Hamuq tiempopi imayna kawsakunanchikmanta Apocalipsis qillqapi willakusqan

 1. ¿Imapaqtaq kunanmanta tantiakunanchik?

KUNANMANTAM tantiakunanchik Jehova Diosman hapipakuspa kamachikuyninkunata kasukunapaq utaq satanasman sayapakuspa paypa munayninta ruwanapaq. Jehova Diosta yupaychananchikpaq akllakuspanchikqa wiñaypaqmi kawsakusunchik (Mat. 25:31-33, 46). Jehova Diosta kasukuspanchikqa llumpa-llumpay ñakariy punchawkunapim kawsananchikpaq marcasqa kasunchik (Apoc. 7:14; Ezeq. 9:4, 6). Manchakuypaq animalpa marcanwan marcasqa kaqkunañataqmi wañunqaku (Apoc. 14:9-11).

 2. (1) ¿Imata ruwanapaqtaq Hebreos 10:35-39 kallpanchawanchik? (2) ¿Imaynatam yanapawanchik Apocalipsis qillqapi willakuykunaqa?

² (Leey Hebreos 10:35-39). Jehova Diospa gobiernonpi hapipakunanchikpaq tantiakusqanchikqa mayna allinmi. Munachkanchiktaqchá hukkunatapas yanapayta. Apocalipsis qillqapi willakuykunamanta yachasqanchikqa kallpanchawasunmi. Willawanchiktaqmi Jehova Diospa contranpi kaqkunataqa imakuna pasananmanta. Chaymantapas willawanchiktaqmi Jehova Diosta tukuy sunqunchikwan yupaychaspanchikqa imakunata chaskinanchikmantapas. Chay yachachikuykunamanta yachananchikpaq kallpanchakuyninchikqa ancha allinmi, chayqa yanapawasunmi Jehova Diosta tukuy sunqunchikwan servinanchikpaq. Chaymantapas hukkunatam yachachisun qipaman mana kutispa Diosta tukuy sunqunkuwan hinalla servinankupaq.

 3. ¿Imakunamantam yachasun?

³ Kay yachachikuypim yachasunchik kaykunamanta: ¿Imakunatam chaskisunchik Jehova Diospa gobiernonpi hapipakuqkunaqa? ¿Imataq pasanqa Apocalipsis qillqapi nisqanman hina pukay-pukay manchakuypaq animalman sayaqkunataqa?

 4. ¿Pikunatataq apostol Juanqa rikurqa Jesuswan kuska hanaq pachapi sayachkaqta?

⁴ Jesusmi apostol Juanman musquyninpi hina qawachispan willarqa Jehova Diosta yupaychaqkunaqa iskayman rakisqa kasqankuta. Hukninpim 144.000 runakunata rikurqa (Apoc. 7:4). Paykunaqa kay pachamanta akllasqam kanku Jesuswan kuska hanaq pachamanta kay pachata kamachimunankupaq (Apoc. 5:9, 10; 14:3, 4). Paykunatam apostol Juan rikurqa Jesuswan kuska Diospa qayllanpi sayachkaqta (Apoc. 14:1).

 5. ¿Imataq pasanqa hanaq pachapaq akllasqakunawan?

⁵ Chay 144.000 runakunataqa apostolkunapa tiemponmanta kunan tiempokamam Jehova Diosqa akllachkan (Luc. 12:32; Rom. 8:17). Apostol Juanqa nirqataqmi tukupay punchawkunapi paykunamanta wakiqninkuqa hinallaraq kay pachapi kawsanankumanta. Llumpa-llumpay ñakariy punchaw manaraq qallarichkaptinmi hanaq pachapaq akllasqakunaqa urkunkupi sellowan marcasqa kanqaku, chaywanqa nichkanchik Jehova Dios chaskiykusqanmantam (Apoc. 7:2, 3; 12:17). Chaymantam 144.000 hanaq pachapaq akllasqakunaqa llapankuña hanaq pachapi kanqaku. Chaymantam Jesuswan kuska kamachimunqaku (Mat. 24:31; Apoc. 5:9, 10).

