Puchukay punchawmanta

“¡Kayllapiñam puchukay punchawqa!”, niq rimayta uyarispayki, ¿imapitaq piensanki? ¿Yaqachu piensanki iglesiapi biblianta hapikuykuspan qaparkachaq runapi? ¿Piensankichu kay allpa pacha ninawan utaq bombakunawan chinkachisqa kananmanta? Chaypi piensaspankum wakinkuqa manchakunku, wakinñataq mana kaqpaqpas hapinkuchu utaq asikunku.

Bibliapas kaynatam nin: “Kay tiempoqa tukunqam”, nispa (Mateo 24:14). Chaytaqa sutichantaqmi ‘Armagedonwan’ hinaspa ‘Diospa punchawninwan’ (Apocalipsis 16:14, 16). Religionniyuq kaqkunaqa tukuy imaymanatam chay punchawmanta rimanku, wakin rimasqankuqa manchakuypaqmi. Ichaqa bibliapa nisqanman hinaqa ¿imaynataq kanqa chay puchukay punchawqa? Bibliaqa allintam yachachiwanchik chay punchawpi ima pasananmanta chaynataq imaynata salvakunamantapas. Qatiqnin yachachikuypim qawasun bibliapa willakusqanman hina chay punchaw imayna kananmanta. Yachasuntaqmi imakuna puchukachisqa kananmantapas.

1. KAY PACHAQA MANAM NINAWANCHU KAÑASQA KANQA

   Bibliam nin: ‘[Diosmi] kay pachata maypi tiyananpaq unancharqa. Mana haykapipas suchurinanpaqmi chaynata takyachirqa’, nispa (Salmo 104:5). Bibliaqa willakunmi Diosqa kay pachata mana haykapipas chinkachinanmanta, nitaqmi saqinqachu pipas chinkachinantaqa (Eclesiastes 1:4; Isaias 45:18).

2. YACHAKUNÑAM HAYKAPI KANANMANTA

   Runakuna mana yachaptinkupas, bibliapa willakusqanman hinaqa Diosqa ñam tantearunña puchukay punchaw haykapi hinaspa imay hora kananmanta. Ninmi: ‘Ichaqa manam pipas yachanchu ima punchawmi utaq imay horam kutimunaytaqa, hanaq pachapi angelkunapas manam yachanchu nitaqmi Diospa churinpas yachanichu aswanqa taytallaymi. Chaynaqa qamkunayá cuidakuychik, Diosta mañakustinyá listolla suyawaychik haykapi kutimunaytapas mana yachasqaykichikrayku’nispa (Marcos 13:32, 33). Qawasqanchikman hinaqa Diosqa ñam tantearunña puchukay punchaw haykapi kananmanta.

3. MANAM RUNACHU PUCHUKAY PUNCHAWTAQA QALLARICHINQA

   ¿Pitaq puchukay punchawtaqa qallarichinqa? Bibliapi Apocalipsis librom nin: ‘Chaymantam rikurqani hanaq pacha kicharayachkaqta, chaypim rikurirurqa huk yuraq caballo, sillakuqninpa sutinmi kasqa confiakuna hinaspa chiqap [...]. Hinaptinmi manchakuypaq animalta rikururqani kay pachapi reykunatawan. Paykunaqa huñunasqa kachkasqa tropantinmi caballopi sillakuqpa contranpi hinaspa tropankunapa contranpi peleanankupaq’, nispa (Apocalipsis 19:11-21). Kaypi willakusqanqa tupanachiyllam. Ichaqa sutillatam musyakunchik Diosqa enemigonkunata wañuchinanpaq angelninkunata kamachinanmanta.

