Diospa munaynin rurakunanpaq Jesuspa imakunawan sutichasqa kasqan

“Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa.” (JUAN 14:6.)

1, 2. ¿Imanasqataq Diospa munaynin rurakunanpaq Jesuspa imakunawan sutichasqa kasqanmanta yachananchik?

ÑAWPAQMANTARAQMI runakunaqa imapas rurasqankuwan allin reqsisqa kayta munarqaku, ichaqa yaqa llapankum chay munasqankuta mana hayparqakuchu. Huk-iskayllam ninmanku paykunapa rurasqankuta hukkuna mana ruray atisqankuta hinaspa rurasqanku admirakunapaq kasqantapas. Ichaqa Diospa Churin Jesucristopa rurasqanmi mana tupachiy atina huk runakunapa rurasqankuwanqa.

² ¿Imanasqataq Jesuspa imakunawan sutichasqa kasqanmanta yachananchik? Chaymanta yachayninchikmi yanapawasun Jehová Dioswan amistadninchik allin kananpaq. Jesusmi nirqa: “Ñoqam kani ñan, cheqap kaqpas chaynataq kawsay qokuqpas. Taytaymanqa manam pipas chayanmanchu mana ñoqawanqa”, nispa (Juan 14:6; 17:3). Qawasunchikyá imanasqam Jesus hina mana pipas kasqanmanta. Chaynapim allinta entiendesun hinaspa chaninchasun Diospa munaynin rurakunanpaq Jesuspa imakunawan sutichasqa kasqanta.

Diospa ‘Sapallan Churin’ nisqa sutinmanta

3, 4. a) ¿Imanasqataq ninchik Jesusqa ‘Diospa Sapallan Churinmi’ nispa? b) ¿Imanasqataq tukuy imapas unanchasqa kachkaptin Jesuspa rurasqanqa mana tupachiy atina karqa?

³ Jesusqa manam angelkuna hinallachu, aswanmi ‘Diospa Sapallan Churin’ (Juan 3:16, 18). Griego rimaypi “sapallan” nispanqa “pay hina pipas mana kasqanmantam” rimachkan otaq “familianpi sapallan kasqanmanta”. Jehová Diospa millonninpi angelninkuna kachkaptinqa, ¿imanasqataq ninchik ‘pay hina pipas mana kasqanmanta’?

⁴ Payllata Taytan kikinpuni unanchasqanraykum, Jesus hinaqa mana pipas kanchu. ‘Payqa karqañam llapa imakunapas manaraq unanchasqa kachkaptin’ hinaspa ‘Diospa tukuy unanchasqanmanta qallariyninmi’ (Col. 1:15; Apo. 3:14, NM). Tukuy imapas unanchasqa kachkaptin Diospa Sapallan Churinpa rurasqanpas mana tupachiy atinam. Jehová Dios Unanchaq kaspanpas, Jesuswanmi tukuy imakunatapas unancharqa (leey Juan 1:3). Apostol Pablom kaynata qellqarqa: “Ñoqanchikpaqa chullallam Diosninchikqa, payqariki Dios Taytam. Paymi rurarqa tukuy imata, ñoqanchikpas paypaqmi kanchik. Chullallam Señorqa, payqariki Jesucristom, paywanmi tukuy imapas unanchasqa karqa, paywantaqmi ñoqanchikpas unanchasqa kanchik”, nispa (1 Cor. 8:6).

 5. ¿Imaynatam Bibliaqa qawachiwanchik Jesus hina pipas mana kasqanta?

⁵ Ichaqa, manam chayraykullachu ninchik Jesus hina pipas mana kasqanmantaqa. Bibliaqa reqsichiwanchikmi huk sutikunawanpas, kaykunam qawachiwanchik Diospa munaynin cumplikunanpaq ima rurayniyoq kasqanmanta. Qawasunchik Mateo libromanta Apocalipsis librokama pichqa sutikunawan Jesus reqsisqa kasqanmanta.a

‘Simi’ nisqa sutinmanta

 6. ¿Imanasqataq ‘Simi’ nispa Jesusta sutichayqa ancha allin?

