Iñiyqa anchatam kallpanchawanchik

IÑIYNINCHIKQA anchatam yanapawanchik. Yanapawanchikmi mana atisqanchik kaqkunata ruwanapaq. Satanasqa Jehova Dios qipanchananchiktam munachkan. Ichaqa iñiyninchikmi yanapawanchik ‘satanaspa [...] flechankunata amachananchikpaq’ (Efes. 6:16). Iñiyninchikqa yanapawanchiktaqmi urqu hinaña sasachakuykunatapas atipananchikpaq. Jesuspas nirqam: “Mostaza muhu sayayllapas iñiynikichik kaptinqa, kay urqutam niwaqchik, ‘kaymanta wakman riy’ nispa, hinaptinqa chaypiñam rikurirunman”, nispa (Mat. 17:20). Chaynaqa, ancha-anchatam iñiyninchikqa yanapawanchik. Chayraykum kay tapukuykunamanta yachayninchik allin kanman: ¿Imataq iñiyqa? Iñiyniyuq kananchikpaqqa, ¿imayna runam kananchik? ¿Imatam ruwachwan aswan iñiyniyuq kanapaq? Hinaspa, ¿pimanwanmi iñikunanchik? (Rom. 4:3).

Iñiyqa manam Dios kasqanta riqsikuyllachu nitaqmi bibliapa nisqankunata yachayllachu. Demoniokunapas Dios kasqantaqa riqsikunkum hinaspam manchakuymanta katkatatanku (Sant. 2:19). Hinaptinqa, ¿imataq iñiyqa?

Iñiymantam biblia nin kaynata: “Iñiyqa suyasqanchikta chiqaptapuni chaskinanchikpaqña suyaymi”, nispa (Heb. 11:1a). Iñiyniyuq kaspaqa manam iskayrayasunchu Jehova Diospa tukuy ima niwasqanchikkuna ruwakunanmantaqa. Jehova Diosmi Israel runankunata nirqa: “Punchawwan chaynataq tutawan pacto ruwasqayqa cumplikunqapunim, chayraykum punchawpas chaynataq tutapas tiempollanpi chayamun. Chaynam serviqniy Davidwan pacto ruwasqaypas cumplikunqapuni”, nispa (Jer. 33:20, 21). ¿Yaqachu haykaqllapas iskayrayarqanchik inti qispimunanmanta utaq siqaykunanmanta hinaspa achikyamunanmantawan tutaykunanmanta? Manamá. Chaynaqa, chaykunamanta mana iskayrayachkaspaqa, ¿iskayrayachwanchu intitapas qispimunanpaq hinaspa siqaykunanpaq kamachiq Diospa tukuy ima nisqankuna ruwananmanta? Manamá (Is. 55:10, 11; Mat. 5:18).

Chaymantapas, iñiymantam biblia kaynataraq nin: “[Iñiyqa] mana rikusqanchik kaqkunatapas chiqap kasqanpaqña hapiymi”, nispa (Heb. 11:1b). Warmachanchik imaynanpi wayra kasqanmanta tapuwaptinchikqa wayrata mana rikuchkaspapas mana iskayrayaspam ninchik wayrawan kawsasqanchikta, wayra sachakuna kuyuchisqanta hinaspa tukuy imapaq kasqanta. Chaykunawanmi warmachanchikqa wayrata mana rikuchkaspanpas wayra kasqanmantaqa manaña iskayrayanqachu. Chaynam iñiyninchikpas yanapawanchik mana rikusqanchik kaqkunamanta mana iskayrayanapaq (Rom. 1:20).

