Allin angelkunaqa yanapawanchikmi

WAKIN runakunaqa ninkum: “Imapas mana rikusqayqa manam kanchu”, nispa. Ichaqa manayá chaynachu, mana rikuy atisqanchikkunapas kachkanmi. Ichaqa, ¿imakunataq kanman?...

Kayta tapusqayki. Qamqa, ¿wayrata rikuruwaqchu?... Manam ¿aw? Ichaqa, ¿imaynatataq wayra kasqanta yachawaq? Makikita pukukuykuy, ¿imatam musyanki?... Arí, wayratam. Ichaqa manam rikunchikchu ¿aw?...

Wakin yachachikuykunapim rimamurqanchik hanaq pachapi yachaqkunamanta. Wakinmi allin ruwaqkuna kanku, wakinñataq mana. ¿Pikunataq allin ruwaqkuna kanku?... Jehova Dioswan Jesusmi, hinaspa allin ruwaq angelkunam. Ichaqa, ¿kanchu mana allin angelkunapas?... Arí, paykunaqa demoniokunam. ¿Yuyachkanki imayna kasqankuta?...

Angelkunaqa hinaspa demoniokunaqa ñuqanchikmanta aswan atiyniyuqmi kanku. Jesusqa manaraq kay pachaman hamuchkaspanmi hanaq pachapi kaspan huk kaqnin angel karqa, chaymi angelkunataqa allinta riqsin. ¿Sutiyuqchu kanku?...

Arí, lucerokuna hinam angelkunapas sutiyuqkama kanku. Chaymantapas paykunaqa rimankum, chaymi biblia nin ‘angelkunapas rimayniyuq’ kasqankuta (1 Corintios 13:1). ¿Imamantaya rimanku? ¿Ñuqanchikmanta rimanmankuchu?...

Arí, rimankum. Demoniokunaqa Jehova Diosta mana kasukuspa llakichinanchikta munaspankum huchaman imayna urmachiwananchikmanta rimanku. Ichaqa, ¿imamantam Diosta kasukuq angelkunaqa rimanku?... Paykunaqa rimanku imayna yanapawananchikmantam. Ñawpaq tiempokunapipas Diosta kasukuq runakunatam yanaparqaku.

Chayna yanapasqam karqa Diosta kasukuq Danielpas. Payqa Babilonia nacionpim yacharqa. Chaypi runakunaqa mana allinkuna ruwaq kasqankuraykum Jehova Diosta pipas mañakuqta wañuchinankupaq nirqaku. Danielmi ichaqa Diostaqa hinalla mañakurqa. Hinaptinqa, ¿wañurachirqakuchu?...

Wañurachiyta munaspankum yarqaymanta kaq leonkunapa uchkunman wischuykurqaku. Hinaptinqa, ¿mikururqachu leonkuna?... Kikin Danielmi nirqa: ‘Diosniymi angelninta kachamuspan leonkunapa siminta wichqarachirqa’, nispa. ¡Manamá leonkunaqa imanarqakuchu! Chaynatam angelkunaqa Diosta kasukuq runakunata yanaparqa (Daniel 6:18-22).

Angelkunapa yanapasqantaqmi karqa Jesuspa qatiqnin Pedropas. Payqa Jesusmanta imam kaqta willakusqanraykum presochasqa karqa. Chiqniqnin runakunam carcelman churaruspanku soldadokunata nirqaku ayqikunanmanta qawanankupaq. ¿Atinmanchu karqa ayqikuyta?...

Sasam karqa iskay soldadokunapa chawpinpi cadenayuq kasqanrayku. Ichaqa bibliam nin: ‘Diospa angelnin rikuriruptinmi carcelpi cuartopas achkirirurqa. Chay angelmi Pedrota puñusqanmanta rikcharichispan nirqa: “¡Utqayman hatariy!”’, nispa.

Hinaptinmi Pedrota hapiqnin cadenakuna wichirurqa. Angelqa nirqaraqmi: ‘Pachakuspayki qatiway’, nispa. Chaymi Pedroqa soldadokunapa chawpinmanta hatarispan angelta qatirqa. Fierro punkuman chayaruptinkuñataqmi punkupas kikillanmanta kichakururqa. Soldadokunaqa manamá ima ruwaytapas atirqakuchu. Chaynatam angelqa Pedrotapas yanapaykurqa Diosmanta hinalla willakunanpaq (Hechos 12:3-11).

¿Diospa angelninkunaqa ñuqanchiktapas yanapawachwanchu?... Arí. Ichaqa, ¿tukuy imapichu yanapawachwan?... Manam. Mana allinta imatapas ruwaruspaqa kikillanchikmi ñakarisun, manam angelkunaqa yanapawasunchu. Chaywanpas wakinpiqa allinta ruwachkaspapas ñakarisunmi. Angelkunaqa manam sapa kuti imamantapas harkawananchikpaqchu kamachisqa kachkanku. Chaywanpas Diospa kamachisqantam ruwachkanku.

Paykunaqa tukuy hinastinpim runakunaman nichkanku: “Diostayá yupaychaychik”, nispa (Apocalipsis 14:6, 7). ¿Imaynata? ¿Hanaq pachamantachu qaparimuchkanku?... Manam. Diosmantaqa willakunku Jesuspa qatiqnin runakunam, ichaqa angelkunapa yanapasqanmi. Angelkunam paykunata allin sunquyuq runakunata tarinankupaq yanapachkanku. Diosmanta willakuptinchikqa ñuqanchiktapas angelkunam yanapawasun.

Ichaqa wakinpim mana allin runakuna presocharuwachwan utaq imanawachwanpas. Hinaptinqa, ¿yanapawasunchu angelkuna?... Yanapawachwanmi, ichaqa manam llapanpichu.

Chaynam karqa Jesuspa qatiqnin Pablowan. Angelkunaqa manam chayllachu yanaparqaku Roma nacionman presochasqata pusaptinkuqa. ¿Imanasqa? Runakunaman hinallaraq Diosmanta willakunanta munaspankum. Chaymi huk kaqnin angel nirqa: “Ama manchakuychu Pablo. Roma nacionta kamachiqpa ñawpaqninpim kanayki”, nispa. Angelpa nisqanman hinam Pabloqa Diosmanta willakurqa. Manamá angelkunapa qunqasqanchu karqa. Chaynam ñuqanchiktapas Diosta kasukuptinchikqa angelkuna yanapawasun (Hechos 27:23-25).

Chaymantapas angelkunaqa Diospa nisqanta kasukuspankum mana allin ruwaq runakunata ña wañuchinqakuña. Chaynapim “angelkunaqa manam kanchu” niqkunaqa yachakunqaku pantaypi kasqankuta (2 Tesalonicenses 1:6-8).

Ñuqanchikwanqa, ¿imataq kanqa?... Diosta kasukuptinchikqa angelkunam yanapawasun. Ichaqa, ¿kasukuchkanchikchu?... Kasukuspaqa allin ruwaq angelkuna hinam kasunchik, hinaspapas runakunatam yanapasunchik Diosta kasukunankupaq.