Astawan kuyakuq kanapaqyá kallpanchakusun

 1. ¿Imakunatam testigokuna bibliawan yachachisurqanki?

¿YUYACHKANKICHU testigokuna bibliamanta yachachisuptiki imakuna yachasqaykita? Kusikurqankichá Diosqa sutiyuq kasqanmanta yacharuspayki. Chaymantapas kusikurqankichá Diosqa runakunata infiernopi wiñaypaq mana kañasqanta yacharuspayki. Kusisqataqchá tarikurqanki kay allpa pachanchik sumaq huerta kaptin aylluykikuna kawsarimuptin yapamanta tupaykunaykita yachaspayki.

 2. Bibliamanta yacharuspaykipas, ¿imakunataraqmi ruwarqanki Diosta astawan kuyasqaykirayku? (Rimarimuytaq Efesios 5:1, 2 nisqanmantapas).

² Bibliamanta astawan yachaspaykiqa Jehova Diostapas astawanmi kuyarqanki. Chaychá kallpanchakurqanki yachasqaykiman hinaña kawsakunaykipaq. Bibliapa yachachikuyninkunata kasukuspaykichá imapaqpas allintaña tantiakurqanki. Chaymantapas, imayna piensaynikita hinaspa ruwaynikitachá cambiarqanki Diosta kusichiyta munaspa. Imaynam warmachakunapas papanpa imapas ruwasqanta qatipakun, chaynachá qampas kuyakuq Diosninchikta imayna kasqanta qatipakuyta qallaykurqanki (leey Efesios 5:1, 2).

 3. ¿Imakunatam nikuchwan?

³ Llapallanchikmi nikuchwan: “¿Bautizakurusqaymantaqa astawanchu kunanqa Jehova Diosta kuyani? ¿Jehova Dios hinachu kunanqa astawan piensani hinaspa imatapas ruwani? ¿Chayna kasqayqa qawakunchu iñiqmasiykunata kuyasqaypi?”, nispa. Kuyakuyninchik chiriyaruptinqa amayá llakikusunchu. Apostolkunapa tiemponpi iñiqkunapas chaynam wakinpiqa tarikurqaku. Chaywanpas Jesusqa manam qipancharurqachu, ñuqanchiktapas manam qipanchawasunchu (Apoc. 2:4, 7). Jesusqa yachanmi qallariypi hina Diosninchikta kuyayta atinanchikmanta.

 4. ¿Imamantam kay yachachikuypi yachasun?

⁴ Kay yachachikuypim yachasun Jehova Diosta hinaspa runamasinchikkunata astawan kuyanapaq imakuna yanapawananchikmanta. Chaymantañataqmi yachasunchik kuyakuq kayninchikqa ñuqanchikpaqpas hinaspa runamasinchikpaqpas allin kasqanmanta.

5, 6 (1) ¿Ima sasachakuykunapim apostol Pabloqa tarikurqa Diosta servisqanrayku? (2) ¿Imam kallpancharqa hinalla Diosta servinanpaq?

⁵ Apostol Pabloqa Diosta servispanqa kusisqam tarikurqa, wakinpim ichaqa sasachakuypi karqa. Achka kutitam karu llaqtakunata viajarqa sasa kaptinpas. Chaymi nirqa: ‘Hatun sasachakuykunapim karqani suwakunamanta. Hatun sasachakuypitaqmi karqani lamar quchapipas, mayukunapipas’, nispa. Wakinpiqa chiqniqnin runakunam sasacharqa (2 Cor. 11:23-27). Chaymantapas wakin iñiqkunaqa paykunarayku imapas ruwasqantam mana kaqpaqpas hapiqku (2 Cor. 10:10; Filip. 4:15).

⁶ ¿Imataq Pablota kallpancharqa Diosninchikta hinalla servinanpaq? Payqa Jehova Diostam allinta riqsirqa palabranta sumaqta estudiasqanrayku hinaspa Dios imayna yanapasqanta yuyasqanrayku. Chaymi Diosqa anchata kuyasqanmanta mana iskayrayarqachu (Rom. 8:38, 39; Efes. 2:4, 5). Pabloqa anchatataqmi Jehova Diosta kuyarqa, chayraykum Diospa ‘runankunata hinalla serviyta’ munarqa (Heb. 6:10).

 7. ¿Imatam ruwachwan Jehova Diosta astawan kuyanapaq?

