Jesustayá allintapuni qatipakusun

1, 2. ¿Imawanmi rikchanachichwan Jesusta qatipakunapaq Pedropa qillqasqanta?

ACHKA runakunapiwan sasa purina ritillaña urqunta richkachwan, ñawpaqninchiktañataq richkanman chay sitiota riqsiq runa, chaynapi maymi risqanta rinanchikpaq. Pusawaqninchik saqiruwaptinchikpas manam mancharikuchwanchu, yupinta qawaspanchikmi riqmasinchikkunapiwan qatichwan.

² Ñuqanchikpas sasa purina ñanninta richkaq hinam mana allin runakunapa chawpinpi kawsakuchkanchik, ichaqa manam manchakunchikchu. Jehova Diosmi churin Jesusta churaykun pusawananchikpaq (1 Ped. 2:21). Pedropa nisqanman hinam Jesuspa yupinta qatinanchik maymi sarusqanman saruspa. ¿Ima ninantaq chayqa? ¿Imanasqataq Jesusta qatinanchik? ¿Imaynatam qatichwan? Kay yachachikuypim chaymanta yachasun.

 3. ¿Ima ninantaq pipapas yupinta qatiyqa?

³ Bibliapi “puriy” nispanqa rimachkan kawsakuyninchikpi imakuna ruwasqanchikmantam (Gen. 6:9; Prov. 4:26). Chaynaqa, pipapas yupinta qatiyqa imayna kawsakusqanta qatipakuymi.

 4. ¿Imatam Pedro nichkarqa ‘Jesuspa yupintam qatina’ nispanqa?

⁴ ¿Imatam Pedro nichkarqa ‘Jesuspa yupintam qatina’ nispanqa? Jesusta qatipakunanchikmantam. Pedropa qillqasqanman hinam imaña-haykaña kaptinpas Diosman sunqu kananchik (1 Ped. 2:18-25). Ichaqa manamá chayllapichu Jesustaqa qatipakuchwan. Qatipakuchwantaqmi kay allpa pachapi kachkaspan tukuy ima nisqantapas chaynataq tukuy ima ruwasqantapas.

 5. ¿Pantaq kaspanchikpas atichwanchu Jesusta qatipakuyta?

⁵ ¿Pantaq kaspanchikpas atichwanchu Jesusta qatipakuyta? Arí, atichwanmi. Pedroqa manam nirqa Jesus hinapuni kanapaqchu, aswanqa payta allintapuni qatipakunapaqmi. Arí, kallpanchakuspaqa Jesuspa kawsakusqanman hinam kawsakusun (1 Juan 2:6).

6, 7. ¿Imanasqataq Jesusta qatipakuspaqa Jehova Diosman astawan asuykusun?

⁶ Jesusta qatipakuspaqa Jehova Diosmanmi astawan asuykusun. Jesusqa taytanpa munasqanman hina kawsakuspanmi paypa sunqunta kusichirqa (Juan 8:29). Ñuqanchikpas Jesusta qatipakuspaqa Jehova Diospa sunquntam kusichisun. Manamá iskayrayanchikchu paypa munasqanman hina kawsakuptinchik asuykamuwananchikmantaqa (Sant. 4:8).

⁷ Chaymantapas, Jesusqa taytantam allintapuni qatipakurqa, chaymi nirqa: “Ñuqata rikuwaqniyqa taytaytapas rikurunñam”, nispa (Juan 14:9). Jesusqa kuyakuq hinaspa llakipayakuq kaspanmi leprawan unquqta sanoyaykachirqa, unay wataña unquq warmita hampiykurqa chaynataq wañukuq runakunapa aylluntapas sunqunkuta tiyaykachirqa. Jesuspa chayna kasqanta qatipakuspaqa taytantapas qatipakuchkanchikmi (Mar. 1:40, 41; 5:25-34; Juan 11:33-35). Chayta ruwaspaqa Diosmanmi astawan asuykusun.

 8. Jesusta qatipakuyqa, ¿imaynatam yanapawasun mana imawanpas harkachikunapaq?

⁸ Jesusta qatipakuspaqa mana imawanpas harkachikuspam Diospa munayninta ruwasun. Jesusmi manaraq wañukuchkaspan nirqa: “Ñuqaqa kay pachatam venceruniña”, nispa (Juan 16:33). Chaynataqa nirqa kay pachapi runakuna hina mana kawsakusqanraykum. Manam paykunapa ruwasqankuwanqa utaq rimasqankuwanqa aysachikurqachu. Jesusqa kay pachamanqa hamurqa taytanpa sutinta chuyanchananpaqmi, chayman hina kawsakunanpaqmi kallpanchakurqa. Ñuqanchikpas Jesus hinam mana imawanpas harkachikuspa Diospa munayninta imamantapas puntataqa ruwananchik (1 Juan 5:5).

