“Kunanqa favorecenan tiempoñam”

“Kunanqa favorecenan tiempoñam, kunanqa salvanan punchawñam.” (2 COR. 6:2.)

 1. ¿Imanasqataq yachananchik ima ruraymi vidanchikpi aswan allin kasqanmanta?

“KAY pachapiqa tukuy imam tiempoyoqlla. Imapas munaruyqa tiempoyoqllam.” (Ecl. 3:1.) Salomonmi chaynata qellqarqa imapas rurayninchikpaq tiempo rakiyqa ancha allin kasqanmanta rimaspan, ejemplopaq: tarpunapaq, viajanapaq, negociota ruranapaq otaq hukkunawan rimanapaqpas. Ichaqa, entiendenanchiktaqmi ima ruray aswan allin kasqanmanta, chaynapi haykapipas chayta ruranapaq. Chaymi yanapawasun ima rurayta puntapi churanapaq.

 2. ¿Imaynatam yachanchik ima tiempopi kasqanmanta Jesuspa entiendesqanta?

² Jesus kay Pachapi kachkaspanqa entienderqam ima tiempopi kasqantawan imakuna rurananmantapas. Mesiasmanta willakuykunapa cumplikusqan tiempo chayamusqanta entiendespanmi, yacharqa imata puntapi rurananmanta (1 Ped. 1:11, NM; Apo. 19:10). Qawachinanmi karqa suyasqanku Mesias kasqanta hinaspa willanan karqa Diospa Gobiernonmanta chaynataq huñunan karqa gobiernaqmasinkunatapas. Chaynataqmi, cimientota churachkaq hina cristiana congregacionta qallarichinan karqa, paykunam kay Pachapa cantonkama predicananku hinaspa yachachinanku karqa (Mar. 1:15).

 3. ¿Imaynatam Jesusta kallpancharqa ima tiempopi tarikusqanmanta yachasqan?

³ Chaykunamanta yachasqanmi Cristota kallpancharqa Taytanpa munayninta kusisqa rurananpaq. Qatiqninkunatam nirqa: ‘Achkallañam kachkan cosechanapaqqa, cosechaqkunam ichaqa aslla, chaynaqa mañakuychikyá chakrayoqta cosechaqkunata mandamunanpaq’, nispa (Luc. 10:2; Mal. 4:5, 6). Paywan puriqkunamantam puntata 12 runakunata akllarqa, chaymantañataq 70 runakunata. Ima ruranankuta yacharachispanmi kaynata willakunankupaq kacharqa: “Diospa munaychakunanmi hichparamunña”, nispa. ¿Imatam payqa rurarqa? Bibliam nin: “Jesusmi chunka iskayniyoq discipulonkunaman kamachiyta tukuruspan pasarqa paykunapa llaqtankunapi yachachinanpaq hinaspa Diosmanta willakunanpaq” (Mat. 10:5-7; 11:1; Luc. 10:1, NM).

 4. ¿Imaynatam apostol Pabloqa Jesucristopa ejemplonta qatipakurqa?

⁴ Jesusqa allin ejemplotam saqewarqanchik tukuy sonqowan Diosta servinamanta. Chaytam apostol Pablo qawachirqa iñiqmasinkunata kaynata nispan: “Ejemploytayá qatiychik, ñoqapas Cristopa ejemplontam qatini” (1 Cor. 11:1). ¿Imaynatam Jesusta Pablo qatipakurqa? Allin noticiata willakunanpaq tukuy tiempo kallpanchakuspanmi. Chaymi congregacionkunaman cartasqanpi nirqa: “Amayá qellaqa kaychikchu”, “tukuy sonqoykichikwanyá Señorninchikta serviychik”, “aswan llamkaychik Señorpa rurayninpi” hinaspa “tukuy ima rurasqaykichiktaqa ruraychik Señorninchikpaq rurachkaq hinayá”, nispa (Rom. 12:11; 1 Cor. 15:58; Col. 3:23). Apostol Pabloqa manam haykapipas qonqarqachu Damascoman richkaptin Cristopa rikuriykusqanta hinaspa Ananiasman kayna nisqantapas: “Chay runataqa akllarqani huklaw nacionkunapi runakunaman, reykunaman hinaspa Israelpa mirayninkunaman ñoqamanta willakunanpaqmi” (Hech. 9:15; Rom. 1:1, 5; Gal. 1:16).

‘Kunanqa favorecenan tiempom’

 5. ¿Imanasqam Pabloqa tukuy sonqonwan Diosta servirqa?

