“Angelkunaqa Dios serviq espiritukunam”

“Angelkunaqa Dios serviq espiritukunam, paykunaqa salvakunankupaq kaqkunata servinankupaqmi kachamusqa kachkanku.” (HEB. 1:14.)

 1. ¿Imanasqam kallpanchawanchik Mateo 18:10 hinaspa Hebreos 1:14?

QATIQNINKUNATA ama pipas urmachinanpaqmi Jesus nirqa: “Kayna uchuychakunataqa amam hukllatapas despreciankichikchu. Hanaq pachapiqa paykuna cuidaq angelkunam tukuy tiempo Taytaypa qayllanpi kachkan”, nispa (Mat. 18:10). Pablopas qellqarqam: “Angelkunaqa Dios serviq espiritukunam, paykunaqa salvakunankupaq kaqkunata servinankupaqmi kachamusqa kachkanku”, nispa (Heb. 1:14). Chayna nisqankuqa kallpanchawanchikmi, Diosmi angelkunawan yanapawanchik. ¿Imatawanmi Bibliaqa yachachin angelkunamanta? ¿Imaynatam yanapawanchik? ¿Imatam ejemplonkumanta yachachwan?

2, 3. Willamuy angelkuna ima rurayniyoq kasqankumanta.

² Diospaqqa kanmi ‘kamachisqan ruraq’ hinaspa ‘kallpasapa’ millonnintin angelkuna (Sal. 103:20; leey Apocalipsis 5:11). Imayna kasqankupiqa manam chaynallachu kanku, ichaqa libre hinaspa Taytanku hina sumaq kayniyoqmi kanku. Sapakamam rurayniyoq kanku. Puntataqa kachkan angelkunata kamachiq Miguelmi, kayqa cielopi kaptin Jesuspa sutinmi (Dan. 10:13; Jud. 9). Payqa ‘Simim’ otaq Diosmanta willakuqmi, ‘karqañam llapa imakunapas manaraq unanchasqa kachkaptin’; paywanmi Diosqa tukuy imata unancharqa (Juan 1:1-3; Col. 1:15-17).

³ Miguelmantam qatichkan serafin sutiyoqkuna, Diospa chuya kasqantam qawachinku hinaspa Paypa munasqanman hina kawsanankupaq llaqtanta yanapanku. Chaymantam kachkan querubin sutiyoqkuna, Diospa Llapallan Kamachiq kasqantam yanapanku (Gen. 3:24; Isa. 6:1-3, 6, 7). Wakin angelkunañataq huk rurayniyoq kanku (Heb. 12:22, 23).

 4. a) ¿Imaynam angelkuna tarikurqaku kay Pachata Dios unanchaptin? b) ¿Imaynam tarikunmanku karqa Adanwan Eva libre kasqankuta allinta servichikuspankuqa?

⁴ Angelkunaqa kusikurqakum kay Pachata Dios unanchaptin hinaspa runakuna chaypi yachanankupaq allichaptin, paykunaqa kusikuywanmi rurayninkuta rurarqaku (Job 38:4, 7). Jehová Diosqa ‘runatam rurarqa angelkunamantapas tumpa menosta’, ichaqa Diosman rikchakuq kasqankuraykum Pay hina sumaq kayniyoq kanku (Heb. 2:7; Gen. 1:26). Adanwan Eva libre kasqankuta allinta servichikuspankuqa, Diospa ayllun hinam wawa-churintin sumaq huertapi kawsanmanku karqa.

5, 6. ¿Imatam hanaq pachapi huknin angel rurarqa, hinaptin imatam Dios tantearurqa?

⁵ Kasukuq angelkunapiqa manachá hawkayayqa karqachu Diospa familian ukupi huknin angel mana kasukuptinqa. Paymi mana contentasqa kaspan Dios yupaychayta manaña munarqachu, aswanqa payta adoranankutañam munarqa. Kay munaysapa angelqa Diospa kamachikunanpaq derechoyoq kasqanta iskayrayachiyta munaspanmi huk gobiernota hatarichiyta munarqa. Chaynapim rikurirurqa Satanaspi, kay sutiqa “Contrapi churakuq” ninanmi. Qallariypi llullakusqanwanmi Adantawan Evata engañarurqa, kuyakuq Diospa contranpi paywan kuska hatarinankupaq (Gen. 3:4, 5; Juan 8:44).

