¿Cheqaptachu Diosmanta kanman allin noticiakuna?

Allpa pachapi wiñaypaq kawsanamanta sumaq willakuyqa Bibliapim tarikun (Salmo 37:29). Bibliapi 66 librokunata qellqanankupaqmi Diosqa akllarqa payman sonqo yaqa 40 runakunata. Kimsa waranqa pichqa pachak wata ñawpaqtaraqmi Bibliapi punta kaq pichqa librokunata Moises qellqarqa, tukupaynin librotañataqmi waranqa isqon pachak wata qepataña apostol Juan qellqarqa. ¿Pipa piensasqankunataq Bibliapi willakuykunaqa? Diosmi chuya espirituntakama Palabranta qellqanankupaq runakunata valekurqa (2 Samuel 23:2). Paykunaqa Diospa piensasqankunatam qellqarqaku, manam kikinkupa piensasqankutachu. Chaymi Bibliapi willakuykunaqa Jehová Diospa piensasqankuna. Leey 2 Timoteo 3:​16; 2 Pedro 1:​20, 21.

Qaway “¿Pipa yuyaychasqantaq bibliaqa?” niq videota.

Diospa Palabran kasqanraykum. Chayna kasqanmantaqa manam iskayrayanchikchu, imamantapas willakusqanqa cumplikunpunim, runam ichaqa mana yachanchu hamuq tiempopi imam pasananta (Josuey 23:14). Tukuy atiyniyoq Diosllam chaytaqa willawachwan. Leey Isaias 42:​9; 46:​10.

Bibliaqa Diospa Palabran kasqanraykum yachanchik mana wakin librokuna hina kasqanta. Pachaknintin rimaykunapim Bibliataqa aypukun wara-waranqa millonninpi. Ñawpa tiempomantaraq kaspanpas yachaysapa runakunapa estudiasqankuwanmi tupan. Qellqaqninkuna yaqa 40 kaspapas llapanpim tupaqllata willakunku.a Chaymantapas sapa paginankunapim reparanchik Diosqa kuyakuq kasqanta chaynataq runapa vidantapas cambiay atisqanta. Chaymi millonnintin runakuna mana iskayrayankuchu Bibliaqa Diospa Palabran kasqanmanta. Leey 1 Tesalonicenses 2:13.

Qaway “¿Imanasqataq mana iskayrayachwanchu bibliapa willakuyninmanta?” niq videota.

Bibliaqa willawanchikmi runakunapaq Diospa munayninmanta. Willawanchiktaqmi sumaq huertapi kawsanankupaq favorecesqa kasqankuta imayna chinkachisqankumanta chaynataq Allpa pacha hamuq tiempopi imayna huertayananmantapas. Leey Apocalipsis 21:​4, 5.

Bibliapiqa kachkantaqmi kamachikuykuna, yachachikuykuna chaynataq consejonkunapas. Willawanchiktaqmi Diosqa runakunawan imayna kasqanta, chaynapim yachanchik imayna kasqanta. Chaymanta yachanapaqmi Bibliaqa astawan yanapawanchik. Yachachiwanchiktaqmi Diospa amistadnin kanapaq imam rurananchiktapas. Leey Salmo 19:​7, 11; Santiago 2:​23; 4:8.

“Bibliapa nisqanta” allinta entiendechinanpaqmi Jesusqa textokunamanta rimaspan allinta explicarqa. Kay folletopas chaynatam yachachichkan Bibliapa yachachikuyninkunata allinta entiendenapaq. Leey Lucas 24:​27, 45.

Munachkankichá Diosmantawan munayninmanta yachaytaqa. Wakin runakunaqa manam yachayta munankuchu, hukkunaqa piñakunkuraqmi chaykunamanta rimapayaptinchikqa. Biblia estudiaynikitaqa amayá piwanpas harkachikuychu. Diosmanta yachaqkunalla wiñaypaq kawsanankumantam Bibliaqa nin. Leey Juan 17:3.