6, 7. (1) ¿Pikunatawantaq Juanqa musquyninpi hina rikurqa? (2) ¿Imanasqataq Apocalipsis 7 capitulopi willakuykunamanta allinta yachananchik hanaq pachapaq utaq kay pachapaq akllasqa kaspapas?

⁶ Chaymantapas apostol Juanqa rikurqataqmi achkallay-achka runakunatapas (Apoc. 7:9, 10). ¿Pikunataq paykunaqa kanku? Apostol Juanmi nirqa: “Paykunaqa kanku llumpa-llumpay ñakariypi mana wañuqkunam hinaspa hatun pachankutapas malta carneropa yawarninwan taqsaspa yuraqyachiqkunam”, nispa (Apoc. 7:14). Paykunaqa kanku llumpa-llumpay ñakariy punchawmanta librakuspa kay pachapi wiñaypaq kawsakuqkunam (Sal. 37:9-11, 27-29; Prov. 2:21, 22; Apoc. 7:16, 17).

⁷ Hanaq pachapi utaq kay pachapi kawsakunanchikpaq akllasqa kaspanchikpas, llapanchikmi yuyaymanananchik Apocalipsis 7 capitulopi. Chaypi willakuykunaqa llapallanchiktam kallpanchawanchik Diosta hinalla servinanchikpaq. Jehova Diosta yupaychananchikpaq akllakusqanchikmantaqa manam haykaqpas ñakakusunchu. ¿Imatawanraqmi Apocalipsis qillqaqa willawanchik llumpa-llumpay ñakariy punchawmanta? (Mat. 24:21).

 8. ¿Imawanmi llumpa-llumpay ñakariy punchawkuna qallaykunqa? ¿Chay tiempopiqa imapitaq runakunaqa hapipakunqaku?

⁸ Ñawpaq yachachikuypi yachamusqanchikman hinam enteron pachapi kamachiqkuna pantay religionkunapa contranpi kanqaku (Apoc. 17:16, 17). Chaywanmi qallaykunqa llumpa-llumpay ñakariy punchawkuna. Chayna kaptinpas runakunaqa manam Jehova Diospiqa hapipakunqakuchu, aswanqa Apocalipsis 6 capitulopi willakuykunaman hinam runakunaqa politicokunapi, negociantekunapi hapipakunqaku. Chaykunatam bibliapi tupachin hatun urqukunawan. Paykunataqa Jehova Diosmi chinkachinqa paypi mana hapipakusqankurayku (Luc. 11:23; Apoc. 6:15-17).

 9. ¿Imataq pasawasun llumpa-llumpay ñakariy punchawkunapi Jehova Dios yupaychaqkunata?

⁹ Llumpa-llumpay ñakariy punchawkunapipas Jehova Diosta yupaychaqkunaqa hinallam paypa munayninta ruwanqaku. Hinaptinmi manchakuypaq animalqa chayta qawaspan llumpayta piñakunqa (Apoc. 13:14-17). Piñasqa kasqankuraykum enteron pachapi kamachiqkunaqa Jehova Diosta yupaychaqkunata ñakarichiyta qallaykunqaku. Chaytam bibliapi nin, Magogmanta Gog Jehova Dios yupaychaqkunapa contranpi kasqanmanta (Ezeq. 38:14-16).

10. ¿Imaynatam yupaychaqninkunata ñakarichiyta qallaykuptinku Jehova Diosqa libranqa Apocalipsis 19:19-21 nisqanman hinaqa?

¹⁰ Chay gobiernokuna ñakarichiwaptinchik, ¿imaynatam Jehova Diosqa yanapawasun? Paymi nin Gogpa chayamusqan punchawpi llumpa-llumpayta piñakurunanta (Ezeq. 38:18, 21-23). Diospa piñakuynin punchawpi imakuna pasananmantam Apocalipsis 19 capitulopi willawanchik. Jehova Diosmi yupaychaqninkunata salvananpaq churin Jesusta kachamunqa. Paymi Diospa contranpi sayariqkunataqa chinkachinqa. Jesusqa manam sapallanchu hamunqa, angelkunapiwanmi chaynataq 144.000 kay pachamanta akllasqakunapiwanmi (Apoc. 17:14; 19:11-15). Payqa qalaychapaqmi chinkachinqa Jehova Diospa contranpi kaqkunataqa (leey Apocalipsis 19:19-21).

