¿Imanasqataq kunan tiempopi ancha allin wasin-wasin predicayqa?

“Mana samaykuspankum sapa punchaw templopi hinaspa wasikunapi yachachiqku hinaspa Jesucristomanta willakuqku.” (HECH. 5:42.)

1, 2. a) ¿Imayna predicasqankuwanmi Jehová Diospa testigonkunaqa reqsichikunku? b) ¿Imamantam yachasun kay estudiopi?

YAQA llapallan nacionkunapim kayqa rikukun: allin pachasqa iskay runakunam punkuta takanku hinaspam pipas lloqsimuqman Diospa Gobiernonmanta willanku. Uyariyta munaptinqa, Bibliamanta horqosqa qellqatam munachinku hinaspam ninku Bibliamanta mana qollqellapaq yachachinankupaq. Rimayta tukuruspankum qatiqnin wasimanña rinku. ¿Chaynatachu qampas ruranki? Hinaptinqa, qawarqankichá manaraqpas rimachkaptiki runakunaqa yachankuña Jehová Diospa testigon kasqaykita. Arí, wasin-wasin predicasqanchikmi sutillata reqsichiwanchik.

² Jehová Diospa testigonkuna, ¿imaynatam runakunaman predicanchik Jesuspa kamachiwasqanchikta cumplinapaq hinaspa imaynatam yanapananchik paypa qatiqnin kanankupaq? (Mat. 28:19, 20.) Chaypaqqa predicanchikmi mercadokunapi, callekunapi hinaspa maypipas runakunapa kasqanpi (Hech. 17:17). Chaynataq telefonowan, cartawan hinaspa atikuptinqa imata rurachkaspapas. Kantaqmi Internetpipas kimsa pachak masnin rimaykunapi Bibliamanta yachachisqanchik willakuykuna.a Kayna imaymanata willasqanchikmi allinpi tukun. Ichaqa, wasin-wasinta rispanchikmi astawanqa maypipas predicanchik. ¿Imanasqataq chaynata ruranchik? ¿Imanasqataq Diospa llaqtanqa yaqa llapanpi chaynata predicanku? ¿Imanasqam kunan tiempopi chayna rurayqa ancha allin?

Apostolkunapa imayna predicasqanku

 3. ¿Ima kamachikuytam apostolkuna kasukunanku karqa predicaspanku, hinaspa imaynatam chayta cumplinanku karqa?

³ Wasin-wasin predicayqa Bibliapa nisqanman hinam. Apostolninkunata predicanankupaq nispanmi, Jesucristo kaynata kamachirqa: “Maylaw llaqtamanpas otaq llaqtachamanpas chayaspaykichikqa maskaychikyá allin runa kaqta”, nispa. ¿Imaynatataq maskananku karqa? Runakunata wasinkupi watukuspam, paymi nirqa: “Wasiman yaykuspaqa: ‘Hawkalla kaychik’ nispam rimaykunkichik. Wasipi kaqkuna allin runa kaptinqa, paykunapaqyá mañakuychik hawka kayta”, nispa. ¿Runakunachu apostolkunata ninanku karqa wasinkuman watukamunankupaq? Manam, Jesusmi kaynata nirqa: “Pipas mana chaskisuptikichikqa hinaspa mana uyarisuptikichikqa chay wasimantayá otaq chay llaqtamantayá lloqsiychik, taspiychikyá usutaykichikpi allpatapas”, nispa (Mat. 10:11-14). Kayna kamachisqanmi sutillata qawachiwanchik apostolkuna runakunata wasinkupi watukunankumanta, kaytaqa ruranankum karqa risqankuman hina “llapallan llaqtachakunapi Diosmanta allin noticiata willakuspanku” (Luc. 9:6).

 4. ¿Ima textokunapim Biblia nin wasin-wasin predicaymanta?

⁴ Bibliaqa sutillatam niwanchik apostolkuna wasin-wasin predicasqankumanta. Ejemplopaq, Hechos 5:42 nisqanmi willawanchik 33 watapi congregacion qallarisqan qepallanta ima rurasqankuta: “Mana samaykuspankum sapa punchaw templopi hinaspa wasikunapi yachachiqku hinaspa Jesucristomanta willakuqku”, nispa. Apostol Pablom yaqa iskay chunka wata pasaruptin, Efeso congregacionpi ancianokunaman kaynata nirqa: “Chaywanpas allinnikichikpaq Diospa palabran willakuytaqa manam amirqanichu, ñoqaqa yachachirqaykichikmi llapa runakunapa qayllanpipas chaynataq wasikichikpipas”, nispa. ¿Kaywanqa nichkarqachu manaraq cristiano kachkaptinku paykunata Pablo watukusqanta? Yaqachusmi chayna karqa, paykunatam rimapayarqa ‘huchankumanta wanakuspa Señorninchik Jesusman iñinankumantapas’ (Hech. 20:20, 21). Griego rimaypi Hechos 20:20 ima nisqanmantam, Archibald Thomas Robertson sutiyoq runa kaynata nin: “Llapallanmanta kay reqsisqa runaqa, wasin-wasinmi Diosmanta willakurqa”, nispa.

