Jesucristoqa ‘Diospa atiyninmi’

 1. ¿Imanasqam Pablo nirqa: ‘Cristopim kachkan Diospa atiyninqa’, nispa?

KAY pachapi Jesus kaspanqa, admirakuypaq achka milagrokunatam ruwarqa. Chay milagrokunamanta bibliapi leespanchikqa, iñiyninchikpim allin takyasqa kasunchik (Mat. 9:35; Luc. 9:11). Jesusqa chay milagrokunatam ruwarqa Jehova Dios atiyta quptin. Chaymi apostol Pablo nirqa: ‘Cristopim kachkan Diospa atiyninqa’, nispa (1 Cor. 1:24). Ichaqa, ¿imatam yachachiwanchik Jesuspa milagrokuna ruwasqanqa?

 2. ¿Imatam yachachiwanchik Jesuspa milagrokuna ruwasqanqa?

² Jesuspa milagrokuna ruwasqanmantaqa anchatam yachachwan (Hech. 2:22). Jesuspa chay milagrokuna ruwasqanmi qawachiwanchik 1.000 wata kamachimuspan kay pachapi kawsaq runakunata yanapananpaq tukuy ima ruwananmanta. Chay milagrokuna ruwasqanqa yanapawanchiktaqmi Jehova Diospa sumaq kayninkunamanta astawan yachanapaq. Kay yachachikuypim rimasunchik Jesuspa kimsa milagrokuna ruwasqanmanta hinaspa imaynatam yanapawanchikman kunan chaynataq hamuq tiempopipas.

 3. (1) ¿Maypim Jesusqa punta kaq milagronta ruwarqa? (2) ¿Imanasqataq Jesusqa chay milagrota ruwarqa?

³ Jesusqa punta kaq milagrontam ruwarqa Galilea law Cana llaqtapi. Ichapas achka runakuna casarakuyman risqanrayku vino pisirurqa. Chayqa pinqaymi karqa casarakuqkunapaqqa, chay punchawqa manam imankupas pisinanchu karqa. Chaypitaqmi Jesuspa maman Mariapas karqa, paymi Jesusta nirqa yanapananpaq. ¿Imanasqa? Mariaqa allintam yacharqa Jesusmanta willakuyta chaynataq ‘Diospa churinwan’ sutichasqa kananmantapas (Luc. 1:30-32; 2:52). ¿Yaqachu Mariaqa yacharqa Jesus atiyniyuq kasqanta? Manam yachanchikchu. Ichaqa yachanchikmi Mariawan Jesusqa casarakuqta yanapay munasqankumanta. Chaymi Jesusqa suqta urpukunapi yakuta vinoyarachirqa (leey Juan 2:3, 6-11). Jesusqa manam chay milagrotaqa ruwananchu karqa, ichaqa runakunata llakipayasqanraykum chayta ruwarqa. Payqa Jehova Diospa qukuykuq kasqantam qatipakuchkarqa.

4, 5. (1) ¿Imatam yachachiwanchik Jesuspa punta kaq milagro ruwasqanqa? (2) ¿Imamantam mana iskayrayachwanchu?

⁴ Jehova Diospa atiyninwanmi Jesusqa achka yakuta sumaq vinoman tikrarurqa achka runakunapaq. ¿Imatam yachachiwanchik kay milagro ruwasqanqa? Jesuswan Jehova Diosqa runakunatam llakipayanku hinaspapas qukuykuqmi kanku. Chaymantapas, manam iskayrayachwanchu musuq pachapi achka mikuy kananpaq Jehova Dios atiyninta servichikunanmantaqa (leey Isaias 25:6).

⁵ Kaypi yuyaymanasun: Musuq pachapi kawsaptinqa Jehova Diosmi tukuy imakunatapas quwasunchik. Llapanchikpam kanqa sumaq wasinchik hinaspa achka mikuypas. Tukuy chaykunata Jehova Dios ruwananpi piensasqanchikmi, kallpanchawanchik payta agradecekunanchikpaq.

 6. (1) ¿Imapaqmi Jesusqa atiyninta servichikuq? (2) ¿Imaynatam Jesusta qatipakuchwan?