11. ¿Imawantaq astawanraq kusikusunchik?

¹¹ Mayna kusisqachá tarikusunchik Jehova Diosta yupaychaqkunaqa chiqniwaqninchik runakunata qalaychapaq chinkarachiptinqa. Hanaq pachapipas maynatachá angelkuna kusikunqaku hatun Babiloniawan sutichasqa pantay religionkunata chinkachiptinkuqa (Apoc. 19:1-3). Astawanraqchá kusikuy kanqa hanaq pachapi kaqkunapaqpas kay pachapi kaqkunapaqpas malta carnero casarakuptinqa (Apoc. 19:6-9).

12. ¿Haykapitaq kanqa malta carneropa casarakusqan rikchanachiyqa? (Rimarimuytaq Apocalipsis 21:1, 2 nisqanmantapas).

¹² ¿Haykapitaq kanqa malta carneropa casarakusqan rikchanachiyqa? 144.000 akllasqakuna hanaq pachapi llapallankuña kaptinkupas chay casamientomanta rikchanachiyqa manaraqmi cumplikunqachu (leey Apocalipsis 21:1, 2). Chayqa cumplikunqa Diospa piñakuynin punchaw tukuytañam, chaynataq lliw enemigonkunata chinkarachiptinkuñam (Sal. 45:3, 4, 13-17).

13. ¿Ima ninantaq malta carneropa casarakusqanmanta rikchanachiyqa?

¹³ ¿Ima ninantaq malta carneropa casarakusqanmanta rikchanachiyqa? Imaynam warmiwan qaripas casarakuspan hukllawakunku, chaynam señor Jesuspas kay pachamanta 144.000 akllasqakunawan hukllawakunqa hanaq pachamanta kay pachata waranqa wata kamachimunankupaq (Apoc. 20:6).

14, 15. ¿Imawantaq tupachin 144.000 hanaq pachapaq kaqkunata Apocalipsis 21 capitulopi willakuy? (Qawariytaq qaranpi dibujotapas).

¹⁴ Apocalipsis 21 capitulopim 144.000 akllasqakunata tupachin ‘musuq Jerusalen’ llaqtawan (Apoc. 21:2, 9). Chay llaqtapa muyuriqninmi cimientasqa kachkan 12 rumikunawan. Chay rumikunapim malta carneropa 12 apostolninkunapa sutinku qillqasqa kachkan. Apostol Juanqa maynatachá kusikun hukkaqnin rumipi sutin qillqasqa kasqanta qawaspanqa (Apoc. 21:10-14; Efes. 2:20).

¹⁵ Chay llaqtaqa suma-sumaqmi, callenkunam qurimanta ruwasqa kachkan, punkunkunam perlaswan ruwasqa kachkan, muyuriqninpi pirqankunapas suma-sumaq llipipipiq rumikunawan ruwasqam kachkan. Sayayninpas suma-sumaq tupusqataqmi kachkan (Apoc. 21:15-21). Chay llaqtata qawaspanmi Juan nirqa: “Chay llaqtapiqa manam ima templotapas rikurqanichu, chay llaqtapa templonqariki tukuy atiyniyuq Jehova Diosmi hinaspa malta carnerom. Chay llaqtaqa manam necesitanchu intipa nitaq killapa kanchaynintapas Diospa kanchaynin achkisqanrayku hinaspa malta carnero chay llaqtapa mecheron kasqanrayku”, nispa (Apoc. 21:22, 23). Chay musuq Jerusalen llaqtaqa utaq 144.000 akllasqakunaqa Jehova Diospa qayllanpim kanqaku (Heb. 7:27; Apoc. 22:3, 4). Chayraykum Jehova Dioswan Jesusqa templowan rikchanachisqa kanku.

16. ¿Imaynam enteron pachapi kawsakusunchik Diosña kamachimuptinqa?