Aqarway urukuna hina kunan tiempopi ruranamanta

 5. ¿Imaynatam Joel sutiyoq libropi tupachin predicasqanchikta?

⁵ Punta cristianokunapa predicasqankuqa, kunan tiempopi enteron pachapi predicasqanchikpa qallariyninmi karqa. Diosmanta willakuq Joelmi ungidokunapa predicasqankuta tupachirqa, daño ruraq urukunawan chaynataq aqarwaykunawanpas (Joel 1:4). Aqarwaykunaqa soldadokuna hina rispankum harkakuykunata atipanku, wasikunaman yaykunku hinaspa risqankupi ima tarisqankutapas mikunku (leey Joel 2:2, 7-9). Kaywanmi allinta tupachin, kunan tiempopi Diospa llaqtan mana samaykuspa chaynataq llapallanman predicasqankuta. Joelpa nisqanman hina ungidokunawan ‘sapaq ovejakuna’ imaymana predicasqankumantapas aswan allinqa wasin-wasin predicasqankum (Juan 10:16). ¿Imaynatam apostolkuna hina predicayta qallaykurqanchik?

 6. ¿Ima ruranankupaqmi cristianokunata yuyarichirqa 1922 watapi, hinaptin imatam wakinkuqa rurarqaku?

⁶ Llapallan cristianokunam 1919 watamanta astawan kallpanchasqa karqaku wasin-wasin predicanankupaq. Ejemplopaq, 1922 watapim 15 agosto killapi The Watch Tower nisqa revista, “El servicio es esencial” nisqa yachachikuypi ungidokunata yuyarichirqa “runakunaman qellqakunata kusikuywan apanankumanta hinaspa Diospa Munaychakusqan hichpallapiña kasqanmanta wasin-wasin willanankumantapas”. Chay tiempopi Bulletin (kunan Reinopaq Servicionchik) nisqapi predicanapaq yanapakuykunata qoptinpas, qallariypiqa asllam wasin-wasinta predicarqaku. Wakinkuqa imatapas niqkum mana predicanankurayku, chaytaqa rurarqaku predicayta penqakuypaq hinata qawaspanku. Chay tiempopi wasin-wasin predicanankupaq sapa kuti astawan kallpanchaptinkum, Jehová Diospa llaqtanmanta achka lloqsikurqaku.

 7. ¿Imataq necesitakurqa 1950 watakunapi?

⁷ Qatiqnin watakunapim predicaqkunaqa yapakururqa. Ichaqa, wasin-wasin predicanankupaqqa aswan allin yachachisqam kananku karqa. Ejemplopaq qawasun Estados Unidos nacionpi imayna predicasqankumanta. Yaqa 1950 watakunapim, chay nacionpi kaq testigokunamanta tawa kaq parte masnin invitacionkunallata aypuqku otaq revistakunata hapispa callekunapi sayaqku. Llapankumanta yaqa partenmi sapa kuti mana predicarqakuchu. ¿Imatam rurananku karqa llapallan cristianokuna wasin-wasin predicanankupaq?

8, 9. ¿Ima ruranankupaqmi 1953 watapi yachachiyta qallaykurqaku, hinaspa imapim tukurqa?

⁸ Chaynataq 1953 watapi Nueva York llaqtaman achka nacionkunamanta asambleaman riptinkum, kaqllamanta yuyarichisqa karqaku wasin-wasin predicanankupaq. Nathan H. Knorr, sutiyoq wawqenchikmi qawachirqa imaynam ancianokunaqa astawan kallpanchakunanku karqa iñiqmasinkunata wasin-wasin predicaypi yanapanankupaq. Paymi nirqa: “Llapankum atinanku Diosmanta allin noticiata wasin-wasin predicaytaqa”, nispa. Chayraykum enteron pachapi chaylla arreglota rurarqaku astawan yachachisqa kanankupaq. Wasin-wasin manaraq predicaqkunam yachachisqa karqaku Bibliata servichikuspa runakunawan rimayta qallarinankupaq, chaynataq tapukuyninkunata kutichinankupaq hinaspa piensarichinankupaqpas.