⁶ (Leey Juan 1:14.) ¿Imanasqataq Jesusqa ‘Simi’ nispa sutichasqa? Chayna sutichasqaqa, angelkunatawan runakunata Dios unanchasqanmantapacha Jesusta servichikusqanraykum. Jehová Diosmi Churinta servichikurqa angelkunaman chaynataq runakunamanpas munasqanmanta willananpaq. Jesusta Simiwan Bibliapa sutichasqanqa sutillam qawakun, judiokunaman Jesus kayna nisqanpi: “Kay yachachisqayqa manam ñoqallapachu aswanqa kachamuwaqniypam. Pipas paypa munasqan ruray munaqqa yachanqam kay yachachisqayqa Diosmanta kasqanta hinaspa kikillaymanta mana rimasqayta” (Juan 7:16, 17). Hanaq pachaman kutispanpas Jesusqa hinallam “Diospa Simin” nispa sutichasqa karqa (Apo. 19:11, 13, 16).

 7. ¿Imaynatam qatipakuchwan Jesuspa humilde kasqanta?

⁷ Piensarisun, ima ninanmi Simi nispa sutichasqa kasqanqa. Jesus pimantapas ancha yachayniyoq kaspanpas, manam kikinpa yachayninpiqa confiakunchu, chaymi Taytanpa nisqallanta willakun. Manataqmi alabasqa kaytaqa maskanchu aswanmi Taytanta hatunchan (Juan 12:50). ¡Ancha allin ejemplo qowaqninchikmi! Ñoqanchikpas favorecesqam kanchik ‘allin noticiamanta’ willakunanchikpaq (Rom. 10:15). Humilde kaspa Jesuspa ejemplo qowasqanchikmi yanapawananchik allinta tanteaspa imatapas rimananchikpaq. Runakuna salvakunankupaq predicaspaqa, ‘Bibliapi qellqasqaman hinallam yachachinchik’ (1 Cor. 4:6).

“Amen” nisqa sutinmanta

8, 9. a) ¿Ima ninantaq “Amen” nisqa rimayqa, hinaspa imanasqataq Jesusqa chayna sutiyoq? b) ¿Imaynatam Jesusqa qawachirqa “Amen” nisqa kasqanta?

⁸ Apocalipsis libropim nin: “Laodicea congregacionpi kaq angelman kaynata qellqay: Kaytam nin Amen, cheqap niq hinaspa allin testigakuq chaynataq Diospa tukuy unanchasqanmanta qallariynin”, nispa (Apo. 3:14, NM). ¿Imanasqataq Jesusqa “Amen” nispa sutichasqa? Hebreo rimaypi “Amen” niq rimayqa “chaynayá kachun” ninanmi. Kay rimayqa tupantaqmi “confianapaq” niq rimaywanpas. Hebreo idiomapiqa hina kay rimaytam servichikun, Jehová Dios confianapaq kasqanmanta rimaspa (Deu. 7:9; Isa. 49:7). Ichaqa, ¿imaynatam “Amen” nispa Jesuspa sutichasqa kasqanqa qawachin pay hina pipas mana kasqanmanta? Kay tapukuypa kutichiynintam tarinchik 2 Corintios 1:19, 20 versiculokunapi, chaypim nin: “Diospa Churin Cristo Jesusqa manam ‘Arí’ ninraqchu nitaq ‘Manam’ ninraqchu. Cristontakama willakuyqa cheqappunim. Paypim cumplikun Diospa llapallan prometesqankunaqa, chaymi Diosta alabaspanchikqa ‘Amen’ ninchik Cristo Jesusrayku”, nispa.

⁹ Diospa llapallan prometesqanmanta “Amen” nisqanchikmi Jesusqa. Kay Pachapi mana pantaspa rurasqanwan hinaspa ñoqanchikrayku vidanta qosqanwanmi Jehová Diospa prometesqankuna cheqap kasqanta qawachirqa chaynapi cumplikunanpaq. Job sutiyoq libropa nisqanman hinam, Satanasqa nirqa Dios serviqkuna sasachakuspanku otaq ñakarispanku Diosta qepanchanankumanta, chaymi Jesusqa Diosman sonqo kaspa qawachirqa Satanaspa chayna rimasqan llulla kasqanta (Job 1:6-12; 2:2-7). Diospa llapallan churinkunamantaqa, Piwi Churinmi allinta qawachinman karqa Satanaspa yanqa rimasqanta. Qawachinmantaqmi karqa Taytanpa llapallan kamachiq kasqantapas, chayqa imamantapas aswan allinmi.