¹⁶ Hanaq pachapaq akllasqa kaqkunaqa anchatam kusikunku musuq Jerusalenwan rikchanachisqa kasqankurayku. Kay pachapi kawsakunapaq akllasqa kaqkunatapas chaymanta yachasqanchikqa anchatam kusichiwanchik. Paykunam waranqa wata kamachimuspanku tukuypi yanapawasunchik. Apostol Juanmi rikurqa chay llaqtamanta kawsay qukuq chuyay-chuyay yaku lluqsimuchkaqta, chaynataq chay mayupa kaylaw-waklaw patanpi kawsay qukuq sachakuna kachkaqta, chay sachakunapa rapinmi llaqtakunata sanoyachirqa (Apoc. 22:1, 2). Chaypi kawsakuq runakunaqa llapallankum yanapasqa kanqaku. Jehova Diosta kasukuqkunaqa pisi-pisimantam mana pantaqña kanqaku, chaypiqa manañam kanqañachu unquypas, nanaypas, waqaypas, llakikuypas (Apoc. 21:3-5).

17. ¿Pikunatataq yanapanqa Diospa kamachisqanqa? (Rimarimuytaq Apocalipsis 20:11-13 nisqanmantapas).

¹⁷ ¿Pikunataq chaypiqa kawsanqaku? Llumpa-llumpay ñakariy punchawmanta librasqa kaqkunam, chay sumaq huertapi naceqkunam, Apocalipsis 20 capitulopi willakusqanman hina kawsarimuqkunam (leey Apocalipsis 20:11-13). ¿Pikunataq kawsarimunqaku? Kawsarimunqakuqa Jehova Diosta kasukuchkaspa wañukuqkunam chaynataq paymanta manaraq yachachkaspa wañukuqkunam (Hech. 24:15; Juan 5:28, 29). Chaywanqa ¿nichkanchikchu wañukuqkuna llapachallanku kawsarimunankumanta? Manam. Jehova Diosmanta yachachkaspa payta mana serviqkunaqa manam kawsarimunqakuchu. Paykunaqa Jehova Diospa yachachikuyninkunata wischupakusqankuraykum chaypiqa manaña kawsanqakuñachu (Mat. 25:46; 2 Tes. 1:9; Apoc. 17:8; 20:15).

18. ¿Imayna runañataq kasunchik waranqa wata tukuytaqa?

¹⁸ Waranqa wata tukuytaqa kay pachapi kawsaqkunaqa mana pantaqñam kasunchik. Adanpa saqiwasqanchik huchawanqa manañam mayqanninchikpas sasachakusunñachu (Rom. 5:12). Waranqa wata pasaytañam kay allpa pachapi kawsakuqkunaqa wiñaypaq kawsakusunchik (Apoc. 20:5).

19. ¿Imapaqmi waranqa wata tukuytaqa kallpanchakunanchik kanqa?

¹⁹ Jehova Diosta qipanchananpaq satanas tukuywan Jesusta ñakarichiptinpas payqa Diosman sunqum karqa. Satanasqa waranqa wata tukuyta kaqmanta kacharimusqa kaspam, Jehova Diosta qipanchananchikpaq tukuywan sasachawasunchik. Ichaqa Jesus hinam sapakama Jehova Diosman hapipakunanchik kanqa (Apoc. 20:7). Hinaptinmi Jehova Diosman hapipakuqkunaqa wiñaypaq kawsakusunchik, mana pantaqñataqmi kasunchikpas (Rom. 8:21). Satanasman sayapakuqkunaqa pay hinam chaynataq demoniokuna hinam wiñaypaq wañuchisqa kanqaku (Apoc. 20:8-10).

20. ¿Imaynam tarikunchik Apocalipsis qillqapi willakuykunamanta yachasqanchikwan?

²⁰ ¿Imaynam tarikunchik Apocalipsis qillqapi willakuykunamanta yachasqanchikwan? ¿Munachkanchikchu suma-sumaq pachapiña kawsakuyta? ¿Munachkanchikchu Jehova Diosta yupaychanankupaq hukkunamanpas kay willakuykunamanta willayta? (Apoc. 22:17). Kay yachachikuykunamanta yachasqanchikwanqa apostol Juan hinachá nisun: “¡Amen! Hamuy, señor Jesus”, nispa (Apoc. 22:20).