1. KAY PACHAPI KAMACHIQKUNA

   Bibliam nin: ‘Chay hamuq reykuna gobiernachkaptinmi hanaq pacha Dios hatarichinqa mana tuñichiy atina gobiernota chay gobiernoqa huk runamanqa manam qusqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiña-wiñaypaq’, nispa (Daniel 2:44). Qawamusqanchikman hinam ‘kay pachapi reykuna’ hukllawakunqaku ‘caballopi sillakuqpa contranpi hinaspa tropankunapa contranpi peleanankupaq’ (Apocalipsis 19:19). Ichaqa Diospa gobiernonmi utaq munaychakuyninmi paykunata puchukachinqa.

2. GUERRAKUNAWAN MANA ALLIN RUWAYKUNA

   Enteron pachapim ‘Diosqa guerrakunata tanichinqa’ (Salmo 46:9). Bibliam nin: ‘Diospa munasqanman hina kawsaqkunaqa kay pachapim yachanqaku. Mana culpayuq kaq runakunaqa kay pachapim hinalla takyanqaku. Mana allin ruwaqkunam ichaqa kay pachamanta chinkachisqa kanqaku’, nispa (Proverbios 2:21, 22). Nintaqmi: ‘[Diosmi] musuqyachinqa tukuy imata’, nispa (Apocalipsis 21:4, 5).

3. PANTAY RELIGIONKUNA

   Pantay religionkunamanta rimaspanmi biblia nin: ‘Ñuqamanta willakuqkunam llullallata rimanku. Sacerdotekunam munasqankuman hinalla gobiernanku [...]. Tukupay tiempo chayamuptinqa ¿imatataq ruwankichik?’, nispa (Jeremias 5:31). ¿Imataq pasanqa chayna religionkunawanqa? Jesusmi nirqa: “Juicio punchaw chayaramuptinqa achkallañam niwanqaku: ‘Señorlláy, Señorlláy, ñuqaykuqa qamraykum willakurqaniku, qamraykum demoniokunata qarqurqaniku, qamraykutaqmi achka milagrokunatapas ruwarqaniku’ nispa. Hinaptinmi nisaq: ‘Manam riqsikichikchu. ¡Qayllaymanta asuychik!’”, nispa (Mateo 7:21-23).

4. MANA ALLINKUNATA KUYAQ RUNAKUNA

   Jesucristom nirqa: “Juzgasqaqa kachkanku, kay pachaman achkiy hamuptinpas tutayaytaraq gustarusqankuraykum. Tutayaytaqa gustarurqaku pakasqallapi tukuy ima ruwasqanku mana allinlla kasqanraykum”, nispa (Juan 3:19). Noeypa tiemponpim Diosqa kay pachapi lliw mana allin runakunata chinkarachirqa. Bibliam nin: “Sinchi parawanmi kay pachaqa chinkachisqa karqa. Kunan kaq cielokunawan kay pachaqa, Diospa rimarisqanman hinam juicio punchawpi ninawan tukusqa kananpaq waqaychasqa kachkan, chaypitaqmi huchasapa runakunapas chinkachisqa kanqaku”, nispa (2 Pedro 3:5-7, CQ12).

Noeypa tiemponpi ‘kay pacha chinkachisqa’ kasqanqa tupanmi hichpaykamuq ‘juicio punchawwan’. Ichaqa Noeypa tiemponpiqa Diosqa manam kay pachatachu chinkachirqa aswanqa mana allin runakunatam. Hamuq tiempopipas mana allin runakunatam Diosqa chinkachinqa. Ichaqa Noeyta hinaspa wasinpi kaqkunata waqaychasqanman hinam Diosqa serviqninkunata waqaychanqa (Mateo 24:37-42).

¡Mayna kusisqachá kawsakusun tukuy mana allinkunata kay pachamanta Dios chinkarachiptinqa! Puchukay punchawmanta bibliapa willakusqanqa kusikunapaqmi. Ichaqa tapukuchkankipaschá: “¿Kayllapiñachu puchukay punchaw kachkan? ¿Imatam salvakunaypaq ruwanay?”, nispa. Qatiqninpiyá bibliapa ima nisqanmanta yachasun.