10. ¿Imaynatam “Amen” nispa sutichasqa Jesusta qatipakuchwan?

¹⁰ ¿Imaynatam “Amen” nispa sutichasqa Jesusta qatipakuchwan? Diosman sonqo kaspa chaynataq llapallan kamachiq kasqanta respetaspam. Chaynata ruraspaqa kasukuchkanchikmi Proverbios 27:11 kayna nisqanta: ‘Churilláy yachayniyoq kaspayá kusiriykachiy sonqoyta. Chayna kaptikiqa contestasaqmi insultaqniyta’.

“Mosoq contrato garantizaq” otaq ‘allinyanachiq’ nisqa sutinmanta

11, 12. ¿Imanasqataq ninchik Jesusqa runakunata Diosninchikwan allinyanachinanpaq aswan allin kasqanta?

¹¹ (Leey 1 Timoteo 2:5, 6.) Jesusqa ‘Diosninchikwan runakunata allinyanachiqmi’, payqa ‘mosoq contrato garantizaqmi’ (Heb. 9:15; 12:24). Chaynataqmi Moisespas runakunata Dioswan allinyanachiq karqa. Hinaptinqa, ¿imanasqataq ninchikman Jesusqa Moisesmanta aswan allin kasqanta? (Gal. 3:19.)

¹² Griego rimaymanta ‘allinyanachiq’ nispa tikramusqa rimayqa, juezkunaman rispa allichanamanta rimaymi. Kaymi qawachiwanchik Jesucristopa abogado hina kasqanmanta, paymi ‘Diospa cheqap akllasqankunawan’ otaq hanaq pachaman riqkunawan mosoq contrato rurakusqanta Garantizaq (Gal. 6:16). Paykunaqa kanku hanaq pachapi servinankupaq Diospa espiritunwan akllasqa ‘sacerdotekunam’ (1 Ped. 2:9; Exo. 19:6). Dioswan Israel llaqta Moisesnintakama contrato rurasqanqa, manam rikurichimurqachu hanaq pachapi servinankupaq akllasqa sacerdotekunataqa.

13. ¿Imapaqtaq servin runakunata Dioswan Jesuspa Allinyanachisqan?

¹³ ¿Imapaqtaq servin runakunata Dioswan Jesuspa Allinyanachisqanqa? Jesus vidanta qosqanraykum, Jehová Diosqa derechoyoq mosoq contratoman yaykuqkunata mana huchayoqpaqña qawananpaq (Rom. 3:24; Heb. 9:15). Chaymi paykunaqa mosoq contratopi chaskisqa kanku chaynapi hanaq pachapi reykuna hinaspa sacerdotekuna kanankupaq. Mosoq contrato Garantizaq Jesucristom paykunata yanapan Diospa qayllanpi chuya kanankupaq (Heb. 2:16).

14. Maypi kawsakuyta suyaspanchikpas, ¿imanasqataq chaninchananchik mosoq contrato garantizaq Jesuspa rurasqanta?

¹⁴ Kachkantaqmi chay mosoq contratoman mana yaykuqkunapas, paykunaqa kay Pachapi wiñay kawsay suyakuyniyoqmi kanku. ¿Imaynam paykunaqa Diospaq kanku? Mosoq contratoman mana yaykuspankupas chaywanqa yanapachikunkum, chaymi huchankumanta pampachasqa kanku hinaspa mana huchayoq runakuna hina chaynataq amistadnin hina chaskisqa kanku (Sant. 2:23; 1 Juan 2:1, 2). Chaymi, hanaq pachapi otaq kay pachapi kawsakunapaq suyakuyniyoq kaptinchikpas, achka razonmi kachkan mosoq contrato Garantizaq Jesuspa rurasqanta valorniyoqta qawananchikpaq.

Sacerdotekunapa Jefen nisqa sutinmanta

15. ¿Imanasqataq Jesuspa Sacerdotekunapa Jefen kasqanqa mana chaynallachu ñawpaq sacerdotekunapawan?

