¿Atiwaqchu rikchan-rikchanlla kayta?

1, 2. (1) ¿Imatam Jesusqa willakurqa tukupay tiempomanta? (2) ¿Imatam kay yachachikuypi qawasunchik?

JESUSQA Pedrowan, Andreswan, Santiagowan hinaspa Juanwanmi Olivos muqupi tiyachkarqaku, chaymantam Jerusalenpi temploqa rikukurqa. Chaypim Jesus willakurqa kamachiyta qallaykuptin tukupay tiempopi imakunapas pasakunanmanta. Jesusqa nirqam chay tukupay tiempopi “allin yuyayniyuq confianza sirviente” kananmanta, paykunam Jesuspa rantinpi kay pachapi kananku karqa. Paykunam tiempollanpi mikuchichkaq hina llapanchikta iñiyninchikpi yanapawananchik karqa (Mat. 24:45-47).

² Chaymantañataqmi Jesusqa willakurqa chunka doncellakunamanta (leey Mateo 25:1-13). Kay yachachikuypim yachasunchik kay tapukuykunamanta: ¿Imatam Jesusqa yachachiyta munachkarqa kay willakuywan? ¿Imaynatam Diosman sunqu hanaq pachapaq iñiqmasinchikkunaqa kasukusqankuta qawachirqaku hinaspa imapim chay ruwasqanku tukunqa? ¿Imaynatam kay willakuy ñuqanchiktapas yanapawachwan?

 3. (1) ¿Imaynatam qillqanchikkunaqa chunka doncellakunamanta ñawpaqta yachachirqa? (2) ¿Imam pasakunman imakunawan tupasqanpi llumpayta piensaptinchikqa?

³ Pasaq yachachikuypim qawarqanchik, allin yuyayniyuq sirvienteqa Bibliapa willakuyninkunamanta manaña ñawpaqta hina yachachisqanmanta. Ñawpaqtaqa Bibliapa willakuyninkuna imakunawan tupasqanmantam astawan yachachirqa. Kunanmi ichaqa yachachin sapa willakuykuna ima yachachiwasqanchikmanta. Rimarisun chunka doncellakunamanta willakuyta. Ñawpaqtam qillqanchikkuna astawan yachachirqa chay willakuypi mecherokuna, aceite hinaspa aysakuchakuna imakunawan tupasqanmanta. Ichaqa imakunawan tupasqanpi llumpayta piensaspaqa manam yachasunchu imapi yanapawasqanchikta. Chaymi kay yachachikuypi astawan qawasunchik imapi yanapawasqanchikmanta.

 4. (1) ¿Pitaq novioqa hinaspa imaynatam chayta yachanchik? (2) ¿Pikunataq doncellakunaqa hinaspa imaynatam chayta yachanchik?

⁴ Imata Jesus yachachiy munasqanmanta yachanapaqqa, puntatam yachananchik chay willakuypi pikuna kasqanmanta. Chaypi novioqa Jesusmi. ¿Imaynatam chayta yachanchik? Huk kutipim Jesusqa noviowan tupachikurqa (Luc. 5:34, 35). Doncellakunañataqmi hanaq pachaman rinankupaq suyakuyniyuq iñiqmasinchikkuna. ¿Imaynatam chayta yachanchik? Chay willakuypa nisqanman hinaqa chay doncellakunam mecheronkuta ratachispanku noviota suyananku karqa. Jesuspas hanaq pachapaq iñiqmasinchikkunatam nirqa: “Listollayá kaychik mecheroykichiktapas ratachispa. Casamientomanta patronninku kutimunanta suyaq runakuna hinayá qamkunapas kaychik”, nispa (Luc. 12:32, 35, 36). Apostol Pablowan Juanpas hanaq pachapaq iñiqmasinchikkunatam tupachirqa doncellakunawan (2 Cor. 11:2; Apoc. 14:4). Kaykunam qawachiwanchik chunka doncellakunamanta willakuypa yachachisqanqa hanaq pachapaq iñiqmasinchikkunapaq kasqanta.

 5. (1) ¿Haykapim chunka doncellakunamanta willakuyqa cumplikunqa? (2) ¿Imaynatam chayta yachanchik?

⁵ ¿Haykapim chunka doncellakunamanta willakuyqa cumplikun? Tukupay tiempopim. ¿Imaynatam chayta yachanchik? Willakuypa tukuyninpim Jesusqa nirqa novio ‘chayamusqanmanta’ (Mat. 25:10). 2013 watapa 15 julio killanpi Willakuq qillqapim yacharqanchik Mateo 24 hinaspa 25 capitulonpi willakuymanta, chaypim riman pusaq kutikama Jesuspa hamunanmanta utaq kutimunanmanta. Yacharqanchiktaqmi llumpa-llumpay ñakariy punchawkunapa tukupayninpi Jesus chayamunanmanta, chaynapi juzgananpaq hinaspa mana allin runakunata chinkachinanpaq. Chaymi entiendenchik chunka doncellakunamanta willakuyqa tukupay tiempopi cumplikusqanta, ichaqa Jesusmi llumpa-llumpay ñakariy punchawkunapi hamunqa.

