¿Imam kaqtachu rimanki?

Kaypipas piensariytaq: casarasqa cristianokunam wasinpi cenanankupaq huk cristianata invitan, payqa iskay warmachankunatam sapallan uywan. Cenanankumanta warmachakunaman willaykuptinmi anchata kusirikunku. Paykunaqa chay cenanankupaq tuta chayamunantañam munachkanku. Ichaqa, huk punchawllaña faltachkaptinmi casarasqa iñiqmasinchikkunaqa invitasqan iñiqmasinchikta niykun mana atinankumanta. Chaymantam chay cristianaqa yacharun imanasqa mana cenay atisqankumanta. Casarasqa cristianokunataqa huk amistadninkunam chay cenananku tutallapaq invitarurqaku hinaptinmi paykunaqa arí niykurqaku.

Cristianokunaqa imapas nisqanchiktaqa cumplinanchikmi. Haykapipas ñoqanchikqa ‘imam kaqtam ninanchik’ (2 Cor. 1:18). Ichaqa, qallariy parrafokunapi qawamusqanchikman hinam imapas pasakusqanqa mana chaynallachu. Wakinpiqa manam imata ruwaspapas arí nisqanchiktaqa cumpliyta atichwanchu. Huk kutipim apostol Pablo chaynapi tarikurqa.

Kimsa kaq kutipi Pablo illasqanpim Efeso llaqtapi kachkarqa, chayqa karqa 55 kaq watapim. Payqa chay llaqtamantam Egeo sutiyoq lamar qochanta chimpaspan Corinto llaqtaman riyta munarqa, chaymanta Macedonia llaqtaman rinanpaq. Chaymanta Jerusalenman kutimustinñataqmi Corinto llaqtapi kaq congregacionta kaqmanta watukuyta munarqa, chaynapi Corinto llaqtapi kaq cristianokuna Jerusalenpi kaq cristianokunaman yanapakuyninkuta apachinankupaq (1 Cor. 16:3). Chayna kasqantam 2 Corintios 1:15, 16 nisqanpi leenchik: “Kay confianzawanmi puntata qamkuna watukuq hamuyta munarqani chaynapi ristinpas hinaspa kutimustinpas yanapaykunaypaq. Macedonia lawman riq hinam qamkuna watukuykuyta munarqani, chaynataqmi kutimustinpas watukuykuytataq munarqani chaynapi Judea lawman rinaypaq yanapaykuwanaykichikpaq”, nispa.

Yaqachusmi Pabloqa sapaq cartasqanpi Corinto llaqtapi iñiqkunaman nirqa ama huchapakuq runakunawan juntakunankupaq (1 Cor. 5:9). Ichaqa chay carta qellqasqan qepamanmi Cloepa familian Pabloman willaykurqaku Corinto congregacionpi llumpay liryanakuy kasqanmanta (1 Cor. 1:10, 11). Chaymi Pabloqa illananpaq piensasqanta cambiarqa hinaspam qellqarqa huk cartata, chaytam kunan reqsinchik Corintoman apostol Pablopa Punta kaq cartasqan nispa. Chay qellqasqanpim iñiqkunata consejarqa hinaspa kuyakuywan corregirqa. Nirqataqmi puntata Macedoniaman rispan chaymantaña Corintoman rinanmantapas (1 Cor. 16:5, 6).a

Corintopi kaq iñiqkuna cartanta chaskiruptinkum congregacionpi kaq wakin “hatu-hatun [otaq hatun tukuq] apostolkuna” Pablo yanqa rimaq kasqanta rimarqaku. Chaymi Pablo nirqa: “¿Chay piensasqayqa manachum allin karqa? ¿Mana iñiq runa hinachu rurarqani? Paykunaqariki ‘Arí’ niruchkaspapas ‘Manam’ ninkuraqmi”, nispa (2 Cor. 1:17; 11:5).

¿Mana iñiq runa hinachu Pabloqa mana kaqpaqpas hinata hapirqa watukunanpaq nisqanta? ¡Manamá! Pablom nirqa: “¿Mana iñiq runa hinachu rurarqani?”, nispa. Chayna tapukuyta nisqanqa Corintopi kaq iñiqkunatachá yanaparqa Pablo yanqa rimaq kasqanta mana piensanankupaq.

