Cheqap cristiano kasqanchikta qawachisun

“Allin sachaqa allintam rurun, mana allin sacham ichaqa rurun mana allinllata.” (MAT. 7:17.)

1, 2. Kay tukupay tiempopi, ¿imapim mana chaynallachu cheqap cristianokunaqa pantasqa religionkunawan?

JESUSPA nisqanman hinaqa manam chaynallachu cheqap cristianokunawan pantasqa kaqkunaqa, chaymi rikukun rurasqankupi hinaspa yachachisqankupipas (Mat. 7:15-17, 20). Runakunaqa yuyayninkupi hinaspa sonqonkupi kasqanman hinam imatapas ruranku (Mat. 15:18-20). Chaymi llullata yachaqkunaqa “mana allinllata” ruranku, cheqapta yachaqkunañataq ‘allinta’ ruranku.

² Kay tukupay tiempopim chayqa aswan sutillata qawakun (leey Daniel 12:3, 10). Cristiano tukuqkunaqa manam cheqaptachu Diosmanta yachanku, yanqallam serviq tukunku, Diosta allinta reqsiqkunam ichaqa espirituwan chaynataq cheqapwan yupaychanku hinaspa Cristota qatipakunku (Juan 4:24; 2 Tim. 3:1-5). Ichaqa, ¿imatam nichwan sapakamamanta? Kay estudiopim yachasun 5 ruraykunapi cheqap cristianokuna mana paykuna hina kasqanchikta. Estudiasqanchikman hina tapukusun: “¿Diospa munasqanman hinachu kawsani hinaspa Bibliapa nisqanman hinachu yachachini? ¿Imayna kawsasqay yanapanchu allin sonqoyoq runakuna Diosmanta yachanankupaq?”, nispa.

Bibliapa nisqanman hina kawsasun

 3. ¿Imataq Jehová Diosta agradan hinaspa imaynatam cristianoqa chayta qawachin?

³ Jesusmi nirqa: ‘Manam “¡Señorlláy, Señorlláy!” nispa llapallan niwaqniykunachu Diospa munaychakusqanmanqa yaykunqa aswanqa hanaq pachapi kaq Taytaypa munasqan ruraqllam’, nispa (Mat. 7:21). Diospa agradonpaqqa kanku manam Jesuspa qatiqninmi kani niqkunachu, aswanqa rurasqankuwan chayta qawachiqkunam. Cheqap cristianoqa Bibliapa nisqanman hinam piensan: qollqemanta, llamkaymanta, kusirikuymanta, costumbrekunamanta, watan-watan imapas yuyarisqankumanta, casarakuymantawan amistadkunamantapas. Cristiano tukuqmi ichaqa kay pachapi mana allin runakuna hina piensan hinaspa ruranpas (Sal. 92:7).

4, 5. ¿Imaynatam yanapawananchik Malaquias 3:18?

⁴ Malaquiaspas qellqarqam: ‘Cuentatam qokunkichik pim allin ruraq kasqanmanta, pim mana allin ruraq kasqanmantapas, pim Dios adoraq kasqanmanta chaynataq pim mana adoraq kasqanmantapas’, nispa (Mal. 3:18). Nisqanpi yuyaymanaspa tapukusun: “¿Runapa imayna kawsasqantachu qatipakuni icha kallpanchakunichu mana chayna kanaypaq? ¿Estudiaqmasiykunata otaq llamkaqmasiykunata agradanaypaqchu imatapas rurani? Icha, ¿Diosta kasukunichu hinaspa rimanay kaptinqa willanichu Bibliapa nisqan kasukusqaymanta?”, nispa (leey 1 Pedro 3:16). Sutillam kanan runapa Dios servisqan otaq manapas.

⁵ Imayna kasqayki cambianayki kaptinqa orakuy hinaspa Dioswan amistadniki allin kananpaq kallpanchakuy Bibliata estudiaspa hinaspa huñunakuykunaman rispa. Bibliapa nisqanman hina kawsaptikiqa ‘allinta rurusqaykim’ sutilla kanqa, ejemplopaq Diospa ‘sutinmantam willanki’ (Heb. 13:15).

Diospa Gobiernonmanta willasun

6, 7. ¿Ima ruraypim cheqap cristianokunaqa mana chaynallachu kanku cristiano tukuqkunawan?