⁵ Hechos librota leespam cuentata qokunchik Pablopa valorchakusqanmantawan tukuy sonqonwan Diosta servisqanmanta (Hech. 13:9, 10; 17:16, 17; 18:5). Chaynatam rurarqa ima tiempopi tarikusqanta entiendespan. Chaymi nirqa: “Kunanqa favorecenan tiempoñam, kunanqa salvanan punchawñam”, nispa (2 Cor. 6:2). Qallariypiqa chay nisqanqa karqa cristianokunapa tiemponmanta 537 punta watamantam, chaypim Babiloniapi presochasqa israelitakuna llaqtankuman kutirqaku (Isa. 49:8, 9). Ichaqa, ¿imatam chay textowan Pablo nichkarqa? Yachanapaqmi yanapawasun chay textopa ñawpaqninpiwan qatiqninpi tarikuq textokuna.

6, 7. ¿Imata ruranankupaqmi favorecesqa kanku kunan tiempopi hanaq pachaman riy suyaqkuna, hinaspa pikunam paykunata yanapanku?

⁶ Chay textopa puntanpi rikurimuq versiculokunapim, Pablo nirqa paypas chaynataq hanaq pachaman riy suyaqkunapas huk ruray chaskisqankuta (leey 2 Corintios 5:18-20). Nirqam huk rurayta cumplinankupaq paykunata Dios akllasqanmanta. Willananku hinaspa rueganankum karqa runakuna ‘Dioswan allinyanankupaq’. Arí, invitanankum karqa Dioswan hawka kanankupaqwan amistadninta kaqmanta tarinankupaqpas.

⁷ Eden huertapi mana kasukuspankum runakunaqa Jehová Diosmanta karunchakururqaku (Rom. 3:10, 23). Diospa kanchayninmanta karunchakuruspankum ñakariypa hinaspa wañuypa munaychakusqanña karqaku. Pablopa nisqanman hinam “kunankama Diospa tukuy ima unanchasqankuna ñakarichkan waqachkaq hina hinaspa wachakuywan ñakarichkaq warmi hina” (Rom. 8:22). Ichaqa, Diosmi runakunata ruegaspanraq invitananpaq tantearurqa payman kutirinankupaq hinaspa allinyanankupaq. Chaytam punta pachak watapi rurananku karqa Pablo hinaspa hanaq pachaman riy suyaqkunapas. Jesuspi iñiqkunapaqqa, Diospa ‘favorecenan tiempoqa’ karqa ‘salvakunankupaq punchawmi’. Kunanpas hanaq pachaman riqkuna hinaspa ‘sapaq ovejakunapas’ hinallam runakunata invitachkanku ‘favorecenan tiempota’ allinta servichikunankupaq (Juan 10:16).

 8. ¿Imanasqataq allinyanakuymanta invitacionqa ancha allin?

⁸ ¿Imanasqam allinyanakuymanta invitacionqa ancha allin? Runakuna mana kasukuspanku Diosmanta karunchakuruptinkupas, Paymi allinyanakunankupaq puntata invitarqa (1 Juan 4:10, 19). ¿Imaynatam chayta rurarqa? Pablom nin: “Diosmi [. . .] runakunata huchankunamanta pampachaspa Jesucristopi kikinwan allinyanachichkarqa. Paymi kunawarqanchik allinyanakuymanta willakunanchikpaq”, nispa (2 Cor. 5:19; Isa. 55:6).

 9. ¿Imaynatam Pablo qawachirqa Diospa llakipayasqanmanta agradecekusqanta?

⁹ Wañunanpaq Churinta qomuspanmi, Jehová Diosqa iñiyniyoq runakunata huchankumanta pampacharqa hinaspa amistadninta kaqmanta tarinankupaq yanaparqa. Chaymantapas serviqninkunatam enteron pachaman kacharqa tiempo kachkaptinraq Dioswan runakuna allinyanakunanmanta willanankupaq (leey 1 Timoteo 2:3-6). Diospa munaynin ima kasqanmantawan ima tiempopi kasqanta entienderuspanmi Pabloqa tukuy vidanwan servirqa runakuna Dioswan ‘allinyanankupaq’. Diosqa manam cambianchu chayna rurasqantaqa. Hinallam runakunata yanapananpaq makinta haywarichkan. Mayna cheqapmi Pablopa kayna nisqanqa: “Kunanqa favorecenan tiempoñam, kunanqa salvanan punchawñam”. ¡Mayna llakipayakuqmi Diosninchikqa! (Exo. 34:6, 7.)

“Amayá despreciaychikchu Diospa hatun favornintaqa”

10. ¿Ima ninantaq ‘salvakuna punchawqa’ ñawpaq tiempopi hinaspa kunan tiempopi hanaq pachaman riy suyaq cristianokunapaq?