Iñiyqa imapas kasqanmanta mana iskayrayaymi. Chayraykum iñiyniyuq kanapaqqa puntata imamantapas “imam kaqta” yachananchik (1 Tim. 2:4). Ichaqa manam chayllachu. Apostol Pablom qillqarqa iñiyniyuq kasqanchiktaqa sunqumanta iñispa qawachisqanchikta (Rom. 10:10). Iñiyqa manam imapas kasqanmanta mana iskayrayayllachu, aswanqa imamantapas yachasqanchikta chaninchaymi. Chayta ruwaspaqa iñiyniyuq kasqanchiktam qawachisun, iñiyniyuq kayqa Diospa munasqanman hina kawsakuymi (Sant. 2:20). Diosmanta yachasqanchikkunata mana chaninchaspaqa, yachasqanchikkunata mana kaqpaqpas hapispam yanqakunamanña utaq mana allin kaqkunamanña hapipakuyta qallaykuchwan (2 Ped. 3:3, 4; Jud. 18). Chayraykum, mana llapallan runachu iñikurqa Jehova Diospa hinaspa churin Jesuspa ruwasqanpiqa (Num. 14:11; Juan 12:37). Chaynaqa, mana allinta chiqninankupaq kallpanchakuqkunallatam Jehova Diosqa yanapan iñiyniyuq kanankupaqqa (Gal. 5:22; 2 Tes. 2:10, 11).

Diosta yupaychaq iñiyniyuq runakunamanta huk kaqninmi kamachiq David (Heb. 11:32, 33). Ichaqa manam llapallan ayllunchu iñiyniyuqqa karqa. Chayraykum Eliabqa hatunkaray Goliatta wañuchiqpaq ima kananmanta sullkan Davidpa tapukusqanta uyariruspan qaqchaparurqa (1 Sam. 17:26-28). Iñiyninchikqa manam kikillanmantachu rikurin nitaqmi tayta-mamanchikmantachu chaskinchik. Chaynaqa, Davidpas iñiyniyuqqa karqa Jehova Diosta kuyasqanraykum.

Salmos 27 capitulonpim, iñiyniyuq kananpaq ima yanapasqanmanta David willakun (1 kaq versiculo). Anchatam yuyaymanaq Jehova Dios sasachakuyninkunawan yanapaykusqanpi hinaspa chiqniqnin runakunamanta waqaychaykusqanpi (2 hinaspa 3 kaq versiculo). Anchatam chaninchaq Jehova Diospa wasinta hinaspa Diospaq imapas ruwasqanta (4 kaq versiculo). Hinaspapas wakin Israel runakunawan kuskam Jehova Diosta yupaychaq (6 kaq versiculo). Imaypas Jehova Diostam mañakuq yanapaykunanpaq (7 hinaspa 8 kaq versiculo). Chaymantapas Jehova Diostam mañakurqa ñanninta riqsiykachinanpaq (11 kaq versiculo). Davidpaqqa iñiyniyuq kayqa ancha allinmi karqa, chayraykum nirqa mana iñiyniyuq kaspayqa maypiya kachkayman karqa, nispa (13 kaq versiculo).

Salmos 27 capitulonpa nisqanman hina ruwaspallam David hina iñiyniyuqqa kasun. Iñiyniyuq kanapaqariki Jehova Diosmantam imam kaqta yachana. Chaynaqa biblianchiktawan qillqanchikkunatayá ñawinchasun. Chayta ruwaspaqa manam sasachakusunchu iñiyniyuq kanapaqqa (Sal. 1:2, 3). Biblianchikta utaq qillqanchikkunata ñawinchaspaqa yuyaymanasunyá ñawinchasqanchikpi. Yachasqanchikkunapi yuyaymanaymi yanapawasun astawan Jehova Diosta kuyananchikpaq, Jehova Diosta kuyaspanchikqa huñunakuykunapim rimarisun hinaspapas suyakuyninchikmantam hukkunaman willasun (Heb. 10:23-25). Iñiyniyuq kasqanchiktaqa qawachinchiktaqmi Jehova Diosta mañakuspa hinaspa payllapi hapipakuspa (Luc. 18:1-8). Chaynaqa, maypiña-chaypiña kaspapas Jehova Diostayá mañakusun, payqariki ñuqanchikmantam nanachikun (1 Tes. 5:17; 1 Ped. 5:7). Iñiyninchikqa imatapas ruwanapaqmi yanapawanchik, imapas ruwasqanchikñataqmi aswan iñiyniyuq kanapaq yanapawanchik (Sant. 2:22).