⁶ Jesusmi nirqa: “Diospa munaychakusqanmanta allin noticiataqa wakin llaqtakunapipas willakunaymi, chaypaqmi ñoqataqa kachamuwarqa”, nispa (Luc. 4:43). ¿Imanasqam Diospa Gobiernonmanta astawan willakurqa? Payqa yacharqam Diospa Gobiernonpi Rey kananta chaynataq hanaq pachaman rispanku kawsarimuqkuna yanapaptin ñakariykuna rikurichiq Satanastawan huchata chinkachinantapas (Rom. 5:12; Apo. 20:10). Chaymi qatiqninkunata kamachirqa chay Gobiernomanta tukupaykama willanankupaq (Mat. 24:14). Cristiano tukuqkunaqa chaytaqa manam rurankuchu nitaq rurayta atinmankuchu. ¿Imanasqa? Yaqa kimsa razonrayku. Puntata, manam willakuyta atinmankuchu mana entiendesqankumantaqa. Iskay, manam humildechu kanku nitaq valorchakunmankuchu willakuptinku contrankupi hatarisqankuta hinaspa burlakusqankuta aguantanankupaq (Mat. 24:9; 1 Ped. 2:23). Kimsa, Diospa espiritunmi paykunataqa mana yanapanchu (Juan 14:16, 17).

⁷ Cheqap cristianokunam ichaqa yachanku Diospa Gobiernonmantawan ima rurananmantapas. Chaymi vidankupi puntata maskanku hinaspa chuya espiritu yanapaptin enteron Pachapi willanku (Zac. 4:6). ¿Imatam nichwan sapakamamanta? ¿Sapa kutichu predicanchik? ¿Kallpanchakunchikchu astawan hinaspa allinta predicanapaq? ‘Diospa Palabranqa kawsaqmi hinaspa atiyniyoqmi’, chaynaqa ¿Pablo hinachu kallpanchakunchik Bibliata allinta servichikunapaq hinaspa uyariqninchikkunata yuyaymanachinapaq? (Heb. 4:12; Hech. 17:2, 3.)

8, 9. a) ¿Ima ejemplokunam qawachin predicaspa Biblia servichikuy ancha allin kasqanta? b) ¿Imatam rurachwan Bibliata astawan servichikunapaq?

⁸ Wasin-wasinta predicaspanmi huk cristiano leepurqa catolico runaman Daniel 2:44 nisqanta, hinaspam willarqa hawkayaytawan seguro kawsakuyta Diospa Gobiernon apamunanta. Chay runam nirqa: “Agradecekuykim Bibliamanta leepuwasqaykita, manam willayllachu-willawarqanki”, nispa. Huk cristianopas Señoranwan predicachkaspanmi Bibliata leepurqa Ortodoxa Griega religionniyoq warmiman. Paymi achka tapukuykunatam rurarqa, chaymi Bibliawan contestarqaku. Chaymantañam señoraqa nirqa: “Qamkunawanqa rimarqani Bibliayoq hamuspa chaymanta leesqaykichikraykum”, nispa.

⁹ Qellqanchikkuna ancha allin kasqanrayku runakunaman saqespanchikpas, puntataqa Bibliatam servichikunanchik. ¿Sapa kutichu servichikunki predicaspa? Manachayqa kallpanchakuy chayta ruranaykipaq. Ichapas akllaruwaq Diospa Gobiernonmantawan predicasqayki lawpi runakunapa sasachakuyninkunata imayna allichananmanta rimaq textokunata hinaspa kallpanchakuwaq predicaspa leenaykipaq.

Mana penqakuspa Diospa sutinta apasunchik

10, 11. ¿Imaynatam Jesusqa Diospa sutinta qawarqa ichaqa imaynatam cristiano tukuqkuna qawanku?

¹⁰ Jehová Diosmi nin: ‘Ñoqalla Dios kasqaymantam testigoy kankichik’, nispa (Isa. 43:12). ¿Pim puntata karqa Jehová Diospa testigon? Jesusmi. Payqa Taytanpa sutin apaytawan willakuytapas anchatam chanincharqa (leey Exodo 3:15, Juan 17:6 hinaspa Hebreos 2:12). Chaymi Biblia nin ‘Confianapaq allin Testigo’ kasqanta (Apo. 1:5; Mat. 6:9).

¹¹ Cristiano tukuqkunam ichaqa yaqa llapanku Diospa sutintaqa mana respetankuchu, tikrasqanku Bibliapipas manam churankuchu. Kunankunallam catolico sacerdotekuna kamachikuyta chaskirqaku “tawa letrallapi rikuriq Diospa sutinta (YHWH) iglesiapi huñunakuspa manaña rimanankupaq”.a ¡Chayna piensayqa manam allinchu!

12. ¿Imaynatam cheqap cristianokunaqa 1931 watapi Diospa sutinwan astawan reqsichikurqaku?

