Kallpanchakuy casado vidaykita salvanaykipaq

“Casado kaqkunatam ichaqa kamachini [. . .]. Kay kamachikuyqa manam ñoqapachu aswanqa Señorpam” (1 COR. 7:10).

¿IMATAM NIWAQ?

¿Imanasqam nichwan Diosqa casado kaqkunata kuskanchasqanmanta?

¿Imaynatam ancianokunaqa casado vidankupi sasachakuqkunata yanapanmanku?

¿Imaynatam casado vidata qawananchik?

 1. ¿Imaynatam casado vidata cristianokuna qawanku hinaspa imanasqa?

HUK cristiano casarakuspanqa Diosmanmi prometekun, chaymi casarakusqantaqa mana yanqata hinachu qawanan (Ecl. 5:4-6). Casado vidataqa Diosmi qallarichirqa, chaymi nichwan runakuna casarakuspanku ‘Diospa kuskanchasqan’ kasqanmanta (Mar. 10:9). Jehová Diospa chayna kuskanchasqanqa ancha allinpunim, nacionkunapa kamachikuyninkuna chayna kananpaq mana niptinpas. Chaymi lliw cristianokunaqa casado vidata Diospa qawasqanman hina qawananku. Chaynatam qawananku Jehová Diosta manaraq reqsichkaspa casarakuq cristianokunapas.

 2. ¿Ima tapukuykunamantam yachachkasunchik?

² Casado vidaqa ancha kusikunapaqmi kanman. Ichaqa, ¿imatam rurachwan casado vidapi sasachakuykuna kaptinqa? ¿Atichwanchu sasachakuykuna kaptinpas casado vidanchikta kallpanchayta? ¿Ima yanapakuykunam kan sasachakuykunapi tarikuqkunapaq?

¿KUSIKUNAPAQCHU ICHA LLAKIKUNAPAQCHU KANQA?

3, 4. ¿Imaynam pi cristianopas tarikunman casarakunanpaq mana allinta akllaruspanqa?

³ Cristianokunapa casado vidanku allin kaptinqa, ancha kusikuytam apamun hinaspapas Jehová Diostam hatunchan. Mana allin kaptinñataqmi, llumpay llakikuyta apamun. Casarakuyta piensaq cristianoqa atinmanmi casado vidanta allinta qallarichiyta, Diospa nisqanta kasukuspanqa. Casarakunanpaq mana allinta akllaspanmi ichaqa llumpay llakikuypi tarikunman. Wakin mozo-sipaskunam manaraq casarakunankupaq kachkaspanku, piwanpas reqsinakuyta qallaykunku. Wakinñataqmi Internetpi tariruspanku apurawllamanña casarakunku hinaspam llumpayta ñakarinku. Wakinkunañataqmi reqsinakusqanku tiempopi hatun huchapi wichiykuspanku casarakunku, chaymi mana respetanakuspanku casado vidankuta qallarinku.

⁴ Wakin cristianokunañataqmi ‘Señorllapi casarakunankupaq’ kamachikuyta mana kasukunkuchu, chaymi llumpay sasachakuykunapi tarikunku (1 Cor. 7:39). Chaynapi tarikuspaykiqa, Diosta pampachasunaykipaq mañakuy hinaspa yanapasunaykipaqpas. Ñakariykunamanta mana harkasuspaykipas, Diosqa kallpatam qosunki aguantanaykipaq (Sal. 130:1-4). Tukuy sonqoykiwan kallpanchakuy Payta haykapipas kusichinaykipaq, hinaptinmi ‘Diospa kusikuyninqa amparasuqniki wasi hina’ kanqa (Neh. 8:10).

CASADO VIDAPI SASACHAKUYKUNA KAPTIN

 5. Casado vidankupi sasachakuqkunaqa, ¿imakunapim mana piensanankuchu?

⁵ Casado vidankupi sasachakuqkunaqa ichapas kaynata ninmanku: “¿Allinraqchu kanman kay llakikuypaq casado vidayta allichayqa? ¡Atiruyman ñawpaq tiempoman kutiyta chaynapi hukwan casarakunaypaq!”, nispa. Ichapas rakinakuyta munaspanku ninmankuraq: “¡Rakinakuruspayqa kaqllam libre kayman! ¿Atiruymanchu divorciakuyta? Bibliapa nisqanman hina mana huchallikuspas, ¿rakinakuruymanchu chaynapi kusisqalla kanaypaq?”, nispa. Chaykunapi piensanamantaqa otaq ñakakunamantaqa, cristianokunaqa Diospa yanapakuynintam maskananku hinaspam kallpanchakunanku kasukunankupaq.

