Iñiqmasinchikkunata yanapay

Lliw nacionkunapim testigokunaqa huñunakunku Jehova Diosta kusisqa yupaychanankupaq. Kusisqam tarikunku huñunakusqankupi Diosmanta yachachikuykunata uyarisqankuwan chaynataq iñiqmasinkuta tukuy imapi yanapasqankuwanpas. ¿Kusisqachu qampas tarikunki iñiqmasinchikkunata yanapaspayki?

1. ¿Imaynatam tiempochakuspa yanapawaq iñiqmasinchikkunata?

Llapallanchikmi imallapipas iñiqmasinchikkunata yanapaykuytaqa atichwan. Wakin iñiqmasinchikqa yuyaqñam kanku, wakinñataqmi unquchkanku, ¿paykunata yanapawaqchu huñunakuyman rinanpaq? ¿Yanapawaqchu imapas pisipusqanta rantiykapuspa utaq wasinpi imatapas allichaykapuspa? (Leey Santiago 1:27). Chaymantapas, yanapakuchwanmi huñunakusqanchik wasi limpiaypi hinaspa allichaypi. Mana pipa hikutasqanmi chaykunapiqa kikinchikmanta yanapakunchik Jehova Diosta chaynataq iñiqmasinchikkunata kuyasqanchikrayku (Salmos 110:3).

Bautizasqa kaqkunaqa astawanraqmi iñiqmasinchikkunata yanapanchik. Wakinqa punta apaqkunapa yanapaqninmi kanku, paykunapas tiempopa risqanman hinam punta apaqña kanku kallpanchakuspankuqa. Wakin iñiqmasinchikkunapas yanapakunkutaqmi precursor kaspanku. Wakinkuñataqmi yanapakunku wasikunata ruwaypi, utaqmi huklaw llaqtachakunaman ripukunku testigokuna chaypi mana ancha kasqanrayku.

2. ¿Imaynatam yanapakuchwan qullqinchikwan utaq imapas kapuqninchikwan?

Bibliapim nin: “Kapuqnikikunamanta allinnin kaqta quspayá Jehova Diosta hatunchay”, nispa (Proverbios 3:9). Ancha kusikunapaqmi huñunakusqanchikpi qullqichanchikwan utaq imapas kapuwaqninchikwan yanapakuyqa. Chayqa yanapakun enteron pachapi Diosmanta willakuy apakunanpaqmi (leey 2 Corintios 9:7). Qullqichanchikta quspanchikqa yanapachkanchiktaqmi sasachakuypi tarikuq iñiqmasinchikkunatapas. Wakin iñiqmasinchikkunaqa tiempowanmi ‘sapaqchankuña’ qullqichankuta qunankupaq (leey 1 Corintios 16:2). Qullqichanchiktaqa huñunakusqanchik wasipi kaq cajachakunamanmi churachwan utaqmi internetpi donate.jw.org nisqantakamapas apachichwan. Diosqa munan qullqichanchikta utaq kapuqninchikta quspa kuyasqanchik qawachinanchiktam.

ASTAWAN YACHAYKUSUN

3. Qullqichanchikwanmi yanapakuchwan

Jehova Dioswan Jesusqa kusikunkum pipas sunqunmanta qullqichanwan yanapakuptinqa. Huk kutipim Jesus qawarqa wakcha viudapa qullqichan churasqanta, chaywanmi kusikurqa. Leeychik Lucas 21:1-4 hinaspa qatiqninmanta rimariychik:

• ¿Achka qullqita churaptillanchikchu Jehova Diosqa kusikunman?

• ¿Jehova Dioswan Jesusqa kusikunkuchu qullqichanchikta sunqumanta churaptinchik?

Qullqichanchikwan imakuna ruwasqankuta yachanapaq VIDEOTA qawaykuychik. Chaymantañataq qatiqninmanta rimariychik:

VIDEO: Sunqumantayá imapas kapuqninchikta Jehova Diosman qusun (4:47)

• ¿Imaynatam qullqi churasqanchikwan enteron pachapi iñiqmasinchikkunata yanapanku?