⁶ Jesusqa manam haykapipas atiynintaqa servichikurqachu kikinpa munasqanta ruwananpaqqa. Huk kutipim, diabloqa Jesusta nirqa rumita tantayachinanpaq. Ichaqa Jesusmi mana munarqachu (Mat. 4:2-4). Jesusqa runakunata yanapananpaqmi atiynintaqa servichikuq. ¿Imaynatam chay ruwasqanta qatipakuchwan? Kikin Jesusmi nirqa qukuykuq kananchikpaq (Luc. 6:38). ¿Imakunata ruwaspam qukuykuq kasqanchikta qawachichwan? Nichwanmi iñiqmasinchikkunata wasinchikpi kuska mikunanchikpaq. Huñunakuy tukuytapas tiempochakuchwanmi paykunapaq, ichapas demostracionta ruwananpaq utaq Diosmanta willakunanpaq ensayaptin uyarichwan. Hukkunata yanapaspanchik hinaspa qukuykuq kaspanchikqa, Jesustam qatipakuchkanchik.

 7. ¿Imam hinalla kanqa satanaspa munaychakusqan pachapiqa?

⁷ Ñawpaq tiempopi hinam, kunanpas achka runakuna wakcha kanku. Jehova Diosmi Israel runakunata nirqa: “Wakchakunaqa manam faltanqachu kay pachapiqa”, nispa (Deut. 15:11). Achka watakuna pasaytapas Jesusmi nirqa: “Wakcha runakunaqa qamkunawanmi haykapikamapas kanqa”, nispa (Mat. 26:11). ¿Nichkarqachu kaywanqa wakcha runakuna wiñaypaq kananmanta? Manam. Jesusqa nichkarqam satanaspa munaychakusqan pachapi wakchakuna hinalla kananmanta. Musuq pachapiqa manam chayqa kanqachu. Chaypiqa achka mikuymi kanqa llapanchikpaq hinaspapas manam pipas wakchaqa kanqachu.

8, 9. (1) ¿Imanasqam Jesusqa waranqantin runakunaman mikuchirqa? (2) ¿Imaynam tarikunki kay milagropi yuyaymanaspayki?

⁸ Salmo 145:16 nin: “Makillaykita kicharispam llapallan kawsaqkunata saksaykachinki. Qamqa munasqankuwanmi llapallan kawsaqkunata saksaykachinki”, nispa. Kay pachapi Jesus kaspanqa, Jehova Diostam qatipakurqa hinaspa runatapas tukuy imapi yanaparqa. Ichaqa manam achka atiyniyuq kasqanta qawachinanpaqchu chaytaqa ruwarqa, aswanqa runakunata llakipayasqanraykum. Qawasun Mateo 14:14-21 (leey) nisqanta. Waranqantin runakunam Jesustaqa chakillawan qatirqaku achka llaqtakunamanta (Mat. 14:13). Tutaykuptinñataqmi, Jesuspa qatiqninkunaqa musyakurqaku runakuna pisipasqa hinaspa yarqaymanta kasqankuta. Chaymi Jesusta nirqaku: “Pasakuchunkuñayá hichpa llaqtachakunaman rispa mikuyta rantimunankupaq”, nispa. ¿Imatam Jesusqa ruwarqa?

⁹ Jesusqa chay runakunatam mikuchirqa pichqa tantallawan hinaspa iskay challwallawan. ¿Imanasqam Jesusqa chay milagrota ruwarqa? Runakunata kuyasqanraykum hinaspa llakipayasqanraykum. Bibliaqa nintaqmi: “Llapallankum mikurqaku saksanankukama”, nispa. Chay mikuymi kallpata qurqa wasinkuman kutinankupaq, paykunaqa karu-karutam illananku karqa (Luc. 9:10-17). Achka mikuy kasqanraykum, puchuntapas chunka iskayniyuq canasta huntata huñurqaku.

10. ¿Imam wakchayaywan pasanqa?