⁶ Diosqa chayllam Satanasta sentenciarqa kaynata nispan: “¡Warmitawan qamtam cheqninachisqayki, cheqninachisaqtaqmi miraynikitawan miraynintapas! Mirayninmi umaykita chamchasunki, qamñataqmi talonninpi kachunki” (Gen. 3:15). Kay punta willakuypa nisqanman hinaqa cheqninakunmankum karqa Satanaswan ‘warmiqa’. Chay ‘warmiqa’ llapallan kasukuq angelkunam, paykunaqa Diospa llumpay kuyasqan señoran hinam. Chay punta willakuy “pakasqa” kaspapas tiempopa risqanman hinam entiendekunan karqa, ichaqa Diospa nisqanmi hamuq tiempopaq sumaq suyakuyta qawachirqa. Diosmi tantearurqa contranpi hatariqkunata huknin angelninwan chinkachinanpaq hinaspa kay pachapi chaynataq hanaq pachapi kaqkunata huñunanpaqpas (Efe. 1:8-10).

 7. ¿Imatam rurarqaku wakin angelkuna Noeypa tiemponpi, hinaptin imatam paykunata Jehová Dios rurarqa?

⁷ Noeypa tiemponpim, wakin angelkuna ‘yachananku sitiota’ saqeruspanku kikinkupa munasqallanta kay Allpapi ruranankupaq runa hina cuerpoyoq rikurirurqaku (Jud. 6; Gen. 6:1-4). Paykunatam Jehová Diosqa castigarqa tutayaypi hina kanankupaq. Chaymi Pablopa nisqanman hina ‘mana allin espiritukunapi’ hinaspa Diosta serviqkunapa enemigonpi Satanaswan kuska rikurirunku (Efe. 6:11-13; 2 Ped. 2:4).

¿Imaynatam angelkuna yanapawanchik?

8, 9. ¿Imaynatam Diosqa serviqninkunata yanaparqa angelninkunawan?

⁸ Angelkunaqa Diosta serviqkunatam yanaparqa: Abrahanta, Jacobta, Moisesta, Josueyta, Isaiasta, Danielta, Pedrota, Juanta, Pablota hinaspa Jesustapas. Chaymantapas, Diosmantam willakuqku, castigonta ruraqku hinaspa Diospa kamachikuyninkunatapas willaqku (2 Rey. 19:35; Dan. 10:5, 11, 14; Hech. 7:53; Apo. 1:1). Kunanqa munasqanta willananpaqqa Diosqa manañachusmi angelkunata servichikunchu Biblia kasqanrayku (2 Tim. 3:16, 17). Mana rikuyta atiptinchikpas hinallam Diospa munayninta rurachkanku hinaspa serviqninkunatapas yanapachkanku.

⁹ Bibliaqa ninmi Dios respetaqta angelkuna harkasqanta hinaspa salvasqantapas (Sal. 34:7; 91:11). Satanasqa Diosta serviqkunatam nichkan mana kasukunanchikta, chaymi Diosqa saqen imawanpas pruebasqa kananchikta (Luc. 21:16-19). Diosmi ichaqa yachan maykama pruebasqa kananchikta, yachantaqmi kasukuyninchik haykapi allin qawachisqa kasqantapas (leey 1 Corintios 10:13). Angelkunaqa listom kachkanku Dios kamachiptin yanapawananchikpaq. Salvarqakum Sadracta, Mesacta, Abednegota, Danielta hinaspa Pedrotapas. Ichaqa, manam harkarqachu Estebantawan Santiagota enemigonku wañuchinantaqa (Dan. 3:17, 18, 28; 6:22; Hech. 7:59, 60; 12:1-3, 7, 11). ¿Imanasqa? Imayna tarikusqankuwan imanasqa ñakarichisqa kasqankum mana chaynallachu karqa. Chaynataq, Alemania nacionpi presochasqa kaspa sasa llamkaypi kaqkunata yaqa llapankuta Dios libraptinpas, wakinkuqa wañuchisqam karqaku.

