Apocalipsis qillqapi willakuykunapiyá yuyaymanasun

1, 2. ¿Imaynanpitaq Apocalipsis qillqaqa fotoman rikchakunman?

PIPAPAS fotonkunata qawachkaspanchik chaypi kasqanchikta qawaspanchikqa yuyaymananchikchá haykapi, maypi, pikunawan chay fotota hurquchikusqanchikpi.

² Apocalipsis qillqapi willakuykunaqa chay foto hinam. ¿Imaynanpi? Puntataqa: Ñuqanchikpaq qillqasqa kasqanraykum, chayraykum qallariyllanpi nin: “Tukuy kay willakuykunaqa Jesucristopa qawachisqanmi. Paymi tukuy kaykunataqa Diosmanta chaskirqa imakuna chaylla pasakunanmanta Diospa serviqninkunaman willananpaq”, nispa (Apoc. 1:1). Chaynaqa, Apocalipsis qillqapi willakuykunaqa manam llapallan runakunapaqchu, aswanqa Jehova Diosta yupaychaqkunallapaqmi. Anchatam kusikunchik chay qillqapi Diospa nisqankuna cumplikunanpaq yanapakusqanchikwanqa.

3, 4. ¿Haykapitaq Apocalipsis qillqapi willakuykunaqa cumplikunan karqa? ¿Yanapawachwanchu chay willakuykunaqa?

³ Chaymantapas, chay willakuykuna tukupay punchawkunapi cumplikusqanraykum kusikunchik. Chaymanta rimaspam apostol Juanpas nirqa: “Chuya espiritupa yanapakuyninwanmi señorpa punchawninpi rikuriruspay uyarirqani qipaypi kallpawan rimamuqta”, nispa (Apoc. 1:10). Yaqapaschá Juanqa chaytaqa qillqarqa 96 kaq watapi. Chaypaqqa ‘señorpa punchawninqa’ manaraqmi hichpamurqaraqchu (Mat. 25:14, 19; Luc. 19:12). Ichaqa bibliapi willakusqanman hinaqa chay punchawqa qallaykurqa 1914 watapim, Jesus hanaq pachapi kamachiyta qallaykuptin. Chay watamantapacham Apocalipsis qillqapi willakuykuna cumplikuyta qallaykurqa. Chaymi ninchik ñuqanchikqa ‘señorpa punchawninpiña’ kasqanchikta.

⁴ ‘Señorpa punchawninpiña’ kawsasqanchikraykum kay Apocalipsis 1:3 nisqanpi yuyaymanananchik, chaypim nin: “Mayna kusisqam kanku hamuq tiempopi imapas kananmanta willakuykunata kallpawan leeqkunaqa hinaspa uyariqkunaqa, chaynataq kaypi qillqasqa kaqkunata kasukuqkunaqa. Akllasqa tiempoqa hichpallañam kachkan”, nispa. Chaynaqa, kallpawanmi leenanchik chay willakuykunataqa, hinaspanchikmi uyarispa kasukunanchik. ¿Ima willakuykunatataq kasukunanchik?

 5. ¿Imaynatam Apocalipsis qillqapi nisqanman hinaqa Diosta yupaychananchik pay chaskiwananchikpaq?

⁵ Apocalipsis qillqapiqa qallariyllanpim willawanchik qatiqninkuna imayna kasqankuta Jesus qawamusqanta (Apoc. 1:12-16, 20; 2:1). Chayna kasqantam yachanchik Asia lawpi huñunakuq iñiqkunaman ima nisqanwan. Chaykunataqa nirqa chay tiempopi qatiqninkunata yanapananpaqmi chaynataq Jehova Diosta allinta yupaychanankupaqmi. Chay nisqankunaqa ñuqanchiktapas yanapawanchikmi. ¿Imatataq chaymanta yachachwanchik? Kamachiwaqninchik Jesucristoqa Diosta imaynata servisqanchiktam qawamuchkan. Payqa waqaychawaspanchikmi yanapawanchik, manam imamantapas usuchiwanchikchu. Yachanmi imakunata ruwaspa Diosman sunqu kananchikta. Qatiqninpim chaykunamanta astawan yachachkasun.

 6. (1) Apocalipsis 2:3, 4 nisqanman hinaqa, ¿imawantaq Efeso lawpi Jesuspa qatiqninkuna sasachakurqaku? (2) ¿Imatataq chaymanta yachachwan?