 9. ¿Imatam ruwananchik wiñaypaq kawsakunapaqqa?

⁹ Jesusta qatipakuspaqa wiñaypaqmi kawsakusun. Apu runam Jesusta tapurqa: “Yachachikuq, ¿ima allintataq ruwanay wiñay kawsayta chaskinaypaq?”, nispa. Jesusñataqmi nirqa: ‘Qatiqniyyá kay’, nispa (Mat. 19:16-21). Chaymantapas, Diospa akllasqan kasqanmanta iskayrayaq judiokunatam Jesus nirqa: ‘Ovejaykunaqa [...] qatiwanmi. Ñuqam wiñay kawsayta paykunaman quni’, nispa (Juan 10:24-29). Jesusqa Nicodemotapas nirqam paypi iñiqkunaqa wiñaypaq kawsanankumanta (Juan 3:16). Jesuspi iñispaqa yachachisqantam kasukusun, qatipakusuntaqmi imayna kawsakusqantapas. Chayta ruwaspaqa wiñay kawsayman apaq ñanpim hinalla kasun (Mat. 7:14).

10. ¿Imatam ruwananchik Jesusta allinta riqsinanchikpaq? Rimarimuytaq Juan 17:3 nisqanmantapas.

¹⁰ Jesusta allintapuni qatipakunapaqqa allintaraqmi riqsinanchik (qaway Juan 17:3). Chaypaqqa imayna sunquyuq kasqanmanta, imayna piensasqanmanta hinaspa kamachikuyninkunamantam hinalla yachananchik. Chayllaraq utaq unayña Jehova Diosmanta yachaspanchikpas paymantawan churin Jesusmanta yachananchikpaqmi kallpanchakunanchik.

11. ¿Imakunamantam willawanchik Mateo, Marcos, Lucas hinaspa Juan qillqakuna?

¹¹ Jehova Diosqa kuyawaspanchikmi churin Jesusta allinta riqsinanchikpaq yanapawanchik. Chaypaqmi qillqachirqa Mateo, Marcos, Lucas hinaspa Juan qillqakunata. Chaypim willawanchik Jesuspa yachachisqanmantawan imakuna ruwasqanmanta. Yanapawanchiktaqmi Jesuspi allinta yuyaymananapaqpas (Heb. 12:3). Chay qillqakunata ñawinchaspanchikqa Jesusta allintapuni riqsispanchikmi qatipakusun.

12. ¿Imatam ruwananchik Jesusmanta rimaq tawa qillqakunamanta allinta yachanapaq?

¹² Jesusmanta rimaq qillqakunataqa manam leeyllachu-leenanchik, aswanqa tiempochakunanchikmi sumaqta estudianapaq hinaspa yuyaymananapaq (tupachiy Josuey 1:8 nisqanwan). Yachaykusunchik chay qillqakunata leespa yuyaymananapaq imakuna yanapawananchikmanta, chaynapi yachasqanchikta kasukunapaq.

13. ¿Imaynatam Jesusmanta rimaq qillqakunata allinta entiendechwan?

¹³ Chaypi kasqanchikta piensasun. Jesusmanta leespaqa imayna tarikusqanpi, imakuna rikusqanpi hinaspa maypi kasqanpim piensarinanchik. Chaypaqqa qillqanchikkunapim maskachwan chaypi yachaqkunamanta, chay lawpi sitiokunamanta hinaspa chay tiempopi imakuna pasakusqanmanta. Chaymantapas, leesqanchikmanta huknin qillqapi rikuriptinqa chaywanmi tupachichwan, chaynapi allinta yachananchikpaq.

14, 15. ¿Imatam ruwananchik ñawinchasqanchikpi yachasqanchikta kasukunapaq?

¹⁴ Yachasqanchikta kasukusun (Juan 13:17). Chay qillqakunapi ima yachachikuymantapas leeruspam tapukuchwan: “¿Imatam yachachiwan? ¿Imaynatam kay yachasqaywan hukkunata yanapayman?”, nispa. Chaymantam pi yanapananchikpi piensaruspa ima yacharusqanchikmanta kuyakuywan willaykuchwan.

¹⁵ Qatiqninpiyá yachaykusun templopi Jesuspa rikusqan wakcha viudamanta. Chaymanta ñawinchaspanchikyá chaypi kasqanchikta piensasun hinaspa yachasqanchikta kasukusun.

16. ¿Imatam willawanchik Marcos 12:41?

