ‘punchawpi cielo hina achkirinqaku’?

⁹ (Leey Daniel 12:3). ¿Imaraqtaq pasanqa kayllapiña kaq ‘hatun ñakariypa’ qipanman? Daniel 12:3 nin llumpa-llumpay ñakariypa qipanman ima pasananmanta.

¹⁰ ¿Pikunataq ‘punchawpi cielo hina achkirinqaku’? Chayta yachanapaqqa Mateo 13:43 nisqanmi yanapawanchik, chaypim Jesus nirqa: “Chay tiempopim allin ruwaqkunaqa hanaq pachapi kaq taytanpa gobiernonpi inti hinaraq kancharinqaku”, nispa. Chaynata nisqanwanqa Jesusqa rimachkarqa ‘Diospa gobiernonpi kaqkunamantam’ utaq paywan kamachinankupaq hanaq pachapaq akllasqakunamantam (Mat. 13:38). Chaynaqa Daniel 12:3 nichkan hanaq pachapaq akllasqakunamantam chaynataq 1.000 wata ukupi kamachimuspanku imakuna ruwanankumantam.

11, 12. ¿Imatataq ruwanqaku 1.000 wata ukupi 144.000 hanaq pachapaq kaqkunaqa?

¹¹ Hanaq pachapaq kaqkunam achkaqta yanapanqaku ‘allin ruwaq kanankupaq’. ¿Imaynatataq chaytaqa ruwanqaku? 1.000 wata ukupim Jesusta yanapanqaku kay allpa pachapi kawsarimuqkunata Diosmanta yachachiypi. 144.000 hanaq pachaman riqkunaqariki kamachiqkunam hinaspa sacerdotekunam kanqaku (Apoc. 1:6; 5:10; 20:6). Paykunam yanapakunqaku ‘nacionkuna hampiypi’, chaynapim runakunaqa pisi-pisimanta manaña pantaq kanqaku (Apoc. 22:1, 2; Ezeq. 47:12). ¡Maynataraq chayta ruwaspankuqa kusikunqaku!

¹² ¿Pikunataq ‘allin ruwaq kanankupaq’ yanapasqa kanqaku? Diospa piñakuynin punchawpi mana wañuqkunam, kawsarimuqkunam, kay allpa pacha suma-sumaqña kaptin naceqkunam. 1.000 wata tukuytaqa kay allpa pachapi kawsaqkunaqa mana pantaqñam kanqaku. Chaynaqa, ¿haykapitaq Diospa libronpiqa sutinku kanqa manaña lapizwan qillqasqa hinañachu aswanqa lapicerowan qillqasqa hinaña?

13, 14. ¿Imatataq ruwananku kanqa kay allpa pachapi kawsaq runakunaqa manaraq wiñay kawsayta chaskichkaspanku?

¹³ ¿Pipas 1.000 wata tukuyta manaña pantaq kasqankuraykuchu nichwan wiñay kawsaytaña hayparusqanta? Manam, Adanwan Evapas mana pantaqmi karqaku. Wiñay kawsayta haypanankupaqqa Diostam kasukunanku karqa, ichaqa manamá kasukurqakuchu (Rom. 5:12).

¹⁴ 1.000 wata tukuytaqa llapallan kay allpa pachapi kawsaqkunam mana pantaqña kanqaku. Chay runakunaqa mana pantaqña kaspankupas, ¿wiñaypaqchu Diosman sunqu kaspanku kasukunqaku? Icha, ¿wakinkuqa Adanwan Eva hinachu mana pantaqña kachkaspankupas Diosta mana kasukunqaku? ¿Imaynatataq imayna kasqankutaqa yachana kanqa?

15, 16. (1) ¿Haykapitaq runakunaqa Diosman sunqu kanankupaq astawan kallpanchakunanku kanqa? (2) ¿Imataq pasanqa mana kasukuqkunawan chaynataq kasukuqkunawan?