Pabloqa yanqa rimaqpaq hapisqankumantam kaynata nirqa: “Diosqa confiakunapaqmi chaymi ñoqaykupas imam kaqta nikiku”, nispa (2 Cor. 1:18). Pabloqa Corinto llaqtaman watukunanpaq nisqantaqa cambiarqa iñiqkunapa allinninpaq kasqanraykum. 2 Corintios 1:23 nisqanmi qawachin paykunata ‘llakipayasqanrayku’ imanasqa rinanpaq piensasqan cambiasqanmanta. Chaynata ruwasqanwanmi tiempota qorqa manaraq pay watukuchkaptin mana allin ruwasqankuta allichanankupaq. Chaymi Macedonia lawpi kachkaspan Tito sutiyoq cristianopa willasqanmanta anchata kusikurqa, Pablopa chay cartasqanmi Corintopi kaq iñiqkunata yanaparqa huchankumanta wanakunankupaq (2 Cor. 6:11; 7:5-7).

Pablo yanqa rimaq kasqanta nispankuqa, Diosmanta willakusqanpas mana confiakunapaq hina kasqanta nichkanmankupas hinam karqa. Ichaqa, Pablom Corintopi kaq iñiqkunata yuyarichirqa Jesucristomanta paykunaman willasqanta. Paymi nirqa: “Silvanopa, Timoteopa hinaspa ñoqapa qamkunaman willasqay Diospa Churin Cristo Jesusqa manam ‘Arí’ ninraqchu nitaq ‘Manam’ ninraqchu. Cristontakama willakuyqa cheqappunim”, nispa (2 Cor. 1:19). Pablopa qatipakusqan Jesucristoqa confiakunapaqmi karqa. Kawsakuyninpi hinaspa Diosmanta willakuyninpipas Jesusqa cheqap kaqtam nirqa (Juan 14:6; 18:37). Jesucristopa Diosmanta willakusqanqa cheqap hinaspa confianapaqmi karqa, Pablopas hina chayllamantam willakurqa, hinaptinqa Pablopa willakusqanpas cheqapmi karqa.

Jehova Diosqa cheqap kaqkunapa Diosninmi (Sal. 31:5, NM). Chayna kasqantam qawachin Pablo kayna qellqasqanpi: “Paypim cumplikun Diospa llapallan prometesqankunaqa”. Chaywanqa Jesucristomantam rimachkarqa. Kay Pachapi kachkaspan wañunankama Diosman sonqo kasqanmi sutillata qawachirqa Diospa tukuy promesankunaqa confiakunapaq kasqanta. Pabloqa nirqataqmi: “Chaymi Diosta alabaspanchikqa ‘Amen’ ninchik Cristo Jesusrayku”, nispa (2 Cor. 1:20). ¿Imanasqam chaynata nirqa? Jesusnintakamam Jehova Diospa promesankunaqa cumplikunqa.

Hinaptinqa, Jehova Dios hinaspa Jesucristo hinam imapas nisqanta Pabloqa cumplirqa (2 Cor. 1:19). Manam payqa “mana iñiq runa hinachu” karqa aswanqa confiakunapaqmi karqa (2 Cor. 1:17). Payqa chuya espiritupa munasqanman hinam kawsarqa (Gal. 5:16). Tukuy ima ruwasqanmi qawachirqa hukkunamanta nanachikusqanta. Payqa imam kaqtam rimarqa.

Bibliapa nisqanta mana kasukuq runakunaqa sapa kutim imapas nisqankutaqa mana cumplinkuchu tukuy imapas pasakusqanrayku. Negociokunapiqa documentota ruwanakuchkaspankupas manam chayman hinachu ruwanku. Achka runakunañataqmi casarakuyta qawanku manaña wañukunankukama prometenakusqankuta hinañachu. Arí, divorcianakuy astawan yapakusqanmi qawachiwanchik casarakuyta achka runakuna mana kaqpaqpas hapisqankuta (2 Tim. 3:1, 2).

¿Qampaqa imam kaqchu imapas nisqayki? Kay yachachikuypa qallariyninpi qawamusqanchikman hinam wakinpiqa imapas nisqanchikta mana cumpliyta atisunchu qonqaymanta imapas mana piensasqanchik pasarusqanrayku. Ichaqa imatapas prometekuspaykiqa tukuytam ruwanayki chayta cumplinaykipaq (Sal. 15:4; Mat. 5:37). Chaynata ruwaptikiqa hukkunam confiakunapaq, prometekusqanta cumpliq hinaspa imam kaqta rimaq kasqaykipaq hapisunki (Efes. 4:15, 25; Sant. 5:12). Kawsakuynikipi chayna kasqaykita runakuna qawasuspaykiqa ichapas allinta uyarisunki Diosmanta willakusqaykitapas. Chaynaqa, kallpanchakuyá imam kaqta rimanaykipaq.