¹⁶ Chaypi kasqanchikta piensasun (qaway Marcos 12:41). Jesusmi kimsa punchawllaña wañukunanpaq faltachkaptin templopi Diosmanta yachachichkarqa. Chay punchawmi religionkunapi punta apaqkuna pantarachiyta munarqaku. Wakinkunañataqmi tapurqaku ima derechonwan hinaspa pipa kamachisqan imatapas ruwasqanmanta (Mar. 11:27-33; 12:13-34). Chaymantam Jesusqa qullqi churananku cajakunapa chimpanpi tiyaykurqa, hinaspanmi runakunapa qullqi churasqankuta qawarqa. Apukunaqa achkatam churarqaku. Yaqapaschá Jesusqa uyarirqa churaptinku qullqipa wichisqanta.

17. ¿Imatam Marcos 12:42 nisqan willawanchik wakcha viudamanta?

¹⁷ (Qaway Marcos 12:42). Chaymantam Jesus rikururqa wakcha viudata (Luc. 21:2). Chay viudapaqqa sasamá karqa qullqi tariyqa, chaywanpas qullqi churananku cajaman asuykuspanmi iskay qullqichata churaykurqa. Jesusqa yacharqam chay churasqanqa mana ancha valorniyuq lepton sutiyuq qullqichakuna kasqanta. Manam chay qullqichaqa chulla pichinkuchata rantinallapaqpas haypaqchu. Yaqa lliw runam pichinkuchataqa rantiyta atiq mana ancha qullqillapaq kasqanrayku.

18. Marcos 12:43, 44 nisqanman hinaqa, ¿imatam Jesus nirqa wakcha viudapa qullqi churasqanmanta?

¹⁸ (Qaway Marcos 12:43, 44). Jesusqa chay viudapa qullqi churasqanta qawaspanmi qatiqninkunata qayaykuspan nirqa: “Kay viudam wakcha kachkaspanpas aswan achkataraq churaykun llapallan qullqi churaqkunamantapas”, nispa. Nirqataqmi: “Llapallankum puchuqllankutaña churaykunku, paymi ichaqa wakcha kachkaspanpas lliw kaqninta churaykun, kawsananpaq kaqtam llapallanta quykun”, nispa. Wakcha viudaqa manam iskayrayarqachu Jehova Dios yanapananmantaqa, chaymi qullqichantapas llapallanta quykurqa (Sal. 26:3).

19. ¿Imatam yachachwan Jesuspa nisqan wakcha viudamanta?

¹⁹ Yachasqanchikta kasukusun. Jesuspa nisqan wakcha viudamanta ñawincharuspam tapukuchwan: “¿Imatam yachayman?”, nispa. Yuyaymanasun wakcha viudapi. Atispanqa achka qullqitachá Jehova Diospaq churanman karqa, chaywanpas sunqumantam lliw kapuqninta churaykurqa. Jesusqa yacharqam chay churasqanwan taytan anchata kusikusqanta. Kaywanmi yachanchik Jehova Diosqa tukuy sunqunchikwan hinaspa tukuy kallpanchikwan servinanchikta munasqanta (Mat. 22:37; Col. 3:23). Payqa anchatamá kusikun willakunanchikpaq hinaspa huñunakuykunaman rinanchikpaq kallpanchakuptinchikqa.

20. ¿Imaynatam wakcha viudamanta yachasqanchikwan hukkunata yanapachwan?

²⁰ ¿Imaynatam wakcha viudamanta yachasqanchikwan hukkunata yanapachwan? Iñiqmasinchikkunatam yuyariykachichwan imapas ruwasqankuwan Jehova Dios kusikusqanta. Ichapas yuyaq iñiqmasinchikkuna hukmanyasqa tarikunku ñawpaqpi hina manaña Diospaq imatapas ruwaspanku. Yaqapaschá mayqan iñiqmasinchikpas unqusqanrayku huñunakuykunaman mana rispan hukmanyasqa tarikun. Paykunatam kallpanchaykuchwan wakcha viudamanta ima yacharusqanchikta willaykuspa (Efes. 4:29). Paymanta willaykuptinchikqa manam iskayrayanqakuchu tukuy ruwasqankuwan Jehova Dios kusikusqanmantaqa (Prov. 15:23; 1 Tes. 5:11). Jesusta qatipakuspaqa iñiqmasinchikkunatam alabaykusun tukuy sunqunkuwan Diosta servisqankumanta.

21. Kaypi yachasqanchikman hinaqa, ¿imatam sapakama ruwachwan?

²¹ Anchatamá kusikunchik bibliapi Jesusmanta willawasqanchikwan. Chaywanmi allintapuni Jesusta qatipakuchwan, chaymi allin kanman sapallanchikpas utaq ayllunchikwanpas Jesusmanta rimaq qillqakunamanta sumaqta yachaykuyninchik. Estudiaspaqa chaypi kasqanchiktam piensananchik hinaspam yachasqanchikta kasukunanchik. Kaypim yacharunchik Jesuspa ruwasqankunata imayna qatipakunamanta, qatiqninpiñataqmi yachasun qirupiña kachkaspan imakuna nisqanmanta.