¹⁵ Satanasqa 1.000 watam wichqasqa kanqa. Chay tiempopiqa manamá pitapas pantachinqachu. Ichaqa 1.000 wata tukuytam kacharisqa kanqa hinaspanmi manaña pantaq runakunata pantachiyta munanqa. Chay tiempopiqa sapakamam tantiakunanku kanqa Diosta kasukunankupaq utaq mana kasukunankupaqpas (Apoc. 20:7-10). Ruwasqankuman hinam sutinkuqa Diospa libronpi kanqa utaq manapas.

¹⁶ Wakinkuqa Adanwan Eva hinam Jehova Diosta qipanchanqaku. ¿Imataq paykunawanqa pasanqa? Apocalipsis 20:15 nin: “Diospa libronpi sutinku mana qillqasqa kaqkunaqa chay rupachkaq quchamanmi wischusqa karqaku”, nispa. Chaypi nisqanman hinam mana kasukuqkunaqa wiñaypaq wañunqaku. Kasukuqkunapam ichaqa sutinkuqa Diospa libronpi wiñaypaq qillqasqa kanqa.

17. ¿Imakuna kay tiempopi pasananmantataq angelqa Danielman nirqa? (Rimarimuytaq Daniel 12:4, 8-10 nisqanmantapas).

¹⁷ ¡Hamuq punchawkunamanta yachasqanchikwanqa anchatam kusikunchik! Ichaqa angelmi Danielman nirqa imakuna kay tiempopi utaq ‘tukupay punchawpi’ pasananmanta (leey Daniel 12:4, 8-10; 2 Tim. 3:1-5). Angelmi nirqa: ‘Chiqap kaqtam allinta yachanqaku’, nispa. Chaywanqa nichkarqa Daniel qillqapi willakuykunamanta kay tiempopi allinta entiendenanchikmantam. Chaymantapas angelqa nirqaraqmi: “Mana allin ruwaqkunañataqmi llumpay mana allintaraq ruwanqaku, paykunaqa manam chaytaqa entiendenqakuchu”, nispa.

18. ¿Imataq pasanqa tumpallamantaña cabrawan rikchanachisqan runakunata?

¹⁸ Kay punchawkunapiqa Diosta mana kasukuq runakunaqa munasqankutam ruwanku (Mal. 3:14, 15). Ichaqa Jesusmi cabrawan rikchanachisqan runakunata juzganqa hinaspam rakinqa ovejawan rikchanachisqan runakunamanta (Mat. 25:31-33). Cabrawan rikchanachisqan runakunaqa llumpa-llumpay ñakariy punchawkunapim wañunqaku. Paykunaqa manañam kawsarimunqakuñachu, sutinkupas paykunapaqqa manam ‘yuyasqachu kanqa’ (Malaquias 3:16).

19. ¿Imapaqmi kunanmanta kallpanchakunanchik? ¿Imaynanpi? (Rimarimuytaq Malaquias 3:16-18 nisqanmantapas).

¹⁹ Diosta mana kasukuq runakunawan kuska mana wañurunanchikpaqmi kunanmanta kallpanchakunanchik Diosman sunqu kananchikpaq (leey Malaquias 3:16-18). Jehova Diosqariki kunanmi akllachkan ‘paypaq kaqkunata’, ñuqanchikpas chay ukupi kaytam munanchik.

20. ¿Imatataq Jehova Diosqa Danielman nirqa? ¿Imaynanpitaq qamqa munanki chay cumplikunanta?

²⁰ Hamuchkanmi tukuy mana allinkuna chinkanan punchaw. Chaypa qipanmanmi qawasunchik Danielman Jehova Diospa nisqan cumplikusqanta. Danielmanmi nirqa: ‘Punchawkuna tukuruptinmi hatarimunki qampaq kaqta chaskinaykipaq’, nispa (Dan. 12:13). ¿Munachkankiñachu Daniel hina kuyasqayki aylluykikuna kawsarimunanta? Chayta munaspaykiqa Diosman sunqu kanaykipaq kallpanchakuy, chaypaq kallpanchakuptikiqa sutikim Diospa libronpi kanqa.