 6. ¿Imatam Jesusqa yachachiyta munarqa chunka doncellakunamanta willakuywan?

⁶ ¿Imatam Jesusqa yachachiyta munarqa kay willakuywan? Mateo 24 capitulopim Jesusqa ‘allin yuyayniyuq confianza sirvientemanta’ utaq aslla hanaq pachapaq iñiqmasinchikkunamanta rimarqa, paykunam tukupay tiempopi iñiqmasinchikkunata yanapananku karqa. Chay aslla iñiqmasinchikkunatam Jesusqa nirqa Diosman sunqu kanankupaq. Jesusqa chay chunka doncellakunamanta willakuywanmi yachachirqa tukupay tiempopi kawsaq llapallan hanaq pachapaq iñiqmasinchikkuna rikchan-rikchanlla kanankupaq, mana chayqa suyakuyninkutam chinkarachinmanku (Mat. 25:13). ¿Imaynatam hanaq pachapaq iñiqmasinchikkuna chayta kasukunku? Qawasun.

7, 8. (1) ¿Imanasqam allin yuyayniyuq doncellakunaqa listolla karqaku? (2) ¿Imaynatam hanaq pachapaq iñiqmasinchikkunaqa listolla kachkanku?

⁷ Chunka doncellakunamanta Jesus willakuspanmi nirqa pichqa doncellakuna ‘allin yuyayniyuq’ kasqankuta. ¿Imanasqa? Novio chayamuptin listolla hinaspa rikchan-rikchanlla kasqankuraykum. Llapallan doncellakunam mecheronkuta ratachispanku novio chayamunankama suyananku karqa. Allin yuyayniyuq doncellakunallam aysakuchankupi achka aceiteta aparqaku mecheronkupi aceite tukuruptin yapanankupaq, chaywanmi listolla kasqankuta qawachirqaku, mana umayuq pichqa doncellakunam ichaqa mana chaynatachu ruwarqaku. ¿Ima nichwantaq hanaq pachapaq iñiqmasinchikkunamanta? ¿Listollachu suyachkanku Jesuspa chayamunanta?

⁸ Hanaq pachapaq iñiqmasinchikkunaqa listolla kaspankum Jehova Diospa kamachisqanta ruwachkanku. ¿Imaynatam chayta ruwachkanku? Paykunaqa yachankum Jehova Diosta servinankupaqqa kapuqllankuwan kawsanankuta, chaytaqa kusisqam ruwanku. Chaymantapas, tanteakurunkum Diosman sunqu kanankupaq Diospa piñakuynin haykapiña chayamunan kaptinpas, chaytaqa ruwanku Jehova Diostawan Jesusta kuyasqankuraykum. Chaymantapas manam tukuy imayuq kaytaqa munapayankuchu nitaq huchapakunkuchu Diosta mana serviq runakuna hinaqa. Hanaq pachapaq iñiqmasinchikkunaqa allin yuyayniyuq doncellakuna hinam listolla kachkanku. Arí, mana amispam hanaq pachapaq iñiqmasinchikkunaqa Jesusta suyachkanku unamuq hina kaptinpas (Filip. 2:15).

 9. (1) ¿Imatam Jesus nirqa kay tiempopi hanaq pachapaq iñiqmasinchikkunata? (2) ¿Imatam ruwarqaku hanaq pachapaq iñiqmasinchikkunaqa “Novioqa hamuchkanñam” niqta uyarispanku? (Qaway willakuyta.)

⁹ Allin yuyayniyuq doncellakunaqa listolla kasqankutam qawachirqaku rikchan-rikchanlla kasqankuwan. Ichaqa Jesusmi nirqa: “Novio manaña chayamuptinmi llapallanta puñuy aysaykuptin puñururqaku”, nispa. ¿Imatam Jesusqa kaywan yachachiyta munarqa? Pipas rikchan-rikchanlla kayta munachkaspanpas puñuywanmi aysarachikunman, huk rimaypiqa Jesuspa chayamunanta suyasqankupim iñiyninkupipas hukmanyarunmanku. Chaymi hanaq pachapaq iñiqmasinchikkunaqa anchata kallpanchakurqaku rikchan-rikchanlla kanankupaq. ¿Imaynatam chayta ruwarqaku? Yuyarisun Jesuspa willakusqanpi chunka doncellakunamanta, paykunam uyarirqaku: “Novioqa hamuchkanñam”, niqta. Ichaqa allin yuyayniyuq doncellakunallam rikchan-rikchanllaqa karqaku (Mat. 25:5, 6; 26:41). Yaqa paykuna hinam, hanaq pachapaq iñiqmasinchikkunapas rikchan-rikchanlla kachkanku hinaspapas tukuy imakuna qawasqankuwanmi musyakurunku Jesusqa chayamunanpaq hichpallapiña kasqanta. a Kunanñataq rimarisun chay willakuypa tukuyninpi ima pasakusqanmanta.