¹⁰ Dioswan allinyanankupaq punta yanapachikuqkunaqa ‘Cristowan kaqkuna’ otaq hanaq pachaman riy suyaqkunam (2 Cor. 5:17, 18). Paykunapaqqa ‘salvakuna punchawqa’ qallaykurqa Pentecostes 33 watapim. Chay tiempomantam ‘allinyanakuymanta willanankupaq’ kamachisqa kachkanku. Kunanpas hanaq pachaman riqkunamanta kay Pachapi qepaq cristianokunam ‘allinyanakuymanta’ willachkanku. Paykunaqa entiendenkum revelacionninpi Juanpa rikusqan angelkuna, ‘kay pachaman [. . .] mana wayramunanpaq’ wayrata harkasqankuta. Manam tukunraqchu ‘salvakunapaq punchaw’ nitaq ‘favorecenan tiempopas’ (Apo. 7:1-3). Chaymi, yaqa 1990 watamantapacha hanaq pachaman riqkunamanta kay pachapi qepaqkunaqa, tukuy sonqonkuwan enteron pachapi willachkanku runakuna ‘allinyanakunankupaq’.

11, 12. Hanaq pachaman riq cristianokuna, ¿imaynatam 1990 watapa qallariyninpi qawachirqaku ima tiempopi kasqankumanta entiendesqankuta? (Qawariy 15 paginapi fotota.)

¹¹ Los testigos de Jehová, proclamadores del Reino de Dios libropa nisqanman hinaqa yaqa 1990 watapim “Russellwan yanapaqninkunapas yacharqaku, cosecha tiempopi kasqankumanta hinaspa runakuna libreyachisqa kanankupaq cheqap yachachikuyta uyarinankumantapas”. ¿Imatam rurarqaku? Cosecha otaq runakunata ‘favorecena tiempopi’ kasqankumanta cuentata qokuspankum paykunaqa mana contentakurqakuchu huñunakuykunaman runakunata invitasqallankuwanqa. Chaytam achka wataña rurachkarqaku religionkunapi punta apaqkuna. Hanaq pachaman riy suyaq cristianokunam ichaqa tukuyta rurarqaku Diospa Gobiernonmanta masta willanankupaq. Chaypaqmi servichikurqaku runakunapa chayllaraq rurasqanku aparatokunata.

¹² Diosmanta allin noticiata willanankupaqmi chay aschalla cristianokunaqa servichikurqaku folletokunata, revistakunata hinaspa librokunatapas. Qellqarqakutaqmi yachachikuykunata runakunaman leepunapaq hinaspa waranqantin periodicokunapi lloqsinanpaqpas. Chaynataq, enteron nacionpi hinaspa huk nacionkunaman chayaq radiokunapim Bibliamanta yachachirqaku hinaspa runakunapa rurasqanku peliculakunapi rimasqanku mana uyarikuchkaptinraq peliculakunata rurarqaku rimasqanku uyarikuqtaña. ¿Imapim tukurqa chayna kallpanchakusqanku? Kunanmi kachkan chayna willakuykunata uyariq 7 millon runakuna, paykunapas nichkankum ‘Dioswan allinyanakuychik’ nispa. Chayqa rurakurqa sasachakuykuna kaptinpas, chay tiempopi hanaq pachaman riq cristianokuna tukuy sonqonkuwan servisqankuraykum.

13. ¿Pablopa ima consejo qosqantam kasukunanchik?

¹³ Kunanpas cheqapmi Pablopa kayna nisqanqa: “Kunanqa favorecenan tiempoñam”. Ancha agradecesqam tarikunchik Dios kuyakuyninpi paywan allinyananchikpaq willakuyninta uyarinanchikpaq favorecewasqanchikmanta. Mana imapas ruranayoq hina hawka puñukunamantaqa, Pablopa kayna consejasqantam kasukunanchik: ‘Ruegamuykikum amayá despreciaychikchu Diospa hatun favornintaqa [otaq nisqantaqa cumpliychikyá]’ (2 Cor. 6:1). Diosqa favornintam qawachin Jesucristota servichikuspan runakuna paywan ‘allinyanakunankupaq’ (2 Cor. 5:19).

14. ¿Imam pasakuchkan achka nacionkunapi?

¹⁴ Yaqa lliw runakunatam Satanasqa tutayaypi tarichin, Unanchaqninmantapas karunchasqata hinaptinmi kuyakuyninpi Diospa rurananmanta entiendeyta atinkuchu (2 Cor. 4:3, 4; 1 Juan 5:19). Chayna kaptinpas, achkam yachayta munanku sasachakuykunatawan ñakariykunata qawaspanku hinaspa Diospa contranpi runakuna hatarisqanrayku chaykuna kasqanmanta yachaspanku. Predicasqanchikta mana uyariy munaq nacionkunapipas, achka runakunam uyarichkanku hinaspa kallpanchakuchkanku Dioswan allinyanankupaq. Kunanmi masta kallpanchakunanchik runakuna ‘Dioswan allinyanankupaq’ willaypi.