⁶ (Leey Apocalipsis 2:3, 4). Qallariypi hinayá Jehova Diosta hinalla kuyasun. Efeso lawpi qatiqninkunamanmi señorninchik Jesusqa nirqa aguantaspanku mana pisipaspa Jehova Diosta servisqankumanta, chaywanpas manañam qallariypi hinañachu Jehova Diosta kuyarqaku. Jehova Dios chaskinanpaqqa qallariypi kuyasqankuman hinam kallpanchakuspa servinanku karqa. Chaymi kunan tiempopipas ima sasachakuytapas aguantananchik Jehova Diosta kuyasqanchikrayku chaynataq kusichiyta munasqanchikrayku. Jehova Diosqa manam ruwasqallanchiktachu qawamuchkan, aswanqa imaynanpi ruwasqanchiktawanmi. Jehova Diosqa kuyakuywan chaynataq tukuy ima quykuwasqanchikmanta agradecekuspa yupaychananchiktam munan (Prov. 16:2; Mar. 12:29, 30).

 7. (1) Apocalipsis 3:1-3 nisqanman hinaqa, ¿imawantaq Sardis lawpi Jesuspa qatiqninkuna sasachakurqaku? (2) ¿Imatataq chaymanta yachachwan?

⁷ (Leey Apocalipsis 3:1-3). “Qawan-qawanllayá” kasunchik. Sardis lawpi Jesuspa qatiqninkunapas qallariypiqa tukuy sunqunkuwanmi Jehova Diosta servirqaku. Tiempopa pasasqanman hinam iñiyninkupi chiriyayta qallaykuspanku manaña allintañachu Diosta servirqaku, chaymi Jesusqa rikchan-rikchanlla kanankupaq kallpancharqa. Chaypaq kallpanchasqanqa ñuqanchikpaqwanmi. Jehova Diosqa paypaq imatapas ruwasqanchiktaqa manam qunqanchu (Heb. 6:10). Chaywanpas kallpanchakunanchikmi rikchan-rikchanlla kanapaq. Ñawpaqpi hina ima ruwaytapas mana atispanchikqa kallpanchakunanchikmi ‘señorpa llamkayninta’ hinalla ruwananchikpaq (1 Cor. 15:58; Mat. 24:13; Mar. 13:33).

 8. ¿Imatam yachachwan Laodicea lawpi qatiqninkunaman Jesuspa nisqanmanta? (Rimarimuytaq Apocalipsis 3:15-17 nisqanmantapas).

⁸ (Leey Apocalipsis 3:15-17). Jehova Diostaqa tukuy sunquwanmi kusisqallaña servinanchik. Laodicea lawpi Jesuspa qatiqninkunapas Diostaqa mana munastinmi servirqaku. Chaymi Jesusqa nirqa “qalalla”, ‘llakipayanapaq’ hina kasqankuta (Apoc. 3:19). ¿Imatam chaymanta yachachwan? Qallariypi hina Diosta manaña servispanchikqa kallpanchakunanchikmi tukuy sunqumanta Diosta servinapaq, chayta ruwaspaqa apu runa hinam kasunchik (Apoc. 3:18). Amayá Dios serviytaqa saqisunchu kay pachapi tukuy imata maskasqanchikraykuqa. Imamantapas puntataqa Jehova Diospa munaynintam ruwananchik.

 9. Pergamo lawpi chaynataq Tiatira lawpi qatiqninkunaman Jesuspa nisqanmanta, ¿imatam yachachwan?

⁹ Amayá uyarisunchu Diosta qipanchaqkunapa yachachisqankutaqa. Jesusmi piñakurqa Pergamo lawpi qatiqninkuna Diosta qipanchaqkunapa yachachisqankuta uyarisqankurayku (Apoc. 2:14-16). Chaymantapas Jesusqa Tiatira lawpi qatiqninkunatam alabaykurqa ‘satanaspa yachachisqankunata’ mana uyarisqankumanta, hinaspam kallpancharqa Diospa yachachikuyninkunapi hapipakunankupaq (Apoc. 2:24-26). Chay pantay yachachikuykunata uyariq wakin runakunaqa chay uyarisqankumantam wanakunanku karqa. Ñuqanchikpas manam uyarinanchikchu Jehova Diospa contranpi mana allin yachachikuykunataqa. Pantay yachachiqkunaqa yaqapaschá ninku: “Diostam serviniku”, nispanku. Ichaqa ruwayninkunawanqa mana chayna kasqankutam qawachinku (2 Tim. 3:5). Jehova Diosmanta bibliapi astawan yachananchikpaq kallpanchakuspanchikqa, manam sasachakusunchu chay pantay yachachikuykunamanta karunchakuytaqa (2 Tim. 3:14-17; Jud. 3, 4).