10. Angelkunata servichikuspanpas, ¿imatawanmi Diosqa ruranman yanapawananchikpaq?

¹⁰ Bibliaqa manam ninchu sapakamata cuidawananchikpaq huk angel kasqantaqa. Ichaqa niwanchikmi munasqanman hina Diosta sapa kuti mañakuptinchikqa uyariwasqanchikta (1 Juan 5:14). Pay munaspanqa huk angelnintam kachamunman yanapawananchikpaq, ichaqa manam chaynallatachu Diosqa yanapawanchikman. Ejemplopaq, huk iñiqmasinchiktam kallpanchanman yanapawananchikpaq otaq consuelawananchikpaq. Yachaytapas qoykuwachwanmi otaq yanapawachwanmi “Satanaspa kachamusqan” hina tipawaqninchik ‘kichkata’ otaq ñakariykunata aguantanapaq (2 Cor. 12:7-10; 1 Tes. 5:14).

Jesuspa ejemplonmanta

11. a) ¿Imaynatam Jesusta angelkuna yanaparqaku? b) ¿Imatam Jesus qawachirqa vidanta qospan?

¹¹ Qawasunyá imaynatam angelkunata Dios servichikurqa kay Pachaman Jesus hamuptin. Paykunaqa Jesustam yanaparqaku, willarqakutaqmi nacesqanmantawan kawsarimusqanmantapas. Hukninmi kallpancharqa manaraq presochasqa kachkaptin. Ichaqa manam harkarqachu presochaspa wañuchinankutaqa (Mat. 28:5, 6; Luc. 2:8-11; 22:43). ¿Imanasqa? Diospa munayninman hinaqa Jesusmi vidanta qonan karqa, chaynatam qawachirqa cabal runaqa imawanña pruebasqa kaspapas kasukuy atisqanta. Chaymi Diosqa kawsarichispan hanaq pachapi qorqa wiñay kawsayta chaynataq ‘tukuy atiytapas’, paytam angelkunapas kasukunku (Mat. 28:18; Hech. 2:32; 1 Ped. 3:22). Chaynatam, ‘warmipa’ punta kaq ‘miraynin’ Jesus kasqan qawachisqa karqa (Gen. 3:15; Gal. 3:16).

12. ¿Imaynatam Jesus hina allin piensaq kachwan?

¹² Jesusqa yacharqam Jehová Diosta mana pruebaman churananta, chaymi vidanta peligropi mana churaqchu angelkuna yanapananta suyaspanqa (leey Mateo 4:5-7). Ñoqanchikpas kallpanchakunanchikmi Jesus hina ‘allin piensaq’ kanapaq. Qatikachasqa kaspa Diospi confiaspanchikpas, manam vidanchiktaqa peligropi churanachu (Tito 2:12).

¿Imakunatam yachachwan kasukuq angelkunamanta?

13. ¿Imatam angelkunamanta yachachiwanchik 2 Pedro 2:9-11, hinaspa imaynatam ejemplonkuta qatipakuchwan?

¹³ Hanaq pachaman riqkunata ‘insultaq’ runakunata corregispanmi, Pedroqa angelkunapa sumaq ejemplonmanta rimarqa. Paykunaqa atiyniyoq kachkaspankupas humildem kanku, manam pitapas yanqaqa tumpankuchu Jehová Diosta respetasqankurayku (leey 2 Pedro 2:9-11). Chaynaqa, amayá pitapas juzgasunchu, respetasuntaq congregacionpi punta apaqkunata hinaspa ima kaptinpas Tukuy Atiyniyoq Juez Jehová Diospa makinpi saqesun (Rom. 12:18, 19; Heb. 13:17).

14. ¿Ima ejemplotam angelkuna qowanchik humilde kanapaq?