⁷ Jehova Diosta astawan kuyanapaqqa biblianchiktam sumaqta estudiana imamantapas yachanapaq hina. Bibliata leespanchikqa nikunanchikmi: “¿Imatam kay leesqayqa Jehova Diosmanta yachachiwan?”, nispa. Chaymantañataqmi nikunanchik: “¿Imaynam kay versiculokuna qawachiwan Jehova Dios kuyawasqanta? ¿Imaynatam kay yachasqayqa kallpanchawan Jehova Diosta astawan kuyanaypaq?”, nispa.

 8. ¿Imaynanpim Diosninchikta mañakuyqa yanapawanchik payta astawan kuyanapaq?

⁸ Diosta astawan kuyanapaqqa yanapawasuntaqmi sapa punchaw payta mañakuspa sunqunchikta kichariyninchikpas (Sal. 25:4, 5). Payqariki mañakusqanchiktaqa uyariwasunmi (1 Juan 3:21, 22). Asia lawpi yachaq iñiqmasinchik Kiaramb nin: “Qallariypiqa Jehova Diostam kuyarqani imayna kasqanta riqsisqayraykulla. Chaymantam ichaqa kuyarqani mañakusqayta uyariwasqanraykuña, chayraykum payta kusichiq kaqkunata astawan ruwayta munarqani”, nispa.

 9. ¿Imanasqam yachanchik Timoteoqa iñiqmasinkunata kuyasqanta?

⁹ Pablom Diosta serviyta qallaykusqan qipakunata riqsirurqa iñiqmasinkuna kuyaq musuta, paypa sutinmi karqa Timoteo. Timoteoqa Jehova Diosta hinaspa runamasinkunatapas anchatam kuyarqa. Chaymi Pabloqa Filipo llaqtapi iñiqkunaman Timoteomanta kaynata qillqarqa: “Manam pipas pay hinaqa kanchu, payqa qamkunamantam tukuy sunqunwan anchata llakikusunkichik”, nispa (Filip. 2:20). Pabloqa manam Timoteotaqa alabachkarqa allin yachachisqanmantachu nitaq imatapas allinta cuentallikusqanmantachu. Aswanqa alabachkarqa iñiqmasinkunata anchata kuyasqanmantam. Chayna kasqanraykuchá iñiqkunaqa kusikuyllawanña Timoteota suyaqku (1 Cor. 4:17).

10. Iñiqmasinchik Anawan qusanqa ¿imatam ruwarqaku iñiqmasinkuta kuyasqankurayku?

¹⁰ Ñuqanchikpas kallpanchakunanchikmi iñiqmasinchikkunata imapipas yanapaykunapaq (Heb. 13:16). Pasaq yachachikuypim rimarqanchik iñiqmasinchik Anamanta. Paymi qusanpiwan huk iñiqmasinchikkunata watukurqaku llumpay wayra-para karuptin. Chay iñiqmasinchikpa wasinpa qatansi wichiykamusqa, chaysi cambiakunankupaqpas manaña limpio pachankupas kasqañachu. Chayta qawaykuspa ima ruwasqanmantam Ana willakun: “Pachankutam taqsamunaykupaq aparqaniku hinaspam kutichipurqaniku planchasqachataña hinaspa doblasqachataña, chay ruwasqaykuqa manam imachu karqa. Ichaqa chayraykum paykunawanqa allin amistadña kaniku”, nispa. Iñiqmasinchikkunata kuyasqanraykum Anawan qusanqa kallpanchakurqaku iñiqmasinkuta chaynata yanapaykunankupaq (1 Juan 3:17, 18).

11. (1) ¿Pitapas yanapananchikpaq kallpanchakusqanchikqa yanqapaqchu kanqa? (2) Proverbios 19:17 nisqanman hinaqa, ¿imaynatam Jehova Diosqa qawan pitapas yanapasqanchikta?

¹¹ Iñiqmasinchikkunawan kuyakuq kaspanchikqa hinaspa imapipas yanapaykuspanchikqa, Jehova Diospa imayna piensasqanta hinaspa imayna kasqantam qatipakuchkanchik. Chaypaq kallpanchakusqanchikqa manamá yanqapaqchu. Manapaschá haykapipas yachasunchu wakin iñiqmasinchikkuna yanapasqanchikta anchata valorasqankutaqa. Pusaq parrafopi rimamusqanchik iñiqmasinchik Kiaram hatun kuyakuywan yuyarin imayna yanapaykusqankuta. Paymi nin: “Iñiqmasinchikkunatam anchata agradecekullani Diosmanta willakuq rinaypaq pusawasqankumanta. Kuyakuqllañam karqaku, wasiyman hamuspam pusallawaqku hinaspam imallatapas mikunaypaq quwaqku utaqmi docenaypaq mikuyta qaraykullawaqku hinaspam wasiyman allinllata kutichiwaqku. Chayraqmi cuentata qukuni yanapawanankupaqqa anchata kallpanchakusqankuta, ichaqa kuyawasqankuraykum tukuy chaykunata ruwarqaku”, nispa. Wakinqa manapaschá agradecekuyta atiwasunchu mana riqsiwasqanchikrayku. Pikuna yanapasqanmanta rimaspanmi Kiara nin: “Munanim llapallan yanapawaqniykuna agradecekuyta, ichaqa manam yachanichu wakinqa maypi yachasqankuta. Diosninchikmi ichaqa yachan maypi yachasqankuta chaymi payllataña mañakuni yanapawasqankumanta bendeciykunanpaq”, nispa. Arí, Jehova Diosqa pitapas imaynachallatapas yanapaykusqanchiktaqa qawamuchkanmi. Chaytaqa payqa qawan qullqitapas payman prestasqanchikta hinam, chaymi kutichipuwananchikmantapuni niwanchik (leey Proverbios 19:17).