 6. ¿Ima niwaqtaq Mateo 19:9, NM nisqanpi Jesuspa rimasqanmanta?

⁶ Pi cristianopas yanqamanta divorciakuruspanqa manam librechu kachkan Biblia nisqanman hina kaqmanta casarakunanpaqqa. Jesusmi nirqa: “Mana huchapakuchkaptin pipas warminmanta divorciakuspan hukwan casarakuqqa pierdekuy huchamanmi wichiykun”, nispa (Mat. 19:9, NM). Kay textopi huchapakuymanta rimaspanqa, rimachkantaqmi hukwan pierdekuymantapas hinaspa chayman rikchakuq hatun huchakunamantapas. Chaynaqa, sichu pi cristianopas divorciakuyta munachkan casado vidanpi mana mayqenpas huchapakuchkaptin, hinaptinqa ancha allinmi Diospa yanapakuyninta maskayninqa.

 7. ¿Imatam runakuna ninmanku cristianokunapa casado vidanku mana allinpi tukuruptin?

⁷ Pi cristianopapas casado vidan mana allinpi tukuruptinqa, yaqapaschá iñiyninkupipas mana allinchu karqaku. Apostol Pablom nirqa: “Wasinpipuni mana imayna kamachikuyta atispaqa ¿imaynataq Diosman iñiqkunataqa nanachikunman?”, nispa (1 Tim. 3:5). Sichu cristiano kachkaspanku casado vidanku mana allin kaptinqa, runakunam ninmanku rurasqanku predicasqankuwan mana tupasqanta (Rom. 2:21-24).

 8. Casarasqa cristianokuna rakinakuyta otaq divorciakuyta piensaspankuqa, ¿imapim mana allinchu kachkanmanku?

⁸ Casarasqa cristianokuna yanqamanta rakinakuyta otaq divorciakuyta piensaspankuqa, sutillamá qawachichkanku iñiyninkupi mana allin kasqankuta. Yaqapaschá huk kaqninku otaq iskayninkupas Bibliapa yachachisqankunata mana kasukuchkankuchu. ‘Tukuy sonqonkuwan’ Jehová Diospi confiaspankuqa, atinmankum sasachakuyninkunata allichaytaqa (leey Proverbios 3:5, 6).

 9. ¿Imapim tukun mana chaylla rakinakunankupaq kallpanchakuq cristianokunaqa?

⁹ Rakinakuytaña piensaq achka cristianokunam atirqaku sasachakuyninkunata allichayta. Mana chaylla rakinakunankupaq kallpanchakuq cristianokunaqa allinpim tukunku. Apostol Pedrom nirqa: “Warmikuna, qamkunapas qosaykichiktayá kasuychik, chaynapim Diospa palabranpi mana iñiq qosakunapas mana rimapayachkasqalla allin kawsasqaykichikwan iñikunqaku. Respetowan allin kawsasqaykichikta qawaspam iñikunqaku”, nispa (1 Ped. 3:1, 2). Hinaptinqa, allin kawsasqanchikwanmi mana iñiqpas Jehová Diosmanta yachayta munanman. Sasachakuyninkunata atipaq cristianokunaqa Jehová Diostam hatunchan hinaspapas anchatam kusichin qosanta, warminta hinaspa churi-wawankunatapas.

10, 11. ¿Imanasqam cristianokunapa casado vidanku hukmanyarunman, ichaqa imaynatam Diosqa qawan?

¹⁰ Jehová Diosta kusichiyta munaspankum, yaqa lliw cristianokunaqa Diosta serviqkunallawan casarakunku. Chayna kaptinpas casado vidankuqa hukmanyarunmanmi. Wakinpiqa huk kaqninmi mana allin genioyoq rikurirunman. Wakinpiñataqmi Diosmanta willakuyta huk kaqninku saqerunman. Rimasun Lindamantaa, payqa tukuy sonqonwanmi Diosta serviq. Ichaqa qosanmi Diosmanta karunchakuruspan congregacionmanta qarqosqa karqa. ¿Imatam casarasqa cristianoqa ruranman chayrayku rakinakunankupaqña kachkaspanku?