¹⁴ Qawasunyá imakunapiwan angelkuna humilde kasqankuta. Wakinkuqa sutinta tapuptinkum mana willakurqakuchu (Gen. 32:29; Jue. 13:17, 18). Millonnintin angelkuna cielopi kaptinkupas, Bibliaqa iskaypa sutillantam willawanchik: Miguelmantawan Gabrielmanta. Chaynapim paykunataqa mana hatunchanchikchu (Luc. 1:26; Apo. 12:7). Angelta apostol Juan yupaychayta munaptinmi angelñataq nirqa: “Ama qonqorakuychu ñoqaqa qampapas, wawqe-panikikunapapas [. . .] serviqmasillanmi kani”, nispa (Apo. 22:8, 9). Ñoqanchikpas Diosllatam yupaychana hinaspa mañakunapas (leey Mateo 4:8-10).

15. ¿Imaynatam angelkuna qawachinku pacienciakuq kasqankuta?

¹⁵ Angelkunaqa pacienciakuqtaqmi kanku. Bibliapa nisqanman hinaqa ‘yachaykuytam munanku’ Diosmanta pakasqa yachaykunata (1 Ped. 1:12). Chayna kaptinpas, Diosmanta pakasqa wakin yachachikuykunataqa manaraqmi yachankuchu. ¿Imaynam chaywan tarikunku? Pacienciawanmi suyanku mana ‘haypay atina yachayninta’ llaqtanwan Dios willananta (Efe. 3:10, 11).

16. ¿Imaynatam portakuyninchik angelkunata yanapan?

¹⁶ Bibliaqa willawanchikmi sasachakuypi tarikuq cristianokunaqa angelkunapa qawananpaq ‘churasqa kasqankuta’ (1 Cor. 4:9). Paykunaqa qawamunkum imayna portakusqanchikta hinaspa anchatam kusikunku Diosta kasukuptinchikqa. Kusikunkitaqmi pipas huchanmanta wanakuqtinqa (Luc. 15:10). Cristianakunapa rurasqankutapas qawachkankum. Bibliam nin: ‘Warmiqa umantam tapakunan qariman sujetasqa kasqanta angelkunamanpas qawachinanpaq’, nispa (1 Cor. 11:3, 10). Arí, angelkunaqa kusikunkum Diosta serviqkunapa kasukusqankuta qawaspanku. Kasukusqanchikmi paykunapaqpas ejemplo.

Diosmanta willaypipas angelkunaqa yanapankum

17, 18. ¿Imaynatam yachanchik predicaptinchik angelkuna yanapawasqanchikta?

¹⁷ ‘Señorpa punchawninpi’ tukuy ima sucedekusqanpim angelkunaqa achka rurayniyoq kanku. Ejemplopaq, 1914 watapi Diospa Reinon munaychakuyta qallaykuptin hinaspa Satanastawan angelninkunata ‘Miguel angelninkunapiwan’ hanaq pachamanta wischumuptinkupas (Apo. 1:10; 11:15; 12:5-9). Juanmi rikurqa ‘huk angelta cielopa chawpinta pawachkaqta, paymi wiñaypaq kaq allin noticiata apachkasqa kay pachapi llapallan nacionkunaman’. Angelmi kaynata nin: “Diostayá manchakuywan alabaychik, juzganan horam chayaramunña, cielokunatapas kay pachatapas, lamar qochatapas hinaspa pukyukunatapas unanchaqtayá adoraychik”, nispa (Apo. 14:6, 7). Satanasmi piñasqallaña harkakuchkan Diospa Gobiernonmanta willasqanchikta, ichaqa segurom kananchik angelkuna yanapawasqanchikta (Apo. 12:13, 17).

¹⁸ Angelkunaqa manañam Felipeta hina rimapayaspaqa allin sonqoyoq runakunamanqa pusawasunchu, paytam yanaparqa Etiopia nacionpi kamachikuq runaman asuykunanpaq (Hech. 8:26-29). Paykunata mana rikuyta atiptinchikpas achka experienciakunam qawachin predicaptinchik hinaspa ‘wiñay kawsaypaq [. . .] kaqkunata’ tarinanchikpaq yanapawasqanchikta (Hech. 13:48).a Ñoqanchikpas kallpanchakunanchikmi sapa kuti predicanapaq hinaspa ‘espirituwan’ chaynataq ‘cheqapwan’ Dios yupaychay munaqkunata maskanapaqpas (Juan 4:23, 24).