¹⁰ Kamachikuq runakuna kikillanpaq munaq hinaspa suwa kasqankuraykum, kunanpas millonnintin runakuna wakcha kanku. Wakin iñiqmasinchikkunapapas manam ancha kanchu mikunankupaq. Diosmi ichaqa atiyniyuq hinaspapas munanmi mana imapas pisipuwananchikta. Payqa niwanchikmi wakchayayta tukuchinanmanta (leey Salmo 72:16). Diosta kasukuq runakunaqa mana wakchayaypa nitaq suwakunapa kasqanpiñam kawsanqaku.

11. (1) ¿Imanasqam mana iskayrayachwanchu yanapawananchikpaq Jesus atiyninta servichikunanmanta? (2) ¿Imata ruwanapaqmi kallpanchasqa tarikunchik?

¹¹ Jesusqa kay pachapi kaspanmi kimsa wata parten achka milagrokunata ruwarqa (Mat. 15:24). Kunanqa hanaq pachapi kamachiqmi, hinaspapas 1.000 wata kay allpata kamachimuspanmi lliwta yanapawasun (Sal. 72:8). Jesusqa milagrokuna ruwasqanwanmi qawachin yanapawananchikpaq atiyniyuq kasqanta. Chaymi mana iskayrayanchikchu chayta hamuq tiempopi ruwananmanta. Chaypi yuyaymanaspam, kallpanchasqa tarikunchik runakunata yanapanapaq tiemponchikta hinaspa kallpanchikta servichikunapaq (Sal. 45:1; 49:3). Arí, ñuqanchikqa manam milagrokuna ruwaytaqa atinchikchu. Ichaqa atichwanmi bibliapa willakusqankunamanta runakunaman yachachiyta. Chayqa ñuqanchikpa ruwayninchikmi (Rom. 1:14, 15).

12. ¿Imanasqam Jesusqa allintapuni yachan kay pacha imayna unanchasqa kasqanta?

¹² Jehova Dios tukuy imata unanchaptinmi Jesusqa ruwaysiqnin maestro karqa (Prov. 8:22, 30, 31; Col. 1:15-17). Chayraykum Jesusqa allintapuni yachan kay pacha imayna unanchasqa kasqanta, hinaspapas atinmanmi llumpay wayra-para kaptin hawkayachiyta.

13, 14. ¿Atirqachu Jesusqa llumpay wayra-para kaptin hawkayachiyta?

¹³ Kay pachapi Jesus kaspanmi, llumpay wayra-para kaptin hawkayachiy atisqanta qawachirqa. Huk kutipim Diospa atiyninta servichikurqa ‘sinchillataña wayramuptin’ hawkayachinanpaq (leey Marcos 4:37-39). Bibliamanta yachaq runapa nisqanman hinaqa, chay sinchi wayra-paraqa karqa: yana puyuyuq, llumpay wayrayuq, llipyayuq hinaspa nisyu parayuqmi. Chayqa manchakuypaqmá karqa. Apostol Mateopas yaqa chayna kasqanmantam willakurqa (Mat. 8:24).

¹⁴ Chay pasakusqanpi yuyaymanay: Olakunam huqarikuspan boteta yaqalla tapachkarqa. Yakuñataqmi kuti-kutirispan boteman yaykuchkarqa. Rayokunapas anchatam tuqyachkarqa, boteñataqmi kayman-wakman aytinyachkarqa. Chayna kaptinpas, Jesusqa llumpay pisipasqam puñuchkarqa. Qatiqninkunam ichaqa mancharisqa kachkarqaku. Chaymi Jesusta rikcharichispa nirqaku: “¡Señorlláy, salvawayku, chinkaykuchkanchikñam!”, nispa (Mat. 8:25). ¿Imatam Jesusqa ruwarqa? Hatarispanmi wayratawan lamar quchata nirqa: ‘Hawkayayña’, nispa (Mar. 4:39). Hinaptinmi tukuy imapas hawkayarurqa. ¡Jesusqa mayna atiyniyuqmá!

15. ¿Imaynatam yachanchik tukuy imapas Jehova Diospa makillanpi kasqanta?