10. ¿Imatam piensachwan allin yuyayniyuq doncellakuna mana yanapay munasqankumanta?

¹⁰ Chunka doncellakunamanta willakuypa tukuyninpim willakun, mana umayuq doncellakuna allin yuyayniyuq doncellakunata mecheronkupaq aceiteta mañakusqankumanta. Ichaqa paykunam mana quyta munarqakuchu (leey Mateo 25:8, 9). Yaqachusmi kaywanqa nichkan manaraq Jesus hamuchkaptin utaq llumpa-llumpay punchawkuna tukuchkaptin imapas pasakunanmanta. Ichaqa yaqapaschá tapukunchik: “¿Imaynamá hanaq pachapaq iñiqmasinchikkunaqa mana pitapas yanapaytaqa munanqakuchu?”, nispa. Kayta entiendenapaqqa, yuyarinanchikmi chay pasakuptinqa hanaq pachapaq iñiqmasinchikkunaqa wiñaypaq sellasqaña kasqankumanta.

11. (1) ¿Imataq pasakunqa llumpa-llumpay ñakariy punchawkuna qallaykunanpaq kachkaptin? (2) ¿Ima niytam munachkarqaku allin yuyayniyuq doncellakunaqa aceiteta rantimunankupaq nisqankuwanqa?

¹¹ Llumpa-llumpay ñakariy punchawkuna qallaykunanpaq kachkaptinmi, kay pachapiraq Diosman sunqu llapallan hanaq pachapaq iñiqmasinchikkunaqa wiñaypaq sellasqa kanqaku (Apoc. 7:1-4). Kaywanqa niytam munachkan hanaq pachaman rinankupaq Jehova Diospa chaskisqanña kasqankumanta. Ichaqa ¿imam pasanqa paykuna mana rikchan-rikchanlla kaptinkuqa hinaspa manaraq llumpa-llumpay ñakariy punchawkuna chayamuchkaptin Diosta qipancharuptinkuqa? Manam sellasqachu kanqaku utaq manam hanaq pachamanqa rinqakuchu. Llumpa-llumpay ñakariy punchawkuna qallaykuptinqa hinaspa pantay religionkuna chinkachisqa kasqanta qawaspankum, paykunaqa manaña ima ruwaytapas atinqakuchu. ¿Imanasqa? Chaypim musyakunqaku Jesus chayamuptin mana listolla kasqankumanta. ¿Imataq pasanqa chayraq yanapakuyta mañakuptinkuqa? Chayta yachanapaqqa qawasun chunka doncellakunamanta willakuyta. Allin yuyayniyuq doncellakunaqa manam qunkuchu aceitenkutaqa, aswanmi ninku rantiq rinankupaq. Ichaqa chawpi tutapiña kasqankuraykum manaña pipas rantikunchu. Kaywanqa niyta munachkarqaku manaña imatapas chay hora ruway atinankumantam.

12. (1) Diosta qipanchaq hanaq pachapaq iñiqmasinchikkunata, ¿imataq pasanqa llumpa-llumpay ñakariy punchawkunapi? (2) ¿Imatam Jesusqa ninqa mana umayuq doncellakuna hina kaqkunataqa?

¹² Llumpa-llumpay ñakariy punchawkunapiqa, ¿imataq pasanqa Diosta qipanchaq hanaq pachapaq iñiqmasinchikkunataqa? Hanaq pachapaq iñiqmasinchikkunaqa manañam paykunataqa yanapayta atinqakuñachu. Diosta qipancharuqkunaqa manañamá ima ruwaytapas atinqakuñachu. Hinaptinqa, mana umayuq doncellakuna hinam tarikunqaku, paykuna aceite rantiq pasakuptinkum “novio chayaramurqa chaymi listo kaq doncellakuna paywan yaykururqaku casamientoman hinaptinmi punku wichqakururqa”. Jesusqa llumpa-llumpay ñakariy punchawkunapa tukuyninpim Diosman sunqu hanaq pachapaq iñiqmasinchikkunawan hanaq pachapi huñunakunqa (Mat. 24:31; 25:10; Juan 14:1-3; 1 Tes. 4:17). Diosta qipanchaqkunatam ichaqa mana chaskinqachu. Paykunaqa yaqapaschá mana umayuq doncellakuna hina ninqaku: “¡Señor, señor, kichaykamuwayku!”, nispanku. Ichaqa Jesusmi Diosta qipanchaq wakin runakunata hina ninqa: ‘Qamkunataqa manapunim riqsikichikchu’, nispa (Mat. 7:21-23; 25:11, 12).