¹¹ Ichapas tapukunki: “¿Hinallachu kallpanchakunay mana rakinakunaypaq?”, nispa. Chaytaqa kikikimá tanteanayki. Ichaqa casado vidaykipi llumpay sasachakuypiña tarikuspaykipas, allinmi kanman hinalla kallpanchakuynikiqa. Jehová Diosqa anchatam chaninchan, casado vidapi sasachakuykunata conciencianrayku aguantaq cristianotaqa (leey 1 Pedro 2:19b, 20). Diosqa Palabranwanmi hinaspa chuya espiritunwanmi yanapan mana rakinakunanpaq kallpanchakuq cristianotaqa.

MUNANKUM YANAPAYTA

12. ¿Imaynatam ancianokunaqa qawawasunchik sasachakuyninchikmanta willaptinchik?

¹² Casado vidaykipi sasachakuypi tarikuspaykiqa, iñiyninkupi allin takyasqa cristianokunata yanapasunaykipaq mañakuy. Ancianokunaqa Diospa ovejankunata michiqmi kanku, chaymi kuyakuywan Bibliapa consejonkunawan yanapasunki (Hech. 20:28; Sant. 5:14, 15). Ama piensaychu casado vidaykipi sasachakuynikita paykunaman willaptiki, hukmantaña qawasunaykitaqa. Aswanmi paykunaqa kuyasunkichik Jehová Dios kusichiy munasqaykichikmanta.

13. ¿Ima consejokunam kan 1 Corintios 7:10-16 nisqanpi?

¹³ Mana iñiq señorayoq otaq qosayoq cristiano yanapakuyta maskaptinqa, ancianokunaqa apostol Pablopa nisqanman hinam kaynata consejanku: “Casado kaqkunatam ichaqa kamachini, warmiqa amayá qosanmantaqa rakikuchunchu. Kay kamachikuyqa manam ñoqapachu aswanqa Señorpam. Rakikuruspanqa amataqyá hukwanqa casarakuchunchu, manachayqa qosanwanyá amistachun. Qosanpas amataqyá dejachunchu warmintaqa [. . .]. Mana rakikuspaqa yaqapasmi qosaykita salvawaq, qosapas yaqapasmi warmikita salvawaq”, nispa (1 Cor. 7:10-16). ¡Mayna kusikunapaqmi mana iñiq qosa otaq warmi Dios serviyta qallaykuptinqa!

14, 15. ¿Imaynanpim casarasqa cristianokunaqa piensanmanku rakinakuyta, ichaqa imanasqam sonqomanta Diosta mañakunanku?

¹⁴ ¿Imaynanpim casada cristianaqa ‘qosanmanta rakikunman’? Wakin cristianakunam rakikunku qosanku familianta mana mantieneyta munaptin otaq llumpayta maqaptin hinaspa Jehová Diosta servinanpaq llumpayta harkakuptin.

¹⁵ Rakikunamanta otaq mana rakikunamantaqa sapakamam tanteakunanchik. Ichaqa chayta tanteanapaqqa sonqomantam Diosta mañakunanchik. Piensariy kaypi: sichu Jehová Diosta servinapaq llumpayta harkakusqanrayku iñiyninchik chiriyaptinqa, ¿mana iñiqllachu huchayoq kanman, icha ñoqanchikpas huchayoqchu kachwan Biblia estudiayta, huñunakuykunaman riyta hinaspa predicaytapas saqerusqanchikmanta?

16. ¿Imataq harkawananchik utqayllaman mana divorciakunapaq?

¹⁶ Jehová Dioswan amistadninchikta anchata chaninchasqanchikraykum hinaspa casado vidata Diospa qawasqanman hina qawasqanchikraykum, utqayllamanqa mana tantearunachu divorciakunapaqqa. Diospa serviqninkunaqa munanchikmi Jehová Diospa sutin chuyanchasqa kananta. Chaymi mana rakinakuchwanchu hukwanña casarakuyta munaspaqa (Jer. 17:9; Mal. 2:13-16).

17. ¿Imaynanpim nichwan cristianota hawkayayman Dios qayasqanta?

¹⁷ Mana iñiqwan casarasqa cristianoqa kallpanchakunanmi mana rakinakunanpaq. Ichaqa kallpanchakuptinpas mana iñiq kaq rakinakunanpaq tantearuptinqa, manam llumpaytaqa hukmanyarunanchu. Apostol Pablom nirqa: “Diospi mana iñiq qari otaq warmi rakikuyta munaspaqa rakikuchunyá, chaynapiqa wawqepas panipas libreñam. Diosqa qayawarqanchik hawkayaymanmi”, nispa (1 Cor. 7:15).c

JEHOVÁ DIOSPI HAPIPAKUY

18. ¿Yanqachu kanman cristianopa mana rakinakunankupaq kallpanchakusqanqa?