10. ¿Imatawanraqtaq yachanchik Pergamo lawpi chaynataq Tiatira lawpi qatiqninkunaman Jesuspa nisqanmanta?

¹⁰ Amayá huchapakusunchu nitaq huchapakuqkunawanqa hukllawakusunchu. Pergamo lawpi chaynataq Tiatira lawpi wakin iñiqkunaqa huchapakuqmi karqaku, chaymi Jesusqa paykunawan piñakurqa hinaspam anyarqa (Apoc. 2:14, 20). Kaymantam yachanchik pipas huchallikuruptinqa Jehova Diosqa hayka wataña payta serviptinpas utaq ima ruwayniyuqña kaptinpas chaylla corregisqanmanta (1 Sam. 15:22; 1 Ped. 2:16). Kay pachapi mana allinkuna maynaña kaptinpas, Jehova Diosqa kamachikuyninkunata kasukuspanchik kawsakunanchiktam munan (Efes. 6:11-13).

11. ¿Imakunamantam kunankama yacharamunchik? (Rimarimuytaq “Kaykunatam yacharamunchik” niqmantapas).

¹¹ ¿Imakunatam kaykama yacharamunchik? Yacharamunchikmi Jehova Diospa munasqanman hina yupaychananchikmanta. Imatapas Jehova Diospaq hina mana ruwaspaqa chayllam kallpanchakunanchik allinta ruwanapaq (Apoc. 2:5, 16; 3:3, 16). Manam chaykunallatachu Jesuspa nisqanmantaqa yachachwan. Chaykunamantayá qatiqninpi yachaykusun.

12. ¿Imatam yachachwan Esmirnaman chaynataq Filadelfiaman Jesuspa willasqanmanta? (Rimarimuytaq Apocalipsis 2:10 nisqanmantapas).

¹² Kunanñataqyá yachaykusunchik Esmirna lawpi chaynataq Filadelfia lawpi iñiqkunamanta. Jesusmi paykunata nirqa chiqnisqa kaspankupas Jehova Diosman sunqu kanankupaq. Chaynapi pagota hina wiñay kawsayta chaskinankupaq (leey Apocalipsis 2:10; 3:10). ¿Imatam chay nisqankunamanta yachachwan? Jesuspa qatiqnin kasqanchikraykum chiqnisqa kasunchik, chaymi chiqnisqa kaspapas kallpanchakunanchik takyananchikpaq (Mat. 24:9, 13; 2 Cor. 12:10).

13, 14. Apocalipsis 12 capitulonpi nisqanman hinaqa, ¿imaynam tarikunanku karqa Diospa serviqninkunaqa?

¹³ Apocalipsis qillqapim willakun tukupay punchawkunapi Diosta serviqkuna chiqnisqa kaspanku ñakarinankumanta. Apocalipsis 12 capitulopim willakun hanaq pachapi guerra karusqanmanta, chayqa karurqa Jesusta Dios kamachinanpaq churaruptinmi. Jesusmi tropankunapiwan satanaswan chaynataq demoniokunawan pelearqa (Apoc. 12:7, 8). Diospa enemigonkunaqa hanaq pachamantam wischumusqa karqaku, chaymi kunanqa satanaswan demoniokunaqa runakunata kay pachapi ñakarichichkanku (Apoc. 12:9, 12). Astawanraqmi Diosta serviqkunataqa.

¹⁴ Apocalipsis qillqapi nisqanman hinam satanasqa hanaq pachaman mana kutiyta atispan, hanaq pachapaq kaq Jesuspa qatiqninkunata tukuyta ruwaspan ñakarichichkan. Paykunaqa ‘Jesusmanta willakunankupaqmi kamachisqa karqaku’ (Apoc. 12:17; 2 Cor. 5:20; Efes. 6:19, 20). ¿Imaynatam kay Apocalipsis qillqapi willakusqanqa cumplikurqa?

15. ¿Pikunawantaq tupan Apocalipsis 11 capitulopi ‘iskay testigokunaqa’? ¿Imam pasarqa paykunawan?

¹⁵ Satanaswan demonionkunaqa Diospa ‘iskay testigonkunatam’b ñakarichinanku karqa. Paykunaqa hanaq pachapaq akllasqa Jesuspa qatiqninkunawanmi tupan (Apoc. 11:3, 7-11). 1918 watapim Diosman sunqu pusaq iñiqmasinchikkunata yanqamanta carcelpi wichqarurqaku. Chaywanqa piensarqakum Diosmanta willakusqanchikta qullurachisqankuta.