⁹ Chay arreglo rurakusqanqa allinpunim karqa. Yaqa chunka watallapim, huk chaynatawan predicaqkuna yapakururqa, revisitatapas huk chayna mastaraqmi rurarqaku hinaspa huk chayna partentañataq estudiotapas qorqaku. Kunanqa yaqa qanchis millon testigokunam enteron Pachapi Diosmanta willakuchkanku. Kayna admirakuypaq yapakusqanmi qawachin, wasin-wasin predicaqkunapa kallpanchakusqankuta Jehová Dios bendecisqanta (Isa. 60:22).

Salvasqa kanankupaqmi marcasqa kanku

10, 11. a) ¿Imamantam willakun Ezequiel libro 9 capitulonpi? b) ¿Imaynatam kunan tiempopi cumplikun chay willakusqan?

¹⁰ Wasin-wasin predicay ancha allin ruray kasqanmanta entiendenapaqmi, allin kanman Ezequiel libropa 9 capitulonpi Diospa qawachisqanmanta yachay. Chaypim Ezequiel rikurqa soqta runakunata mazo aptarisqata hinaspa huk runatapas linomanta pachayoq weqawninpi tintero waqaychaqta. Linomanta pachayoq runatam nirqa: “Llaqtapa chawpinkunapiyá puririy hinaspayá llaqtapi millakuypaq kaqkunamanta llakillawanña waqaq runakunapa urkunpi churamuy huk señalta”, nispa. Chay rurayta tukuruptinmi, mazo aptarisqa soqta runakunata Dios kamachirqa mana marcayoq runakunata wañuchinankupaq (leey Ezequiel 9:1-6).

¹¹ Yachanchikmi “linomanta pachayoq” runaqa tupachisqam kachkan kay Pachapi puchuq ungidokunawan. Predicaspanku hinaspa bautizakunankama yachachispankum paykunaqa Jesuspa ‘sapaq ovejankunaman’ marcata churachkanmankupas hina kachkanku (Juan 10:16). ¿Imataq chay marcaqa? Kayqa —yaqa urkunkupi marcasqapas kachkanmanku hinam— Jesuspa qatiqnin kanankupaq vidankuta Diosman qospa bautizakusqankum, chaynataq mosoq pachawan churakuchkaq hina mosoq runaña kasqankupas (Efe. 4:20-24). Paykunaqa ungidokunawanmi huk sonqolla kanku hinaspam paykunata yanapanku marcachkankumanpas hina runakunata predicaspanku (Apo. 22:17).

12. ¿Imaynatam Ezequielman Diospa qawachisqan yachachiwanchik ovejaman rikchakuq runakunata hinalla maskanamanta?

¹² Ezequielpa rikusqanmi qawachiwanchik imanasqam maskananchik ‘llakillawanña waqaq runakunata’ otaq allin sonqoyoqkunata; paykunapa vidanmi peligropi kachkan. Hinaptinqa, pisi tiempollapiñam Jehová Diosqa chinkachinqa mana marcayoq runakunata, kaytam ruranqa akllasqa tropankunawan. Apostol Pablom chay punchaw hichpallapiña kasqanmanta rimaspan nirqa, ‘Diosta mana reqsiqkunatawan Señorninchik Jesusmanta allin noticia mana kasukuqkunatapas’ Jesucristo angelninkunapiwan puchukachinanmanta (2 Tes. 1:7, 8). Bibliapa kayna nisqanmi yachachiwanchik, imaynam runakunaqa juzgasqa kanqaku predicacionta imayna chaskisqankumanta, chaymi Diosmanta willakuyqa astawan willasqa kanan tukuyninkama (Apo. 14:6, 7). Kaymi qawachiwanchik runakunaman mana predicaspaqa Jehová Diosman cuentata qonanchikmanta (leey Ezequiel 3:17-19).

13. a) ¿Ima rurananpaqmi apostol Pablo astawan kallpanchakurqa, hinaspa imanasqa? b) ¿Qampas chaynatachu sientinki runakunamanta?

¹³ Apostol Pablopas chaynatam qawarqa runakunaman predicaytaqa, chaymi kaynata qellqarqa: “Willanaypunim educadokunamanpas chaynataq mana educasqakunamanpas, yachayniyoqkunamanpas chaynataq mana yachayniyoqkunamanpas. Chayraykum Roma llaqtaykichikpipas llumpayta munachkani Jesucristomanta allin noticiakuna willaykuyta”, nispa (Rom. 1:14, 15). Pabloqa ancha agradecesqam karqa Dios pampachaykusqanmanta. Chaymi runakunata yanapaypi astawan kallpanchakurqa pay hina yanapasqa kanankupaq (1 Tim. 1:12-16). Llapallan runakunamanta manukurunmanpas hinam sientikurqa, chay manukusqantaqa pagayta atinman karqa Diosmanta sumaq noticiata willaspallanmi. ¿Qampas chaynatachu sientinki predicasqanchik runakunamanta? (Leey Hechos 20:26, 27.)