19, 20. Tukupay tiempopi tukuy ima sucedekusqanpi, ¿imakunam angelkunapa rurayninku?

¹⁹ Tukupay tiempomanta rimaspanmi Jesusqa nirqa angelkuna ‘mana allin runakunata justo runakunamanta rakinanta’ (Mat. 13:37-43, 49). Paykunaqa hanaq pachaman riy suyaqkunatam huñunku hinaspa akllanku (leey Mateo 24:31; Apo. 7:1-3). Chaynataq, “cabrakunamanta ovejakunata” Jesus rakiptinmi yanapanqaku (Mat. 25:31-33, 46).

²⁰ ‘Jesucristo hanaq pachamanta atiy qosqan angelninkunawan’ rikurimuptinmi, ‘Dios mana reqsiqkunawan [. . .] Jesusmanta allin noticia mana kasukuqkuna’ puchukachisqa kanqaku (2 Tes. 1:6-10). Revelacionninpim apostol Juanpas chayna sucedenanmanta qawarqa. Rikurqam Jesusta hinaspa hanaq pachapi kaq tropakunata guerrapaq yuraq caballokunapi listo kasqankuta (Apo. 19:11-14).

21. ¿Imatam ruranqa Satanastawan demonionkunata Miguel sutiyoq angel?

²¹ Juanqa rikurqataqmi “huk angelta hanaq pachamanta uraykamuchkaqta, payqa uraykamuchkasqa uku pachapa [otaq qaqapa] llaventawan hatun cadenata aparikuspanmi”. Payqa angelkuna kamachiq Miguelmi, paymi Diablotawan demoniokunata presochanqa. Cristopa Kamachisqan Waranqa wata tukuyninpim pisi tiempolla kacharisqa kanqaku, chaypim cabal runakunaqa pruebasqa kanqaku. Chaymantam Satanaspiwan mana kasukuqkunapas chinkachisqa kanqaku (Apo. 20:1-3, 7-10; 1 Juan 3:8). Hinaptinmi, ¡Diospa contranpi hatariqkunaqa tukurunqaku!

22. a) Hamuq tiempopiqa, ¿ima rurayniyoqmi angelkunaqa kanqaku? b) ¿Imaynam tarikunchik paykunapa rurasqankupi piensaspa?

²² Pisi tiempollamantañam Satanaspa munaychakusqan mana allinkunaqa chinkachisqa kanqa, ñoqanchikñataq salvasqa kasunchik. Angelkunaqa achka rurayniyoqmi kanqaku, Jehová Diospa Llapallan Kamachiq kasqan hatunchasqa kananpaq hinaspa Allpapaqwan runakunapaq munaynin rurakunanpaqpas. “Angelkunaqa Dios serviq espiritukunam, paykunaqa salvakunankupaq kaqkunata servinankupaqmi kachamusqa kachkanku”. ¡Maynatam Diosta agradecekunchik angelninkunata servichikuspan munayninta ruranapaq hinaspa wiñay kawsayta tarinapaq yanapawasqanchikmanta!

[Willakuy]

¿Imatam niwaq?

• ¿Ima rurayniyoqtaq angelkunaqa kanku?

• ¿Imatam rurarqaku wakin angelkuna Noeypa tiemponpi?

• ¿Imaynatam angelkunata Dios servichikun yanapawananchikpaq?

• ¿Imatam kunan tiempopiqa angelkuna ruranku?

[21 kaq paginapi dibujo]

Kusikunkum Diospa munayninta ruraspa

[23 kaq paginapi dibujo]

Danielpa pasasqanpi hinam, angelkunaqa kachkanku Diospa munasqanman hina ruranankupaq

[24 kaq paginapi dibujokuna]

Angelkunaqa predicacionpim yanapawachkanchik, ama manchakusunchu

[Reqsikunchikmi]

Kay pacha: NASAPA foto horqosqan