¹² Jesuspa hinaspa ‘puyu hinaña’ ñawpaq testigokunapa ejemplonta qatipakuspankum kay tiempopi cristianokunaqa Diospa sutinta mana penqakuspa servichikurqaku (Heb. 12:1). Chaymi 1931 watapi “Jehová Diospa testigonkuna” nispa sutichakurqaku (leey Isaias 43:10-12). Chaynapim Diospa sutin apaq llaqta karqaku (Hech. 15:14, 17).

13. ¿Imaynatam cumplichwan Diospa sutin apaq kasqanchikwan?

¹³ ¿Imaynatam seguro kachwan Diospa sutin apaq llaqta kasqanchikwan cumplisqanchikmanta? Puntataqa, paymanta haykapipas willakuspa. Pablom qellqarqa: “[Jehová] nispa mañakuqtam payqa salvaykunqa. ¿Imaynatamá mañakunqaku payman mana iñichkaspankuqa? ¿Imaynataqmá iñinqaku paymanta mana uyarichkaspankuqa? ¿Imaynataq uyarinqaku pipas paykunaman mana willachkaptinqa? ¿Imaynatataq willakunqaku mana pipas kachachkaptinqa?”, nispa (Rom. 10:13-15). Diosta mana allinpi qepachiq yachachikuykuna llulla kasqantam mana manchakuspa hinaspa cuidadowan qawachinanchik, ejemplopaq infiernomanta yachachikuymi kuyakuq Diosta qawachin Diablo hina ñakarichiq kasqanta (Jer. 7:31; 1 Juan 4:8; tupachiy Marcos 9:17-27).

14. ¿Imaynam tarikunku wakin runakuna Diospa sutinta yacharuspanku?

¹⁴ ¿Kusikunkichu Diospa sutin apasqaykiwan? ¿Hukkunaman willankichu? Achka wata qepatam, Franciapi huk señora yacharurqa Diospa sutinmanta Testigokuna yachachisqankuta. Testigowan tuparuspanmi nirqa Bibliapi qawachinanpaq. Salmo 83:18 (NM) nisqanta leeruspanmi admirakurqa hinaspam Biblia estudiayta qallaykurqa, kunanqa huklaw nacionpim Diosta servichkan. Chaynataq, Australia nacionniyoq catolica señorapas Bibliawan Diospa sutinta yacharuspan kusikuymanta waqarqa. Cheqapmanta yacharuspanmi achka wataña precursora kachkan. Chaymantapas, qaynallam Jamaica nacionniyoq iñiqmasinchikkuna huk señoraman Biblianpi qawachirqaku Jehová Diospa sutinta, paypas kusikuymantam waqarqa. Achka razonkunam kachkan mana penqakuspa Diospa sutinta apanapaq hinaspa Jesus hina maypipas willanapaq.

“Amayá kuyaychikchu [. . .] mana allin ruraykunataqa”

15, 16. a) ¿Imaynatam cristianokunaqa qawanchik mana allin ruraykunata? b) ¿Imakunatam sapakama tapukunanchik?

¹⁵ Bibliam nin: ‘Amayá kuyaychikchu kay pachapi mana allin ruraykunataqa nitaq [. . .] mana allin kaqkunatapas, chaykunata kuyaqqa manam kuyanchu Diostaqa’, nispa (1 Juan 2:15). Kikillanpaq munaspa mana allin ruraqkunaqa Diospa hinaspa chuya espiritupa contranpim kachkanku. Cheqap cristianokunaqa karunchakunkum kay pachapi mana allin ruraykunamantaqa, yachankum chaykunata “kuyaruspaqa Diospa enemigon” rikurirunankuta (Sant. 4:4).

¹⁶ Kay tiempopi achkallaña tentacionkuna kasqanraykum Santiagopa nisqanta kasukuyqa sasa (2 Tim. 4:10). Chaymi qatiqninkunapaq Jesus mañakurqa: ‘Mañakuykiqa manam kay pachamanta horqonaykipaqchu aswanqa Diablomanta waqaychanaykipaqmi. Ñoqaqa manam kay pachallapaqchu kani chaynataqmi paykunapas mana kay pachallapaqchu’, nispa (Juan 17:15, 16). Tapukusun: “¿Kallpanchakunichu kay pachapi kaqkunata mana kuyanaypaq? ¿Reqsiwaqniykuna yachankuchu Diospa mana munasqan fiestakunamantawan costumbrekunamanta ima piensasqayta?”, nispa (2 Cor. 6:17; 1 Ped. 4:3, 4).

17. ¿Imanasqataq allin sonqoyoq runakunaqa Jehová Dios reqsiyta munanmanku?