12. ¿Imatam qarikunaqa ruwananku iñiqmasinkuna kuyasqanta yachanankupaq? (Qaway fotokunatapas).

¹² Diosta serviq qari kaptikiqa, ¿imata ruwaptikim huñunakusqaykipi iñiqkuna yachanmanku paykuna kuyasqaykita? Imapipas yanapaptikim chaytaqa yachanqaku. Musu kaq iñiqmasinchik Yordanmi punta apaqta tapukurqa imaynata iñiqmasinchikkunata astawan yanapananmanta. Hinaptinmi punta apaqqa alabaykurqa allintaña kallpanchakusqanmanta. Ichaqa nichaykurqaraqmi kaychakunataraq ruwananpaq. Nirqam: “Tiempochawanraqmi huñunakuyman chayamunayki chaynapi iñiqmasinchikkunata saludaykunaykipaq, kallpanchakunaykim huñunakuyninchikpi rimarinaykipaq, sapa kutim grupoykiwan Diosmanta willakuq lluqsinayki. Chaymantapas iñiqmasinchikkunatam imallapipas yanapaykunayki”, nispa. Tukuy chaykunata ruwasqanraykum Yordanqa iñiqmasinkunata astawan kuyarqa, hinaspapas listoñam karqa qipakunata Diospa llaqtanpi astawan yanapakunanpaq. Chaymantapas, Yordanqa yacharurqam punta apaqkunapa yanapaqnin kaspanqa hukkuna yanapayta mana chayraq qallarinanmanta, aswanqa ñawpaqta ruwasqanman hina hinalla ruwananmanta (1 Tim. 3:8-10, 13).

13. ¿Imapaq tantiakusqanmi iñiqmasinchik Cristianta yanaparqa yapamanta punta apaq kananpaq?

¹³ ¿Manañachu punta apaq utaq punta apaqkunapa yanapaqnin kanki? Chayna kaptinqa amayá kayta qunqaychu: Jehova Diosqa manam qunqanchu payta kuyasqaykirayku imapas ruwasqaykitaqa (1 Cor. 15:58). Diosqa kunanpas qawamuchkanmi paypaq tukuy ima ruwasqaykitaqa. Iñiqmasinchik Cristiansi manaña punta apaq kananmanta niykuptinku llumpay llakisqa tarikullasqa, ichaqa manas chaynallachu kasqa. Ima ruwasqanmantam niwanchik: “Tantiarurqanim manaña punta apaq kaspaypas Diosta kuyasqayrayku tukuy atisqayta hinalla ruwanaypaq”, nispa. Chaymi tiempopa pasasqanman hina yapamanta nirqaku punta apaq kananpaq. Paymi nin: “Yapamanta punta apaq kanaypaq niwaptinkum iskayrayarqani chaskikunaypaq. Ichaqa kayna piensayniymi yanapawarqa: Punta apaq kanaypaq yapamanta Jehova Dios kuyapayawaspan nillawaptinqa payta hinaspa iñiqmasiykunata kuyasqayraykuyá chaskikullasaq”, nispa.

14. ¿Imatam ñuqanchikpas iñiqmasinchik Elena hina ruwachwan?

¹⁴ Testigokunaqa mana testigo kaq runamasinchikkunatapas kuyasqanchikraykum yanapaykunchik (Mat. 22:37-39). Georgia nacionmanta iñiqmasinchik Elenam nin: “Diosmanta chayllaraq willakuyta qallaykuspayqa Jehova Diosta kuyasqayraykullam willakuq lluqsiq kani. Ichaqa, Diosta astawan kuyaspayqa runamasinchikkunatapas astawanmi kuyarqani. Yuyaymanaqmi kani imakunawan sasachakusqankuta hinaspa imakunamanta yachay munasqankuta. Chayna piensayniymi yanapawarqa runamasinchikkunata aswan allinta yanapanaypaq”, nispa (Rom. 10:13-15).