4. Yanapakunaykipaq niy

Ñawpaq tiempopi Diosta serviqkunapas kusikuywanmi yanapakuqku huñunakuna wasikuna allichaypi, manam qullqillankuwanchu yanapakuqkuqa. Leeychik 2 Cronicas 34:9-11 hinaspa qatiqninmanta rimariychik:

• ¿Imakunatataq ruwarqaku Israel runakunaqa “Jehova Diospa wasinta” allichanankupaq?

Ñawpaqta hinam Jehova Diospa testigonkunapas huñunakunanku wasita allichanku, chaypaq VIDEOTA qawaykuychik. Chaymantañataq qatiqninmanta rimariychik:

VIDEO: Diosta yupaychanapaq wasikunata allichasun (3:31)

• ¿Imanasqataq huñunakunanchik wasita limpiananchik hinaspa allichananchik?

• ¿Imaynatataq qampas yanapakuwaq?

5. Qari iñiqkunaqa kallpanchakunmankum astawan yanapakunankupaq

Bibliapim qari iñiqmasinchikkunata kallpanchan Diosta serviyninkupi kallpanchakunankupaq chaynapi iñiqkunata astawan yanapanankupaq. Chayta ruwaq iñiqmasinchikmanta yachaykunaykichikpaq VIDEOTA qawaykuychik. Chaymantañataq qatiqninmanta rimariychik:

VIDEO: Dios serviynikichikpi ñawparinaykichikpaqyá kallpanchakuychik (5:23)

• ¿Imakunapim Brayanqa kallpanchakurqa iñiyninpi ñawparinanpaq hinaspa iñiqmasinchikkunata yanapananpaq?

Bibliapim nin pipas punta apaq utaq yanapaqnin kananpaqqa imayna runa kananmanta. Leeychik 1 Timoteo 3:1-13 hinaspa qatiqninmanta rimariychik:

• ¿Imaynataq kananku punta apaqkunaqa hinaspa yanapaqnin kayta munaqkunaqa?

• ¿Imaynataq churinkupas hinaspa señorankupas kanan? (Kaqmanta leeykuychik 4 hinaspa 11 versiculokunata).

• Chayna kanankupaq qari iñiqmasinchikkuna kallpanchakuptinkuqa, ¿imanasqataq chayqa llapanchikpaqpas ancha allin?

YUYARIYKUSUN

Jehova Diosqa manam qunqanchu iñiqmasinchikkunata yanapanapaq tiempochakusqanchiktaqa chaynataq qullqichanchikta utaq kapuqninchikta qusqanchiktaqa.

¿Ima niwaqtaq?

• ¿Imaynatam tiempochakuspa yanapachwan iñiqmasinchikkunata?

• ¿Imaynatataq yanapakuchwan qullqichanchikwan utaq imapas kapuqninchikwan?

• ¿Imaynatataq qampas iñiqmasinchikkunata yanapawaq?

ASTAWAN YACHANAYKIPAQ

Diosqa manañam mañawanchikchu diezmotaqa, chaymantayá kay yachachikuypi leeykuy.

“¿Imatam biblia nin diezmomanta?” (Tarinkim jw.org nisqanpi)

Bibliapim nin iñiqkuna ukupi wakin imapas ruwaytaqa bautizasqa qarikunalla ruwanankumanta. Mana bautizasqa qari kaptinqa, ¿chaykunata ruwanmankuchu bautizasqa warmikunapas?

“Iñiqkunapa umanqa Cristom” (Willakuq, febrero 2021)

Wakin testigokunam karu llaqtapi iñiqmasinkuman sasa kaptinpas qillqakunata apanku, chayta qawaykuy kay videopi.

Congo nacionpi qillqanchikkunata imayna aypusqankumanta (4:25)

Jehova Diospa testigonkunaqa imatapas ruwanaykupaqqa manam wakin religionkunapi hinachu qullqita mañakuniku, chaymanta kaypi leeykuy.

“¿Ima qullqiwantaq Jehova Diospa testigonkunaqa tukuyta ruwanku?” (Tarinkim jw.org nisqanpi)