¹⁷ Manam llapankuchu imayna kasqanchiktaqa allinta qawanku, ichaqa allin sonqoyoqkunam chayrayku yachayta munanku. Achkam qawanku Bibliapa nisqanpi iñisqanchikman hina imatapas rurasqanchikta, chaymi yachayta munanku hanaq pachaman riqkunapa yachachisqanta. Paykunaqa yaqa kaynatam ninku: “Qamkunawan riytam munaniku, uyarirunikum Dios yanapasusqaykichikta”, nispa (Zac. 8:23).

Cheqap kuyakuyta qawachisun

18. ¿Imayna kuyakuytam Diosman hinaspa runamasinchikmanpas qawachina?

¹⁸ Jesusmi nirqa: ‘Diosnikitam kuyanki tukuy sonqoykiwan, tukuy vidaykiwan hinaspa tukuy yuyaynikiwan [. . .], kuyankitaqmi runamasikitapas kikikita hina’, nispa (Mat. 22:37, 39). Chayna kuyakuyqa (griego rimaypiqa agápe nisqam), Diospa kamachikuyninman hinaspa allin kawsakuyman hinam, kallpanchawanchikmi rurayninchikwan cumplinapaq. Chayna kaptinpas anchata sientispa cheqaptapuni sonqomanta kuyaymi (1 Ped. 1:22). Chaytam qawachinchik rimaspa chaynataq hukkunapaq allinta ruraspa (leey 1 Corintios 13:4-7).

19, 20. Ejemplokunawan willamuy kuyakuy ancha allin kasqanmanta.

¹⁹ Runapa mana ruray atinankunataqa ruranchik chuya espiritu kuyakuqta kawsachiwaptinchikmi, kuyanakunchikmi huk nacionniyoq hinaspa huk castamanta kaspanchikpas (leey Juan 13:34, 35; Gal. 5:22). Allin sonqoyoqkunaqa admirakunkum chayna kuyakuyta qawaspanku. Ejemplopaq, Israel nacionniyoq mozom huñunakuyninchikman chayllaraq rirqa hinaspam admirakurqa judiokunawan Arabia nacionniyoqkuna Diosta kuska serviptinku. Chaymi Bibliata estudiaspan huñunakuykunamanpas rirqa. ¿Chaynatachu iñiqmasinchikkunawan kuyanakunchik? ¿Kuyakuywanchu chaskiykunchik Salonman chayllaraq hamuqkunata: huk nacionniyoq, huk castamanta hinaspa apu otaq wakcha kaptinkupas?

²⁰ Cheqap cristianokunaqa lliw runatam kuyanchik. El Salvador nacionpim, sipas iñiqmasinchikwan Bibliata estudiachkarqa 87 watayoq catolica señora, ichaqa manam religionninta saqerqaraqchu. Huk punchawmi onqoruspan hospitalpi karqa. Lloqsiruptinmi iñiqmasinchikkuna killantin watukurqaku, mikunantapas manam faltachirqakuchu. Iglesianmantam ichaqa mana pipas watukurqachu chaymi taytachankunata chinkachirqa, religionninta saqerqa hinaspa kaqmanta estudiarqa. ¡Atiyniyoqmi kuyakuyqa! Ancha allinmi hayka kuti rimapayaymantapas.

21. ¿Imatam rurananchik hamuq tiempo suyasqanchik seguro kananpaq?

²¹ Jesusqa cristiano tukuqkunatam ninqaña: “Manam reqsikichikchu. ¡Qayllaymanta asuychik mana allin ruraqkuna!”, nispa (Mat. 7:23). Paykunamantaqa, allinkunata ruraspam Diosta hinaspa Churin respetasqanchikta qawachinanchik. Jesuspa kayna nisqantam yuyanchik: “Nisqaykunata uyarispan ruraqqa taqra rumipa hawanpi wasichakuq allin yachayniyoq runamanmi rikchakun” (Mat. 7:24). Chaynaqa, Jesuspa cheqap qatiqnin kasqanchikta vidanchikpi qawachiptinchikqa, Diosmi chaskiwasun hinaspapas hamuq tiempo suyasqanchikmi taqra rumipa hawanpi wasi hina seguro kanqa.

[Willakuy]

¿Yuyachkankichu?

• ¿Imapim mana chaynallachu cheqap cristianokunaqa cristiano tukuqkunawan?

• Willamuy imakunata ruraspa cheqap cristianokuna reqsichikusqankumanta.

• ¿Ima ruraypim cristianoqa astawan kallpanchakuchwan?

[13 kaq paginapi dibujo]

¿Sapa kutichu Bibliata predicacionpi servichikunchik?

[15 kaq paginapi dibujo]

¿Hukkuna yachankuchu Diospa contranpi kaq fiestakuna mana rurasqayta?