¹⁵ Jehova Diosmi Jesusmanqa atiyta qurqa llumpay wayra-para kaptin hawkayachinanpaq. Chaymi mana iskayrayachwanchu chayta Jehova Diospas ruway atisqanmantaqa. Manaraq sinchi para kachkaptinmi nirqa: ‘Qanchis punchawmantam parachimusaq kay pachapa hawanman tawa chunka punchaw tawa chunka tuta’, nispa (Gen. 7:4). Chaymantapas, bibliam nin: ‘[Jehova Diosmi] intipa qispimunan lawmanta sinchi wayrawan lamar quchata rakinarachirqa’, nispa (Ex. 14:21). Hinaspapas Jonas 1:4 nisqanpim nin: ‘[Jehova] Diosmi lamar quchapi hatarirachirqa llumpa-llumpay wayrata. Lamar quchapi llumpa-llumpay wayra-para hatariruptinmi buquepas pakipakurunanpaqña kachkarqa’, nispa. Kaykunata yachasqanchikmi hawkayachiwanchik, hamuq tiempopipas Diospa makillanpim tukuy imapas kanqa.

16. ¿Imanasqam hawkayachiwanchik tukuy imapas Jehova Diospa hinaspa Jesuspa makillanpi kasqanta yachasqanchikqa?

¹⁶ Jehova Diospa hinaspa Jesuspa makillanpi tukuy imapas kasqanta yachasqanchikmi hawkayachiwanchik. Waranqa wata Jesucristo kamachimuptinqa manam kanqachu sinchi wayra, volcankuna, terremotokuna hinaspa lamar quchapas manam lluqsimunqachu. Manañam chaykuna pasakunanmantaqa manchakusunñachu. ¿Imanasqa? Jehova Diosmi lliw runakunata waqaychawasun (Apoc. 21:3, 4). Manataqmi iskayrayanchikchu Diospa atiyninta servichikuspa tukuy chaykunamanta Jesus waqaychawananchikmanta.

17. ¿Imaynatam Diostawan Jesucristota qatipakuchwan?

¹⁷ ¿Imaynatam Diostawan Jesucristota qatipakuchwan? Ñuqanchikqa manamá milagrokuna ruwaytaqa atinchikchu, ichaqa atichwanmi Proverbios 3:27 (leey) nisqan ruwayta. Iñiqmasinchikkuna ñakariptinqa, atichwanmi imapipas yanapaykuyta hinaspa kallpanchaykuytapas (Prov. 17:17). ¿Haykapim chay ruwayta astawan atichwan? Imapas desgraciakuna pasakuptinmi. Huk viuda iñiqmasinchikpa wasintam sinchi wayra aparurqa. Payta iñiqmasinchikkuna yanapaptinkum, iñiqmasinchik nirqa: “Anchatam agradecekuni Jehova Diosta hinaspa llaqtantapas tukuy imapi chaynataq iñiyniypipas yanapawasqankumanta”, nispa. Yaqa chayna sasachakuypim tarikurqa huk soltera iñiqmasinchikpas, payqa hukmanyasqam kachkarqa wasinta sinchi wayra aparuptin. Ichaqa, iñiqmasinchikkunam yanaparqaku wasinta hatarichinankupaq. Chaymi pay nirqa: “Manam imayna agradecekuytapas atinichu. ¡Gracias, Jehova Dios!”, nispa. Llapanchikmi agradecesqa kachkanchik sunqumanta yanapakuq iñiqmasinchikkunamanta. Ichaqa astawanraqmi agradecekunchik Jehova Diosta hinaspa Jesucristota yanapawasqanchikmanta.

18. Jesuspa milagrokuna ruwasqanpi piensaspayki, ¿imaynam tarikunki?

¹⁸ Jesusqa kay pachapi kaspanmi qawachirqa Diospa atiynin kasqanmanta. Ichaqa manamá kikinpa allinninta munaspanchu milagrokunataqa ruwarqa. Payqa runakunata sunqumanta kuyasqanraykum hinaspa yanapayta munasqanraykum milagrokunataqa ruwarqa. Qatiqnin yachachikuypim chaymanta astawan rimasunchik.