15. Runakuna contentasqa tarikunallankupaq willananchikmantaqa, ¿ima yachanankutam munanchik?

¹⁵ Ñoqanchikqa runakunamanqa manam ninchikchu: “Diosman asuykuptikichikqa lliwpim yanapasunkichik hinaptinmi allin tarikunkichik” nispallachu. Chayllatam maskanku yaqa lliw religionkunaqa, pastorkunapas runapa munasqallankutam rimanku asuykamunankupaq hinaspa contentasqa kanankupaq (2 Tim. 4:3, 4). Predicasqanchikqa manam chaypaqchu. Willakunchikqa Dios kuyawaspanchik huchanchikta Cristowan pampachay munasqanmantam. Chaynatam Diosmanta karunchasqa kaspapas paywan allinyanakuchwan (Rom. 5:10; 8:32). Ichaqa ‘favorecenan tiempom’ tukuykuchkanña.

“Espirituwanyá kanchariychik”

16. ¿Imataq kallpata hinaspa valorta Pabloman qorqa?

¹⁶ ¿Imaynatam cheqap religionmanta tukuy sonqowan sientisqanchikta masta masyachichwan? Wakinkuqa manchakuq kaspankum hukkunawan rimayta penqakunku. Ichaqa yuyarinanchikmi, tukuy sonqowan sientiyqa manam hawa sonqolla kusisqa otaq ganasniyoq kaychu, manataqmi imayna kasqanchikmantachu. Pablom qawachirqa tukuy sonqowan servinanpaq ima ruranamanta, nirqam: “Espirituwanyá kanchariychik”, nispa (Rom. 12:11, NM). Arí, chuya espiritum necesitasqan kallpatawan valorta predicananpaq qorqa. Jesuspa qayasqanmanta Romapi presochasqa hinaspa wañuchisqa kanankama 30 wata pasaruptinpas, Diosta tukuy sonqonmanta servisqanqa hinallam karqa. Diosmanmi hapipakurqa, hinaptinmi espiritunwan qorqa necesitasqan kallpata. Chaychiki nirqa: “Tukuy imata ruranaypaqmi kallpayoq kani kallpata qowaqniy yanapawaptillan”, nispa (Fili. 4:13, NM). ¡Achkatam yachachwan ejemplonmantaqa!

17. ¿Imataq cristianokunata yanapawanchik ‘espirituwan kancharinapaq’?

¹⁷ Griego idiomapi “kanchariychik” ninanqa “timpuqkuna” ninanmi (Bover-Cantera). Yakumanta piensarisun. ¿Imataq necesitakun hinalla timpunanpaq? Timpuchiqnin nina hinalla kanantam. Chaynallataqmi cristianokunapas ‘espirituwan kancharinankupaqqa’ tukuy tiempo necesitanku chuya espirituta. Ichaqa, ¿imaynatam chaskichwan? Iñiyninchik kallpanchasqa kananpaq Jehová Diospa tukuy ima qowasqanchikta allinta servichikuspam. Congregacionpi hinaspa familianchikpi Dios yupaychasqanchiktam yanqallata hinaqa mana qawananchikchu, sapa kutim sapallanchik otaq familianchikpiwanpas estudiananchik, orakunanchik hinaspa huñunakuykunaman rinanchik. Chaymi “ninata” qowasun, espirituwan hinalla “timpunapaq” (leey Hechos 4:20 hinaspa 18:25).

18. ¿Imata ruranapaqmi cristianokunaqa kallpanchakunanchik?

¹⁸ Cristianokunaqa tukuy sonqomantam Diosta servinanchik, huk rimaypiqa rurayninchiktam cumplinanchik, chaypaqqa huk ruraykunawanmi mana harkachikunachu nitaq imawanpas mana hukmanyanachu. ¿Imatam rurananchik? Jesus hinam cumplinanchik Diospa munaynin ruraywan (Heb. 10:7). Jehová Diosqa munachkanmi achka runakuna paywan allinyanankuta. Chaynaqa, Jesustawan Pablota qatipakusun hinaspa tukuy sonqonchikwan llamkasun kay tiempopi imamantapas allin hinaspa urgente llamkaypi.

¿Yuyachkankichu?

• ¿Imataq ‘allinyanakuymanta’ Pablopa hinaspa hanaq pachaman riq cristianokunapa kamachikuy chaskisqankuqa?

• ¿Imaynatam yachanchik ‘favorecesqan tiempota’ hanaq pachaman riqkunamanta kay Pachapi qepaqkuna allinta servichikusqankumanta?

• ¿Imataq cristianokunata yanapawanchik ‘espirituwan kancharinapaq’?

[12 kaq paginapi dibujo]

Pabloqa manam qonqarqachu Señor Jesucristopa rikuriykusqantaqa