¹⁸ Casado vidapi ima sasachakuypiña tarikuspaykipas, Jehová Diosta mañakuy kallpata qosunaykipaq hinaspa paypi hapipakuy (leey Salmo 27:14). Kaqmanta rimasun Lindamanta, payqa unay wata mana rakinakunankupaq kallpanchakuptinpas qosanqa rakikururqam. ¿Yanqachu karqa kallpanchakusqanqa? Paymi nin: “Manamá. Kallpanchakusqayta lliw qawaqkunaqa allintam Diosmanta rimarqaku. Concienciaypipas hawkam tarikurqani. Wawaytapas allintam yanaparqa Diospi hapipakunanpaq, bautizakunanpaq hinaspa tukuy sonqonwan Jehová Diosta servinanpaqpas”, nispa.

19. Mana rakinakunapaq kallpanchakuyqa, ¿imapim tukunman?

¹⁹ Rimasuntaq Marilyn cristianamantapas. Paymi anchata kusikun Diospi hapipakusqanmantawan qosanwan mana rakinakunankupaq kallpanchakusqanmantapas. Paymi nin: “Wawa-churiykuta mana mantieneyta munasqanraykum qosaywanqa rakinakuytaña munarqani, iñiyniypipas chiriyachkarqaniñam. Payqa congregacionpi ancianom karqa manaraq mana allin negociokunaman yaykuchkaspanqa. Pisi-pisimantam huñunakuykunamanqa rirqañachu, hinaspam manaña rimanakurqanikuñachu. Terrorista runakuna llaqtaykupi mana allinkunata ruraruptinkum, mancharikuspay karunchakururqani. Hinaptinmi musyakururqani casado vidaypi sasachakuykuna kananpaq ñoqapas huchayoq kasqaymanta. Qosaywan rimanakuyta qallaykuspaykum kaqmanta familiaykuwan Biblia estudiayta hinaspa huñunakuykunaman riytapas qallaykurqaniku. Ancianokunapas kuyakuywanmi yanapawarqaku. Hinaptinmi casado vidaykuqa allinña karqa. Qosaypas tiempopa risqanman hinam kaqmanta congregacionpi rurayninkunata chaskirqa. Qallariypi llakikunapaq kaptinpas, kusikuypim tukurqa”, nispa.

20, 21. ¿Imapaqmi llapanchik kallpanchasqa kachkanchik?

²⁰ Soltero otaq casado kaspapas hinalla Jehová Diospi hapipakusun. Casado vidapi sasachakuykuna kaptinqa kallpanchakusun hukllaña kasqanchikta piensaspa allichanapaq (Mat. 19:6). Amataq qonqasunchu kayta: sichu casado vidanchikpi huk kaqninchik mana iñiq kaptin Jehová Diospi hinalla hapipakuptinchikqa, ichapas mana iñiqqa Dios serviyta qallaykunman.

²¹ Llapallanchikyá imatapas allinta tanteaspa rurasunchik, chaynapi rurasqanchikkunata runakuna qawaspanku Diosta hatunchanankupaq. Casado vidanchikpi sasachakuspaqa, tukuy sonqowan Diosta mañakusun, yuyaymanasun imanasqa rakinakuy munasqanchikpi hinaspa Bibliapa ima nisqanpipas, maskasuntaq ancianokunapa yanapakuynintapas. Chaymantapas kallpanchakusunyá Jehová Diosta kusichinapaq hinaspa casado vidata Diospa qawasqanman hina qawanapaqpas.

[Willakuykuna]

[10 kaq paginapi suti rikuylla kaq willakuy]

Mana chaylla rakinakunankupaq kallpanchakuq cristianokunaqa allinpim tukunku

[12 kaq paginapi suti rikuylla kaq willakuy]

Jehová Diospi hinalla hapipakuy hinaspa kallpata qosunaykipaq mañakuy

[9 kaq paginapi dibujo]

Jehová Diosqa yanapanmi mana rakinakunankupaq kallpanchakuq cristianokunataqa

[11 kaq paginapi dibujo]

Iñiqmasinchikkunaqa iñiyninchikpim kallpanchawanchik hinaspa yanapawanchik