¹⁵ Ñawpaq tiempopi sacerdotekunapa jefen achka kaptinkupas, Jesuspa Sacerdotekunapa Jefen kasqanqa manam paykunapa hinachu. ¿Imanasqam chaynata ninchik? Apostol Pablom kaynata nin: ‘Sacerdotekunapa [jefenkunaqa] puntatam kikinpa huchanmantawan runakunapa huchanmanta sapa punchaw animalta wañuchispa kañaqku, Jesusmi ichaqa chulla kutillata wiñaypaq ofrecekurqa. Leyman hina sacerdotekunapa jefen kanankupaq churasqakunaqa huchayoqmi karqaku. Leypa qepantañataqmi sacerdotekunapa jefen kananpaq wiñaypaq mana huchayoq Churintaña juramentowan Dios churarun’, nispa (Heb. 7:27, 28).b

16. ¿Imanasqam Jesucristopa vidan qosqanqa mana tupachiy atina?

¹⁶ Jesusqa mana pantaq runam karqa, chaynam Adanpas karqa manaraq huchallikuchkaspan (1 Cor. 15:45). Chaymi paylla vidantaqa qoyta atinman karqa, allintapuni hinaspa huk kutillata. Leypa nisqanman hinaqa sapa punchawmi animalkunata kañaspa qorqaku. Ichaqa, sacerdotekunapa animalkuna kañasqankuwan imakunapas rurasqankuqa Jesucristopa rurananmanta llantuy hinallam karqa (Heb. 8:5; 10:1). Jesuspa vidan qosqan runakunata wiñaypaq yanapasqanraykum, Sacerdotekunapa Jefen kasqanqa mana tupachiy atina.

17. ¿Imanasqam chaninchananchik Sacerdotekunapa Jefen Jesuspa rurasqanta, hinaspa imaynatam chayta qawachinchik?

¹⁷ Dioswan amistadninchik allin kananpaqqa, Sacerdotekunapa Jefen Jesuspa yanapaynintam necesitanchik. ¡Mayna allin Sacerdotem payqa! Pablom kaynata qellqarqa: “Sacerdotekunapa jefen kapuwaqninchik Jesusqa huchaman urmaqlla kayninchikmanta llakipayakuqmi. Paypas ñoqanchik hina tukuypi tentasqam karqa ichaqa manam huchallikurqachu”, nispa (Heb. 4:15). Jesuspa rurasqanmanta entiendeq cristianokunaqa, ‘manaña kikillankupaq kawsaspam Cristopaqña kawsanku’ (2 Cor. 5:14, 15; Luc. 9:23).

“Prometesqa miray” nisqa sutinmanta

18. a) ¿Imatam Jehová Dios prometerqa Adan huchallikuruptin? b) Tiempopa risqanman hina, ¿imatam Bibliaqa chay Miraymanta willarqa?

¹⁸ Adan huchallikuruptinmi runakunapaq manaña suyakuy karqachu, chaymi Jehová Dios prometerqa huk librawaqninchik hamunanmanta, paytam suticharqa ‘miray’ nispa (Gen. 3:15). Chay mana reqsisqa Miraymantam pachaknintin watakuna Bibliaqa achka kutipi willakurqaña. Chay mirayqa chayamunanmi karqa Abrahanpa, Isaacpa, Jacobpa hinaspa Davidpa mirayninmanta (Gen. 21:12; 22:16-18; 28:14; 2 Sam. 7:12-16).

19, 20. a) ¿Pitaq chay prometesqa Mirayqa? b) ¿Imanasqataq nichwan Jesusmanta hukkunapas chay miraypa parten kasqanta?

¹⁹ ¿Pitaq karqa chay Mirayqa? Chay Miraymantam yachanchik Galatas 3:16 nisqanpi. (Leey.) Ichaqa chay capitulopim ungidokunaman Pablo kaynata nirqa: “Jesucristopaña kaspaqa, Abrahampa miraynin hinañam kankichik, chayraykum chaskinkichik Abrahanman Diospa prometesqan herenciatapas”, nispa (Gal. 3:29). ¿Imanasqataq Pabloqa nin chay Mirayqa Jesucristo kasqanta hinaspa nintaq hanaq pachaman riqkunapas kasqanta?