16. ¿Imam pasarqa Diospa serviqninkunawan 1919 watapi? ¿Imatam chaymantapacha satanasqa ruwachkan?

¹⁶ Apocalipsis 11 nisqanpi hinam chay ‘iskay testigokunaqa’ pisi tiempollamanta kawsarimunanku karqa, chayqa cumplikurqa 1919 wata marzo killapi carcelasqa iñiqmasinchikkunata kacharisqankuwanmi. Yanqamanta carcelasqankutapas nirqakum. Chaymantapacham satanasqa sasachakuykunawan Dios serviqkunata llumpayllataña ñakarichiwachkanchik (Apoc. 12:15). Chayraykum ñuqanchikpas Diospi hapipakuspa aguantananchik (Apoc. 13:10).

17. ¿Pikunataq Diospa runankunata wakinpi yanapawanchik?

¹⁷ Hina Apocalipsis 12 capitulopim willawanchik serviqninkunataqa Dios yanapawananchikmanta. Chaypim nichkan “manchakuypaq culebrapa aqtusqan mayuta” kay allpa pacha millpurunanmanta (Apoc. 12:16). Chayna nisqanmi kunan cumplikuchkan. Wakinpim juezkunapas Jehova Diosta serviqkunapa favorninpi tantiarqaku, chaynapi Diosmanta hawka willakunanchikpaq. Chaymi Jehova Diospa kamachiwasqanchikta ruwananchikpaq tukuy atisqanchikta ruwananchik (1 Cor. 16:9). Chaykunamantayá yachaykusun.

18. ¿Ima ruwaytam kunan tiempopi ruwachkanchik?

¹⁸ Jesusmi willakurqa Diospa piñakuynin punchaw manaraq chayamuchkaptin enteron allpa pachapi Diosmanta willakunanchikpaq (Mat. 24:14). Chay ruwaypiqa angelkunapas yanapawanchikmi. Apocalipsis qillqapim nin: “Rikurqanitaqmi hanaq pachapa chawpinta pawachkaq huk angeltapas, paymi wiñaypaq kaq sumaq willakuyta apachkasqa kay pachapi yachaqkunaman willakunanpaq”, nispa (Apoc. 14:6).

19. ¿Imamantawanmi willakunanchik kanqa Diosman sunqu kaqkunaqa?

¹⁹ Ñuqanchikqa manam allin willakuykunallamantachu willakuchkanchik, aswanqa Apocalipsis 8 capitulomanta 10 capitulokama nisqantapas willakunchikmi. Chaypim willakuchkan Diosta mana kasukuqkunaman tukuy clase ñakariykunata angelkuna apamunankumanta. Chaymi willakuchkanchik mana allin runakunata ima pasananmanta. Chay willakusqanchikmi rikchakun ninamanwan runtu paraman hinam. Kaywanmi yachanchik Diosqa mana kasukuqkunata chinkachinanmanta (Apoc. 8:7, 13). Lliwmi yachananku Diospa piñakuynin punchawqa kayllapiña kasqanta. Chaymi runakunaqa tukuy mana allinkuna ruwasqankumanta wanakunanku. Chayta ruwaspallam Diospa piñakuynin punchawpiqa mana wañunqakuchu (Sof. 2:2, 3). Chay willakuywanqa achkam piñakunku, chaymi mana manchakuspa hinalla willakunanchik. Llumpa-llumpay ñakariy punchawkunapiqa willakunanchiktaqmi kanqa mana allin runakunata ima pasananmanta. Chaywanmi astawanraq runakunaqa piñakunqaku (Apoc. 16:21).

20. ¿Imakunamantam qatiqnin yachachikuykunapi yachasunchik?

²⁰ Apocalipsis qillqapi willakuykunataqa kasukunanchikpunim (Apoc. 1:3). Chiqnisqa kaspanchikpas, ¿imaynatam chay willakuyta hinalla willakuchwan? Chaypaqqa yanapawasunchikmi Apocalipsispi willawasqanchikman hina chiqniwaqninchikkunata imakuna pasananmanta yachayninchik. Chaymantapas, yanapawasunmi Diosman sunqu kasqanchikrayku imakuna chaskinanchikmanta yachayninchikpas. Chaykunamantam qatiqnin yachachikuykunapi yachaykusunchik.