51 YACHACHIKUY
Rimayninchikqa sumaqyá kachun
Jehova Diosqa rimaqtam unanchawarqanchik, chaymi munan sumaq simiyuq kananchikta (leey Santiago 1:26). Ichaqa, ¿imaynatam rimasqanchikwan Jehova Diosta kusichichwan?
1. ¿Imayna simiyuqtaq kananchik Diosta kusichinapaq?
Diosmi niwanchik: “Hinallayá kallpanchanakuychik hinaspa yanapanakuychik”, nispa (1 Tesalonicenses 5:11). Ichapas pipas llakisqa kachkan. Chayna kaptinqa, ¿imaynatam sunqunta tiyaykachiwaq? Allinmi kanman anchata kuyasqaykimanta niykuyniki. Ichapas niwaq imatapas allin ruwasqanmanta. ¿Bibliapi mayqin textotataq leeykapuwaq sunqunta tiyaykachinaykipaq? Achkam kachkan akllanaykipaqqa. Llampu simillawan imapas nisqaykiqa anchatam yanapanqa. Chaymi piwanpas rimaspaqa kuyakuyllawan rimanayki (Proverbios 15:1).
2. ¿Imakuna rimaytaq mana allinchu?
Bibliam nin: “Amayá simikichikmantaqa mana allin rimaykunaqa lluqsichunchu”, nispa (leey Efesios 4:29). Chaywanqa nichkan hukkunata sientichinanchikrayku mana qacha simi hinaspa mana chiqnikuq kananchikmantam. Hinaspapas manam cuento qipiqa nitaq yanqamanta tumpakuqqa kananchikchu (leey Proverbios 16:28).
3. ¿Imataq yanapawachwan sumaq simiyuq kanapaq?
Rimasqanchikkunapim qawakun imayna runa kasqanchik (Lucas 6:45). Chaymi piensananchik imapas allin kaqkunapi. Chaykunam: Allin ruwaykuna, alabanapaq kaqkuna hinaspa kuyanapaq kaqkuna (Filipenses 4:8). Chaypaqqa imata qawanapaqpas, imata uyarinapaqpas, imapi pukllanapaqpas chaynataq amistadninchiktapas allintam akllakunanchik (Proverbios 13:20). Chaymantapas, manaraq rimachkaspam hukkuna imayna kananpi piensananchik. Bibliam nin: “Nanay simiwan rimaq runapa rimayninqa espada hina kuchukuqllañam, yachayniyuq runapa rimasqanmi ichaqa hampi hina sunqu tiyaykachiq”, nispa (Proverbios 12:18).
ASTAWAN YACHAYKUSUN
¿Imayna rimasqanchiktaq Jehova Diosta kusichin hinaspa runamasinchikta kallpanchan? Chaymantayá yachaykusun.
4. Yanqakunataqa ama rimaychu
Llapanchikmi yanqata rimaruspaqa qipataña pesapakunchik (Santiago 3:2). Leeychik Galatas 5:22, 23 hinaspa qatiqninmanta rimariychik:
Rimasqaykita controlanaykipaqqa, ¿imayna kanaykipaqtaq Jehova Diosta mañakuwaq? ¿Imaynatam chayqa yanapasunkiman?
Leeychik 1 Corintios 15:33 hinaspa qatiqninmanta rimariychik:
¿Pikunawan hukllawakuspataq, imakunata qawaspataq, imakunata uyarispataq hinaspa imakunapi pukllaspataq qacha simi rikuriruwaq?
¿Imamantataq kanqa imayna rimasqanchik?
Leeychik Eclesiastes 3:1, 7 hinaspa qatiqninmanta rimariychik:
¿Ima kaptintaq upallaykuna hinaspa rimana kaptinña rimana?
5. Runamasinchikmantaqa allintayá rimasun
¿Imakunataq yanapawachwan hukkunata mana sientirachinapaq? VIDEOTA qawaykuychik hinaspa qatiqninmanta rimariychik:
¿Imanasqataq iñiqmasinchikqa manaña munarqachu hukkunamanta mana allin rimayta?
¿Imatam chaypaq ruwarqa?
Leeychik Eclesiastes 7:16 hinaspa qatiqninmanta rimariychik:
¿Imatam yuyarinanchik pimantapas mana allinta rimayta munaspaqa?
Leeychik Eclesiastes 7:21, 22 hinaspa qatiqninmanta rimariychik:
Pipas qanmanta rimakusuptikiqa, ¿yanapasunkimanchu kaypi leesqanchik paymanta mana rimanaykipaq?
6. Ayllunchikwanqa amayá nanay simiqa kasunchu
Jehova Diosqa munan ayllunchikkunata kuyakuyllawan rimapayananchiktam. VIDEOTA qawaykuychik hinaspa qatiqninmanta rimariychik:
¿Imataq yanapasunkiman aylluykita kuyakuyllawan rimapayanaykipaq?
Leeychik Efesios 4:31, 32 hinaspa qatiqninmanta rimariychik:
¿Imaynam rimasqanchik kanan wasinchikpi hawka kawsakunapaq?
Jehova Diosqa churin Jesus kuyasqantam niq. Leeychik Mateo 17:5 hinaspa qatiqninmanta rimariychik:
¿Imaynatataq Jehova Diosta qatipakuwaq aylluykiwan rimaspayki?
Pipas allinta ruwaruptinqa kallpanchaykuy.
WAKIN RUNAKUNAM NINKU: “Hina chayna rimakuqmi kani, pitapas imataq qukun”, nispa.
¿Chaynatachu qampas ninki? ¿Imanasqa?
YUYARIYKUSUN
Rimasqanchikwanmi pitapas sientirachichwan utaq sunqunta tiyaykachichwan. Chaymi manaraq imatapas rimachkaspa allinta piensarinanchik.
¿Ima niwaqtaq?
¿Imaynatataq rimasqanchikwan pitapas yanapachwan?
¿Imakuna rimaytaq mana allinchu?
¿Imataq yanapawasun allinllata hinaspa kuyakuyllawan rimanapaq?
ASTAWAN YACHANAYKIPAQ
¿Imataq yanapawasun rimasqanchik allin kananpaq? Chaymanta kay videopi qawaykuy.
Yachaykuy qacha simi mana kanaykipaq ima yanapasunaykimanta.
“¿Imanasqataq qacha simi kayqa mana allinchu?” (Tarinkim jw.org nisqanpi)
Qawaykuy mana cuento qipi kanaykipaq ima yanapasunaykimanta.
Yachaykuy qacha rimayninta huk runa imayna saqisqanmanta.
“Hamuq punchawpi imayna kawsakunaymantam yuyaymanayta qallaykurqani” (Tarinkim jw.org nisqanpi)