²⁰ Kunan tiempopiqa millonnintin runakunam hatunchakuspanku ninku Abrahampa miraynin kasqankuta. Wakin religionkunapipas ninkum profetankupas Abrahampa miraynin kasqankuta. Hinaptinqa, ¿cheqapchu paykunaqa chay prometesqa Miray kanmanku? Manam. Apostol Pablopa nisqanman hinaqa, manam Abrahampa llapallan mirayninkunachu chay prometesqa Mirayqa kanman karqa. Abrahampa churinkuna achka kaptinpas, Isaacpa miraynintakamam chay prometesqa Mirayqa hamunan karqa, hinaspam kay pachapi lliw runakuna bendecisqa kananku karqa (Heb. 11:18). Tiempopa risqanman hinaqa chullallam Abrahampa mirayninmanta chay prometesqa mirayqa karqa, chay miraymi Jesucristo karqa, Bibliapa nisqanman hinaqa paymi Isaacnintakama Abrahampa miraynin karqa.c Chaymantañam ungidokunapas Abrahampa miraynin karqaku. Chaynam kanku ‘Jesucristopaña kasqankurayku’. Qawasqanchikman hinaqa, punta kaq profecia cumplikunanpaqmi Jesuspa chay miray kasqanqa ancha allinpuni.

21. Jehová Diospa munasqan rurakunanpaq, ¿Jesuspa imayna kasqantaq admirachisunki?

²¹ ¿Imatam yachanchik Diospa munaynin rurakunanpaq Jesuspa imakunawan sutichasqa kasqanmanta? Yachanchikmi unanchasqa kasqanmantapacha, Diospa sapallan Churin Jesus hina mana pipas kasqanmanta. Chayna kaspanpas humillakuspanmi Taytanta servirqa hinaspa munaynintapas mana alabasqa kayta maskaspan rurarqa (Juan 5:41; 8:50). ¡Ancha allin ejemplotam qowanchik! Hinaptinqa, Jesustayá qatipakusun chaynataq hinalla kallpanchakusun ima rurasqanchikwanpas ‘Diosta honranapaq’ (1 Cor. 10:31).

[Willakuykuna]

¿Yuyachkankichu?

• ¿Imatam yachachiwanchik Diospa munaynin rurakunanpaq Jesuspa imakunawan sutichasqa kasqan? (Qawariy recuadrota.)

• ¿Imaynatam Jesuspa ejemplonta qatipakuchwan?

[26 kaq paginapi dibujo hinaspa recuadro]

Diospa munaynin rurakunanpaq Jesuspa imakunawan sutichasqa kasqan

◼ Diospa Sapallan Churin (Juan 1:3). Jesusllatam kikinpuni Diosqa unancharqa.

◼ Simi (Juan 1:14). Jehová Diosqa Churintam servichikun angelkunaman chaynataq runakunamanpas paypa munasqanmanta Willakuq kananpaq.

◼ Amen (Apo. 3:14, NM). Ñoqanchikrayku Jesuspa vidanta qosqanwan chaynataq kay Allpapi mana huchallikuspa kawsasqanwanmi, Jehová Diospa prometesqankuna cheqap kasqanta qawachirqa chaynapi cumplikunanpaq.

◼ Mosoq contrato Garantizaq otaq Allinyanachiq (1 Tim. 2:5, 6). Runakunata Diosninchikwan allinyanachiq kasqanraykum Jesusqa ‘Diospa cheqap akllasqankunata’ otaq ungidokunata rikurichimurqa, paykunaqa hanaq pachapim “sacerdotekuna” kanqaku (Gal. 6:16; 1 Ped. 2:9).

◼ Sacerdotekunapa Jefen (Heb. 7:27, 28). Jesusllam atirqa runakunarayku chulla kutillata wiñaypaq vidan qoytaqa. Payraykum huchanchik pampachasqa kanman hinaspa wañuymantapas librasqa kachwan.

◼ Prometesqa miray (Gen. 3:15). Chay prometesqa mirayqa Jesucristom karqa. Chaynataqmi ‘Jesucristopa kaqkunapas’ chay miraypa parten kanku (Gal. 3:29).