Manaraq wañukuchkaspam, Jesusqa qatiqninkunata nirqa: “Diospiyá hinalla iñiychik, chaynallataqyá ñuqapipas iñiychik”, nispa (Juan 14:1). Qawasqanchikman hinaqa, Jesuspipas iñinanchiksi manas Jehova Diosllapichu. Chaynaqa, ¿imata ruwaspam Jesuspi iñisqanchikta qawachichwan?

Jesuspa wañukusqantayá chaninchasun, Jehova Diosmiriki paytaqa kachamurqa ñuqanchikta kuyawasqanchikrayku. Apostol Pablopas nirqam: “Diospa churinpi iñisqayraykum kawsachkani, paymi kuyawaspan ñuqarayku wañurqa”, nispa (Gal. 2:20). Jesuspi iñispanchikqa, manam iskayrayasunchu ñuqanchikrayku pay wañukusqanmantaqa, pay wañukusqanraykumriki Jehova Diospas huchanchikkunata pampachawanchik. Jesuspa ñuqanchikrayku wañukusqallanwantaqmi wiñay kawsaytapas haypasun, chaywanmi Jehova Diosqariki ancha-ancha kuyawasqanchikta qawachiwanchik (Rom. 8:32, 38, 39; Efes. 1:7). Kaykunamanta yachayqa yanapawanchikmi mana allinkunata qipanchanapaq (2 Tes. 2:16, 17).

Jesus wañukusqanraykutaqmi Jehova Diostapas mañakuyta atinchik. Chaynapi, “llakipayasqa hinaspa kuyapayasqa kananchikpaq” (Heb. 4:15, 16; 10:19-22). Jehova Diosta mañakuyqa yanapawanchikmi mana allinkunamanta utaq huchamanta ayqikunapaq (Luc. 22:40).

Jesustayá kasukusun. Apostol Juanmi qillqarqa: “Churipi iñiqqa wiñay kawsayniyuqmi, churita mana kasukuqmi ichaqa mana kawsanqachu, aswanqa Diospa piñakuyninmi paypi hinalla kanqa”, nispa (Juan 3:36). Juanpa qillqasqanpim sutillata qawanchik iñiyqa kasukuywan tupasqanta. Chaynaqa, iñiyniyuq kasqanchiktaqa qawachinchik “Cristopa kamachikuyninta” kasukuspallam, chayqa kay pachapi kachkaspan yachachisqankunawan kamachikuy qusqankunam (Gal. 6:2). Kasukusqanchiktaqa qawachinchiktaqmi Diospa llaqtanpi punta apaqkunapa nisqanta ruwaspa (Mat. 24:45). Jesuspa niwasqanchikta ruwaspaqa, kawsakuyninchikpi sasachakuykunatam atipasun (Mat. 7:24, 25).

Huk kutipim, huk runa Jesusta nirqa: “¡Iñinim! ¡Ichaqa yanapaykuwayá aswan iñiyniyuq kanaypaq!”, nispa (Mar. 9:24). Chay runaqa iñiyniyuqñam karqa, ichaqa aswan iñiyniyuq kananpaq mañakusqanwanmi mana hatun tukuq kasqanta qawachirqa. Pay hinam ñuqanchikpas aswan iñiyniyuq kanapaq yanapaykuwananchikta munanchik. Chaynaqa kunanmantayá kallpanchakusun aswan iñiyniyuq kanapaq, chaypaqqa biblianchikta ñawinchaspam yuyaymanananchik kanqa. Chaynapi Jehova Diosta astawan kuyananchikpaq. Iñiyninchikqa aswanraqmi qawakunqa iñiqmasinchikkunawan kuska Diosninchikta yupaychaptinchik, suyakuyninchikmanta hukkunaman willaptinchik hinaspa Diosta mañakuptinchik. Bibliam niwanchik: “Kuyasqallaykuna, qamkunayá ichaqa chuyay-chuyay iñiynikichikpi wiñaychik, chaynapi Diosninchik hinalla kuyasunaykichikpaq”, nispa (Jud. 20, 21).