14. ¿Imanasqam puntataqa wasin-wasinta predicanchik llapallan runakunaman?

¹⁴ Runakunata salvakunankupaq yanapayqa allinmi, ichaqa manam chayraykullachu wasin-wasintaqa predicanchik. Malaquias 1:11 nisqanpim Jehová Dios kaynata nirqa: ‘Intipa qespimunan lawmanta qallaykuspam intipa seqaykunan lawkama lliw nacionkunapi hatunchawanqaku, [. . .] hinaspam qowanqaku suma-sumaq ofrendakunatapas, chaynapim ñoqaqa tukuy nacionkunapi reqsisqa kasaq’, nispa. Kay willakuypa nisqanman hinam, Jehová Diospa siervonkunaqa enteron pachapi runakunaman willakuspanku sutinta hatunchanku (Sal. 109:30; Mat. 24:14). Hinaptinqa, Dios alabayta munasqanchikraykum ‘kañasqa ofrendata qochkaq hina’ lliw runakunaman wasin-wasin predicanchik (Heb. 13:15).

Haykapipas mana pasasqanmi hichpaykamuchkanña

15. a) ¿Imaynatam israelitakuna qanchis punchawpi yaparqaku Jerico llaqta muyuyninkuta? b) Israelitakunapa rurasqankuman hina, ¿predicacion imayna rurakunantam suyachwan?

¹⁵ ¿Imataq hamuq tiempopi pasanqa predicacionwan? Jerico llaqtaman israelitakuna yaykunankupaq muyurisqankumanta Josuey sutiyoq libropa willasqanmi, qawachiwanchik kunan tiemponchikpi predicacionwan ima pasananmanta. Yuyarisunchik, Jehová Diosmi Jerico llaqtata manaraq purmachichkaspan israelitakunata kamachirqa soqta punchawpi huk kutillata sapa punchaw llaqtata muyurinankupaq. Qanchis punchawpim ichaqa astawanraq yaparqaku chay llaqta muyurisqankuta. Josueytam Jehová Dios kaynata nirqa: ‘Llaqtatam muyurimunkichik qanchis kutita hinaptinmi sacerdotekuna cornetankuta tocanqaku. Cornetata unay neqta tocaptinkuñataqmi [. . .] llapallaykichik sinchimanta qaparinkichik. Hinaptinmi llaqtapa murallan kikillanmanta tuñirunqa’, nispa (Jos. 6:2-5). Yaqapaschá kunan tiempopipas predicasqanchikqa yapakunqa. Mana allin ruraq runakuna puchukachisqa kananpaqqa, yaqachá enteron pachapi Diospa sutinmanta hinaspa Munaychakusqanmantapas astawan willasqa kanqa.

16, 17. a) ¿Imamantam ancha willasqa kanqa manaraq ‘hatu-hatun ñakariy’ tukuchkaptin? b) ¿Ima tapukuykunam kutichisqa kanqa qatiqnin estudiopi?

¹⁶ Diosmanta predicasqanchikqa yaqapaschá kanqa ‘sinchi qapariy’ hina. Apocalipsis librom juiciomanta admirakunapaq willakuyta tupachin huk talento hina llasaq runtu parawan.b Apocalipsis 16:21 nisqanman hinam chayqa “hatu-hatun castigo” kanqa. Manaraqmi yachanchikchu wasin-wasin predicayqa imapaq kananmanta Diospa piñakuyninmanta willakuptinchik. Ichaqa yachanchikmi ‘hatu-hatun ñakariy’ manaraq tukuchkaptin Jehová Diospa sutin enterollan Pachapi ima tiempomantapas astawan willakusqa kananmanta (Apo. 7:14; Eze. 38:23).

¹⁷ Chaykuna pasanankamaqa, hinallayá ganaswan willakusun Diospa Munaychakuyninmanta sumaq noticiata. Hinaptinqa Diospa kamachiwasqanchikta cumplinapaqqa, wasin-wasintam predicananchik. ¿Ima sasachakuykunataq kanman chayta rurananchikpaq? ¿Imaynatam atipachwan chay sasachakuykunata? Qatiqnin estudiopim kay tapukuykuna kutichisqa kanqa.

[Willakuykuna]

¿Imatam niwaq?

• ¿Ima textokunapim Biblia nin wasin-wasin predicanamanta?

• ¿Imaynatam kunan tiemponchikpi astawan kallpanchawarqanchik wasin-wasin predicanapaq?

• ¿Imanasqam Jehová Diosta serviqkunaqa predicananchik?

• ¿Imakunapa pasanantaq hichpaykamuchkanña?

[8 kaq paginapi dibujo]

¿Pablo hinachu qampas munanki runakunaman predicayta?

[9 kaq paginapi dibujo]

Knorr wawqenchik 1953 watapi