13. (1) ¿Nichkarqachu Jesusqa hanaq pachapaq achka iñiqmasinchikkuna Diosta qipanchanankumanta? (2) ¿Imanasqam nichwan kay willakuywan hanaq pachapaq iñiqmasinchikkunamanta Jesus mana iskayrayasqanmanta? (Qaway 9 kaq paginapi dibujota.)

¹³ ¿Nichkarqachu Jesusqa hanaq pachapaq achka iñiqmasinchikkuna Diosta qipanchanankumanta hinaspa paykunapa rantinpi hukkunataña akllananmanta? Manamá. Imanasqa mana chayna kasqanta entiendenapaq yuyarisun Mateo qillqapa 24 capitulonta. Chaypim willakun allin yuyayniyuq sirvientemanta, Jesusqa manamá chaypiqa nichkarqachu mana allin sirvientepi rikurirunanmantaqa. Aswanmi yuyarichichkarqa mana chayna kananpaq. Yaqa chaynam pasakun chunka doncellakunamanta willakuywanpas. Jesusqa hanaq pachapaq iñiqmasinchikkunatam yuyarichichkarqa mana chayna kanankupaq. Imaynam pichqa doncellakuna allin yuyayniyuq karqaku, pichqañataq mana chaynachu karqaku. Chaynam hanaq pachapaq iñiqmasinchikkunapas Diosman sunqu kanankupaq utaq manapas sapakama tanteakunanku. Pablopas yaqa chaynatam yuyarichirqa hanaq pachapaq iñiqmasinkunataqa (leey Hebreos 6:4-9; tupachiy Deuteronomio 30:19). Pablo chaynata yuyarichispanpas, manam iskayrayarqachu Diosman sunqu kanankumantaqa. Hanaq pachapaq kaqkunata Jesus chunka doncellakunamanta willakuywan yuyarichisqanqa, qawachinmi paykunamanta mana iskayrayasqanmanta. Yachanmi Diosman sunqu kanankumanta hinaspa hanaq pachaman rinankumantapas.

14. ¿Imayanatam ‘sapaq ovejakunapas’ yanapachikunmanku chunka doncellakunamanta Jesuspa willakusqanwanqa?

¹⁴ Chunka doncellakunamanta Jesuspa willakusqanqa rikchan-rikchanlla kanapaqmi yachachiwanchik. Kay willakuy hanaq pachapaq iñiqmasinchikkunapaq kaptinpas, sapaq ovejakunapas yanapachikunmankum (Juan 10:16). ¿Imanasqa? Jesusmi nirqa: “Qamkunaman willasqaytaqa llapallanmanmi nini, chaynaqa listollayá suyawaychik”, nispa (Mar. 13:37). Jesusqa munanmi llapallan Diosta serviqkuna listolla hinaspa rikchan-rikchanlla kananchikta. Lliwmi qatipakuyta atichwan hanaq pachapaq iñiqmasinchikkunata hinaspa Diosmanta willakuyta imamantapas puntapi churayta. Yuyarisunchik, mana umayuq doncellakunam allin yuyayniyuq doncellakunamanta aceiteta mañakurqaku, ichaqa paykunaqa manam qurqakuchu. ¿Imatam kayqa yachachiwanchik? Manam suyananchikchu ñuqanchikpa rantinchikpi hukkuna Diosman sunqu, listolla utaq rikchan-rikchanlla kanankutaqa. Chay ruwaytaqa ñuqallanchikmi atichwan. Pisi tiempollamantañam Jesusqa llapanchikta juzgawasunchik, chaypim sapakama cuentata qusunchik. Chaymi listolla kananchikpaq kallpanchakunanchik.

15. ¿Imanasqam kusisqa tarikunchik Jesuspa casarakuyninpi piensaspanchik?

¹⁵ Jesuspa willakusqan casarakuypi piensaspam llapallanchik kusisqa tarikunchik. Diospa piñakuynin punchaw qipatam, hanaq pachapaq iñiqmasinchikkunaqa Jesucristopa novian hina kanqaku (Apoc. 19:7-9). Kay pachapi suyakuyniyuq iñiqmasinchikkunapas yanapachikunqakum. ¿Imanasqa? Chay casamiento kasqanraykum Jesuspa kamachikuynin ukupi kawsanqaku. Chaymi hanaq pachapaq utaq kay pachapaq suyakuyninchik kaptinpas, listolla hinaspa rikchan-rikchanlla kananchikpaq kallpanchakunanchik. Chaynata ruwaspanchikqa Jehova Diospa prometewasqanchik sumaq suyakuytam chaskisunchik.