15, 16. Kay parrafokunapaq fotokunapi qawasqanchikman hinaqa, ¿imanasqam nichwan iñiqmasinchikkunata yanapaspanchikqa runamasinchikkunatapas yanapasqanchikta?

¹⁵ Iñiqmasinchikkunata kuyasqanchikrayku yanapaspanchikqa huk runamasinchikkunatapas yanapachkanchikmi. Coronavirus kasqan tiempopim iñiqmasinchik Paolowan warmichan achka yuyaq iñiqmasinchikkunata yanaparqaku celularninkuwan utaq tabletninkuwan imaynata Diosmanta willakunankupaq. Huk yuyaq iñiqmasinchikmi sasachakullarqa tabletninta servichikuyta. Ichaqa yanapasqankuraykum yacharurqa, chaymi achka familiankunata invitarqa Jesuspa wañukusqanta yuyarinapaq huñunakuyman. Hinaptinmi 60 familiankuna internetninta chay huñunakuyta uyarirqaku. Arí, iñiqmasinchik Paolowan warmichan yanapasqanraykum chay yuyaq iñiqmasinchikpa familianqa chay huñunakuy uyariyta atirqaku. Yuyaq iñiqmasinchikmi Paoloman kaynata qillqarqa: “Gracias turillay Paolo, yuyaqkunata tabletniykuta servichikunaykupaq yachaykachiwasqaykikumanta. Manam qunqasaqchu qamkunawan Jehova Dios yanapaykuwasqantaqa nitaq sumaq pacienciawan yanapaykuwasqaykichiktapas”, nispa.

¹⁶ Chay yuyaq iñiqmasinchikpa chayna nisqanwanmi Paoloqa kayta yacharurqa: Aswan allinqa kuyakuq kaymi, imapas yachayninchikmantaqa utaq imatapas ruway atisqanchikmantaqa. Chaymi iñiqmasinchik Paolo kaynata nin: “Huk tiempom llaqtan-llaqtan watukuq karqani, chay tiempopi huñunakuypi yachachisqaykunataqa iñiqmasinchikkunaqa yaqapaschá qunqarunkuña. Ichaqa imachapipas yanapaykusqaytam kunankama hinalla yuyanku”, nispa.

17. ¿Pipa allinninpaqraqtaq iñiqmasinchikkunata yanapasqanchikqa?

¹⁷ Kuyasqanchikrayku iñiqmasinchikkunata yanapasqanchikqa kikinchikpaqpas allinninchikpaqmi. Chayna kasqantam nin Nueva Zelanda nacionpi yachaq iñiqmasinchik Yonatan. Sabado punchawsi iñiqmasinchik Yonatanqa huk precursor iñiqmasinchikta rikurusqa llumpayta rupamuchkaptinpas sapachallan Diosmanta willakuchkaqta. Chaysi tantiakurusqa sapa sabado tardenpi riysinanpaq. Chaynata yanapaspan kikinpas aswan allin kanantaqa Yonatanqa manam yacharqachu. Paymi willakun: “Chay tiempoqa manam anchachu Diosmanta willakuyta munaq kani. Ichaqa, chay precursor iñiqmasinchikpa sumaqta yachachisqanta qawaspaymi hinaspa achka runakunata yanapasqanta qawaspaymi ñuqapas Diosmanta astawan willakuytaña munarqani. Chaymantapas kusisqam tarikuni allin amistadta tarirusqaymanta. Chay precursorqa yanapawarqam Diosmanta astawan willakuyta munanaypaq, Diosninchikwan astawan kuyachikunaypaq hinaspa iñiyniypi ñawparinaypaq”, nispa.

18. ¿Ima ruwananchiktam Jehova Diosqa munan?

¹⁸ Diosninchikqa munanmi payta hinaspa runamasinchikkunata hinalla kuyanapaq kallpanchakunanchikta. Yachamusqanchikman hinam Jehova Diosta kuyanapaqqa palabranta leenanchik, yuyaymanananchik hinaspa sapa punchaw mañakunanchik. Kuyasqanchikta iñiqmasinchikkuna yachanankupaqñataqmi ima necesitasqankupipas yanapaykunanchik. Astawan kuyakuq kaspaqa Dioswanpas hinaspa iñiqmasinchikkunawanpas astawanmi kuyanakusun. Hinaspaqa wiña-wiñaypaq amistadmi kasun Jehova Dioswanpas hinaspa iñiqmasinchikkunawanpas.